No Akin a Bebendisyonan na Dios so Tuan Panagdayew

“Idayew si Jah, sikayon totoo! Say kilalaban tan say gloria tan say pakayari so kien na Dios tayo, lapud saray panangukom to so tua tan matunong.”​—APOCALIPSIS 19:1, 2.

1. Panon so isabi anggaan na Babilonia a Baleg?

NAPLAG LA so “Babilonia a Baleg” ed imaton na Dios tan nipapaarap natan ed inkaandi. Ipapanengneng na propesiya na Biblia a sayan sankamundoan a relihyoson balangkantis so asingger lan pagiten na saray mapulitikan kalugoran to; say anggaan to so bigla tan maples. Say panangiparungtal nen Jesus ed si Juan so mankarga na sarayan mapropetikon salita: “Sakey a baleg ya anghel so angalsa na sakey a bato a singa baleg a gilingan a bato tan imbasileng itan ed dayat, ya ibabaga to: ‘Diad ontan et diad sakey a maples ya inkitupak so kibasileng na Babilonia a baleg a syudad, tan aglan balot naromogan lamet.’”​—Apocalipsis 18:2, 21.

2. Panon so ikiwas na ariripen nen Jehova ed kadederal na Babilonia?

² Say inkaderal na Babilonia a Baleg so tagleeyan na pigaran elemento na mundo nen Satanas balet maseguron aliwan say ariripen na Dios, mangatatawen odino mangaraldalin man. Say magmaliw a magayagan eyag da ed Dios et: “Idayew si Jah, sikayon totoo! Say kilalaban tan say gloria tan say pakayari so kien na Dios tayo, lapud saray panangukom to so tua tan matunong. Ta sikato so angipakat na panangukom to ed say baleg a balangkantis a nandutak ed dalin diad panamegley na pilalawanan to, tan imbales to so dala na saray aripen to a walad lima to.”​—Apocalipsis 18:9, 10; 19:1, 2.

Antoran Bunga so Nepeg ya Ipatnag na Tuan Relihyon?

3. Antoran tepet so mankakaukolan na ebat?

³ Lapud say dalin so napunas ed palson relihyon, anton nengneng na panagdayew so mansiansia? Panon tayon nadetermina natan no dinan a grupo na relihyon so makaliktar ed kadederal na sankamundoan ya imperyo na palson relihyon nen Satanas? Antoray matunong a bunga a nepeg ya ipatnag na sayan grupo? Walay ag-onkulang ed samploran pakatandaan pian nabidbiran so tuan panagdayew ed si Jehova.​—Malaquias 3:18; Mateo 13:43.

4. Anto so unaan a kakaukolanen parad tuan panagdayew, tan panon ya inletneg nen Jesus so uliran nipaakar ed saya?

⁴ Manuna tan nagkalalo ed amin, saray tuan Kristiano so nepeg a manuporta ed inkasoberano a satan so inateyan nen Jesus​—say inkasoberano na Ama to. Ag-insuko nen Jesus so bilay to parad antokaman a mapulitika, pantribu, pan-etniko, odino pansosyedad a sengegan. Inyuna to so Panarian na Ama to imbes ed amin a mapulitika odino rebolusyonaryon gegemtan na saray Judio. Inebatan to so opresi nen Satanas ed minumundon pakayari ed saray salitan: “Arawi ka, Satanas! Ta walan nisulat, ‘Si Jehova a Dios mo so nepeg mon dayewen, tan sikato lambengat so nepeg mon pangisaklangan na sagradon serbisyo.’” Amta to manlapud Hebreon Kasulatan a si Jehova so tuan Soberano ed interon dalin. Dinan a relihyoson grupo so malinew a manusuporta ed pananguley nen Jehova imbes ed mapulitika iran sistema na sayan mundo?​—Mateo 4:10; Salmo 83:18.

5. (a) Panon so nepeg a panmoria na saray tuan managdayew ed ngaran na Dios? (b) Anto so mangipapanengneng a talagan igagalang na Tastasi nen Jehova itan a ngaran?

