Saray Pinabli Yon Andi-la’d-bilay—Kasin Sikaray Nanengneng Yo Lamet?

SI John so mantaon na siamira labat sanen inatey so ina to. Saginonor, anonotan to so agawa ed purenarya: “Nandrowing ak na sakey a retrato para’d sikato tan sinulatan ko na antikey a kerew ya alagaren to kamin amin ed tawen. Inter ko ed si Daddy pian iyan to ed longon nen Mommy, tan anggaman sikato so inatey la, labay kon nonoten a naawat to’y unor a mensahek.”​—How It Feels When a Parent Dies, nen Jill Krementz.

Anggapo so duaruwa a pinabpabli nen John so ina to. Kayarin dineskribi to so maabig iran kualidad nen ina to, inkuanto: “Aliwan say agko panlabay a nonoten iray negatibon bengatla, balet ag’ak makanonot na antokaman a negatibon bengatlan makapuy nipaakar ed sikato. Sikato so sankagangganaan a biin anengneng ko ed interon bilay ko.”

Singa si John, dakel so walaan na maabig iran memorya ed saray pinabpabli ran andi-la’d-bilay tan bidbiren so pilalek dan napinengnengan lamet ira. Inkuan nen Edith, a say anak ton laki a mantaon na 26 so inatey lapud kanser: “Kaukolan kon sisiaen a say anak ko so mabilay ni ed sananey a pasen balet agko amta no iner. Kasin sikato so nanengneng ko lamet? Agko amta balet iilaloan kon nanengneng ko lamet.”

Maseguro, say maaron Manamalsa na too so makaamta nipaakar ed sayan normal a pilalek na too. Kanian insipan to ya onsabi panaon sano saray minilyon so makapikasakey lamet ed saray pinabli ran andi-la’d-bilay. Say Salita na Dios so mankarga na dakel ya impanukoy ed sayan sipan ya isasabin kikioli na inaatey.​—Isaias 26:19; Daniel 12:2, 13; Oseas 13:14; Juan 5:28, 29; Apocalipsis 20:12, 13.

Siopara’y Napapaoli a Mamaarap ed Tawen?

Konsidiraen tayo pa so ilalo nen John a say inadaro ton ina et manaalagar ed sikato diad tawen. Dakel a mimimisa so walaan na onian ilalo odino sisiaen. Diad panggugunaet a panuporta ed ontan iran panmoria, saray klerigo tan arum a social worker so lingon mangiyaaplika ed saray teksto manlapud Biblia.

Alimbawa, si Dr. Elisabeth Kübler-Ross, sakey ya eksperto ed pananulong ed inateyan so angikuan ed libro ton On Children and Death: “Say ipapatey et mankabaliksan lambengat na pangibantak ed laman tayo a singa paraan na panlakseb ed daan lan kawes tayo, odino iyalis manlapud sakey a kuarto ya onla’d sananey. Diad Eclesiastes 12:7, nabasa tayo: ‘Say dabok ompawil ed dalin a singa sikato nen saman, tan say espiritu ompawil ed Dios ya angiter ed sikato.’ Inkuan nen Jesus: ‘Onlak a mangiparaan na pasen para’d sikayo pian no iner so kulaan ko et wadman kayo met.’ Tan diad matakew a walad krus: ‘Natan wala ka ed siak ed paraiso.’”

Kasin saray teksto ya asalambit so peteg a mankabaliksan a saray pinabli tayon andi-la’d-bilay et mabilay natan tan manalagar ed sikatayo diad tawen? Konsidiraen tayo pan maalwar iray teksto, onggapo ed Eclesiastes 12:7. Mapatnag, say makabat a laki a nansulat ed sarayan salita et agto getman sunien so nisulat la ed parehon libro na Biblia: “Saray mabilay amta ra a sikara ompatey ira; balet saray inaatey agda amta so bengatla.” (Eclesiastes 9:5) Sisingbaten to so ipapatey na katooan ed inkalapagan. Kasin makatunongan so panisia ya amin a mankuan ya atiesta tan inmawet iran kriminal so ompawil ed Dios diad ipatey da? Peteg ya aliwan makatunongan itan. Diad tua, satan so agnibaga ed siopaman ed sikatayo ya ompawil ed Dios, balanglan ikokonsidera tayo so inkasikatayo a maong odino mauges. Lapud anggapo ed sikatayo so akapiolop ed Dios diad tawen, panon a nibaga a sikatayo so ompapawil ed sikato?

