Sigagayagan Manpasakup ed Autoridad
“Nagmaliw kayon maonor ed puso.”—ROMA 6:17.
1, 2. (a) Anton espiritu so mapatnag ed mundo natan, tan anto so panlalapuan to tan say epekto na saya? (b) Panon ya ipapanengneng na dedikadon ariripen nen Jehova a sikaray duma?
SAY “espiritu a natan mangawa ed saray anak na kasusumpa” so makapakebbiew a nanengneng natan. Satan so espiritun agnapokpokan ya independensya, a manlalapud si Satanas, a “pangolo na pakayari [autoridad, NW] dagem.” Sayan espiritu, sayan “dagem,” odino dominanten awawey na inkaagum tan katutunganga, so walaay “autoridad,” odino pakayari, ed kaslakan a totoo. Saya so sakey a rason no akin a say mundo so manasagmak na tatawagen a krisis na autoridad.—Efeso 2:2.
2 Makapaliket, saray dedikadon ariripen nen Jehova natan so agmamapano ed espiritual iran balá ra na marutak a “dagem,” odino espiritu na rebelyon. Kabat da ya “onsabi sanok na Dios ed saray anak na kasusumpa.” Intuloy ni nen apostol Pablo: “Ag kayo sirin mibibiang ed sikara.” (Efeso 5:6, 7) Imbes, panbabanikelan na saray tuan Kristiano a ‘napano na espiritu [nen Jehova],’ tan iinumen da so “kakabatan ya wala a manlapu ed tagey,” a “malinew, insan mareen, masimpit, tan mainomay a pikasian.”—Efeso 5:17, 18; Santiago 3:17.
Mabulos a Panagpasakup ed Inkasoberano nen Jehova
3. Anto so tombok na mabulos a panagpasakup, tan anton baleg a leksion so ibabangat na awaran ed sikatayo?
3 Say tombok ed mabulos a panagpasakup et say pamidbir ed lehitimon autoridad. Ipapanengneng na awaran na katooan a say pangipulisay ed inkasoberano nen Jehova so agmangitatarok na liket. Say ontan a panangipulisay so ag-angitarok na liket ed si Adan tan si Eva, nisay ed angipangulo na impanrebelde ra, si Satanas a Diablo. (Genesis 3:16-19) Diad kaplesan a mauges a kipapasen to, si Satanas so walaan na “baleg a sanok” lapud amta ton antikey lan tuloy so panaon to. (Apocalipsis 12:12) Say kareenan tan liket na katooan, on, ed interon talba, so mandedependi ed panamidbir ed matunong ya inkasoberano nen Jehova.—Salmo 103:19-22.
4. (a) Anton nengneng na panagpasakup tan katutulok so kaliktan nen Jehova ya ipanengneng na ariripen to? (b) Diad anto so nepeg a pakakumbinsian tayo, tan panon iyan imbalikas na salmista?
4 Ingen, lapud makapakelkelaw iran asimbang a kualidad to, agnaliliketan si Jehova ed ambetel a katutulok. Sikato so makapanyari, on! Balet sikato so agmaruksa. Sikato so sakey a Dios na aro, tan labay ton saray intelehentin pinalsa to so sibubulos ya ontulok ed sikato, lapud aro. Labay ton sikaray manpasakup ed inkasoberano to lapud sigpot-puson pinili ran ipasen so inkasikara ed silong na matunong tan lehitimon autoridad to, a kumbinsidon anggapo lay magmaong para’d sikara nen say itulok da ed sikato diad ando lan ando. Say nengneng na toon labay nen Jehova ed talba to so makaeksperiensia a singa ed salmista a nansulat: “Say katunongan nen Jehova nagnap, tan papataulien to so kamarerwa: say panamatua nen Jehova matua, gawaen to a makalakal so andi amta. Saray panontonan nen Jehova maptek ira, pagayagaen da so puso: say gangan nen Jehova malinlinew, liwawaan to so saray mata. Say takot ed Jehova maralus, mansiansia lawas, saray bilibilin nen Jehova tua ra, tan matunong ira ya amin.” (Salmo 19:7-9) Say naspot a panmatalek ed inkakanepegan tan ed inkatunong na inkasoberano nen Jehova—saya so nepeg a magmaliw ya awawey tayo no labay tayo so manbilay ed balon mundo nen Jehova.
