Kasin Aromog Mo La so Suston Relihyon?

“Say relihion a malinew tan andi tilol ed arap na Dios tayo tan Ama sikato ya.”​—SANTIAGO 1:27.

1, 2. (a) Diad isip na dakel a totoo, anto so manitermina no kasin say relihyon da so susto? (b) Anto so nepeg a seryoson kunsideraen diad panhusga ed relihyon?

SIKATAYO’Y manbibilay ed panaon a dakel a totoo so kontenton mangiter ed relihyon na samet lambengat a kabiangan na bilay da. Nayarin sikaray onaatendi ed pigaran relihyoson serbisyo, balet ta dagdaiset so maparanay a manggagawa na ontan. Maslak a totoo so agmanisia ya amin niran relihyon so aliwa tan say relihyon da lambengat so susto. Nayarin liknaen dan say relihyon da so susto para’d sikara.

² Nisesengeg ed saya, kasin say tepet a, Kasin aromog mo la so suston relihyon? et simplin mankabaliksan na, Kasin aromog mo la so relihyon a labay mo? Anto so manitermina ed labay mo? Kasin say pamilyam? Kasin saray kalimog mo? Kasin say dilin liknaan mo? Panon kaseryoso so impangunsideram ed panmoria na Dios ed satan a pamaakaran?

Panon Tayon Naamtaan so Panmoria na Dios?

3. (a) No labay tayon naamtaan so punto-de-bista na Dios, anto so nepeg a niwala ed sikatayo? (b) Antoran tepet so nepeg tayon itepet nipaakar ed no akin a personal tayon sisiaen a say Biblia et nanlapud Dios?

³ No labay tayon amtaen so kanonotan na Dios a mismo, kaukolan sirin a wala so sakey a panangiparungtal a manlapud sikato. Say Biblia so sankadaanan a libro a mangibabagan impuyan na Dios. (2 Timoteo 3:16, 17) Balet kasin talagan nibaga a sayan libro, a midumaan ed amin et karga to so mensahe na Dios para’d amin a too? Panon mon ebatan itan a tepet, tan akin? Kasin lapud saray ateng mo so walaan na onman a panmoria? Kasin satan so lapud awawey na saray kalimog mo? Kasin nausisam la a mismo so ebidensya? Akin ya agmo itan gawaen natan, diad pangusar ed apatiran nantutumbokan ya ebidensya?

4. No nipaakar ed inkawala na saya, anto so mangipapanengneng a say Biblia so nanlapud Dios, imbes na antokaman ya arum a libro?

⁴ Nayarin naala: Say mensahe a talagan nanlapud Dios tan para’d interon atooan a pamilya so kaukolan a nayarin naala ra. Kasin tua itan ed Biblia? Kunsideraen pa iya: Say Biblia, ed intero man odino ed kabiangan, so nipalapag la natan ed masulok a 2,000 a lenguahe. Unong ed American Bible Society, kalabas na ngalngali samploran taon saray lenguahen akaimpritaan na Biblia so nanggawan niwala ed 98 porsiento na populasyon na mundo. Unong a nipanengneng ed Guinness Book of World Records, malinew a say Biblia so “sankalaknaban a nibunog a libro.” Onia so nailaloan tayo ed mensahen nanlapud Dios a nigana ed totoo na amin a rasa tan nasyon tan pansasalita. (Ipareng so Apocalipsis 14:6.) Anggapo la so arum nin libro ed mundo a walaan na rekord a singa satan.

5. Akin ya importanti so katuaan na awaran nipaakar ed Biblia?

⁵ Inkamaawaran: Say maalwar a panangusisa ed saray salaysay na Biblia so mangipaparungtal ni na sakey a paraan a pakapangibiigan a say Biblia so duma manlapud arum niran libro a mangibabagan masanto. Lugan na Biblia iray maawaran a katuaan, aliwan saray agnapaneknekan a tongtong basilyo. Onia so insulat nen Irwin Linton, a bilang sakey ya abogado et asanay a manganalisa no anto so nakaukolan bilang prueba ed korte na ganggan: “Manwarin seseguroen na saray estorya, tongtong basilyo tan palson pantasi a saray ebenton isasalaysay so agawa ed agkabkabat iran pasen tan agpihon panaon, . . . say salaysay ed Biblia so mangiiter ed sikatayo na eksakton petsa tan pasen na saray bengatlan idadalatdat. (Singa bilang, nengnengen so 1 Arari 14:25; Isaias 36:1; Lucas 3:1, 2.) Para’d totoon onnenengneng ed relihyon aliwan pian makaarawi ed kapetegan noagta ed katuaan, saya so importantin kunsideraen.

