Say Sankabalgan a Toon Nambilay ed Kapiganman

Kapitulo 26

Pinmawil Lamet ed Capernaum

Diad sayan bekta et say inkabantog nen Jesus so kinmaykayat, tan dakel a totoo so nambaroy a mamaarap ed maamot a paspasen a panaayaman to. Anggaman kuan, kayari pigaran agew et sikatoy pinmawil ed Capernaum ya asingger ed Dayat na Galilea. Maples a kinmayat so balita ed syudad a pinawilan to, tan dakel so linma ed abung a kulaan to. Saray Pariseo tan managbangat na Ganggan so linma nanlapud arawi a singa say Jerusalem.

Dakel a tuloy so totoo a sinaraan da lay puerta, tan anggapo lay lugar para’d siopaman a makaloob. Say kipapasen so akaparaan para’d peteg a makatantandan ebento. No anto so agawa ed sayan okasyon so peteg a walay kaimportantian, ta ontulong ed sikatayon mangapresya a si Jesus so walaan na pakayarin mangekal ed sengegan na paniirap na katooan tan ipawil so bunigas ed amin a pilien to.

Legan a manbabangat si Jesus ed karaklan, apatiran lalaki so angiyakar ed saman ya abung na sakey a paralitiko a walad dokolan. Labay da a paabigen nen Jesus imay kaaro ra, balet lapud kinarakel na too, sikaray agmakaloob. Agaylan makapadismaya! Ingen ta sikara so agsinmuko. Sikaray kinmalab ed atep a patar, nilungawan da itan, tan inyabeba so dokolan a kaiba imay paralitiko ed abay nen Jesus.

Kasin si Jesus so sinmanok lapud saman a ginawa? Andin balot! Imbes, sikato so mandinayew a tuloy ed pananisia ra. Inkuanto ed saman a paralitiko: “Saray kasalanan mo aperdona la ra.” Balet peteg kasin si Jesus so makaperdona na kasalanan? Saray eskriba tan Pariseo so agmanisip na ontan. Ikakatunongan da ed puso ra: “Akin et mansalita so saya’n too na onia? sikato’y manayew. Siopa so makaperdona na saray kasalanan no ag saksakey, salanti say Dios?”

Diad impakatebek ed saray kanonotan da, inkuan nen Jesus ed sikara: “Akin et nononoten yo so saraya’n bengatla ed kapusoan yo? Dinan so maig-innomay, ya ikuan ed apagpag [paralitiko, NW], Saray kasalanan mo, aperdona ra; ono say pangikuan, Alagey ka, tan alam so dokolan mo, tan manakar ka?”

Insan, inabuloyan nen Jesus so karaklan, pati saray kritiko to, a makanengneng na makatantandan demostrasyon a mangiparungtal a sikatoy walaan na autoridad a mamaandi na kasalanan ed dalin tan peteg a sikato so say sankabalgan a toon nambilay ed kapiganman. Sikatoy inmarap ed paralitiko tan ingganggan to: “Alagey ka, alam so dokolan mo, tan onlaka ed abung mo.” Tan tampol ya ontan so ginawa to, nan-akar a sankagpit toy dokolan to ed arap dan amin! Mankelkelaw a dinayew na saray totoo so Dios tan kinmelyaw: “Ag-itayo ni akanengneng na onia”!

Kasin naimanom a sinalambit nen Jesus a say kasalanan et misiglaotan ed sakit tan say pamerdona na kasalanan so misiglaotan ed pakagamor na pisikal a bunigas? Ipapaliwawa na Biblia a say akaunan ateng tayo, si Adan, so nankasalanan tan amin tayo so akatawir na saray resulta na satan a kasalanan, salanti, sakit tan ipapatey. Balet diad silong na uley na Panarian na Dios, si Jesus so mamerdona ed saray kasalanan na amin a mangaaro ed Dios tan manlilingkor ed Sikato, tan insan amin a sakit so naekal. Agaylan maabig itan! Marcos 2:1-12; Lucas 5:17-26; Mateo 9:1-8; Roma 5:12, 17-19.

▪ Anto so kipapasen para’d sakey a peteg a makatantandan ebento?

▪ Panon a say paralitiko so akasabi ed si Jesus?

▪ Akin ya amin tayo so makasalanan, balet panon ya angiter si Jesus na ilalo a say pamerdona na kasalanan tayo tan nagnap a bunigas so posibli?