Sigagayagan Manpasakup ed Ari Tayo
5. Panon ya atumangan si Jesus lapud katutulok to, tan anto so sibubulos tayon bidbiren?
5 Si Kristo Jesus a mismo so sakey ya uliran ya ehemplo ed panagpasakup ed mangatatawen ya Ama to. Nabasa tayo a “nanpaabeba a nagmaliw a matolok ya anga’d say ipapatey, on, say ipapatey ed cruz [panamairapan a kiew, NW].” Inyarum nen Pablo: “Kanian say Dios met sankatageyan so inpangidayew to ed sikato, tan inter to ed sikato so ngaran ya analonggaring ed amiamin a ngaran: A dia ed ngaran a Jesus so talimokoran na amin a pueg, na saray wala ed tawen, tan wala ed dalin tan wala ed dalem na dalin, Tan pian ganagana a dila nepeg da a patuaen ya si Jesu-Cristo sikato so Katawan, a kadayewan na Dios Ama.” (Filipos 2:8-11) On, sigagayaga tayon ontatalimokor ed arap na Pangulo tayo tan manuuley ya Ari, si Kristo Jesus.—Mateo 23:10.
6. Panon a papaneknekan nen Jesus a sakey a tasi tan pangulo ed nasyonal iran grupo, tan panon a say “uley to bilang ari” so mantultuloy kayari na baleg a kairapan?
6 Nipaakar ed Kristo a Pangulo tayo, impropesiya nen Jehova: “Nia, sikato so inter ko a nipaakar a tasi ed saray baleg a pangulo tan managgangan ed saray baley.” (Isaias 55:4) Diad mangaraldalin ya impanministeryo to tan diad impangiwanwan to na panagpulong a kimey manlapud tawen kayari impatey tan inkioli to, impanengneng nen Jesus a sikato so “tasi a matoor tan matua” ed Ama to diad saray totoo ed amin a nasyon. (Apocalipsis 3:14; Mateo 28:18-20) Saratan a nasyonal a grupo so nilalaman natan ed ondaraak a bilang na “baleg ya olop,” a makaliktar ed “baleg a kairapan” ed silong na panangidaulo nen Kristo. (Apocalipsis 7:9, 14) Balet say panangidaulo nen Jesus so agmanampot dia. Say ‘uley to [bilang principe, NW]’ so mangangga ed loob na sanlibon taon. Para’d matulok a totoo, sikato so manbilay unong ed ngaran to a “Makapakelaw, Mananimbawa, Makapanyari a Dios, Andi angaan ya Ama, Principe na Kareenan.”—Isaias 9:6, 7; Apocalipsis 20:6.
7. No pilalek tayon si Kristo Jesus so mangiwanwan ed sikatayo ed “saray subol na danudanum na bilay,” anto so nepeg tayon gawaen ya anggapoy panangipaleen, tan anto so mamakiwas ed sikatayon aroen nen Jesus tan si Jehova?
7 No kaliktan tayon nagunggunaan manlapud “saray sobol na danudanum na bilay” a diman ipapaarap na Kordero, si Kristo Jesus, iray maptek-impapuson totoo, nepeg ya ag-ipaleen a paneknekan tayo diad panamegley na ikiwas tayon sigagayagan manpasakup ed autoridad to bilang Ari. (Apocalipsis 7:17; 22:1, 2; ipareng so Salmo 2:12.) Ikuan nen Jesus: “No inaro yo ak, sumpal yo so saray gangan ko. Say walaan na saray gangan ko, et sumpalento’ra, sikato so mangaro ed siak: et say mangaro ed siak sikato so inaro nen Amak, tan sikato so aroen ko, et ipatnag ko naani so inkasiak ed sikato.” (Juan 14:15, 21) Labay mo tan aroen ka nen Jesus tan say Ama to? Sirin manpasakup ed autoridad da.
Sigagayagan Ontutulok Iray Manangasikaso
8, 9. (a) Anto so intarya nen Jesus para’d panamabiskeg na kongregasyon, tan diad anton paraan a sarayan lalaki so nepeg a magmaliw ya ehemplo na pulok? (b) Panon a say panagpasakup na saray Kristianon manangasikaso so nisisimbolo ed libron Apocalipsis, tan panon dan nepeg ya anapen so sakey a “matulok a puso” sano mamebenben na hudisyal iran pamaakaran?
8 “Say iglesia wala ed katotolok ed Cristo.” Bilang Manangasikaso na saya, sikato so angiter na “langkap a totoo” pian “onkana a pakayadyarian” na kongregasyon. (Efeso 4:8, NW, 11, 12; 5:24) Sarayan mamasiken ed espiritual so binagaan a ‘pastolan iray polok na Dios a wala ed sikara,’ ya agda ‘pakatawan so nimatalek a nitandad sikara, no ag ingen gawaen da so inkasikara a pinagkauliran a tomboken na saray polok.’ (1 Pedro 5:1-3) Say polok et kien nen Jehova, tan si Kristo so “maong a pastor.” (Juan 10:14) Lapud matukoy lambengat a manilalo iray manangasikaso na mabulos a kooperasyon na saray karnero ya inmatalek nen Jehova tan si Kristo ed sikara, sikaran mismo so nepeg a magmaliw a maabig ya ehemplo ed inkamapasakup.—Gawa 2:28.