6. (a) Panon a talagan tutulongan na Biblia so sakey a too ed saray problema ed bilay? (b) Diad antoran taloran paraan a tutulongan na Biblia so sakey a too a talonaan so ansakit iran kapetegan?

⁶ Inkapraktikal: Saramay seryoson mangusisa ed Biblia so agmanbayag et makamoria a saray ganggan tan prinsipyos to so ag-adisenyon manlames ed sikara. Imbes, saraya so mangidadatak na paraan na kabibilay a mangitatarok na gungguna ed saramay maapit ya ontumbok ed saratan. (Isaias 48:17, 18) Say ligliwa ya itatarok na saya ed saramay nagogonigon so aliwan ataptapew, a nibased saray andi-kakanaan a pilosopya. Imbes, ontutulong itan ed totoo a manalona ed saray ansakit a kapetegan ed bilay. Panon? Diad taloran paraan: (1) diad pangiter na maabig a simbawa no panon so pideneng ed saray kairapan, (2) diad pangisalaysay no panon ya awaten so maaron suportan iiter na Dios ed ariripen to natan, tan (3) diad pangiparungtal ed makapakelaw ya arapen ya igagana na Dios para’d saramay manlilingkor, mangiiter na maabig iran rason ed sikara pian panmatalekan iray sipan to.

7. (a) Usaren iray teksto a nisita ed paimanod-leksab, isalaysay so ebat na Biblia ed sakey ed manuna iran isyu a panpapagaan na totoo natan. (b) Ipanengneng no panon a say simbawa na Biblia so sakey a proteksyon ed sikatayo tan ontutulong ed sikatayon talonaan so sakey a mairap a kipapasen.

⁷ Anggaman say simbawa na Biblia so naynay ya agpopular ed saramay mangipupulisay na pakauley tan mangegemtan na bilay na dilin-panliketan, amoria na dakel a say ontan a bilay so agmangitatarok ed sikara na tuan liket. (Galacia 6:7, 8) Iiter na Biblia so diretsan ebaebat ed saray tepet nipaakar ed aborsyon, diborsyo, tan homoseksualidad. Say simbawa to so salimbeng sumpad panangabuso ed druga tan alak tan sumpad pansakit na AIDS diad panamegley na naalisan a dala odino seksual a kagletan. Ipapanengneng na saya ed sikatayo no panon a nawalaan na maliket iran pamilya. Mangiiter iya na saray ebat ya ontulong ed sakey a toon talonaan so makapagonigon a tuloy iran kipapasen ed bilay, pati say panangipulisay na sankaapitan a membro na pamilya, graben sakit, tan ipatey na sakey ya inadaro. Saya so ontutulong ed sikatayon makatebek no antoray nepeg ya iyuna pian say bilay tayo so magmaliw a makabaliksan imbes a magmaliw a desperado.a

8, 9. (a) Anton propesiya so personal ya anagyat ed sika bilang prueba na inkapuyanan na Biblia? (b) Anto so papaneknekan na saray propesiya na Biblia no nipaakar ed panlalapuan da?

⁸ Propesiya: Say Biblia so nikadkaduma bilang sakey a libro na propesiya, libron mangibabaga no anto so nagawa ed arapen, tan satan so gagawaen ed detalyadon paraan. Impasakbay to so kadederal na kadaanan a Tiro, say inkagba na Babilonia, say panangipaalagey-lamet ed Jerusalem, say inlesa tan insaew na arari na Medo-Persia tan Gresya, tan dakel niran agawgawa ed bilay nen Jesu-Kristo. Impasakbay to met a detalyado iray kipapasen ed mundo a nagagawa ed sayan siglo, tan isasalaysay to’y kabaliksan na saraya. Ipapanengneng to no panon a saray problema a manatalona ed saray manuley et naresolbi, tan ipapakabat to so Manuley a mangitarok ed maandon deen tan tuan kaligenan ed sankatooan.b​—Isaias 9:6, 7; 11:1-5, 9; 53:4-6.

⁹ Makatantanda, ipaparungtal na Biblia so abilidad ya ipasakbay so arapen tekep na inka-susto bilang subok ed inka-Dios. (Isaias 41:1–46:13) Sakey a makapanggawa ed satan odino makapanpuyan ed arum a manggawa na ontan so aliwan basta andiay bilay ya idolo. Sikato so aliwan sakey lambengat a toon relihyoso. Sikato so tuan Dios, tan say libron mankarga na ontan a propesiya et say Salita to.​—1 Tesalonica 2:13.

