Say Sankabalgan a Toon Nambilay ed Kapiganman
Kapitulo 23
Dakel Niran Milagro ed Capernaum
Diad samay Sabaton kayari na impanawag nen Jesus ed saray apatiran akaunan babangatan to—si Pedro, Andres, Santiago, tan Juan—sikaran amin so linma ed sakey a lokal a sinagoga ed Capernaum. Diman inggapo nen Jesus a manbangat, tan mankelaw iray totoo lapud sikatoy manbabangat ed sikara bilang sakey a walaan na autoridad tan aliwan singa saray eskriba.
Diad sayan Sabaton et sakey a lakin aselepan na demonyo so wadman. Kasalilikna, sikatoy inmeyag ed sakey a makbaw a boses: “Anto’y pibibiangan mi ed sika, Jesus, sika a Nazareno? linma ka dia’n mamagbag ed sikami? Amta taka no siopa ka, sika so Santo na Dios.”
Say demonyon mangokontrol ed laki so diad katuaan et sakey ed saray anghel nen Satanas. Diad pamabaat ed demonyo, inkuan nen Jesus: “Ag ka oneesel, tan ompaway ka ed sikato”!
Bueno, inpangalingataw na demonyo iman a laki tan inmeyag na makmaksil. Balet saya so pinmaway ed laki ya agto sinakitan. Balang sakey so basta nikelawan! “Anto ya?” tepet da. “Siouley a mangangan angan saray marumsis ya espiritu, et ontolok ira ed sikato.” Say balita nipaakar ed saya so kinmayat ed interon lugar.
Tinmaynan ed sinagoga, si Jesus tan saray babangatan to so linma ed abung nen Simon, odino Pedro. Diman et say katulangan a bii nen Pedro so mapalalon mansasakit tekep na trangkaso. ‘Ipangasim a tulongan mo,’ pikakasi ra. Kanian inmasingger si Jesus, inegnaan to ed lima, tan impabangon to. Tampol a sikato so inmabig tan intaryaan tora na tagano!
Saginonor, sanen akaselek lay agew, saray totoo manlapud amin a pasen so ginmapon onsabi ed abung nen Pedro a kaiba iray mansasakit da. Ag-abayag et say interon syudad so atipon la diman! Tan pinaabig nen Jesus so amin a mansasakit da, antokaman so sakit da. Pinaabig to ni ingen iramay aselepan na demonyo. Legan a sikaray sikaray ompapaway, saray demonyo a pinapaway to so oneeyag: “Sika so Anak na Dios.” Balet binaat nen Jesus ira tan sikaray ag-inabuloyan a mansalita lapud amta ra a sikato so Kristo. Marcos 1:21-34; Lucas 4:31-41, Mateo 8:14-17.
▪ Anto so agawa ed sinagoga ed Sabaton kayari na impanawag nen Jesus ed saray apatiran babangatan to?
▪ Iner so nila nen Jesus sanen tinmaynan ed sinagoga, tan anton milagro so ginawa to diman?
▪ Anto so agawa ed saginonor diad saman met a labi?