Say Panaanap Da na Suston Relihyon

NANLAPULAD inkaugaw et aanapen la na arum a totoo so makapenek iran ebat ed tepetepet da nipaakar ed bilay. Sanen walad kalangweran ni, nayarin inmatendi ira ed relihyoso iran serbisyo. Balet aromog na dakel ed sikara ya anggan saray ebat a niiter nisay ritual na simbaan so ag-akatulong ed sikara pian natalonaan iray problema ed bilay.

Nayarin bibidbiren da ni a kabiangan nira na relihyon na atateng da, anggaman mataltalag iran onatendi ed saray relihyoson serbisyo. Unong ed sakey ya obispo na Church of England, say samet a pananisian atilak ed sikara so andian na tanton epekto ed bilay da. Ibabaliwala da so relihyon da. Say arum met, lapud nasyosyodotan ed naiimano ran pansimpisimpitan ed relihyoso iran olupan, et sigpot ya angipulisay ed relihyon. Balet ta nansiansia niray tepet da nipaakar ed bilay.

No Akin a say Arum so Walaay Baleg a Panduaruwa

Amta na maslak a totoo a dakel ya iglesia so walaan na saray ahensya pian ontulong ed saray andiay-ayaman, mangibunog na tagano ed saray mankaukolan, odino pian mangisponsor na saray panselebran nipaakar ed kultora. Balet ngalngali inagew-agew a nababalitaan da met so nipaakar ed karawalan tan panagpaagos na dala lapud relihyon ya aliwa lambengat ed limog na saray aliwan-Kristiano noag ontan met ed limog na saramay mankuan a Kristiano. Kasin satan so manurpresa ed sikatayo no panduaruwaan da iray grupon nalalanor ed ontan a karawalan et mangaagamil na suston relihyon?

Dakel a pinabaleg a walaay relihyon so manisia a saray abung-amponan ya inisponsoran na saray simbaan so maabig a bengatla. Anggaman ontan, diad agano niran taon, sikaray akebbiew a saray pari ed nanduruman pasen so naakusaan na seksual a panangabuso ed ugugaw a pinaasikaso ed sikara. Diad ununa et isipen na totoo a pigpigara lambengat a pari so nepeg a tetelen. Natan et arum ed sikara so manumameng no kasin walay aliwa ed iglesia a mismo.

Say arum, a singa si Eugenia, so datin maseet ed relihyon da. Bilang sakey a tobonbalo ed Argentina, sikatoy kabiangan na saramay nanggawa na saray panbaroy pian dayewen so Birhen ed Itati̇́. Nanayam ed kombento bilang sakey a madre ed loob na 14 a taon. Kayari to et pinmaway pian magmaliw a kabiangan na sakey ya internasyonal a grupon relihyoso tan pulitiko a mangitatandoro ed maganat, baleg a pananguman ed sosyal tan ekonomikon inkasangal na sosyedad diad panamegley na rebolusyon. Bilang resulta na naimano tan asagmak to, naandiay pananisia tan talek ed Dios. Agton talaga aanapen so relihyon a napanisiaan to. Say labay to et sakey a paraan a mangitarok na inkahustisya ed saray duka​—on, tan sakey a kaaron napanmatalkan to.

Naiimano na arum so nagagawa ed saray iglesia a sengegay iyaarawi ra ed saraya. Sakey ya ateista a saray sisiaen to et nipalapag nen 1991 ed magasin ya Sputnik so prangkaan ya angikuan: “Anggapoy nanengneng kon antokaman ya importantin pandumaan na saray atributo ed baetan na pagano tan say Kristianon mitolohya.” Bilang sakey ya alimbawa, dineskribe to so sakey ed saray lansangan na Moscow, a diman et kalkalnan aalsaen na saray pari ya akasulong na andukey ya aysing a walaay bordan-balitok so sakey a lungon a walaay inimbalsamon bangkay. Saman so bangkay na “sakey ya Ortudoks na Kristianon santo” ya iyaalis ed sakey a simbaan a nanlapud sakey a museo, tan angipanonot itan ed managsulat na saray pari tan saray bangkay ed kadaanan ya Ehipto. Anonotan to met, a, bangta saramay mibibiang ed prosesyon ed Moscow so manisia ed “Kristianon Trinidad,” saray taga Ehipto so nandayew met ed sakey a trinidad a dirios​—di Osiris, Isis, tan si Horus.

Satan met lanlamang a managsulat so anukoy ed Kristianon ideya nipaakar ed aro​—“Say Dios so aro,” tan “aroen moy kaabay”—​a singano anggapoy pidumaan ed paganon Ehipto. Balet naimano to: “Say inaagin aro so agtinmalona ed mundo, anggan samay partin tatawagen a mismon Kristianon mundo.” Tan tinumbokan to itan na saray komento nipaakar ed mauges iran bunga lapud pangipipilit na iglesia a mibabali ed saray kurang na Estado. Say anengneng to so ag-amakiwas ed sikaton liknaen a say aanapen to et itatarok na saray iglesia na Kakristianoan

Diad pidumaan, aromog na arum so makapenek iran ebat balet aliwan diad saray iglesia na Kakristianoan.