⁵ Say komaduan kakaukolanen et nepeg ya itandoro tan pasantosen na tuan panagdayew so ngaran na Dios. Imparungtal na say Makapanyarin-amin so ngaran to, Jehova (a nipatalos a Yahweh diad pigaran bersyon na Biblia), ed baley ton Israel, tan nilibon danay ya inusar itan ed Hebreon Kasulatan. Sakbay ni ingen na satan, kabat la itan di Adan, Eva, tan arum nira, anggaman agda lawas nirespeto itan. (Genesis 4:1; 9:26; 22:14; Exodo 6:2) Anggaman kaslakan et inekal na saray managpatalos ed Kakristianoan tan saray Judio so madibinon ngaran manlapud saray Biblia ra, inikdan na Tastasi nen Jehova itan a ngaran na makanepegan a pasen tan respeto diad New World Translation of the Holy Scriptures. Papagalangan da itan a ngaran, a singa met ed ginawa na akaunan Kristianos. Tinasian nen Santiago: “Madaldalatdat ya insalaysay nen Simeon no panon a say Dios ed inmunan pankanawnawa et inbaling toy imano to ed saray nasyon pian mangala na totoo parad ngaran to. Tan dia et miabobon iray salita na saray Propeta, . . . ‘pian diad ontan saraman so mansiansia ed saray totoo et sigugunaet ya anapen si Jehova, kaibay totoo ed amin iran nasyon, totoo a tatawagen ed ngaran ko, kuan nen Jehova, a manggagawa ed sarayan bengatla.’”​—Gawa 15:14-17; Amos 9:11, 12.

6. (a) Anto so komatlon kakaukolanen parad tuan panagdayew? (b) Panon ya indanet nen Jesus tan Daniel so pananguley na Panarian? (Lucas 17:20, 21)

⁶ Say komatlon kakaukolanen ed tuan panagdayew et nepeg ya ipaatagey na satan so Panarian na Dios bilang say alenleneg a lehitimo tan posiblin solusyon ed saray problema na katooan nipaakar ed pananguley. Malinlinew ya imbangat nen Jesus iray patumbok to ya ipikasi so isabi na satan a Panarian, pian say uley na Dios so mamanlong ed dalin. Apuyanan si Daniel a manpropesiya nipaakar ed kaunoran iran agew: “Say Dios na tawen so mangiletneg na sakey a panarian ya agbalot nitarok ed kaderal. . . . Mekmeken tan panganggaen to so amin na sarayan [minumundo, mapulitikan] panarian, tan satan a mismo so onalagey ed panaon ya anggapoy-geter.” Siopa so angipanengneng la diad kiwas da ed sayan koma-20 siglo a mangisasaklang na agnaapag a pananuporta ed satan a Panarian​—saray relihyon ta na Babilonia a Baleg odino Tastasi nen Jehova?​—Daniel 2:44; Mateo 6:10; 24:14.

7. Panon so panmoria na saray tuan managdayew ed Biblia?

⁷ Say komapat a kakaukolanen parad panangabobon na Dios et say tuan ariripen na Dios so kaukolan a manuporta ed Biblia bilang say impuyan a Salita na Dios. Diad ontan et ag-ira magmaliw a biktima na saray kritiko ed Biblia, a manasalin ipasen so Biblia bilang sakey a literaryon gawa labat na too tekep na amin a lingo a pawayan na saya. Sisiaen na Tastasi nen Jehova a say Biblia so impuyan a Salita na Dios, a singa met ed insulat nen Pablo ed si Timoteo: “Amin a Kasulatan so impuyan na Dios tan makagungguna ed pakabangatan, ed pakabaatan, ed pametek ed saray bengatla, ed panisiplina ed inkatunong, pian say too na Dios so magmaliw a sigpot a makayari, kompleton akinlongan parad kada maong a gawa.”a Kanian, gagawaen na Tastasi nen Jehova a say Biblia so pinagkagiya ra, say manwal da parad inagew-agew a panagbilay, tan say subol na ilalo ra ed arapen.​—2 Timoteo 3:16, 17.

Say Relihyon na Aro, Aliwan Panbusol

8. Anto so komaliman kakaukolanen parad tuan panagdayew?

⁸ Panon nen Jesus ya impabidbir iray tuan patumbok to? Say ebat to so mangiiter ed sikatayo ed makanan komalima a pakabiigan a tanda na tuan panagdayew. Inkuan nen Jesus: “Iikdan takayo na sakey a balon ganggan, a manarowan ed sakey tan sakey; a singa impangarok ed sikayo, manaarowan kayo. Diad onia a nakabatan na amin a sikayo so babangatan ko, no walaan kayo na aro ed limog yo.” (Juan 13:34, 35) Panon nen Jesus ya impanengneng so aro to? Diad impangiter to na bilay to bilang dondon bagat. (Mateo 20:28; Juan 3:16) Akin a say puron aro et importantin kualidad parad tuan Kristianos? Insalaysay nen Juan: “Inadaro ira, mantultuloy itayon manaarowan ed sakey tan sakey, lapud say aro so nanlapud Dios . . . Siopaman ya agmangaaro et agto kabat so Dios, lapud say Dios so aro.”​—1 Juan 4:7, 8.

