Say Sankabalgan a Toon Nambilay ed Kapiganman

Kapitulo 24

No Akin a Linma Diad Dalin si Jesus

Say agew nen Jesus ed Capernaum kaiba toray apatiran babangatan to so sakey ya okupado, a nansumpal ed impangitagar na saray totoo na Capernaum na amin a mansasakit da ed sikato pian paabigen to anggad labi. Anggapo so panaon para’d panbokbokor.

Natan et masakbay ed ontombok a kabuasan. Legan ya ambilunget ni, si Jesus so binmangon tan pinmaway a bokbokor. Sikato so linma ed mareen a pasen no iner a makapanpikasi ed Ama to a pribado. Balet aganggano so impanbokbokor nen Jesus ta nen amoria nen Pedro tan saray arum a sikatoy naaandi, pinmaway iran nananap ed sikato.

Sanen arumog da si Jesus, inkuan nen Pedro: “Amin da, aanapen da ka.” Labay na saray totoo ed Capernaum a mansiansia si Jesus ed sikara. Aapresyaen dan tuloy so ginawa to para’d sikara! Balet kasin si Jesus so linma dia ed dalin pian manunan manggawa na mamilagro iran panagpaabig? Anto so nibaga to nipaakar ed saya?

Unong ed sakey a salaysay na Biblia, inebatan nen Jesus iray babangatan to: “Onla itayo ed angan ined a pasen ed saray ontombok a balbaley, pian manpulong ak met diman: ta linma ak dia lapu ed saya’n getma.” Anggaman pinaseseg na saray totoo si Jesus a mansiansia diman, inkuanto’d sikara: “Kaokolan ko met ya ipulong ko so evangelio [maong a balita, NW] na panaria’y Dios ed saray arum a ciudad: ta sikatoya so nibakianko.”

On, si Jesus so linma ed dalin a manuna pian ipulong so nipaakar ed Panarian na Dios, a mangalangon ed ngaran na Ama to tan permanentin mansolbar ed amin a sakit na katooan. Anggaman kuan, pian mangiter na ebidensya a sikato so imbaki na Dios, si Jesus so nanggawa na mamilagro iran panagpaabig. Diad parehon paraan, pigaran siglo ed asasakbay, si Moises so nanggawa na milagro pian iletneg so pakabidbiran to bilang aripen na Dios.

Natan, sanen ontaynan la si Jesus ed Capernaum pian manpulong ed arum niran syudad, apatira ed saray babangatan to so akila ed sikato. Sarayan apat et si Pedro tan say agi ton si Andres, tan si Juan tan say agi ton si Santiago. Nanonotan mo a sakey simba labat ed asasakbay, sikara so inimbitaan pian magmaliw ya unonan managbaroy a komikimey nen Jesus.

Say panagpulong nen Jesus ed Galilea a kaiba iray apatiran babangatan to so sakey a maabig ya intalona! Diad katuaan, say report nipaakar ed saray kimey to so linmaknab anggad interon Sirya. Baleg ya ulop manlapud Galilea, Judea, tan ed nibaliw na Ilog Jordan so tinmumbok ed si Jesus tan ed saray babangatan to. Marcos 1:35-39; Lucas 4:42, 43; Mateo 4:23-25; Exodo 4:1-9, 30, 31.

▪ Anto so agawa ed kabuasan kayari na okupadon agew nen Jesus ed Capernaum?

▪ Akin ya imbaki si Jesus ed dalin, tan kinmana ed anto so milagro to?

▪ Siopa so akila ed si Jesus ed panagpulong to ed Galilea, tan anto so inkiwas ed saray aktibidad nen Jesus?