Say Sankabalgan a Toon Nambilay ed Kapiganman

Kapitulo 12

Say Bautismo nen Jesus

Ngalngalin anem bulan kayari na inggapo nen Juan a manpulong, si Jesus, a natan et 30-años la, so inmasingger ed si Juan diad Jordan. Anton rason? Pian ombisita? Kasin interesado lambengat si Jesus no kaunongay iyaaligwas na kimey nen Juan? Andi, kinerew nen Jesus ed si Juan a sikatoy bautismoan to.

Tampol ya ag-inmabuloy si Juan: “Siak so kaukolan a bautismoan mo, tan sika so oonla’d siak?” Amta nen Juan a say kapinsan ton si Jesus et nikabkabiig ya Anak na Dios. Ta, linmukso si Juan ed gayaga ed eges nen ina to sanen si Maria, a lokon toy Jesus, so binmisita ed sikara! Say ina nen Juan, si Elizabet, so andi-duaruwan angibaga ed sikato na saya. Tan nayarin imbaga to met so nipaakar ed impangiyanunsyo na saray anghel ed kiyanak nen Jesus tan nipaakar ed impayawar na saray anghel ed saray pomapastol ed labi na inkiyanak nen Jesus.

Kanian kabkabat nen Juan si Jesus. Tan kabat nen Juan a say panagbautismo to et aliwan para’d kinen Jesus. Saman so para’d saray manbababawi ed saramay kasalanan da, balet si Jesus so andiay kasalanan. Ingen, anggaman ed ag-iyaabuloy nen Juan, inpilit nen Jesus: “Nagawa komon ed saya, ta ed satan et manepeg para’d sikatayo a sumpalen so amin a bengatlan maptek.”

Akin a susto para’d si Jesus a sikatoy bautismoan? Lapud say baustismo nen Jesus so sakey a simbolo, aliwan ed panagbabawi para’d saray kasalanan, noagta ed pangipresenta to na inkasikato pian gawaen so linawa na Ama to. Si Jesus et datin karpintero, balet natan et sinmabi panaon para’d sikato pian igapo so ministeryo ya angibakian nen Jehova a Dios a sumpalen to diad dalin. Padesir mo kasin walay iilaloan nen Juan a nikadkaduman bengatlan nagawa sanen bautismoan to si Jesus?

Bueno, inreport ed saginonor nen Juan: “Samay Sakey a mismon angibaki ed siak pian manbautismo ed danum so angibaga ed siak: ‘Siopaman a nanengnengan mo a dapoan na espiritu tan mansiansia, sayaman so sakey a manbautismo ed masanton espiritu.’” Kanian iilaloan nen Juan ya ondapo so masanton espiritu ed sakey a bautismoan to. Nayari, sirin, a sikato so aliwan tanton asurpresa sanen, legan a si Jesus so onsaksakbit manlapud danum, anengneng nen Juan so “singa sakey a malapati ya espiritu na Dios ya ondadapo ed sikato.”

Balet nagkalalo ni so agawa nen satan sanen babautismoan si Jesus. ‘Say katawenan so alukasan’ ed sikato. Anto so kabaliksan na saya? Mapatnag a sanen sikato so babautismoan, say memorya na bilay to ed tawen sakbay na impagmaliw ton too so pinmawil ed sikato. Sirin, sigpot lan nanonotan nen Jesus natan so bilay to bilang sakey ya espiritun anak nen Jehova a Dios, tekep na amin a bengatlan sinalita ed sikato na Dios ed tawen legan na kiwawala to sakbay a magmaliw a too.

Bilang kaaruman, diad panaon na inkabautismo to, sakey a boses a nanlapud tawen so angiyabawag: “Sikato’ya so anak ko, say inar-aro, ya inabobonan ko.” Siopay akanboses ed satan? Dilin boses nen Jesus? Siempre andi! Satan so boses na Dios. Malinew, si Jesus so Anak na Dios, aliwan say Dios a mismo, a singa ipapasen na arum.

Anggaman kuan, si Jesus so toon anak na Dios, a singa ed inmunan too, si Adan. Say babangatan a si Lucas, kayari na impaniskrebi ed inkabautismo nen Jesus, so nansulat: “Si Jesus a mismo, sanen inggapo to so kimey to, so ngalngalin mantaon na talomplo, ya anak, a singa ibabaga ra, nen Jose, anak nen Eli, . . . anak nen David, . . . anak nen Abraham, . . . anak nen Noe, . . . anak nen Adan, anak na Dios.”

No panon a si Adan so toon “anak na Dios,” ontan met ed kinen Jesus. Si Jesus so sankabalgan a toon nambilay ed kapiganman, a magmaliw a mapatnag sano aralen tayoy bilay nen Jesus. Anggaman kuan, diad inkabautismo to, si Jesus so linmoob ed sakey a balon relasyon ed Dios, a nagmaliw met ya espiritual ya Anak na Dios. Natan et sikatoy tatawagen lamet na Dios ed tawen, a singa panangibaga, diad panamegley na pangipapasen ed sikato ed sakey a kundang a mangitonton ed pangisaklang to na bilay to ed ando lan ando diad bagat nisesengeg ed akondinan katooan. Mateo 3:13-17; Lucas 3:21-38; 1:34-36, 44; 2:10-14; Juan 1:32-34; Hebreos 10:5-9.

▪ Akin a kabkabat nen Juan si Jesus?

▪ Bangta sikatoy agnankasalan, akin a si Jesus so binautismoan?

▪ Nisesengeg ed pikakabat nen Juan nipaakar ed kinen Jesus, akin a sikatoy nayarin ag-asurpresa sanen say espiritu na Dios so dinmapo ed sikato?