Anto, sirin, so labay ya ibaga na managsulat na Biblia diad pangibabaga a diad ipatey, ‘say espiritu so ompawil ed tuan Dios’? Diad panguusar ed Hebreon salita a nipatalos ya “espiritu,” sikato so agmanutukoy ed bengatlan nikaduma a pakabidbiran ed sakey a too manlapud sananey. Imbes, diad Eclesiastes 3:19, say parehon apuyanan a managsulat na Biblia so mangipapaliwawa a say too tan ayayep et “walaan ira ya amin na saksakey a panlinawa.” Mapatnag a say labay ton ibaga et say “espiritu” so aktibon puersa na bilay ed saray selula a manibukel ed pisikal iran laman na too tan ayayep. Agtayo inawat iyan espiritu a direktan nanlapud Dios. Satan so nipasa ed sikatayo diad panamegley na atooan ya atateng tayo sanen sikatayo so ninginew tan diad saginonor et niyanak. Niyarum ni, sayan espiritu so aliwan literal a manbiahe ed liwang tan ompawil ed Dios diad ipatey. Say balikas a, ‘say espiritu so ompawil ed tuan Dios,’ et sakey a piguratibon panagsalita a kabaliksan ton say arapen a bilay ya iilaloan na inatey a too so mandependi ed Dios. Walad sikato so pandeside no siopa so nodnonoten to tan diad kaunoran et paolien to. Imanoen yon mismo no panon a malinlinew ya ipapanengneng na Biblia iya diad Salmo 104:29, 30.

Gagala nen Jehova a Dios a sakey a limitadon bilang na matoor iran patumbok nen Kristo, a manbilang lambengat na 144,000, so napaoli ed mangatatawen a bilay bilang espiritun ananak na Dios. (Apocalipsis 14:1, 3) Saraya so manugyop na sakey a mangatatawen a gobierno a kaiba nen Kristo diad kabendisyonan na katooan diad dalin.

Saray sankaunaan ya akaamta nipaakar ed saya et saray matoor ya apostol nen Jesus, ya angibagaan ton: “Dia ed abung nen Amak walaray amayamay a panayaman; no ag ontan, inbagak komon ed sikayo; ta onlaak a mangiparaan na pasen ya onkana’d sikayo. Et no onlaak tan mangiparaanak na pasen ya onkana’d sikayo, onlaak dia lamet, tan awaten ta kayo ed inkasiak; pian no iner so kawalaan ko, diman makapanayam kayo met.” (Juan 14:2, 3) Saraman ya apostol tan arum ya inmunan Kristianon inaatey so kaukolan a manalagar ya anggapoy liknaan diad patey anggad isabi nen Jesus pian tumangan ira na sakey a mangatatawen a kikioli. Kanian satan no akin a nabasa tayo a say inmunan Kristianon martir, si Esteban, et “naugip ed [patey].”​—Gawa 7:60; 1 Tesalonica 4:13.

Kioli ed Bilay Diad Dalin

Balet komusta so nipaakar ed sipan nen Jesus ed kriminal ya inatey a kaampar to? Singa dakel a Judio ed saman a panaon, sisiaen na sayan too a say Dios so mangibaki na Mesias a mangiletneg na sakey a panarian tan mangipawil na kareenan tan kaligenan ed Judion nasyon ed dalin. (Ipareng so 1 Arari 4:20-25 ed Lucas 19:11; 24:21 tan Gawa 1:6.) Nagkalalo ni, say managgaway-kaugsan so angibalikas na pananisia a si Jesus so mogmon Sakey a pinili na Dios a magmaliw ya Ari. Ingen, diad saman a bekta, singa mairap iyan nagawa lapud pagani-gani la’y ipatey nen Jesus bilang sakey a kinondinan too. Satan so rason no akin a pinaseguroan nen Jesus so kriminal diad impangipaamta ed sipan To ed sarayan salita: “Tua kon ko ed sika natan, Nakaiba taka diad Paraiso.”​—Lucas 23:42, 43, NW.

