Walay Responsabilidad ed Pakaamta na Suston Relihyon
“Lalo’n mapalar so saray ondengel ed salita na Dios, tan sikato’y onoren da.”—LUCAS 11:28.
1. Bektan naamtaan da so suston relihyon, anton nengneng na totoo so akasentroay bilay da ed satan?
AGMAGENAP so pangamta lambengat na suston relihyon. No sikatayo so manangaro na susto tan tua, bektan naromog tayo itan, magmaliw la itan a sentro na kabibilay tayo. Say tuan relihyon so aliwa lambengat a pilosopiya ed mental; satan so dalan na panagbilay.—Salmo 119:105; Isaias 2:3; ipareng so Gawa 9:2.
2, 3. (a) Panon ya indanet nen Jesus so kaimportantian na panggawa ed linawa na Dios? (b) Anton responsabilidad so nipasakbat ed balang sakey ya akaamta ed suston relihyon?
2 Indanet nen Jesu-Kristo so kaimportantian na panggawa na say imparungtal na Dios a linawa To. Diad impanampot na bantog a Sermon ed Palandey, impaamta nen Jesus ya aliwan amin ya ontatawag ed sikato na Katawan (mankuan a Kristianos) so makaloob ed Panarian; saraman lambengat so manggagawa na linawa na Ama to. Say arum, inkuanto, so nipulisay bilang “managgawa na kaugsan.” Akin a kaugsan? Lapud unong ya ibabaga na Biblia, say agpanggawa na linawa na Dios so kasalanan, tan amin a kasalanan so kaugsan. (Mateo 7:21-23; 1 Juan 3:4; ipareng so Roma 10:2, 3.) Nayarin amta na sakey so suston relihyon, nayarin kokomendaan toramay manbabangat ed satan, tan nayarin galgalangen toramay mangaagamil ed satan, balet sikato met so walaan na responsabilidad ya iyaplika itan ed dilin bilay to. (Santiago 4:17) No awaten to itan a responsabilidad, naromog to a say bilay to so napayaman, tan naeksperiensia to so gayaga ya agnagamoran ed arum a paraan.
3 Diad akaunan artikulo, kinunsidera tayoray anemiran pakabidbiran a tanda na tuan relihyon. Balang sakey ed saratan so aglambengat ontutulong ed sikatayon mangamta ed suston relihyon noagta personal a mangipaparungtal met ed sikatayo na saray angat tan pankanawnawa. Panon?
Panon so Ikikiwas Mo ed Salita na Dios?
4. (a) Legan a saray balo ni so onggapon milimog ed saray Tasi nen Jehova, agmanbayag et anto so naimano ra nipaakar ed panangusar na saray Tasi ed Biblia? (b) Panon a makaapekta ed saray aripen nen Jehova so daakan ya espiritual a tagano?
4 Legan ya iyaaral na Tastasi nen Jehova so Biblia ed saray balon interesado, dakel ed sarayan balo ni so akatebek a tampol a say ibabangat et nanlapud Biblia. Diad pangebat ed saray tepet da, sikaray agnipapaarap ed saray bangat na iglesia, ed saray abangonan na too, odino ed saray opinyon na prominentin totoo. Say dilin Salita na Dios so autoridad. Sano sikaray oonla ed Kingdom Hall, naiimatonan da met diman a say Biblia so manunan libron-panaralan. Agmanbayag et namoria na saray masimoon a manaanap na katuaan a say manunan sengegan na gayaga a nanengneng da ed limog na saray Tasi nen Jehova et say katuaan a sikaray natataganon maong ed espiritual a manlalapud Salita na Dios.—Isaias 65:13, 14.
5. (a) Anton angat so ipapaarap ed saramay mangiimano ed Tastasi nen Jehova? (b) Panon dan makapinabang ed gayaga na Tastasi?
5 No bidbiren mo iya, panon so ikiwas mo ed satan? No natalosan mo so kabaliksan na saya, agnayarin sika lambengat so magmaliw ya ag-onkiwakiwas a manangimaton, nisay labay mo so magmaliw ya ontan. Ipapanengneng na Biblia a saramay “dumerengel labat” balet aliwan “mananumpal” et ‘titilaan da so inkasikaran dili [na palson panagkatunongan, NW].’ (Santiago 1:22) Titilaan da so inkasikara lapud agda namoria ya antokaman ya ibaga ra, say isaew dan panumbok ed Dios so mangipapanengneng ya agda talagan aaroen. Say pangibaga na sakey a walaan na pananisia ya agmet tetekepan na saray gawa so inatey a pananisia. (Santiago 2:18-26; 1 Juan 5:3) Midumaan, say sakey a pakikiwasen na aro ed si Jehova a magmaliw a ‘mananumpal ed gawa’ so magmaliw a “mapalar naani ed gawa to.” On, unong ya insalaysay nen Jesu-Kristo, “Lalo’n mapalar so saray ondengel ed salita na Dios, tan sikato’y onoren da.”—Santiago 1:25; Lucas 11:28; Juan 13:17.