9. Siopa so mangipapanengneng la na tuan aro tan panon?

⁹ Siopara ed panaon tayo so mangipapatnag la na onian nengneng na aro, anggan diad arap na panbubusolan lapud rasa, nasyon, odino etniko? Siopa so akalabas la ed sankamaletan a subok, anggan diad patey ni ingen, ta pian say aro ra et ontalona? Kasin nibaga tayo a saraman et Katolikon papari tan mamadre ya aadmitien dan minanabang ed responsabilidad na palanit a panagpatey ya agawa ed Rwanda nen 1994? Kasin satan et say Ortodukso na Serbia odino saray Katoliko ed Croatia ya akibiang ed “panaglinis na rasa” tan arum niran agmakakristianon kiwas ed guerra sibil ed Balkans? Odino kasin satan et say kleron Katoliko odino Protestante ya amadayabdab ed apuy na panangidumaduma tan panbubusolan ed Mamaamianen ya Ireland ed apalabas a pigaran dekada? Maseguron agnaakusa so Tastasi nen Jehova ed pibibiang ed dinanman ed saratan a pankokolkol. Asagmak da so inkipisok tan panangipangawan a kampo, anggan ipapatey ni ingen, imbes ya itapat so Kristianon aro ra.​—Juan 15:17.

10. Akin a saray tuan Kristiano so mansiasiansian neutral?

¹⁰ Say komanem a kakaukolanen ed panagdayew ya aawaten na Dios et say neutralidad nipaakar ed mapulitika iran pakurang na sayan mundo. Akin a kaukolan a mansiansian neutral ed pulitika iray Kristiano? Si Pablo, Santiago, tan Juan so mangiiter ed sikatayo na mabiskeg a rason parad satan a talindeg. Insulat nen apostol Pablo a si Satanas so “say dios na sayan sistema na saray bengatla,” a mamubulag ed saray nonot na agmananisia diad panamegley na amin a paraan a posibli, pati say manangapag a pulitika. Imbalikas nen babangatan a Santiago a “say pikakaaro ed mundo so pibubusol ed Dios,” tan inkuan nen apostol Juan a “say interon mundo so walad pakayari na sakey a marelmeng.” Kanian ag-ikokompromiso na sakey a tuan Kristiano so debosyon to ed Dios diad pibabali ed alay uges a pulitika tan pakayari na mundo nen Satanas.​—2 Corinto 4:4; Santiago 4:4; 1 Juan 5:19.

11. (a) Panon so panmoria na saray Kristiano ed bakal? (b) Anton Makasulatan a basiyan so wala no nipaakar ed sayan talindeg? (2 Corinto 10:3-5)

¹¹ Nisesengeg ed akaunan duaran kakaukolanen, magmamaliw a mabitar so komapito, salanti, a saray tuan Kristiano so kaukolan ya agmibiang ed saray bakal. Lapud say tuan relihyon so sankamundoan ya impanaagin nibased aro, sirin anggapo so makaapag odino makabuyak ed “interon panlilimog na . . . agagi ed mundo.” Imbangat nen Jesus so aro, aliwan say panbusol; kareenan, aliwan bakal. (1 Pedro 5:9; Mateo 26:51, 52) Parehon satan a “sakey a marelmeng,” si Satanas, ya anagdag met ed si Cain a pateyen si Abel so nantultuloy a mangitatanem na panbusol ed limog na katooan tan manasagyat na saray kolkolan tan panagpaagus na dala lapud mapulitika, relihyoso, tan etnikon kaapag-apag. ‘Aglan balot aaralen’ na tuan Kristianos so bakal, antokaman so kasalat na saratan. Diad piguratibon paraan, ‘pinitpit da la iray kampilan da a pinagmaliw a lukoy tan saray gayang da et pinagmaliw da a panagpaltong.’ Ipapatnag da so mareen a bunga na espiritu na Dios.​—1 Juan 3:10-12; Isaias 2:2-4; Galacia 5:22, 23.