Saray patalos a Biblia a mangisisingit na koma sakbay na salitan “natan” so mamapalesa na problema para’d totoon mankaliktan a talosan iray salita nen Jesus. Aglinma si Jesus ed paraiso ed saman a mismon agew. Imbes, sikato so anggapoy liknaan diad patey ed loob na taloran agew anggad sikato so pinaoli na Dios. Anggan kayari na inkioli tan insegep nen Jesus ed tawen, sikato so kaukolan a manalagar ed nikawanan a lima nen ama to anggad isabi panaon pian sikato so manuley bilang Ari na katooan. (Hebreos 10:12, 13) Agmabayag, say Panarian ya uley nen Kristo so mangitarok na inawa ed katooan tan mamasimbalo ed interon dalin a pagmaliwen a sakey a paraiso. (Lucas 21:10, 11, 25-31) Insan sumpalen to so sipan to ed saman a kriminal diad pamaoli ed sikato ed bilay diad dalin. Tan nakaiba nen Jesus iman a too ed pantalos a Sikato so ontulong ed amin a pankaukolan na too, pati say pankaukolan ed pangitarok na estiloy-bilay to a mitunosan ed matunong iran ganggan na Dios.

Kikioli na Dakel

Singa say magbabawin kriminal, say kikioli na kaslakan a totoo so nagawa dia ed dalin. Saya so mitunosan ed gagala na Dios diad impamalsa ed too. Say inmunan laki tan bii so impasen ed sakey a paraison tanamanan tan inbaga ed sikaran makmakan da so dalin. No sikara so nansiansian tinmulok ed Dios, sikara so aglan balot komon ontatken tan ompatey. Diad aturon panaon na Dios, say interon dalin so namakmakan komon, ginawan sankagloboan a paraiso nen Adan tan saray ayadyarin kailalakan to.​—Genesis 1:28; 2:8, 9.

Anggaman ontan, lapud si Adan tan Eva so sigagagalan nankasalanan, sikara so angitarok na patey ed inkasikaran dili tan ed arapen a kailalakan da. (Genesis 2:16, 17; 3:17-19) Kanian satan no akin ya ibabaga na Biblia: “Kanian onong a say kasalanan linmoob ed mundo lapu ed sakey a too [Adan], tan say patey lapud ed kasalanan; et say patey ed satan so linma ed amin a too, ta amin nankasalanan.”​—Roma 5:12.

Wala lambengat so sakey a too a niyanak a bulos manlapud atawir a kasalanan. Satan so ayadyarin Anak na Dios, si Jesu-Kristo, a say bilay to so niyalis manlapud tawen ed panag-anakan na sakey a Judion birhin, si Maria. Si Jesus so nansiansian andi-kasalanan tan agmakanepegan na patey. Sirin, say impatey to so walaan na mananondon a bili nisesengeg ed “kasalanay mundo.” (Juan 1:29; Mateo 20:28) Satan no akin a nibaga nen Jesus: “Siak so kiolian, tan say bilay. Siopaman a mangagamil na pananisa ed siak, anggaman sikato so ompatey, et nabilay.”​—Juan 11:25, NW.

On, kanian sikayo so makapangayaga ed ilalon nakaiba lamet iray pinabli yon andi-la’d-bilay, balet saya so mankakaukolan na pangagamil na pananisia ed si Jesus bilang say Mananondon yo tan ontulok ed sikato bilang tinuro na Dios ya Ari. Agla mabayag say Panarian na Dios so mamunas ed amin a kaugsan diad dalin. Amin a totoon mangipulisay a manpasakup ed uley to so naderal. Anggaman ontan, saray uuleyan na Panarian na Dios so makaliktar tan magmaliw ya okupado ed kimey a pamasimbalo ed sayan dalin a pagmaliwen a sakey a paraiso.​—Salmo 37:10, 11; Apocalipsis 21:3-5.

Insan say makapaliket a panaon so onsabi para’d igapo na kioli. Kasin sika so wadia ed sayan panaon pian mangabrasa ed saray inaatey? Satan so mandipendi ed gagawaen mo natan. Makapakelaw iran bendisyon so manaalagar ed amin natan a manpapasakup ed uley na Panarian nen Jehova diad panamegley na Anak to, si Jesu-Kristo.