Say Sankabalgan a Toon Nambilay ed Kapiganman
Kapitulo 17
Panangibangat ed si Nicodemo
Kaleganan na inyatendi to ed Paskua na 30 K.P., nanggawa si Jesus na makatantanda iran tanda, odino milagro. Bilang nansumpalan, dakel a totoo so anisia ed sikato. Si Nicodemo, sakey a membro na Sanhedrin, say atagey a korte na saray Judio, so mandinayew tan labay to so makaaral na dakel ni. Kanian binisita to si Jesus legan na kabilungetay labi, angangko lapud takot a naderal so reputasyon to ed arum a Judion papangulo sano sikatoy nanengneng da.
“Rabbi,” inkuanto, “amta mi a sika bilang sakey a managbangat et nanlapud Dios; ta anggapo so makapanggawa ed sarayan tanda a ginawam nilikud no wala ed sikato so Dios.” Bilang ebat, imbaga nen Jesus ed si Nicodemo a pian makaloob ed Panarian na Dios, say sakey a too so nepeg a “nianak lamet.”
Ingen, panon a nianak lamet so sakey a too? “Agto nayariay onloob lamet ed panag-anakan nen ina to a pidua tan nianak, agta ontan?” tepet nen Nicodemo.
Andi, aliwan ontan so kabaliksan na kianak lamet. “Nilikud a say sakey so nianak a manlapud danum tan espiritu,” so paliwawa nen Jesus, “sikatoy agmakaloob ed panariay Dios.” Sanen abautismoan si Jesus tan dinmapo ed sikato so masanton espiritu, sikato sirin so nianak “manlapud danum tan espiritu.” Diad manangantabay a deklarasyon manlapud tawen, “Sikatoya so Anak ko ya inabobonan ko,” inyanunsyo na Dios a sikatoy angitarok na sakey ya espiritual ya anak a walaan na ilalon makaloob ed mangatatawen a panarian. Saginonor, diad Pentecostes 33 K.P., arum ya abautismoan so makaawat na masanton espiritu tan sirin nianak lamet a bilang espiritual ya ananak na Dios.
Balet say betang na nikadkaduman atooan ya Anak na Dios so makana: “No panon ya inyatagey nen Moises so uleg ed kalawakan,” kuan nen Jesus ed si Nicodemo, “ontan met a kaukolan ya itagey so Anak na too, pian siopaman a manisia ed sikato so nawalaay andi-anggaan a bilay.” On, no panon a saramay Israelita a kinetket na madetan uleg so kaukolan ya onnengneng ed uleg a gansa pian niliktar, ontan met a kaukolan na amin a too a mangagamil na pananisia ed Anak na Dios pian niliktar manlapud ompapatey a kipapasen da.
Diad pangidanet ed maaron betang nen Jehova ed saya, insublay nen Jesus ya imbaga ed kinen Nicodemo, “Ontan la so panangaro na Dios ed mundo ya inter to so bogbogtong ya anak to pian siopaman a mangagamil na pananisia ed sikato et agnaderal noagta nawalaay bilay ya andi-anggaan.” Kanian, dia ed Jerusalem anem bulan lambengat kayari na impangigapo to na ministeryo to, impalinew nen Jesus a sikatoy usaren nen Jehova a Dios a mangiliktar ed sankatooan.
Impaliwawa ni nen Jesus ed si Nicodemo: “Ta imbaki na Dios so Anak to ed mundo, aliwan pian ukomen to’y mundo,” salanti, aliwan ukomen a siruruksa, odino kondinaen, a sesentensiaan so atooan a rasa na kadederal. Noag ingen, a singa ibabaga nen Jesus, sikatoy imbaki “pian niliktar so mundo ed panamegley to.”
Si Nicodemo so sitatakot a linma ed si Jesus diad impanakbong na kabilungetan. Kanian makapainteres a sinampotan nen Jesus so impitongtong to ed sikato diad impangikuan: “Natan saya so letnegan na panangukom, a say liwawa [ya impatnag nen Jesus ed bilay tan bangabangat to] so linmoob ed mundo balet ta inaro na mundo so kabilungetan imbes a say liwawa, lapud saray gawa ra et mauges. Ta say mangagamil na mauges iran bengatla et kabusol toy liwawa tan ag-onsingger ed liwawa, pian agnabaat iray kimey. Balet say manggawa na tua so onsingger ed liwawa, pian saray kimey so ompatnag a ginawa a mitunosan ed Dios.” Juan 2:23—3:21; Mateo 3:16, 17; Gawa 2:1-4; Numeros 21:9.
▪ Anto so amakiwas ed imbisita nen Nicodemo, tan akin a linma na labi?
▪ Anto so kabaliksan na pagmaliw a “nianak lamet”?
▪ Panon so impangiyilustra nen Jesus ed betang to diad kilalaban tayo?
▪ Anto so kabaliksan na aglinma dia si Jesus pian ukomen so mundo?