Naaralan To so Katuaan Nipaakar ed Inaatey

Si Magdalena, a manedad la natan na 37 a taon, so manaayam ed Bulgaria. Kapatey na katulangan ton laki nen 1991, mairap a tuloy so linawa to. Inulit-ulit ton tinepetan so inkasikato, ‘Iner kasi lalaen na saray inatey? Iner kasi so kawalaan na katulangan kon laki?’ Sikatoy linma’d simbaan, tan nandasal ed arap na sakey ya imahen ed abung, balet anggapoy naawat to iran ebat.

Insan sakey ya agew, sakey a kaabay so nantilepono pian sikatoy imbitaan ed ayaman to. Sakey a malangwer a laki ya iyaaralan na saray Tasi nen Jehova so binmisita ed sayan kaabay. Tinmalineng legan ya isasalaysay na malangwer a laki so nipaakar ed Panarian na Dios tan gagala To a gawaen so dalin a sakey a paraiso a ditan et makapanbilay na ando lan ando ed liket so totoo. Diad tapew na lamisaan et wadman so libron Makapanbilay Kayo na Ando lan Ando ed Paraiso diad Dalin. Diad panguusar ed saya, impaimano na kalangweran a laki ed sikato so teksto ed Biblia ed Eclesiastes 9:5, a kuanto: “Balet saray inaatey agda amta so bengatla.” Diad saman a labi et sikatoy nambasa na nagkalalo ni. Naamtaan to a saray inatey so ag-oonla ed sananey a bilay diad tawen odino diad impierno; anggapo lay pakaamta ra, a singano maitlep a naugip. Sigagayaga ton inawat so imbitasyon ya onatendi ed miting na lokal a kongregasyon na saray Tasi nen Jehova. Kayari na miting sikato so akipaknan regular a paiyaralan na Biblia. Lapud naimatonan to ed miting so paraan na panagpikasi ed si Jehova, sikato met so ginmapon nampikasi ed si Jehova pian sikatoy tulongan a natalonaan so sakey a kaleteyan a nigalet ed sikato. Sanen say pikakasi to so naebatan, amoria ton aromog to so suston relihyon.

Aromog Da so Bilay a Walaay Kabaliksan

Si André so binmaleg ed sakey ya ayaman a saradon Katoliko ed Belgium tan nagmaliw a sakristan na pari ed lugar da. Anggaman ontan, diad saman a panaon, naimano toray bengatlan aneral ed respeto to para’d simbaan. Bilang nansumpalan, sikato so Katoliko ed ngaran lambengat.

Sikatoy propesyonal a managgalaw na soccer ed loob na 15 a taon. Aminsan sanen say team to so nanggalaw ed sakey a tournament ed Italya, sikaray naimbitaan a minengnengan ed papa. Anggapo so bengatlan makapabiskeg ed espiritualidad ed saman ya inbisita, tan say minumundon kayamanan ed kaliber-liber na papa so angonigon ed si André. Lalon naaruman so panduaruwa to ed simbaan. Agmaliket so dilin bilay to lapud duaran danay ya insaew ed panamaley. Say kipapasen na mundo so anismaya ed sikato. Nen 1989 insulat to ed diary to: ‘Anto so kabaliksan na amin a kaambagelan a nagagawa ed kaliber-liber tayo?’ Agto aromog iray ebat ed relihyon to.

Nen 1990, sanen si André so mantatrabaho bilang coach na soccer ed Iceland, sikatoy akapitongtongan nen Iiris, sakey a misionera na Tastasi nen Jehova. Inawat to so literatura tan inimbitaan so misionera ya ompawil. Sikato so pinmawil a kaiba so asawa to, si Kjell. Sanen diad kaunoran et akayurong la ra tan akatongtong si André, mapatnag a sikato so interesadon tuloy a talosan so Biblia. Interesado met so asawa to a si Ásta. Diad kakkaktangay agew, sikatoy awalaan na taloran oras sakbay a mantrabaho bilang coach, tan deniside ran usaren itan a panaon a manaral na Biblia. “Siak so narepreskoan ed panaral na Biblia nen say diad panpainawa,” inkuanto. Kalkalnan naebatan na Biblia iray tepet da. Kalkalnan tinmubo so pananisia ra ed si Jehova tan say Panarian to. Saray maglorian sipan na Biblia a sakey a mareen a balon mundo​—mundon bulos manlapud “amin a kaambagelan a nagagawa ed kaliber-liber tayo,” so tinmua ed sikara. Si André tan si Ásta so manginanabang la natan na balon aromog dan pananisia ed arum.

Si Magdalena, André, tan si Ásta, so matalek a diad kaunoran et aromog da so suston relihyon. Kayari impanalin resolbien iray problema na mundo diad mapulitika iran paraan, diad kaunoran et aromog met nen Eugenia ed limog na Tastasi nen Jehova so relihyon ya ompatnag ed sikaton susto. Balet anton talaga so manedetermina pian naamtaan no kasin say relihyon et susto? Ipangasin nengnengen so ontumbok ya artikulo.

[Litrato ed pahina 7]

Say regular a panagaral na Biblia a kaiba iray Tasi nen Jehova so makakatulong ed masulok a limaran milyon a totoo ed panaanap da na makapenek iran ebat