9 Diad inmunan siglo, saray alanaan a manangasikaso so simbolikon nirerepresenta bilang “walad,” odino “ed,” nikawanan a lima nen Kristo, a mangipapanengneng na panagpasakup da ed sikato bilang say Ulo na kongregasyon. (Apoalipsis 1:16, 20:2:1) Ontan met natan, saray manangasikaso ed loob na saray kongregasyon na Tastasi nen Jehova so nepeg a manpasakup ed panangiwanwan nen Kristo tan ‘manpaabeba ed silong na makapanyarin lima’y Dios.’ (1 Pedro 5:6) Sano sikaray nakerew a mamenben na hudisyal iran pamaakaran, singa si Solomon nen matoor ni, nepeg iran manpikasi ed si Jehova: “Itdan mo so aripen mo sirin na makatalos a puso a mangokom na baley mo, pian nibiig ko so maong tan mauges.” (1 Arari 3:9) Say sakey a puson matulok so mamakiwas ed sakey a matatken a panggunaetan a nengnengen iray bengatla unong ed inengneng nen Jehova tan si Kristo Jesus ta pian say desisyon a nagawa ed dalin so mipadpara no nayari ed saman so agawan desisyon ed tawen.—Mateo 18:18-20.
10. Panon a panbanikelan na amin a manangasikaso ya aligen si Jesus diad dalan na impantrato to ed saray karnero?
10 Saray managbiahen manangasikaso tan mamatatken ed kongregasyon so manbanikel met a mangalig ed Kristo ed paraan na impantrato to ed saray karnero. Aliwan singa saray Pariseo, ag-angipakseb si Jesus na dakel a totontonen a mairap a tumboken. (Mateo 23:2-11) Inkuanto ed saray malakarnero: “Dago kayo’d siak, amin yo’n nasasagpotan tan nabebelatan, et itdan ta kayo’y pampainawa. Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso: et naromog yo’y inawa nipaakad ed saray kamarerwa yo. Ta say pakok mainomay, tan anlemew so awit ko.” (Mateo 11:28-30) Anggaman tua a balang Kristiano so nepeg a “taroken to naani so awi’ton dili,” kaukolan a tandaan na saray manangasikaso so ehemplo nen Jesus tan tulongan daray agagi ra a liknaen a say awit dan Kristianon responsabilidad so “mainomay,” “anlemew,” tan magayagan manakbat ed satan.—Galacia 6:5.
Teokratikon Panagpasakup
11. (a) Panon a narespeto na sakey so inkaulo tan ingen et agmagmaliw a peteg a teokratiko? Iyilustra. (b) Anto so kabaliksan na pagmaliw a tuan teokratiko?
11 Say teokrasya et uley na Dios. Lalanoren to so prinsipyo na inkaulon nibalikas ed 1 Corinto 11:3. Balet kabaliksan to’y nagkalalo ni nen say satan. Nayarin ompatnag so sakey a toon mangipanengneng na respeto ed inkaulo tan ingen agmagmaliw a teokratiko ed sigpot a pantalos ed salita. Panon a nagagawa iya? Pian iyilustra, say demokrasya et gobierno na totoo, tan say sakey a demokrata so uukeran bilang “sakey a toon manisia ed saray kalat na demokrasya.” Nayarin bidbiren na sakey a too a sikatoy demokratiko, mibiang ed saray eleksyon, tan aktibo ni ingen a pulitiko. Balet no, diad inkalapagan ya ikikiwas to et ibabaliwala to so espiritu na demokrasya tan amin a prinsipyon sasaglawien to, kasin nibaga a sikato so peteg a demokratiko? Mipadpara, pian magmaliw a peteg a teokratiko, say sakey a too so nepeg a manggawa na nagkalalo nen say basta panpasakup ed inkaulo diad kunkunwarin paraan. Nepeg ton aligen iray paraan tan kualidad nen Jehova. Kaukolan a sikatoy talagan uleyan nen Jehova ed amin a paraan. Tan lapud inikdan nen Jehova so Anak to na nagnap ya autoridad, say pagmaliw a teokratiko et kabaliksan to so pangalig ed si Jesus.
12, 13. (a) Anto, ed partikular, so nalalanor ed pagmaliw a teokratiko? (b) Kasin say teokratikon panagpasakup et lalanoren to so katutulok ed dakel a totontonen? Iyilustra.
