Kapitulo 22

Panangibiig ed Tuan Relihyon

1. Siopa ra so angagamil na tuan relihyon nen inmunan siglo?

ANGGAPOY duaruwa no siopa ra so angagamil na tuan relihyon nen inmunan siglo. Saray patumbok nen Jesu-Kristo. Amin na saraya so wala ed sakey a Kristianon organisasyon. Kumusta met natan? Panon so pakapangibiig ed saraman so mangaagamil na tuan relihyon?

2. Panon so pakapangibiig ed saraman so mangaagamil na tuan relihyon?

² Ipapaliwawa to no panon so pakapangibiig tayo, inkuan nen Jesus: “Diad panamegley na bunga ra nibiig yo ra. . . . Balang maong a kiew so manbunga na maabig a bunga, balet balang abulok a kiew so mamawala na andi-kanan bunga; . . . Peteg, sirin, diad panamegley na bunga ra et nibiig yo iratan a totoo.” (Mateo 7:16-20) Anto ran maabig a bunga so nailaloan mo ed saray tuan managdayew ed Dios a pawalaen? Anto so nepeg dan ibabaga tan gagawaen natan?

PANAMASANTOS ED NGARAN NA DIOS

3, 4. (a) Anto so inmunan kerew ya agawa ed Modelon Pikakasi nen Jesus? (b) Panon nen Jesus a pinasantos so ngaran na Dios?

³ Saray tuan managdayew ed Dios so onkiwas a mitukoyan ed Modelon Pikakasi ya inter nen Jesus ed saray patumbok to. Say ununan bengatla a sinalambit nen Jesus diman et saya: “Ama min wala ka ed katawenan, napasantos komon so ngaran mo.” Sananey a bersyon na Biblia so angibaga ed onia: “Komon ta say ngaran mo so mansiansian masanto.” (Mateo 6:9, Jerusalem Bible) Anto so kabaliksan na pamasantos, odino pamasiansian masanto, ed ngaran na Dios? Panon so impanggawa nen Jesus ed satan?

⁴ Impanengneng nen Jesus no panon so impanggawa to ed satan sanen inkuanto diad pikakasi to ed Ama to: “Imparungtal ko so ngaran mo ed saray totoo ya inter mo ed siak a nanlapud mundo.” (Juan 17:6) On, impakabat nen Jesus so ngaran na Dios, si Jehova, ed arum. Agto sinmaew a mangusar ed satan a ngaran. Kabat nen Jesus a gagala nen Ama to a say ngaran To so nigloria ed amin a dalin. Kanian inletneg to so ehemplo diad panangiyabawag ed satan a ngaran tan panamasiansia ed satan a masanto.​—Juan 12:28; Isaias 12:4, 5.

5. (a) Panon so inkisiglaot na Kristianon kongregasyon ed ngaran na Dios? (b) Anto so nepeg mon gawaen ta pian nagamoran so kilalaban?

⁵ Ipapanengneng na Biblia a say mismon kiwawala na tuan Kristianon kongregasyon so nisiglaot ed ngaran na Dios. Impaliwawa nen apostol Pedro a say Dios so “mangipaarap na imano to ed nasyones a mangala ed sikara na sakey a katooan a para ed ngaran to.” (Gawa 15:14) Sirin saray tuan totoo na Dios so nepeg a mantrato ed satan a ngaran a masanto tan ipaamta ra ed sankadalinan. Diad tua, say pikabat ed satan a ngaran so nakaukolan diad kilalaban, a singa ibabaga na Biblia: “Ta ‘siopaman ya ontawag ed ngaran nen Jehova so nilaban.’”​—Roma 10:13, 14.

6. (a) Kasin saray iglesia ed inkalapagan so mamapasantos ed ngaran na Dios? (b) Kasin walaray mangitatarok na pantasi ed ngaran na Dios?

⁶ Natan, sirin, siopa ra natan so mantatrato ed ngaran na Dios a masanto tan ipapakabat da ed sankadalinan? Saray iglesia ed inkalapagan so ompapaliis diad pangusar ed ngaran nen Jehova. Arum ni ingen so angekal ed satan diad saray patalos da ed Biblia. Anggaman kuan, no sika so mitongtong ed saray kaabay mo tan mabetbet a tukoyen mo si Jehova, ya usaren mo so ngaran to, diad anton muyongan so isipen mon pangikakasakeyan da ed sika? Wala lambengat so sakey a totoon peteg a manutumbok ed ehemplo nen Jesus ed sayan pamaakaran. Say manunan gagala ra ed bilay et say panlingkor ed Dios tan say pantasi ed ngaran to, a singa ginawa nen Jesus. Kanian inala ra so Makasulatan a ngaran a “Tastasi nen Jehova.”​—Isaias 43:10-12.