Kasin Amin a Manguusar na Biblia so Susto?

10, 11. Singa impanengneng nen Jesus, anggaman uusaren na sakey a klerigo so Biblia, anto so nayarin manggawa ya andi-kana so itatandoro ton relihyon?

¹⁰ No ontan, kasin makatunongan​—nagkalalon importanti et Makasulatan ta—​ya ibagan amin a relihyoson grupo a mankuan a manguusar na Bilbia so mangibabangat na tuan relihyon? Kasin amin a mangaawit odino mangaaon ed Biblia so mangaagamil na suston relihyon?

¹¹ Dakel ed saray klero, anggaman walaan ira na Biblia, so manguusar ed relihyon a bilang paraan pian idalangirang da so inkasikara. Lalaokan daray puron katuaan na saray abangonan tan saray pilosopiya na too. Kasin makapaliket ed Dios so panagdayew da? Diad saray relihyoson pangulo nen inmunan-siglo ed Jerusalem a manggagawa na ontan, matukoy so impangiyaplika nen Jesu-Kristo ed imbaga na Dios diad panamegley nen Isaias, a mankuan: “Sayan baley igalang to ak ed saray bibil da; say puso ra balet arawi’d siak. Balet maapa so panangigalang da’d siak, ya ibangat dan singa matuan kakabatan da so bilibilin na saray totoo.” (Mateo 15:8, 9; 23:5-10) Malinew, a say ontan a nengneng na relihyon et aliwan tuan relihyon.

12, 13. (a) Panon a say kondukta na saray membro na sakey ya iglesia so ontutulong ed sakey a toon manitermina no say relihyon da et susto? (b) Panon so panmoria na Dios ed panagdayew tayo no say pilien tayoran kalimog et saramay ipupulisay to? (2 Awaran 19:2)

¹² Anto no mauges iray bungan pawalaen na saray bangat na arum a relihyon, a singa nanengneng ed bilay na saray membron walaan na maong a talindeg? Diad Sermon to ed Palandey, impasakbay nen Jesus: “Manaluar kayo ed saray aliwa’n tua’n profetas, . . . Napatnagan yo ra lapu’d saray bunga ra. . . . Amin a maong ya kiew mangiter na maong a bunga; sa balet so aderal a kiew mangiter na aliwan maong a bunga.” (Mateo 7:15-17) Tua a saray totoo so makagawa na mauges tan nakaukolan a nakorihe. Balet say kipapasen so duma sano saray membro na iglesia, anggan say klero, so mangaagamil na pilalawanan tan pikakaluguran, pibabakal, panagbuanges, inkaagum, panagtila, espiritismo, pandayew ed saray idolo​—dinanman odino amin na sarayan bengatla—​balet agnadidisiplina, tan saramay mantutultuloy ed onian kurang so ag-eekalen manlapud kongregasyon. Malinlinew ya ibabaga na Biblia a saramay mangaagamil na saratan a bengatla so nepeg ya ekalen manlapud kongregasyon; anggapoy betang da ed Panarian na Dios. (Galacia 5:19-21) Say panagdayew da so agmakapaliket ed Dios, nisay say panagdayew tayo so makapaliket ed Dios no say pilien tayon kalimog et saramay ipupulisay to.​—1 Corinto 5:11-13; 6:9, 10; Apocalipsis 21:8.

¹³ Malinew ya aliwan amin a grupon mangibabaga ya uusaren da so Biblia so mangaagamil na tuan relihyon a dedeskribien to. Anto sirin so ipapanengneng na Biblia a bilang pakabidbiran iran tanda na tuan relihyon?

Saray Pakabidbiran a Tanda na Tuan Relihyon

14. (a) Diad anto so kibabasiyan na amin a bangat na tuan relihyon? (b) Panon inkamatalona so onian panagsuri ed saray bangat na Kakristianoan nipaakar ed Dios tan kamarerwa?

