Say Sankabalgan a Toon Nambilay ed Kapiganman

Kapitulo 20

Say Komaduan Milagro Kaleganan a Walad Cana

Sanen pinmawil si Jesus ed nianakan ton teritorya kayari na apalaknab a kampanya na panagpulong ed Judea, aliwan pian manpainawa. Imbes, inggapo to so mas malaknab a ministeryo ed Galilea, say dalin a binalegan to. Balet saray babangatan to, imbes a mansiansian kaiba to, so sinmempet ed saray kapamilyaan da tan ed gendat a trabaho ra.

Anton mensahe so inggapo nen Jesus ya impulong? Saya: “Say panarian na Dios so inmasingger la. Magmaliw kayon managbabawi, sikayoran totoo, tan nawalaan na pananisia ed maong a balita.” Tan say ebat? Inawat na saray taga Galilea si Jesus. Sikatoy inggalang na amin. Anggaman ontan, saya so aliwan nagkalautlan lapud mensahe to, noag ingen, lapud dakel ed sikara so wala ed Paskua ed Jerusalem pigaran bulan ed asasakbay tan anengneng daray makatantandan tanda a ginawa to.

Mapatnag ya inggapo nen Jesus so baleg a ministeryo to ed Galilea diad Cana. Diad asasakbay, nayarin nanonotan yo, a diad impawil to a nanlapud Judea, inpagmaliw to so danum ya alak diad sakey a bansal diman. Diad sayan komaduan pankanawnawa, say anak na sakey ya opisyal na gobierno nen Arin Herodes Antipas so mansasakit a tuloy. Diad impakadngel to a sinmabi si Jesus ed Cana a nanlapu ed Judea, nambaroy iray opisyal nanlapud abung to ed Capernaum pian anapen si Jesus. Apusek na ermen, akikasi so laki: ‘Ipangasim ya onla ka a tampol, sakbay ya ompatey so anak ko.’

Inmebat si Jesus: ‘Sempet ka la. Maabig la so anak mo!’ Anisia so opisyal nen Herodes tan inggapo to so andukey a panbaroy a pasempet. Dia ed dalan et sikatoy nabet na saray ariripen to, a nanapuran mangibaga ed sikato a maong la so bengabengatla​—inmabig la so anak to! ‘Kapigan so inyabig to?’ tepet to.

‘Karuman ed ala 1:00 na ngarem,’ so ebat da.

Amoria na opisyal a sikatoya so mismon oras sanen inkuan nen Jesus, ‘Maabig la so anak mo!’ Kayari na saman, say laki tan say interon sankaabungan to so nagmaliw a babangatan na Kristo.

Kanian say Cana so nagmaliw ya apaboran a pasen a no iner et, diad impangisinyal na ipawil to ed Judea, amiduan nanggawa na milagro si Jesus. Siempre, aliwan saraya lambengat so milagro a ginawa to anggad sayan panaon, balet saraya so makabaliksan lapud tinandaan da so ipawil to ed Galilea.

Amaarap la natan si Jesus ed baley to ed Nazareth. Anto so manaalagar ed sikato diman? Juan 4:43-54; Marcos 1:14, 15 Lucas 4:14, 15.

▪ Sanen pimawil si Jesus ed Galilea, anto so agawa ed saray babangatan to, tan panon so impangawat na saray totoo ed sikato?

▪ Anton milagro so ginawa nen Jesus, tan panon so epekto to ed saramay nalalanor?

▪ Kaunongan diad ontan so impamabor nen Jesus ed Cana?