PANANGIYABAWAG ED PANARIAN NA DIOS

7. Panoy impangipanengneng nen Jesus na kaimportantian ed panarian na Dios?

⁷ Diad Modelon Pikakasin imbangat nen Jesus, impanengneng to met so kaimportantian na panarian na Dios. Imbangat toray totoon manpikasi: “Onsabi komon so panarian mo.” (Mateo 6:10) Inulit-ulit nen Jesus ya indanet so Panarian a bilang say alenleneg a solusyon ed saray gonigon na katooan. Sikato tan saray apostoles to so nanggawa ed saya diad impangipulong da ed totoo nipaakar ed satan a panarian “diad saray baryo” tan “diad kabkaabungan.” (Lucas 8:1; Gawa 5:42; 20:20) Say panarian na Dios so tema na panagpulong tan panagbangat da.

8. Panoy impangipanengneng nen Jesus ed no anto so manunan mensahe na saray tuan patumbok to ed sarayan “kaunoran ya agew”?

⁸ Kumusta ed agew tayo natan? Anto so sentron bangat na tuan Kristianon organisasyon na Dios? Diad impangipropesiya to ed sarayan “kaunoran ya agew,” inkuan nen Jesus: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Sirin say Panarian so nepeg a manunan mensahe na totoo na Dios.

9. Siopa ran totoo natan so mangipupulong ed mensahe na Panarian?

⁹ Tepetan mo so inkasika: No ontuktuk ed puertam so sakey a too tan salitaen to so nipaakar ed panarian na Dios a bilang say tuan ilalo na katooan, diad anton organisasyon so pikakasakeyan na satan a too? Kasin saray totoo ed anggan anton relihyon likud ed saray Tasi nen Jehova so akitongtong la ed sika nipaakar ed panarian na Dios? Akin, pigpigara ed sikara so anggan mikabat no anto’tan! Sikara so andi-esel nipaakar ed gobierno na Dios. Ingen satan a gobierno so mananenyeg-mundon balita. Impasakbay nen propeta Daniel a sayan panarian so ‘manmekmek tan mangupot ed amin nin arum a gobierno tan sikato lambengat so manuley ed dalin.’​—Daniel 2:44.

PANAMAGALANG ED SALITA NA DIOS

10. Panon nen Jesus ya impanengneng so panamagalang ed Salita na Dios?

¹⁰ Sananey a dalan a pakapangibiigan ed saraman so mangaagamil na tuan relihyon et say awawey da ed Biblia. Diad amin a panaon et impanengneng nen Jesus so panamagalang ed Salita na Dios. Naynay a sikato so inmapelo ed satan a bilang say pinal ya autoridad ed saray pamaakaran. (Mateo 4:4, 7, 10; 19:4-6) Impanengneng met nen Jesus so panamagalang ed Biblia diad impambilay to a tukoy ed saray bangabangat to. Agton balot minudmora so Biblia. Noag ingen, kinondena to iraman so agnambangat a mitukoyan ed Biblia tan analin mamakapuy ed puersa na bangat to diad impangiyuna ra ed saray dilin ideya ra.​—Marcos 7:9-13.

11. Anton awawey ed Salita na Dios so mabetbet ya ipapanengneng na saray iglesia?

¹¹ Panon so kisukat na saray iglesia na Kakristianoan diad ehemplo nen Kristo ed sayan pamaakaran? Kasin walaan ira na aralem a panamagalang ed Biblia? Dakel a klero natan so agmanisia ed awaran na Biblia diad inkaplag nen Adan ed kasalanan, say Delap ed agew nen Noe, Jonas tan say baleg a sira, tan arum ni. Ikuan da met a say too so linmesa dia ed panamegley na ebolusyon, aliwan diad direktan palsa na Dios. Kasin ditan et ipapaseseg da so panamagalang ed Salita na Dios? Andi, arum a papangulo na iglesia so mangisangsang a say relasyon ed sekso na aliwan sanasawa so aliwan mauges, odino say homoseksualidad odino poligamya so manepeg. Kasin ibagam a papasesegen da so totoon mangusar ed Biblia a bilang giya ra? Seguradon agda tutumboken so ehemplo na Anak na Dios tan saray apostoles to.​—Mateo 15:18, 19; Roma 1:24-27.