¹⁴ Saray bangat to so mapekder a nibase ed apuyanan a Kasulatan. “Amin a Sulat ya inpuyan na Dios sikato met so maabig a pakaaralan, pakasumalan, pakasimbawaan, tan pakapanontonan a sikato so wala ed katunongan.” (2 Timoteo 3:16) Balet iner so pangibabagaan na Masanton Biblia nipaakar ed Trinidad na Kakristianoan? Tan iner ta ibabangat na Biblia, a singa gagawaen na klero, a saray totoo et walaan na kamarerwa a mantultuloy a manbilay kapatey na pisikal a laman? Kinerew mo ta ed sakey a klerigo ya ipanengneng ed sika ed Bibliam iratan a bangat? Onia so kuan na The New Encyclopœdia Britannica: “Say salitan Trinidad nisay pihon doktrina to so agnanengneng ed Balon Sipan.” (1992, Micropœdia, Tomo 11, pahina 928) Tan bibidbiren na New Catholic Encyclopedia: “Diad limog na saray Apostolikon Pari, anggapoy anggan melmelanting a kapara na ontan a pananisia.” (1967, Tomo XIV, pahina 299) No nipaakar met ed ideya na Kakristianoan a say kamarerwa so onsian manlapud laman ed ipapatey, aaksobien na saray iskolar na iglesia a binayes da itan ya ideya manlapud Griegon pilosopiya. Anggaman ontan, ag-ibabaliwala na tuan relihyon so katuaan na Biblia lapud pilosopiya na too.​—Genesis 2:7; Deuteronomio 6:4; Ezequiel 18:4; Juan 14:28.

15. (a) Panon ya ipapabidbir na Biblia so Sakey a nepeg lambengat a dayewen? (b) Anto so nalilikna na tua iran managdayew no nipaakar ed iyaasingger ed si Jehova?

¹⁵ Itatandoro na tuan relihyon so panagdayew ed alenleneg a tuan Dios, si Jehova. (Deuteronomio 4:35; Juan 17:3) Diad pangisalaysay ed Deuteronomio 5:9, mapekder ya imbaga nen Jesu-Kristo: “Igalang mo naani so Dios a Katawan [Jehova, NW] mo, tan sikato labat so panlinkoran mo.” (Mateo 4:10) Mitunosan ed satan, impakabat nen Jesus so ngaran na Ama to ed saray babangatan to. (Juan 17:26) Imbangat ka ta na relihyon mo a dayewen si Jehova? Nakakabatan mo ta so Persona ya awalaan na ontan a ngaran​—saray gagala to, saray kimey to, saray kalidad to—​a diad ontan et naliknam so pakaasingger ed sikaton walaay talek? No wala ka’d tuan relihyon, say ebat et on.​—Lucas 10:22; 1 Juan 5:14.

16. Para’d saray aktibon mangaagamil na tuan relihyon, anto so kabaliksan na pananisia ed Kristo?

¹⁶ Say sakey ya importantin kabiangan na panagdayew a makapaliket ed Dios et say pananisia ed Anak to, si Jesu-Kristo. (Juan 3:36; Gawa 4:12) Agkabaliksan na saya so basta panisia a sikatoy nambilay odino sikatoy matalonggaring a persona. Lalaktipen to so apresasyon ed ibabangat na Biblia nipaakar ed kablian na bagat na ayadyarin bilay nen Jesus bilang too tan say pamidbir ed kipapasen to natan bilang mangatatawen ya Ari. (Salmo 2:6-8; Juan 3:16; Apocalipsis 12:10) No sika so mililimog ed saramay mangaagamil na tuan relihyon, kabat mo a diad inagew-agew a bilay et masimoon dan panggugunaetan a tuloken si Jesus, ya aligen so alimbawa to, tan personal a mibiang tan maseseg ed kimey ya impabtang to ed saray babangatan to. (Mateo 28:19, 20; Juan 15:14; 1 Pedro 2:21) No satan so aliwan tua ed saramay kaibam a managdayew, kaukolan mon anapen ed arum.

17. Akin a maalwar iray tuan managdayew a mansiansian andi-mantsa ed mundo, tan anto so sasaglawien na satan?

¹⁷ Say tuan panagdayew so agnatilolan na pibabali ed pulitika tan minumundo iran gutgutan. (Santiago 1:27) Akin ya andi? Lapud inkuan nen Jesus nipaakar ed saray patumbok to: “Ag ira taga mundo, salanti onong ya ag ak taga mundo.” (Juan 17:16) Ag-akibabali si Jesus ed pulitika, tan binaat toray patumbok to ed pangusar na saray ayura. (Mateo 26:52) Saramay mangipapuso ed ibabaga na Salita na Dios so ‘agla manaral na bakal ed angan kapigan.’ (Isaias 2:2-4) No sika so nituring a sakey a membro na antokaman a relihyon ya agmitukoyan ed onman a deskripsyon, panaon la pian itundam so pilimog ed satan.​—Santiago 4:4; Apocalipsis 18:4, 5.