6. No talagan aapresyaen tayo so Salita na Dios, antoran pankanawnawa so personal a panggunaetan tayon anamoten?
6 Satan a gayaga so ombaleg legan na ibubulaslas na pikakabat mo ed linawa na Dios tan iyaaplika so nagkalalon bengatlan naaralan mo. Kaunongan a sagpot so isesekar mo pian aralen so Salita na Dios? Nilibon agmarunong a manbasa so nanggunaet a makaaral a manbasa, a gagawaen iya nagkalautla ta pian sikaray makapanbasa na Kasulatan tan ibangat iraya ed arum a totoo. Say arum so masakbay ya ombabangon a kinabuasan ta pian makapangusar ira na daiset a panaon ed kada agew ed panbasa na Biblia tan saray katulongan ed panaral na Biblia, a singa Say Panag-Bantayan. Legan a personal mon babasaen so Biblia odino nenengnengen iray nisitan kasulatan ed aaralen a materyal, imanoen a maong iray ganggan tan pananontonan nen Jehova, tan panggunaetan a tebeken so dakel a prinsipyo a wadtan para’d panangiwanwan tayo. Dalepdepen so ipaparungtal na kada parte nipaakar ed Dios, ed gagala to, tan saray impideneng to ed sankatooan. Abuloya’y panaon pian moldien na saya so pusom. Kunsideraen no walaray paraan pian sigpot a niyaplikam ed bilay mo so simbawa na Biblia.—Salmo 1:1, 2; 19:7-11; 1 Tesalonica 4:1.
Kumpleto Ta so Debosyon Mo ed si Jehova?
7. (a) Panon a makakaimpluensya so doktrinan Trinidad ed panggunaet na toon dayewen so Dios? (b) Anto so nayarin nagawa sano naaralan na sakey a too so katuaan nipaakar ed si Jehova?
7 Para’d minilyon a totoo, nagmaliw a ligliwa a naamtaan a say tuan Dios so aliwan sakey a Trinidad. Sikaray agbalot apenek ed salaysay a satan et “sakey a misteryo.” Panon iran makaasingger ed Dios ya agda natalosan? Bilang nansumpalan na satan a bangat, ginagala ran mangibaliwa ed Ama (ya agdan balot nadngelan so ngaran to ed simbaan da) tan dayewen si Jesus bilang Dios odino ipaarap so panagdayew da ed si Maria (a nibangat ed sikara bilang “Ina na Dios”). Balet say puso ra so sililiket a kinmiwas sanen sakey ed saray Tasi nen Jehova so angilukas na Biblia tan angipanengneng ed sikara na personal a ngaran na Dios, Jehova. (Salmo 83:18) Sakey a biin taga Venezuela so ontanlan aliketan sanen nipanengneng ed sikato so madibinon ngaran ya alakap to so sakey a malangwer a biin Tasi ya angipanabang ed sikato na satan a mablin katuaan, tan inmabuloy a paiyaralan na Biblia ed ayaman. Sano naamtaan na saratan a totoo a sinalita nen Jesus so Ama to a bilang “Dios ko tan Dios yo” tan tinukoy nen Jesus so ama to a “saksakey a tua’n Dios,” namomoria ran say ibabangat na Biblia nipaakar ed Dios so agmairap a talosan. (Juan 17:3; 20:17) Legan a naamtaan da so kalidades nen Jehova, napapaapit ira ed sikato, gapoan da so manpikasi ed sikato, tan panpilalekan dan paliketen. Anto so resulta?
8. (a) Lapud panangaro ra ed si Jehova tan ed pankaliktan dan pamaliket ed sikato, anto so ginawa na minilyon a totoo? (b) Akin ya importantin tuloy so Kristianon bautismo?
8 Legan na apalabas a samploran taon, 2,528,524 a totoo ed anemiran kontinenti tan ed nilasus ya isla so angidedika na bilay da ed si Jehova tan insan insimbolo ra iyan dedikasyon diad bautismo ed danum. Sakey ka ta ed sikara, odino kasin manpaparaan ka la para’d bautismo? Say bautismo so importantin kundang ed bilay na balang tuan Kristiano. Inganggan nen Jesus iray patumbok to a manggawa na saray babangatan ed amin a nasyon tan bautismoan ira. (Mateo 28:19, 20) Makatantanda met a kayarin tuloy na dilin bautismo nen Jesus, si Jehova a mismo so nansalita manlapud tawen, a kuanto: “Sika so Ana’ko ya inadaro, dia ed sika napaliketak a maong.”—Lucas 3:21, 22.