12. (a) Akin a say panagdayew na dakel ya anggaman walaan na Biblia so aliwan makapaliket ed Dios? (b) No saray managgagalan managgaway-mauges so naabuloyan a mansiansia ed maabig a talindeg ed sakey ya iglesia, anto so nibaga tayo?

¹² Walaray membro na iglesia a walaan na Biblia tan aaralen da ni, balet say dalan a pangipapakurang da ed bilay da so mangipanengneng a satan so agda tutumboken. Diad saray totoon singa ontan, kuan na Biblia: “Lapag ya iyaabawag da a kabat da so Dios, balet ta sikato so itapat da diad panamegley na saray gawa ra.” (Tito 1:16; 2 Timoteo 3:5) No saray membro na iglesia a mansusugal, manbubuanges odino manggagawa na arum a kaugsan so naabuloyan a mansiansia ed maabig a talindeg ed dalem na iglesia ra, anto so ipanengneng na saya? Satan so pamatnagan a say relihyoson organisasyon da so ag-aabobonan na Dios.​—1 Corinto 5:11-13.

13. Anton seryoson desisyon so nepeg a gawaen na sakey a too no naromog ton saray bangat na iglesia to so ag-iran amin mitukoyan ed Biblia?

¹³ No inumameng mo laray akaunan kapitulo na sayan libro, ya inusisam iray teksto na Biblian aromog diman, akabatan mo laray manunan bangat na Salita na Dios. Ingen anto no saray bangat na relihyoson organisasyon a pikakasakeyan mo so agmitukoyan ed saramay wala ed Salita na Dios? Sirin walaan ka na seryoson problema. Sikato so problema ed pandesidi no kasin awaten mo so inkamatua na Biblia odino ipulisay mo pian lablabayen moray bangat ya agsusuportaan na Biblia. Say gawaen mo, siempre, so dilin desisyon mo. Anggaman kuan, nepeg mon simbangen iray pamaakaran a maalwar. Saya so lapud say desisyon a gawaen mo so mangapekta na talindeg mo ed Dios tan say ilalom diad pambilay na ando lan ando ed paraiso diad dalin.

MANSIANSIAN NIBIIG ED MUNDO

14. (a) Anto so sananey a pakapangibiigan a tanda na tuan relihyon? (b) Akin ya importantin tuloy a saray tuan managdayew so manumpal ed sayan nakakaukolan?

¹⁴ Ingen say sananey a pakapangibiigan a tanda na saraman so mangaagamil na tuan relihyon et, a singa inkuan nen Jesus, “sikara so aliwan kabiangan na mundo.” (Juan 17:14) Kabaliksan na saya a saray tuan managdayew so mansiansian nibiig a manlapud sayan abulok a mundo tan saray kurang to. Agnilabay nen Jesu-Kristo so magmaliw a mapulitikon manuley. (Juan 6:15) Naapresyam no akin a say pansiansian biig ed mundo so importantin tuloy sano nanonotan mo ya ibabaga na Biblia a si Satanas a Diablo so manuley na mundo. (Juan 12:31; 2 Corinto 4:4) Say inkaseryoso na sayan pamaakaran so malaknab nin nanengneng ed balikas na Biblia: “Siopaman, sirin, a malabay a kaaro na mundo so manggagawa ed inkasikato a sakey a kabusol na Dios.”​—Santiago 4:4.

15. (a) Kasin saray iglesian kabkabat mo so peteg ya “aliwan kabiangan na mundo”? (b) Kasin wala so kabat mon sakey a relihyon a makasusumpal ed sayan nakakaukolan?

¹⁵ Kasin ipanengneng na katuaan a saray iglesia ed lugar mo so mangipapapuso ed sayan pamaakaran? Kasin saray klero tan ontan met ed saray membro na kongregasyon so peteg ya “aliwan kabiangan na mundo”? Odino kasin sikara so alanor a pirmi ed nasyonalismo, pulitika tan laslasan na grupo ed mundo? Sayan tepet so aliwan mairap ya ebatan, lapud saray aktibidades na iglesia so malaknab a kabkabat. Diad biek a dapag, mainomay met ya usisaen so aktibidades na saray Tasi nen Jehova. Diad panggawa na ontan, naromog mo a sikaran peteg so manutumbok ed ehemplo nen Kristo tan saray akaunan patumbok to diad pansiasiansian nisian ed mundo diad saray mapulitikon kurang tan kasibletan to, imoral tan maruksan dalan to.​—1 Juan 2:15-17.

