Say Sankabalgan a Toon Nambilay ed Kapiganman

Kapitulo 19

Panangibangat ed Samaritana

Diad pamapaarap da ed Galilea a manlapud Judea, si Jesus tan saray babangatan to so dinmalaw ed distrito na Samaria. Naksawan lapud panagbaroy, tinmunda ran manpainawa ed abay na bobon ya asingger ed syudad na Sicar ed ngalngali lan kaagwan. Sayan bobon so kinotkot nen Jacob pigaran siglo lay apalabas, tan wala ni itan anggad natan, diman ed asingger na modernon-agew a syudad na Nablus.

Kaleganan na panpapainawa nen Jesus dia, linma iray babangatan to ed syudad a mangaliw na tagano. Sanen sakey a Samaritana so sinmabi pian onasol na danum, kinerew to: “Ikdan mo ak na inumen.”

Diad inkalapagan et saray Judio tan Samaritano so andian na pidedeneng lapud niutel a panangidumaduma. Kanian, diad inkakelawan, tinepet na bii: “Panon a sika, anta sakey ka a Judio, onkerew ka’d siak na inumen, bangta sakey ak a Samaritana?”

“No kabat mo lambengat,” ebat nen Jesus, “no siopa so angikuan ed sika, ‘Ikdan mo ak na inumen,’ kinmerew ka komon ed sikato, tan inikdan to ka komon na mabilay a danum.”

“Katawan,” inmebat, “sika so andian na anggan timba a pangasol na danum, et aralem so bobon. Manlapud iner sirin, a walaan ka na sayan mabilay a danum? Aliwa ka a babaleg nen say inmunan ama min Jacob, ya angiter ed sikami na bobon tan sikaton mismo a kaiba iray anak to tan saray baka to ya inminom manlapud satan, agta ontan?”

“Balang sakey ya uninom manlapud sayan danum so napegaan lamet,” so inkuan nen Jesus. “Siopaman ya uninom ed iter kon danum ed sikato so agbalot napegaan, noagta say danum ya iter kod sikato so magmaliw ed sikato a sakey a subol na danum a manlipwa pian manginabang na andi-anggaan a bilay.”

“Katawan, iter mo’d siak so sayan danum, pian agak la napegaan nisay ompawil-pawil ed sayan pasen pian onasol na danum,” so ebat na bii.

Inkuan natan nen Jesus ed sikato: “Onla ka, tawag mo so asawam tan onla kayo ed sayan pasen.”

“Andian ak na asawa,” so ebat to.

Say salita to so pinatua nen Jesus. “Maabig so impangibagam, ‘Andian ak na asawa.’ Lapud walaan ka na limaran asawa, tan say lakin kaamong mo natan so agmo asawa.”

“Katawan, natebek ko a sakey kan propeta,” inkuan na bii tekep na pankelaw. Ipapatnag so espiritual ya interes to, inkuanto a saray Samaritano so “nandayew ed sayan palandey [Gerizim, a walad asingger]; balet sikayo’ran totoo [saray Judio] so angikuan a diman ed Jerusalem so nepeg a pandayewan na totoo.”

Ingen, say pasen na panagdayewan so aliwan importantin bengatla, impalinew nen Jesus. “Say oras so onsabi,” inkuanto, “sano saray tuan managdayew so mandayew ed Ama diad espiritu tan katuaan, ta peteg, ontan iray anapen na Ama a mandayew ed sikato. Say Dios so Espiritu, tan saramay mandadayew ed sikato so nepeg a mandayew ed espiritu tan katuaan.”

Ontanla so inkasagyat na bii. “Amtak ya onsabi so Mesias, a tatawagen a Kristo,” inkuanto. “Sano sikatoy onsabi, silulukas ya iyabawag to ed sikami so amin a bengatla.”

“Siak a mitotongtong ed sika so sikato,” so indeklara nen Jesus. Isipen pa itan! Sayan bii a linman onasol ed kapegleyay agew, angangko pian napaliisay pakapiabet ed saray taga baley a bibii a manmodmora ed sikato nisengeg ed kurang na bilay to, so pinalangkapan nen Jesus diad makapakelaw a dalan. Tekep na anton nansumpalan?