18. (a) Anto so ipapaamta na Juan 13:35 bilang sakey ya matalonggaring a walna na tuan relihyon? (b) Panon mon natulongan so siopaman pian nadetermina no dinan a grupo so mitunosan ed Juan 13:35?

¹⁸ Ibabangat tan aagamilen na tuan relihyon so agsinisiblet ya aro. (Juan 13:35; 1 Juan 3:10-12) Say ontan ya aro so aglabat isasalita ed saray sermon. Satan so talagan mamapakasakey ed puron impanaagi na totoo ed amin a rasa, amin a nengneng na panagbilay, amin a lenguahe, amin a nasyon. (Apocalipsis 7:9, 10) Satan so mangibibiig ed tuan Kristianos manlapud mundon kulaan da. No agmo ni nagagawaan itan, onatendi ka ed saray miting diad Kingdom Hall na saray Tasi nen Jehova, ontan met ed babaleg iran kumbension da. Imatonan mo ira legan a mankakasakey iran mankikimey a mangipaalagey na sakey ed saray Kingdom Hall da. Imanom no panon dan ipapasen iray maedad la (pati saray balo) tan saray kalangweran (pati saramay saksakey so ateng da odino ulila lan sigpot). (Santiago 1:27) Ipareng mo so naimatonan mo diman ed naimanom ed arum a relihyon. Insan tepetan mo so inkasika, ‘Siopa ta so mangaagamil na tuan relihyon?’

19. (a) Anton solusyon ed saray problema na sankatooan so itatandoro na tuan relihyon? (b) Anto so nepeg a gawaen na saray membro na grupon ontutumbok ed tuan relihyon?

¹⁹ Itatandoro na tuan relihyon so Panarian na Dios bilang say maandon solusyon na saray problema na sankatooan. (Daniel 2:44; 7:13, 14; 2 Pedro 3:13; Apocalipsis 21:4, 5) Kasin gagawaen itan na antokaman iran iglesia na Kakristianoan? Kapigan so unor ya impakadngel mo ya insalaysay na klerigo so nipaakar ed Panarian na Dios tan say ibabaga na Kasulatan a nagawaan na saya? Papasesegen ka ta na organisasyon a kawalaan mo ya itongtong ed arum so nipaakar ed Panarian na Dios, tan no on, kasin amin a membro so walaay betang ed pibiang ed saya? Ginawa nen Jesus itan a panagtasi; ontan met so ginawa na asasakbay iran babangatan to. Sika met so walaan na pribilihyon makapibiang ed sayan kimey. Satan so sankaimportantian a kimey a nagagawa natan ed dalin.​—Mateo 24:14.

20. Kayarin naamtaan so tuan relihyon, anto so nepeg tayon gawaen?

²⁰ Anggaman walaray nilibon relihyon, tutulongan itayon tampol na Biblia a mangekal ed pakawetwetan ta pian naamtaan so tua. Balet nagkalalo so kaukolan nen say pangamta lambengat ed saya. Importanti so pangagamil ed satan. Malalaknab a kunsideran, ed ontumbok ya artikulo, no antoy lalanoren to.

[Saray paimano ed leksab]

Panon Yon Ebatan?

◻ Diad pangamta na suston relihyon, siopan punto-de-bista so sankaimportantian?

◻ Anton apatiran datak na ebidensya so manutukoy a say Biblia et Salita na Dios?

◻ Akin ya aliwan amin a relihyon a manguusar na Biblia so abobonan na Dios?

◻ Antoray anemiran pakabidbiran a tanda na sakey a tuan relihyon?

[Kahon ed pahina 10]

Saray Tasi nen Jehova so . . .

◆ Mangibabase na amin a bangat da ed Biblia.

◆ Mandadayew ed saksakey a tuan Dios, si Jehova.

◆ Manbibilay unong ed say pananisia ra ed si Jesu-Kristo.

◆ Agmibibiang ed pulitika tan minumundo iran gutgutan.

◆ Manggugunaet ya ipatnag so agsinisiblet a panangaro ed inagew-agew a kabibilay.

◆ Mangitatandoro ed Panarian na Dios bilang say magnayon a solusyon ed saray problema na katooan.

[Litrato ed pahina 9]

SAY BIBLIA​—anto so mangipapanengneng a lugan to so mensahe na Dios para’d amin a too?