Say Sankabalgan a Toon Nambilay ed Kapiganman

Kapitulo 13

Pakaaral Manlapud Impanukso ed si Jesus

Tamtampol kayari na bautismo to, si Jesus so inwanwan na espiritu na Dios ed kalawakan na Judea. Dakel a tuloy so kaukolan ton nonoten, lapud diad inkabautismo to “say katawenan so alukasan,” pian natebek toray mangatatawen a bengatla. On, dakel so nakaukolan ton umamengen!

Inusar nen Jesus so 40 ya agew tan 40 a labi ed kalawakan tan ag-angan legan na sarayan panaon. Insan, sanen si Jesus so narasan lan maong, inmasingger so Diablo pian sikatoy tuksoen, a kuanto: “No sika so anak na Dios, ibagam ed sarayan bato a magmaliw iran tinapay.” Balet amta nen Jesus a lingo so pangusar na mamilagron pakapanyari to pian peneken so personal iran pilalek to. Kanian impulisay toy patukso.

Balet say Diablo so agsinmuko. Sinali to so sananey nin paraan. Inangat to si Jesus ya ontaboy manlapud pader na templo ta pian sikato so iliktar na saray anghel na Dios. Balet si Jesus so ag-atukso pian gawaen iman a makapakelaw a panengneng. Diad impangaon manlapud Kasulatan, impanengneng nen Jesus a lingo so pangiyan ed Dios ed subok ed onian paraan.

Diad komatlon tukso, impanengneng na Diablo so amin a panarian ed mundo diad mamilagron paraan tan imbaga to: “Amin iraya so iter ko ed sika no sika so ondakmomo tan manggawa na gawan panangidayew ed siak.” Balet si Jesus lamet so ag-inmabuloy a patangguyor ed tukson manggawa na lingo, tan pinili to so mansiansian matoor ed Dios.

Makaaral tayo manlapud sarayan tukso ed kinen Jesus. Ipapanengneng na saraya, bilang alimbawa, a say Diablo so aliwa lambengat a kualidad na kaugsan, a singa ibabaga na arum, noagta sikato so peteg, agnanengneng a persona. Say tukso ed kinen Jesus so mangipapanengneng met ya amin a gobierno ed mundo so kayarian na Diablo. Ta panon a say panangiyopresi na Diablo ed kinen Jesus et magmaliw a peteg a tukso no saraya so agto tuan kayarian?

Tan nonoten iya: Imbaga na Diablo a sikatoy akaparaan a manumang ed si Jesus para’d sakey a gawan panagdayew, anggan iter so amin a panarian na mundo. Nayarin salien met na Diablo a sikatayoy tuksoen to ed parehon dalan, nayarin say pangiyan ed arapan tayo na mananam iran pankanawnawa pian nagamoran so minumundon kayamanan, pakayari, odino posisyon. Balet agaylan makabat para’d sikatayo a tumboken so alimbawa nen Jesus diad panamegley na pansiansian matoor ed Dios diad anggan anton tukso! Mateo 3:16; 4:1-11; Marcos 1:12, 13; Lucas 4:1-13.

▪ Antoran bengatla so mapatnag ya uumamengen nen Jesus legan na 40 agew to ed kalawakan?

▪ Panon a sinali na Diablo a tuksoen si Jesus?

▪ Anto so naaralan tayo manlapud tukso ed kinen Jesus?