Dakel a Samaritano so Anisia

Diad impawil da nanlapud Sicar a sankaawit so tagano, aromog na saray babangatan si Jesus ed bobon nen Jacob ya anaynanan da ed sikato, tan no iner et sikato natan so mitotongtong ed sakey a Samaritana. Sanen sinmabi iray babangatan, say bii so tinmaynan, ya intilak so buyog na danum, tan amaarap ed syudad.

Lapud ontanlan interesado ed saray bengatlan imbaga nen Jesus ed sikato, inkuanto ed saray lalaki ed syudad: “Dago kayo, nengneng yo so sakey a toon angibaga ed siak ed saray amin a bengatlan ginawak.” Insan, ed sakey a paraan pian sagyaten so inkamausisa, intepet to: “Agta nayarin sikatoya so Kristo?” Sinumpal na tepet so gagala to​—linma iraman a totoo pian nengnengen dan dili.

Kaleganan to, dinagdag na saray babangatan si Jesus a mangan na taganon awit da a nanlapud syudad. Balet ta sikatoy inmebat: “Walaan ak na tagano a naakan ya agyo amta.”

“Anggapoy angitarok ed sikato na antokaman a naakan, agta ontan?” so tepet na saray babangatan ed balang sakey. Impaliwawa nen Jesus: “Say taganok et say panggawak na linawa na samay angibaki ed siak tan sumpalen so kimey to. Agta imbaga yo a wala lambengat lay apatiran bulan sakbay na isabi panagani? Anggaman kuan, ituturo to so espiritual a panagani, inkuan nen Jesus: “Itangwa yo iray mata yo tan nengneng yo so kaumaan, ya amputi la’ra para’d panagani. Aawaten la na manag-ani so upa tan manbobodbor na bunga para’d maandon bilay, pian say managtanem tan manag-ani so parehon manggayaga.”

Angangko ta anengneng la nen Jesus so engranden epekto na say impiabet to ed sakey a Samaritana​—salanti dakel so anisia ed sikato lapud impantasi to. Sikatoy nantasi ed saray ombaley a kuanto: “Imbaga to ed siak so amin a bengatlan ginawak.” Sirin, sanen saray totoo ed Sicar so dinmago ed sikato ed bobon, kinerew dan sikatoy mansiansia tan mitongtong ed sikara na malaglaem. Inawat nen Jesus so imbitasyon tan nansiansia ed loob na duay agew.

Legan a saray Samaritano so ondedengel ed si Jesus, dakerakel ni so anisia. Diad saman inkuanda ed say bii: “Agkami la manisia ed ibabagam; ta nangel mi a mismo tan amta mi a sayan too so peteg a manangiliktar na mundo.” Sigurado a saman a Samaritana so amawala na maabig ya alimbawa no panon so pakapantasi tayo nipaakar ed Kristo diad panamegley na panagyat na inkamausisa pian nagkalalon mansukimat iray dumerengel!

Tandaan ya apatiran bulan lambengat sakbay na panagani​—mapatnag a say panagani na sebada, a nagagawa ed Palestina diad premabera. Kanian natan et nayarin Nobyembre odino Disyembre la. Kabaliksan na saya a kayari na Paskua na 33 K.P., inusar nen Jesus tan saray babangatan to so waloran bulan odino onsulok ni diad Judea a nambangat tan amautismo. Tinmaynan la ra natan ya amaarap ed niyanakan a teritorya ra ed Galilea. Anto so manaalagar ed sikara diman? Juan 4:3-43.

▪ Akin ya asurpresa iman so Samaritana diad impitongtong nen Jesus ed sikato?

▪ Anto so imbangat nen Jesus ed sikato nipaakar ed say mabilay a danum tan no iner so pandayewan?

▪ Panon so impangiparungtal nen Jesus ed sikato na inkasikato, tan akin a sayan impangiparungtal so makapakelaw a tuloy?

▪ Anton panagtasi so agawaan na samay Samaritana tan tekep na anton resulta?

▪ Kaunongan so pisiglaot na tagano nen Jesus ed panagani?

▪ Panon tayon nadetermina so dukey na ministeryo nen Jesus ed Judea kayari Paskua na 33 K.P.?