Bebendisyonan na Dios so Inkapuro na Kondukta tan Bangabangat

12. (a) Anto so komawalon kakaukolanen, balet antoran relihyoson inkaapag so nisita yo? (b) Panon ya impabitar nen Pablo iyan komawalon kakaukolanen?

¹² Say Kristianon pankakasakey so komawalon kakaukolanen na tuan panagdayew. Balet ag-akatulong iray naapag a relihyon na Kakristianoan ed sayan gagala. Dakel a mankuan a manunan denominasyon so ataytayak ed nanduruman sekta, tan say resulta et inkawetwet. Alaen pan alimbawa so relihyon a Baptist ed Estados Unidos, a naapag ed baetan na Northern Baptists (American Baptist Churches diad E.U.A.) tan Southern Baptists (Southern Baptist Convention), ontan met ed dakel nin grupo na Baptist a nansumpal ed agpantatalosan. (World Christian Encyclopedia, pahina 714) Dakel a dibisyon so linmesa lapud pandurumaan na doktrina odino panuley na simbaan (alimbawa, Presbyterian, Episcopalian, Congregational). Saray inkaapag na Kakristianoan so nipara ed saramay relihyon ed paway na Kakristianoan​—balanglan saman et Budismo, Islam, odino Hinduismo. Anto so inkonseho nen apostol Pablo ed asasakbay iran Kristiano? “Natan bagaan takayo, agagi, ed panamegley na ngaran na Katawan tayon Jesu-Kristo a sikayon amin so kaukolan a mansalitan manpapakna, tan kaukolan ya anggapo iray inkaapag-apag ed limog yo, balet sikayo komon so matukotukoy a mankakasakey ed parehon nonot tan ed parehon linya na isip.”​—1 Corinto 1:10; 2 Corinto 13:11.

13, 14. (a) Anto so kabaliksan na ‘pagmaliw a masanto’? (b) Panon a napansiansian malinis so tuan panagdayew?

¹³ Anto so komasiam a kakaukolanen parad relihyon ya aabobonan na Dios? Sakey a prinsipyo na Biblia so nibalikas ed Levitico 11:45: “Nepeg mon paneknekan so inkasika a masanto, lapud siak so masanto.” Inulit nen apostol Pedro iyan kakaukolanen sanen insulat to: “Mitunosan ed Masanton Sakey ya anawag ed sikayo, sikayo met komon so magmaliw a masanto ed inkasikayo diad amin a kondukta yo.”​—1 Pedro 1:15.

¹⁴ Anto so ipapanengneng na sayan pankaukolan ed pagmaliw a masanto? A saray managdayew nen Jehova so kaukolan a magmaliw a malinis ed espiritual tan moral. (2 Pedro 3:14) Anggapo so lugar parad saray agmagbabawi tan sigagalan managkasalanan, a diad kondukta ra et nibabaliwala ra so dondon bagat nen Kristo. (Hebreos 6:4-6) Kakaukolanen nen Jehova a say Kristianon kongregasyon so pansiansiaen a malinis tan masanto. Panon itan a nasusumpal? Diad melag a kabiangan et diad hudisyal a proseso na panagdispelosip ed saramay manmantsa ed kongregasyon.​—1 Corinto 5:9-13.

15, 16. Antoran pananguman so ginawa la na dakel a Kristiano ed bilay da?

¹⁵ Sakbay a naamtaan so Kristianon katuaan, dakel so nambilay ya andiay-kontrol, mahilig ed panliliket, tan makasarili. Balet sikaray pinasimbalo na salita nipaakar ed Kristo, tan agamoran da so panamerdona ed saray kasalanan da. Maranet so impangibalikas nen Pablo sanen insulat to: “Anto! Agyo ta amta a saray agmatunong a totoo so agmakatawir na panarian na Dios? Agkayo paibabalang. Anggan saray managlawan, nisay managtalintao, nisay managkalugoran, nisay lalakin mantultuloy ed agkasiporan a gagala, nisay lalaki a miakdol ed lalaki, nisay matatakew, nisay maagum a totoo, nisay managbuanges, nisay managpabanday, nisay managkikil so agmakatawir na panarian na Dios. Tan ingen ontan so arum ed sikayo. Balet naurasan kayon malinis.”​—1 Corinto 6:9-11.