ARO ED LIMOG DAN DILI

16. Anto so importantin dalan a pakapangibiigan ed saray tuan babangatan nen Kristo?

¹⁶ Say sankaimportantian a pakapangibiigan ed saray tuan babangatan nen Kristo et diad aro a walad sikara ed limog dan dili. Inkuan nen Jesus: “Diad saya naamtaan dan amin a sikayoray babangatan ko, no walaan kayo na aro ed limog yon dili.” (Juan 13:35) Kasin saray relihyoson organisasyon a kabkabat mo so walaan na onian aro? Anto so gagawaen da, alimbawa, no saray bansa a panaayaman da so onlan mibakal a sumpad sananey?

17. Panoy kisukat na saray relihyoson organisasyon tan saray membro ra diad panumpal ed nakakaukolan diad panangipanengneng na aro ed limog dan dili?

¹⁷ Kabat mo so gendagendat a nagawa. Diad panangiganggan na minumundon totoo saray membro na nanduruman relihyoson muyongan so onla ed lawak na bakalan tan pateyen daray kapananisiaan da ed sananey a bansa. Sirin say Katoliko et pateyen to so Katoliko, Protestante et pateyen to so Protestante tan say Muslim et pateyen to so Muslim. Isipen mo kasin say ontan a kurang so mitukoyan ed Salita na Dios tan peteg ya ipapanengneng to so espiritu na Dios?​—1 Juan 3:10-12.

18. Panoy kisukat na saray Tasi nen Jehova ed sayan pamaakaran na panangipanengneng na aro ed balang sinansakey?

¹⁸ Panoy kisukat na saray Tasi nen Jehova ed sayan pamaakaran na panangipanengneng na aro ed balang sinansakey? Agda tutumboken so kurang na saray minumundon relihyon. Agda pateyen so kapananisiaan da ed saray lawak na bakalan. Sikara so andi-kasalanan na pambibilay ed katilaan diad pangikuan, “Inarok so Dios,” bangta gugulaen da so agi ra ed sananey a nasyonalidad, tribu odino rasa. (1 Juan 4:20, 21) Ingen ta ipapanengneng da met so aro ed sananey a dalan. Panon? Diad dalan na pidedeneng da ed saray kakaabay da tan diad panamegley na maaron sagpot dan ontulong ed arum a mangaral nipaakar ed Dios.​—Galacia 6:10.

SAKEY A TUAN RELIHYON

19. Akin a namparan makatunongan tan Makasulatan so pangibaga a wala lambengat so sakey a tuan relihyon?

¹⁹ Makatunongan lambengat a wala so sakey a tuan relihyon. Saya so mitukoyan ed katuaan a say tuan Dios so sakey a Dios, “aliwan kaguloan, noagta kareenan.” (1 Corinto 14:33) Ibabaga na Biblia a diad tua et wala lambengat so “sakey a pananisia.” (Efeso 4:5) Siopa, sirin, iray manitibukel na ulop na saray tuan managdayew natan?

20. (a) Diad liwawa na pakapatnagan, siopa so ituturo na sayan libro a sikara so tuan managdayew natan? (b) Kasin satan so sisiaen mo? (c) Anto so sankaabigan a dalan diad pikabisadon maong ed saray Tasi nen Jehova?

²⁰ Anggapoy panabala min mangibaga a saray Tasi nen Jehova. Pian sika so nakumbinse ed saya imbitaan mi kan mikabkabat a maong ed sikara. Say sankaabigan a panggawa ed saya et say iyatendi ed saray pantitipon da diad Kingdom Hall na saray Tasi nen Jehova. Lapud ipapanengneng na Biblia a say panangagamil na tuan relihyon so mangitarok na baleg a kapnekan natan tan lukasan to so dalan ed panggayaga ed bilay ya andi-anggaan diad paraison dalin, seguradon makagungguna so panggawa na ontan a panangusisa. (Deuteronomio 30:19, 20) Sika so ampetapetang ya imbitaan min manggawa na ontan. Akin ya agla manusisa natan?

[Litrato ed pahina 185]

No tongtongen mo ed arum so nipaakar ed si Jehova tan say panarian to, diad anton relihyon so pangikakasakeyan na totoo ed sika?

[Saray litrato ed pahina 186]

Kasin papagalangan na sakey a too so Salita na Dios no agmanbibilay a tukoy ed satan?

[Litrato ed pahina 188, 189]

Agnilabay nen Jesus so magmaliw a mapulitikon manuley

[Litrato ed pahina 190]

Sika so ampetapetang a naimbitaan ya onatendi ed pantitipon na saray Tasi nen Jehova