Say Sankabalgan a Toon Nambilay ed Kapiganman

Kapitulo 22

Apatiran Babangatan so Tinawag

Kayari na say getman pamatey ed si Jesus ed dilin baley to ed Nazareth, sikato so linma ed syudad na Capernaum asingger ed dayat na Galilea. Saya so anumpal ed propesiya na Isaias. Saman so nipaakar ed pasakbay a saray totoo ed Galilea a manaayam ed abay na dayat so makanengneng na baleg a linawa.

Sanen ginawa nen Jesus so panangakbibit-liwawan kimey ed panagpulong na Panarian dia, aromog to so apatira ed saray babangatan to. Saraya so nambaroy a kaiba to nen saman balet ta pinmawil ira a kaiba si Jesus a nanlapud Judea. Nayari ya, aanapen ira natan nen Jesus, lapud panaon la a kaukolan toy permiyan, regular a katulongan a sarag ton ipasal a mangituloy na ministeryo sano sikato so naandi la.

Kanian legan a manaakar si Jesus ed gilig na dayat tan anengneng to si Simon Pedro tan saray kakaiba to a manguuras na iket da, inasinggeran to ra. Sikatoy linmugan ed baluto nen Pedro tan kinerew ton iguyor a manlapud sakbit. Sanen akaarawi ra na daiset, inmirong si Jesus ed baluto tan ginapoan ton bangatan so baleg ya ulop a wala ed gilig na dayat.

Kayari na saya, inkuan nen Jesus ed si Pedro: “Iguyor mo ed kawalaay aralem, insan yo ipelag so iket yo pian makaerel.”

“Managbangat,” ebat nen Pedro, “sanlabi kamin nankesaw et agkami akaerel, balet nisengeg ed ganggan mo, ipelag mi so iket mi.”

Sanen nipelag iray iket, agaylan karakel a sira so narel ya apilat so iket. Tampol, kinaweyan na lalaki so kakaiba ra ed sakey a baluton walad asingger pian ondago tan ontulong. Ag-abayag, napno so duaran baluto na agaylan karakel a sira ya onlelereg la. Diad impakanengneng ed saya, dinmakmomo si Pedro ed arapan nen Jesus tan kuanto: “Arawi ka ed siak, lapud sakey ak a makasalanan a too, Katawan.”

“Agka natatakot,” so ebat nen Jesus. “Manlapud natan makaerel ka na totoon mabilay.”

Inimbitaan met nen Jesus so agi nen Pedro a si Andres. “Tombok ka ed siak,” paseseg to ed sikara, “tan gawaen takayon sumisigay na totoo.” Saray kakaiba ran sumisigay a si Santiago tan si Juan, saray anak nen Zebedeo, so naimbitaan met, tan kinmiwas met iran andi abala. Kanian sarayan apatira so anaynan ed panagsigay da tan nagmaliw ya ununan apatiran permiyan, regular a patumbok nen Jesus. Lucas 5:1-11; Mateo 4:13-22; Marcos 1:16-20; Isaias 9:1, 2.

▪ Akin a tinawag nen Jesus iray babangatan to ya ontombok ed sikato, tan siopa iraya?

▪ Anton milagro so anaktakot ed si Pedro?

▪ Anton nengneng na panagsigay so inyimbita nen Jesus ed saray babangatan to a gawaen?