Say Sankabalgan a Toon Nambilay ed Kapiganman

Kapitulo 25

Panangabagey para’d sakey ya Akating

Kaleganan na bisita nen Jesus tan saray apatiran babangatan to ed syudad na Galilea, say balita nipaakar ed makapakelaw a bengabengatla a gagawaen to so kinmayat ed interon distrito. Say balita ed saray gawa to so akarateng ed sakey a syudad no iner a wala so sakey a lakin akating. Say managtambal a si Lucas so manideskribe ed sikato bilang “napno na kating.” Sano mapalalo la, sayan makapasesgan sakit so kalkalnan manmigmig ed nanduruman parte na laman. Kanian sayan akating so walad pakaskasin kipapasen.

Sanen akasabi si Jesus ed syudad, inmasingger so akating ed sikato. Unong ed Ganggan na Dios, say sakey ya akating so nepeg a mangikelyaw na panamasakbay, “Marumsis, marumsis”! pian salimbengan iray arum manlapud iyasingger a maapit tan naalisan. Say akating natan so dinmakmomo tan akikasi ed kinen Jesus: “Katawan, no labay mo, nayarianmoak a linisan.”

Agaylan pananisia na sayan too ed si Jesus! Ingen, peteg a pakaskasi so itsura to lapud sakit to! Anto kasi so gawaen nen Jesus? Anto so gawaen mo? Apakiwas tekep na panangabagey, inyunat nen Jesus so lima to tan diniwit iman a too, a kuanto: “Labay ko. Magmaliw kan malinis, NW.” Tan tampol a naandipat imay kating ed sikato.

Labay mo ta’n magmaliw ya ari so ontan kaabagey? Say paraan na impangipasen nen Jesus ed sayan akating so mangiiter ed sikatayo na talek a kaleganan na uley na Panarian To, say propesiya na Biblia so nasumpal: “Ilagak to so makabos tan naokolan, tan ilaban to so kamarerwa na naokolan.” On, sumpalen nen Jesus ed satan so pilalek na puso to a tulongan so amin a naiirapan.

Anggan sakbay na impamaabig ed akating, say ministeryo nen Jesus so amalesa na baleg a liket ed limog na totoo. Diad kasumpalan na propesiya nen Isaias, ginanggan natan nen Jesus imay toon apaabig: “Nengneng mo ya angapo’y too’n pangibabagaanmo.” Insan sikatoy binilin to: “Onla ka ipatnag moy inkasika ed sacerdote tan isaklang mo’y nipaakar ed inkalinisan mo so saray bengatla ya inbilin nen Moises, pian pakapamintuaan ed sikara.”

Balet ta say too so ontanlan maliket ya agto niyamot so milagro ed inkasikato. Sikato so linma tan ginmapon ikayat so balita ed inerman a pasen, mapatnag a nansengegan na ontanlan interes tan inkamausisa ed limog na totoo a si Jesus so agmakaonlan parungtalan ed syudad. Kanian, si Jesus so nansiansia ed maamot iran lugar no iner ya anggapoy manaayam, tan saray totoo ed amin a pasen so linma pian ontalineng ed sikato tan napaabig ed saray sakit da. Lucas 5:12-16; Marcos 1:40-45; Mateo 8:2-4; Levitico 13:45; 14:10-13; Salmo 72:13; Isaias 42:1, 2.

▪ Anton epekto so nayarin napawala na kating, tan anton pasakbay so nepeg ya iter na sakey ya akating?

▪ Panon ya akikasi sakey ya akating ed kinen Jesus, tan anto so naaralan tayo ed inkiwas nen Jesus?

▪ Panon a samay apaabig a too so sinmaew ed pangunor ed kinen Jesus, tan antoray nansumpalan?