Say Sankabalgan a Toon Nambilay ed Kapiganman

Kapitulo 18

Dinmaiset ed si Juan, Dinmaak ed si Jesus

Kayari Paskua ed premabera na 30 K.P., si Jesus tan saray babangatan to so tinmaynan ed Jerusalem. Anggaman kuan, ag-ira pinmawil ed saray ayaman da diman ed Galilea noagta linma ra ed baley na Judea, a nanggawaan da na panagbautismo. Gagawaen nen Juan so parehon kimey ed ngalngalin sakey taon la natan, tan siansian sikatoy walaan na saray babangatan a mililimog ed sikato.

Diad tua, agnambautismo si Jesus a mismo, noagta amautismo iray babangatan to diad panangiwanwan to. Say bautismo ra so walaan na parehon kabaliksan a singa samay ginawa nen Juan, a bilang simbolo na panagbabawi na saray Judio ed saray kasalanan sumpad Ganggan a sipanan na Dios. Anggaman kuan, kayari inkioli to, binilin nen Jesus iray babangatan to a mamautismo ed duman kipaakaran. Say Kristianon bautismo natan so sakey a simbolo na dedikasyon na sakey a manlingkor ed si Jehova a Dios.

Anggaman kuan, diad sayan asasakbay a kabiangan na ministeryo nen Jesus, sikara nen Juan, anggaman mankikimey a nambiigan, so mangibabangat tan mamabautismo ed saray managbabawi. Balet ta mangimon iray babangatan nen Juan tan nanreklamo ed sikato nipaakar ed si Jesus: “Rabbi, . . . nia, sayan sakey so mamabautismo tan amin so ondadago ed sikato.”

Imbes a mangimon, nanggayaga si Juan ed aligwas nen Jesus tan labay to met a manggayaga iray babangatan to. Pinanonotan to’ra: “Sikayon mismo so mantasi ya inkuan ko, aliwan siak so Kristo, noagta siak so nibaki sakbay na satan a sakey.” Insan sikatoy angusar na marakep ya ilustrasyon: “Samay walaan na nobya et say nobyo. Anggaman kuan, say kaaro na nobyo, sano sikatoy onalagey tan narengel da, so walaan na baleg a gayaga nisesengeg ed boses na nobyo. Sirin sayan gayagak so agawan sigpot.”

Si Juan, bilang kaaro na Nobyo, so nanggayagan ngalngalin anem bulan nin asasakbay sanen impakabat toray babangatan to ed si Jesus. Arum ed sikara so nagmaliw a prospektibon membro na mangatatawen a nobyan klase nen Kristo a tugyopen na saray nilanaan na espiritun Kristiano. Labay nen Juan a saray kaplesan a babangatan to so ontumbok met ed si Jesus, lapud ta say gagala to et say pangiparaan na dalan para’d matalonan ministeryo nen Jesus. A singa ipapaliwawa nen Juan a Managbautismo: “Satan a sakey so nepeg a mantultuloy ya ondaak, balet ta siak so nepeg a mantultuloy ya ondaiset.”

Say balobalon babangatan nen Jesus a si Juan, a diad akauna et babangatan met nen Juan a Managbautismo, so nansulat nipaakar ed lapuan nen Jesus tan say importantin betang To para’d kilalaban na too, a kuanto: “Sikato a nanlapud tawen so uloan na amin. . . . Inaro na Ama so Anak tan inter to so amin a bengatla ed lima to. Say mangagamil na pananisia ed Anak so walaan na andi-anggaan a bilay; say agmangunor ed Anak so agmakanengneng na bilay, noagta say sanok na Dios so mansiansia ed sikato.”

Ag-abayag kayari impaningbat nen Juan a Managbautismo ed idaiset na dilin kimey to, sikatoy inerel nen Arin Herodes. Inala nen Herodes si Herodias, ya asawa nen Felipe ya agi to, bilang kayarian to, tan sanen mapublikon inwalwal nen Juan ya agmanepeg so ginawa to, sikatoy impaipangaw nen Herodes. Sanen nadngelan nen Jesus so impangerel ed si Juan, sikatoy tinmayman ed Judea a kaiba iray babangatan to ya amaarap ed Galilea. Juan 3:22​—4:3; Gawa 19:4; Mateo 28:19; 2 Corinto 11:2; Marcos 1:14; 6:17-20.

▪ Anto so kabaliksan na bautismon ginawa ed silong na panangiwanwan nen Jesus sakbay na inkioli to? Tan kayari na inkioli to?

▪ Panon so impangipanengneng nen Juan a say reklamo na saray babangatan to so agmakatunongan?

▪ Akin a nipangaw si Juan?