9. Pian napansiansia so sakey a naabobonan a relasyon ed si Jehova, anto so nakakaukolan ed biang tayo?
9 Say naabobonan a relasyon ed si Jehova so bengatlan pablien. No walaan ka na ontan a siglaotan diad panamegley na dedikasyon tan bautismo, arawian so antokaman a makaderal ed satan. Ag-abuloyan a nipasen itan ya onkomadua lapud saray panaburidoan ed bilay tan kapagaan ed materyal a bengabengatla. (1 Timoteo 6:8-12) Talagan makapanbilay ka a mitunosan ed simbawa na Uliran 3:6: “Dia ed saray amin a dalan mo sikato so bidbiren mo [Jehova], et sikato itonton to so saray basbas mo.”
Kaunongan Kaaralem so Epekto ed Sika na Aro ed Kristo?
10. Akin a say panagdayew tayo ed si Jehova so aliwan sengegan pian ibaliwala tayo si Jesus?
10 Siempre, say manepeg ya apresasyon para’d si Jehova bilang say alenleneg a tuan Dios so agmagmaliw a rason pian ibaliwala na sakey si Jesu-Kristo. Diad kasuniyan et sasalitaen na Apocalipsis 19:10: “Say pantasi nen Jesus sikato so espiritu na profecia.” Manlapud Genesis ya anggad Apocalipsis, saray impuyan a propesiya so mangiiter na saray detalye nipaakar ed papel a betang nen Jesu-Kristo ed gagala nen Jehova. Legan a naaamtaan na sakey irayan detalye, onleletaw so sakey a makapasagyat a retrato ya andiay panpikewet tan agsuston ideya a resulta na palso iran bangat na Kakristianoan.
11. Panon ya akaapekta ed sakey a biin taga Poland so impakaamta ed talagan ibabangat na Biblia nipaakar ed Anak na Dios?
11 Say pakatalos ed katuaan nipaakar ed Anak na Dios so nayarin nawalaan na sakey a mabiskeg ya epekto ed sakey a too. Ontan so agawa ed si Danuta, sakey a biin taga Poland. Akilimog ed saray Tasi nen Jehova ed loob na waloy taon, nangayaga ed imbangat da, balet agto ginawan paraan na bilay to so tuan panagdayew. Kayari to et angawat na sakey a kopya na libron The Greatest Man Who Ever Lived, a mangipaparungtal ed bilay nen Kristo ed paraan a mainomay a natalosan.a Legan a manaralem so labi, nilukasan to so libro, diad getman basaen so sakey lambengat a kapitulo. Balet ta ompapalbangon la nen asumpal toy manbasa tan tinmunda. Sikatoy akanangis. “Jehova, perdona moak,” so pikakasi to. Bilang nansumpalan na binasa to, mas malinew ton anengneng nen say apalabas so impanengneng ya aro nen Jehova tan say Anak to. Amoria to a diad loob na waloy taon et sikatoy anggapoy otang a linawan angibeneg ed tulong a siaanos a tutulongan na Dios. Nen 1993 sikatoy nampabautismo bilang simbolo na dedikasyon to ed si Jehova ed letnegan na pananisia ed Jesu-Kristo.
12. Panon a say suston pikakabat ed si Jesu-Kristo so mangapekta ed bilay tayo?
12 “[Say suston] pikakabat ed Katawan tayo a Jesu-Cristo” so nisisiglaot ed pagmaliw ya aktibo tan mabungan Kristiano. (2 Pedro 1:8) Diad anton kalaknab so magmaliw a betang mo ed ontan a kimey, ya ipapanabang so mensahe na Panarian ed arum? Say kabaleg na nagawaan na siopaman so apektado na amayamay a sirkumstansya. (Mateo 13:18-23) Agtayo nayarin umanen so arum a sirkumstansya; say arum met so nayari. Anto so mamabayubo ed sikatayo pian amtaen tan gawaen iray pananguman a nagawaan? Insulat nen apostol Pablo: “Ta say aro nen Cristo pasooten to kami;” diad arum a salita, say aron impanengneng to ed impangiyapay na bilay to nisesengeg ed sikatayo so matalonggaring a legan ya ombubulaslas so apresasyon tayo ed satan, say kapusoan tayo so napakiwas a tuloy. Bilang resulta, namomoria tayo ya agmatukoy para’d sikatayo a mansiansian mangegemtan na sinisiblet iran kalat tan manbilay a say babaleg a kabiangan et uusaren ed dilin-panamaliket. Imbes, iyuuksoy tayo so panagbilay tayo pian iyuna so kimey ya imbangat nen Kristo ed babangatan ton gawaen.—2 Corinto 5:14, 15.