¹⁶ Mapatnag ya aabobonan nen Jehova iramay magbabawi ed agmakasulatan a kondukta ra, ombeneg, tan magmaliw a tuan papatumbok nen Kristo tan ed saray bangat to. Matuan aaroen da iray kapara ra a singa sikaran dili tan ipapatnag itan diad dakel a paraan, a singa say pantultuloy diad sakey a ministeryon mangiyoopresi na mensahe bilay ed amin ya ondengel.​—2 Timoteo 4:5.

“Say Katuaan Ibulos to Kayo”

17. Anto so komasamplon kakaukolanen parad tuan panagdayew? Mangiter na saray alimbawa.

¹⁷ Walaan si Jehova na komasamplon kakaukolanen parad saramay mandayew ed sikato diad espiritu tan katuaan​—say puron bangat. (Juan 4:23, 24) Inkuan nen Jesus ed papatumbok to: “Naamtaan yo so katuaan, tan say katuaan ibulos to kayo.” (Juan 8:32) Say katuaan na Biblia so mangibubulos ed sikatayo manlapud saray doktrinan agmamapagalang ed Dios, a singa say imortal a kamarerwa, impiernon-apuy, tan purgatoryo. (Eclesiastes 9:5, 6, 10; Ezequiel 18:4, 20) Ibubulos to itayo manlapud Binababilonian misteryo na “Sankasantosan a Trinidad” na Kakristianoan. (Deuteronomio 4:35; 6:4; 1 Corinto 15:27, 28) Say katutulok ed katuaan na Biblia so mansusumpal ed maaro, mangiyaansakit, maabig, tan mapangasin totoo. Agbalot iyaalibansa na tuan Inkakristiano so ombawi, agmaabuloy iran inkuisidor, a singa si Tomás de Torquemada, odino saray mabusol a manangisugsog na bakal, a singa saray papa ya angiyalibansa na saray Krusada. Ingen, onia so pinawala na Babilonia a Baleg a nengneng iran bunga ed interon awaran, anggan panon manlapud panaon nen Nimrod ya anggad natan.​—Genesis 10:8, 9.

Sakey a Ngaran a Nikadkaduma

18. (a) Siopa so makasukat ed samploran kakaukolanen parad tuan panagdayew tan panon? (b) Anto so nepeg a gawaen tayo bilang indibidual pian tawiren so bendisyon a walad arapen tayo?

¹⁸ Siopa natan so peteg a manusumpal na sarayan samploran kakaukolanen ed tuan panagdayew? Sioparay kabkabat tan bibidbiren na arum lapud rekord da na integridad tan pagmamaliw a mareen? Diad interon globo kabat a say Tastasi nen Jehova so “aliwan kabiangan na mundo.” (Juan 15:19; 17:14, 16; 18:36) Sakey a kagalangan parad totoo nen Jehova ya akbibiten so ngaran to tan magmaliw a Tastasi to, a singa si Jesu-Kristo a sakey a matoor a tasi ed Ama to. Aakbibiten tayo itan a masanton ngaran, a sinononot ed responsabilidad tayon manbilay unong ed irerepresenta to. Tan, bilang Tastasi to, agaylan maglorian iilaloan so akatarya ed sikatayo! Say pagmaliw a kabiangan na matulok, nankakasakey ya atooan a pamilya, a mandadayew ed Unibersal a Soberano ed sakey a nipawil a paraiso dia ed dalin. Pian nagamoran so ontan a bendisyon, mantultuloy tayon ipakabat so inkasikatayo bilang kabiangan na tuan panagdayew tan sikikinon ya akbibiten so ngaran a Tastasi nen Jehova “lapud saray panangukom to so tua tan matunong”!​—Apocalipsis 19:2; Isaias 43:10-12; Ezequiel 3:11.

[Paimano ed leksab]

Panon Yon Ebatan?

◻ Panon so panangipasen na ariripen nen Jehova no nipaakar ed kadederal na Babilonia a Baleg?

◻ Antoray manunan kakaukolanen parad tuan panagdayew?

◻ Panon a nibubulos kayo na katuaan?

◻ Anton nikadkaduman kagalangan so kien tayo bilang Tastasi nen Jehova?

[Saray litrato ed pahina 17]

Saray Tastasi nen Jehova so mangipupulong tan mangibabangat ed maong a balita na Panarian na Dios

[Litrato ed pahina 18]

Lawas nansiansian neutral iray tuan Kristiano no nipaakar ed minumundon pulitika tan bakabakal

[Credit Line]

Eroplano: Courtesy of the Ministry of Defense, London