Say Sankabalgan a Toon Nambilay ed Kapiganman

Kapitulo 14

Saray Inmunan Babangatan nen Jesus

Kayari na 40 agew ed kalawakan, pinmawil si Jesus ed si Juan, ya amautismo ed sikato. Legan a sikatoy onaasingger, mapatnag a sikatoy ituturo nen Juan tan ikekelyaw ed saraman so presenti: “Nia, say Kordero na Dios a mangekal na kasalanan na mundo! Saya man so inkuan ko ed sikayo, Diad benegan ko et onsasabi so sakey a laki ya akauna la ed siak, lapud sikato so wala la sakbay ko.” Anggaman si Juan so panguloan nen say kapinsan ton si Jesus, kabat nen Juan a si Jesus so niwala la sakbay to bilang sakey ya espiritun persona ed tawen.

Ingen, pigaran simba ed asasakbay, sanen si Jesus so linman pabautismoan, si Juan so mapatnag ya agmaseguro a si Jesus so magmaliw a Mesias. “Anggaman sikato’y agko kabat,” so binidbir nen Juan, “balet say rason no akin a siak so manbabautismo ed danum et pian sikatoy nayarin nipatnag ed Israel.”

Intuloy nen Juan ya impaliwawa ed saray dumerengel to no anto so agawa sanen binautismoan to si Jesus: “Anengneng ko so espiritu ya onleleksab a singa malapati a nanlapu ed tawen, tan nansiansia ed sikato. Anggaman sikato’y agko kabat, balet samay mismon Sakey ya angibaki ed siak a mamautismo ed danum so angikuan ed siak, ‘Siopaman a pakanengnengan mo na onleleksab ya espiritu tan pansiansiaan, saya man so sakey a mamautismo ed masanton espiritu.’ Tan satan so anengneng ko, tan tinasian ko a sayan sakey so Anak na Dios.”

Diad ontumbok ya agew et si Juan so manal-alagey a kaiba iray duaran babangatan to. Lamet, legan ya onaasingger si Jesus, inkuanto: “Nengneng yo, say Kordero na Dios!” Diad saya, sarayan duaran babangatan nen Juan a Managbautismo so tinmumbok ed si Jesus. Sakey ed saraya et si Andres, tan sayan sakey et mapatnag a samay mismon toon angikurit ed sarayan bengatla, a manngaran met na Juan. Sayan Juan, unong ed saray pakatandaan, et sakey met a kapinsan nen Jesus, mapatnag ya anak na agi nen Maria, si Salome.

Nen linmengaw tan anengneng si Andres tan Juan ya ontutumbok ed sikato, tinmepet si Jesus: “Anto so aanapen yo?”

“Rabbi,” tepet da, “iner so panaayaman mo?”

“Galidia, tan nanengneng yo,” ebat nen Jesus.

Ngalngali alas-kuatro la ed ngarem, tan si Andres tan Juan so akiiba ed si Jesus ed saman ya agew. Kasumpal na satan et si Andres so malikeliket a nanapuran inanap to so agi to, a tatawagen a Pedro. “Nalmo mi la so Mesias,” inkuan to ed sikato. Tan intagar to’y Pedro ed si Jesus. Nayarin si Juan ed saman met a bekta so nananap ed kinen agi ton si Santigo tan intagar to ed kinen Jesus; ingen, sipor ya agto impila iyan personal ya impormasyon ed ebanghelyo to.

Diad ontumbok ya agew, aromog nen Jesus si Felipe, a taga Bethsaida, a parehon syudad a nanlapuan nen Andres tan Pedro. Sikatoy inimbitaan to: “Magmaliw ka a mananumbok ko.”

Insan aromog nen Felipe si Natanael, a tatawagen met na Bartolome, tan inkuanto: “Aromog mi imay sakey ya insulat nen Moises ed Ganggan, tan ontan met na saray Propeta, si Jesus, say anak nen Jose, a taga Nazareth.” Manduaruwa si Natanael. “Kasin wala so bengatlan maabig a manlapud Nazareth?” tepet to.

“Gala tan nengneng mo,” paseseg nen Felipe. Sanen sikaray manasingger ed si Jesus, imbaga nen Jesus so nipaakar ed kinen Natanael: “Nengneng yo, sakey ya Israelitan peteg, a diad sikato et anggapoy saol.”

“Panon ton agawa a siak so kabat mo?” tepet nen Natanael.

“Sakbay a tinawag to ka nen Felipe, legan a sika so wala ed silong na kiew na igos, anengneng ta ka,” ebat nen Jesus.

Mankelaw si Natanael. “Rabbi [a mankabaliksay Managbangat], sika so anak na Dios, sika so Ari na Israel,” inkuanto.

“Lapud imbagak ed sika ya anengneng ta ka ed silong na kiew na igos kanian sika so manisisia?” Tepet nen Jesus. “Nanengneng mo ni so bengabengatlan babaleg nen saraya.” Insan to impasipor: “Tua, tua kuan ko ed sikayo, Nanengneng yo so tawen ya akalukas, tan saray anghel na Dios ya onsesegep tan onlalasor ed Anak na too.”

Ag-abayag kayari to’ya, si Jesus, a kaiba iray balobalo ni a babangatan, so inmalis ed Lawak na Jordan tan nambaroy a mamaarap ed Galilea. Juan 1:29-51.

▪ Siopara so akaunan babangatan nen Jesus?

▪ Panon a si Pedro, a nayarin ontan met ed si Santiago, so nipakabat ed kinen Jesus?

▪ Anto so akakumbinsi ed kinen Natanael a si Jesus so Anak na Dios?