Biig Manlapud Mundo—Diad Anton Kalaknab?
13. Akin ya agtayo labay so magmaliw a kabiangan na sakey a relihyon a mibibiang ed mundo?
13 Agmairap a nengnengen so rekord a ginawa na Kakristianoan tan arum niran relihyon lapud labay dan magmaliw a kabiangay mundo. Uusaren daray pundo na simbaan pian ipakurang so rebolusyon. Saray pari so nagmaliw a gerilya. Diad inagew-agew, irereport na saray peryodiko so nipaakar ed manlalaban iran grupo na relihyon ed nanduruman parti na dalin. Saray lima ra so mantedter na dala. (Isaias 1:15) Tan diad sankamundoan say klero so manggugunaet ya impluensyaan so lawak na pulitika. Saray tuan managdayew so agkabiangan na saya.—Santiago 4:1-4.
14. (a) Anto so personal a paliisan tayo no labay tayon mansiansian biig ed mundo? (b) Anto so makatulong ed sikatayo pian napaliisan so patit na minumundo iran awawey tan agagamil?
14 Balet nagkalalo nen say satan so nalalanor ed pagmaliw a biig manlapud mundo. Say mundo so kabkabat lapud aro ed kuarta tan ed nasaliw na kuarta, ed pilalek a pagmaliw a prominenti, tan ed mantultuloy a pangegemtan na panliliket, pati saray bengatlan singa say kakulangay tuan pililikna ed arum, panagtila tan maabuson panagsalita, rebelyon sumpad autoridad, tan isaew a mangagamil na dangka. (2 Timoteo 3:2-5; 1 Juan 2:15, 16) Lapud dilin ag-inkayadyari tayo, nayarin no maminsan et naiimano ed sikatayo so pigara ed sarayan ugali. Anto so makatulong ed pipupuligesgesan tayon paliisan iratan a patit? Kaukolan tayon panonotan so inkasikatayo no siopa so walad benegan na saratan ya amin. “Say sankamundoan so mandokdokol ed kaugsan.” (1 Juan 5:19) Kaunongan man kaingganyo so sakey a kurang, kaunongan man karakel so totoon manbibilay ed ontan a paraan, sano nanenengneng tayo so manunan kabusol nen Jehova, si Satanas a Diablo, so walad benegan na satan, namoria tayo so agaylan kabandayan na satan.—Salmo 97:10.
Panon Kalaknab so Sabien na Panangarom?
15. Panon kan atulongan na anengneng mon agsinisiblet ya aro pian nabidbir so suston relihyon?
15 Sanen inmunan akilimog ka ed saray Tasi nen Jehova, maseguron akaingganyo ed sika so aron naiimano ed limog da lapud kiduma na saya ed espiritu na mundo. Say panangidanet ed agsinisiblet ya aro so rason no akin a say puron panagdayew ed si Jehova so duma ed amin niran nengneng na panagdayew. Nayarin saya so akakumbensi ed sika a saray Tasi nen Jehova so talagan mangaagamil na tuan relihyon. Si Jesu-Kristo a mismo so nankuan: “Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey.”—Juan 13:35.
16. Antoray nayarin walan pankanawnawa pian balang sinansakey et napalaknab tayo so panangaro tayo?
16 Kasin satan a kalidad so mangipapakabat ed sika bilang sakey ed saray babangatan nen Kristo? Wala ta iray paraan pian napalaknab mo so panangipanengneng na aro? Anggapoy duaruwa ya amin tayo so makapanggawa na ontan. Nagkalalo ni so nasasaglawi ed saya nen say pagmaliw a makaaro ed arum diad Kingdom Hall. Tan sano sikatayoy mangipanengneng na aro ed saraman lambengat so mangaaro ed sikatayo, wala ta so pidumaan tayo ed mundo? “Lalo la a toloy, ag komon naumas so aro yo ed sakey tan sakey.” (1 Pedro 4:8) Siopa so napangipanengnengan tayo na babaleg a panangaro? Kasin sakey a Kristianon agin laki odino bii a say abenegan to et duma ed sikatayo tan say paraan na panggawa to na bengabengatla so mamapaalipanes ed sikatayo? Diad sakey ta, a lapud sakit tan itatatken, et agmaparanay a makakaatendi ed saray miting? Kasin say asawa tayo? Odino nayarin, kasin satan so maedad laran atateng tayo? Say arum met a mangipanengneng na saray bunga na espiritu, pati say aro et liknaen dan singano naaralan da lamet irayan amin sano sikaray nidunget ed mairap iran situasyon a nayarin onlesa ed pangiter na ngalngali kumpleton panangasikaso ed sakey a membro na pamilya a ngalngali la baldado. Siempre, anggan nipaarap ed sarayan sirkumstansya say panangaro tayo so kaukolan a sabien to met so anggad labas na dilin sankaabungan tayo.
