Say Sankabalgan a Toon Nambilay ed Kapiganman

Kapitulo 21

Diad Sinagoga ed Dilin-Baley nen Jesus

Andi duaruwan wala so liket ed Nazareth sanen sinmabi si Jesus. Sakbay na intaynan to pian pabautismoan ed si Juan masulok a sakey taon la so apalabas, akabatan si Jesus bilang sakey a karpentero. Balet natan sikatoy malaknab a kabkabat bilang managgaway milagro. Saray lokal a residente so magunaet a makanengneng ed sikato a manggawa na pigara ed sarayan makapakelaw a gawa ed limog da.

Pinmalalo so panatalaran da kaleganan a si Jesus, unong ed ugali to, so linma ed lokal a sinagoga. Kaleganan na serbisyo, sikato so inmalagey a nambasa, tan say lukot nen propeta Isaias so inyawat ed sikato. Aromog to so pasen a mangibabaga na nipaakar ed Sakey a nilanaan na espiritu nen Jehova, a say kawalaan to ed Biblia tayo natan et diad kapitulo 61.

Kayari ton binasa no panon so pangipulong na sayan Sakey ed kibulos na saray nipangaw, say kalukasay mata na saray bulag, tan nipaakar ed makapaliket a taon nen Jehova, impawil nen Jesus so lukot ed say katulongan insan inmirong. Amin a mata so mapetepet ya akaapasakey ed sikato. Insan nansalita, nayarin medyo abayag, tan impaliwawa to: “Natan sayan kasulatan a kadkadngel yo so asumpal.”

Mandinayew iray totoo ed satan a “mananalona iran salita” to tan nankuan ed sinansakey: “Agta sikatoya so anak nen Jose?” Balet lapud amta to a labay dan nanengneng a manggawa na saray milagro, intuloy nen Jesus: “Andi duaruwan iyaplika yo so sayan ilustrasyon ed siak, ‘Managtambal, tambal mo so inkasika; saray bengatlan nadngel mi ya agawa ed Capernaum, gawam met dia ed dilin baley mo.’” Mapatnag, liknaen na datin kakaabay nen Jesus a say panagtambal so onggapo ed dilin ayaman, para ed kagunggunaan ya ununa na saray dilin baley to. Kanian nilikna ran minelmelag ira nen Jesus.

Amoria so kaisipan da, insalaysay nen Jesus so pigaran onaplikan awaran. Dakel iray baló ed Israel legan na saray agew nen Elias, inkuanto, balet ag-imbaki si Elias ed siopaman ed saraman. Imbes, sikatoy linma ed sakey ya aliwan Israelitan baló ed Sidon, a nanggawaan toy manangiliktar bilay a milagro. Tan dia ed saray agew nen Eliseo, dakel iray akating, balet si Naaman lambengat a nanlapud Siria so nilinisan nen Eliseo.

Asanokan nisesengeg ed saray aliwan maapabor a maawaran a panangikumpara ya angiwalwal ed kasibletan tan kakulangan da na pananisia, tinmalindeg iramay walad sinagoga tan ingguyor da si Jesus ed paway na syudad. Diman, diad toktok na palandey a kawalaan na inkapaalageyan na Nazareth, sinali ran sikatoy ipelag manlapud tambib. Balet ta akalukpos si Jesus manlapud lima ra tan tinmaynan a maligen. Lucas 4:16-30; 1 Arari 17:8-16; 2 Arari 5:8-14.

▪ Akin a wala so liket ed Nazareth?

▪ Anto so isipen na saray totoo ed saray balikas nen Jesus, balet diad saman et anto so amasanok ed sikara?

▪ Anto so sinalin gawaen na saray totoo ed si Jesus?