Panagtasi ed Panarian—Panon Kaimportanti Itan ed Sikayo?
17. Sano sikatayo so personal ya agunggunaan manlapud saray indalaw na Tastasi nen Jehova, anto so nalilikna tayo natan a nepeg tayon gawaen?
17 Say sakey ya importantin paraan a nipanengneng tayo so aro para’d kaparan too et diad pantasi ed sikara nipaakar ed Panarian na Dios. Saksakey lambengat a grupo na totoo so manggagawa ed sayan kimey ya impasakbay nen Jesus. (Marcos 13:10) Sikara so Tastasi nen Jehova. Personal tayon agunggunaan ed saya. Natan et pribilihyo tayon tulongan so arum. No say panmoria tayo et mipadpara ed panmoria na Dios, sayan kimey so napatnagan ed bilay tayo.
18. Panon a say panagbasa tayo ed libron Jehovah’s Witnesses—Proclaimers of God’s Kingdom so nayarin mangimpluensya ed dilin betang tayo ed panagtasi na Panarian?
18 Say makapasagyat a salaysay ed no panon a nipapasabi so mensahe na Panarian ed sankaarawian a kabiangan na dalin ed sarayan kaunoran ya agew so niparungtal ed libron Jehovah’s Witnesses—Proclaimers of God’s Kingdom. No amta yo so Ingles, agmo sasaewen iyan basaen. Tan legan a gagawen mo itan, nikadkaduman imanoen ya amin so paraan ya inusar na totoon akibiang ed panagtasin nipaakar ed Panarian. Wala ta so pigaran nayarian mon aligen so alimbawa ra? Dakel a pankanawnawa so lukas ed sikatayon amin. Komon ta pakiwasen itayo na aro ed si Jehova pian usaren iraya ed sankaabigan a paraan.
19. Panon tayon nagugunggunaan sano aawaten tayo so responsabilidad a katekep na pakaamta ed suston relihyon?
19 Sano usaren tayo so inkasikatayo ed panggawa na linawa nen Jehova, naromog tayo so ebat ed say tepet. Anto so kabaliksan na bilay? (Apocalipsis 4:11) Agtayo mankarkarapas, a nalilikna tayo so kaandi-kakanaan. Anggapo so kareran napangitalagaan mo na inkasika a mangitarok na babaleg ya inkakontento nen say sigpot-puson panangiyaplikam na inkasika ed serbisyo ed si Jehova a Dios. Tan agaylan engranden arapen so iyoopresi to! Sakey ya andi-anggaan a makapenek a bilay ed balon mundo to, a sigpot tayon nausar iray abilidad tayo ed sigpot a pitunosan ed maaron gagalan impamalsa na Dios ed too.
[Paimano ed leksab]
a Impalapag na Watchtower Bible and Tract Society of New York, Inc.
Panon Yon Ebatan?
◻ Akin ya importanti ya awaten na sakey a relihyon so Biblia bilang Salita na Dios tan mamagalang ed si Jehova bilang say tuan Dios?
◻ Anto so ibabangat na tuan relihyon no nipaakar ed betang nen Jesus bilang Mananondon?
◻ Akin a saray Kristiano so nepeg a mansiansian biig ed mundo tan mangagamil na agsinisiblet ya aro?
◻ Anto so betang na panagtasi ed Panarian ed suston relihyon?
[Saray litrato ed pahina 16]
Say bautismo so sakey ya importantin kundang ed pangawat na saray responsabilidad ed tuan panagdayew. Kada bulan, ngalngali 25,000 ed sankamundoan so manggagawa ed satan a kundang
Russia
Senegal
Papua New Guinea
E.U.A.
[Saray litrato ed pahina 17]
Say panangipanabang ed arum na katuaan na Biblia so kabiangan na tuan panagdayew
E.U.A
E.U.A
Brazil
Hong Kong