12 Tandaan, kaliktan nen Jehova so mabulos a panagpasakup a papakiwasen na aro. Ontan so paraan na panuuley to ed talba. Sikato so mismon uliran na aro. (1 Juan 4:8) Si Kristo Jesus so “sinag na gloria to, tan dilin talintao na inka Dios to.” (Hebreos 1:3) Kakaukolanen toray tuan babangatan a manaaroan. (Juan 15:17) Kanian say pagmaliw a teokratiko et agto lambengat lalanoren so panpasakup noagta pagmaliw met a maaro. Satan a bengatla so nasegek a singa say onggendan: Say teokrasya so uley na Dios; say Dios so aro; kanian say teokrasya so uley na aro.
13 Nayarin isipen na matatken a pian magmaliw a teokratiko, nepeg a tumboken na agagi so amin a nengneng na totontonen. Say arum a mamatatken so nanggawa na totontonen a nanlapud saray suhestion a tunggal paminsan a niiiter na “matoor tan makabat ya aripen a klase.” (Mateo 24:45) Singa bilang, aminsan et insuheri a pian mainomay a nakabat iray agagi ed kongregasyon, maabig no agnaynay ya onyurong ed apasakey a yurongan ed Kingdom Hall. Say getma na saya et praktikal a suhestion, aliwan nipapaskar a totontonen. Balet say arum a mamatatken so nayarin labalabay dan gawaen a totontonen iman tan liknaen a saramay ag-ontutumbok ed satan so aliwan teokratiko. Ingen, nayarin walaray maabig a rason no akin a mas labay na sakey ya agi ya onyurong ed saksakey a lugar. No saratan a bengatla so agmaaro iran konsideraen na matatken, kasin sikato a mismo so talagan teokratiko? Pian magmaliw a teokratiko, ‘gawaen iray amin a gawaen komon dia ed aro.’—1 Corinto 16:14.
Manlingkor Tekep na Gayaga
14, 15. (a) Panon a naekalan na sakey a matatken so pigaran agagin lalaki tan bibii na gayaga ra ed panaglinkor ed si Jehova, tan akin a saya so aliwan teokratiko? (b) Panon ya impanengneng nen Jesus ya aapresyaen to so aron nibalikas ed serbisyo tayo, imbes ed karakel na oras? (c) Anto so nepeg ya ikunsidera na mamatatken?
14 Say pagmaliw a teokratiko et kabaliksan toy panlingkor ed si Jehova tekep na gayaga. Si Jehova so “bendito [maliket, NW] a Dios.” (1 Timoteo 1:11) Kaliktan ton saray managdayew to so manlingkor ed sikato a sigagayaga. Tandaan a saramay lawas manangipilit ed itumbok ed saray pananontonan a kabiangan na saray regulasyon a kaukolan a ‘nepeg ya unoren’ na Israel et say onggendan: “Manliket ka naani ed arap nen Jehova a Dios mo ed amin a pangitapewan mo na limam.” (Deuteronomio 12:1, 18) Antokaman so gawaen tayo ed serbisyo ed si Jehova so nepeg a pangayagaan, aliwan sakey a pabelat. Dakel so nagawaan na saray manangasikaso a panliketan na saray agagi a gawaey anggaay nayarian da diad panlingkor ed si Jehova. Diad kasuniyan, no saray mamatatken so agmaalwar, nayarin naekalan da na gayaga iray agagi ra. Alimbawa, no sikaray manggawa na panangikumpara, a kokomendaan iramay akadampot odino akalampas ed promedyo na kongregasyon ed oras a nausar ed panagtasi tan manpasiki ed saray ag-akaabot ed satan, panon so liknaan na saramay walaan na makatunongan a rason ed impangireport na dagdaiset ya oras? Kasin saya so agmanggawa ed sikara na mabiskeg tan permanentin liknaan a nankasalanan tan naekalan ira na gayaga?
15 Say pigaran oras a nitalaga na arum ed mapublikon panagtasi so nayarin mangirepresenta ed babaleg a sagpot nen say dakel ya oras ya inusar na arum ed panagpulong, nisesengeg ed mas malangwer ya edad, magmaong a bunigas, tan arum niran sirkumstansya. Diad sayan bengatla, sikara so agnepeg ya ukomen. On, si Jesus so inikdan na Ama na “pakauley [autoridad, NW] a mangokom.” (Juan 5:27) Kasin binalaw nen Jesus so dukan balo lapud say inyapay to so mas daiset nen say kaslakan? Andi, alikna to no anto so kasimbangan na saman a duaran melag a sinsilyo para’d say balo. Saman so “amin so wala ed sikato, salanti amin a panbilay to.” Agaylan aralem a panangaro ed si Jehova so irerepresenta na saraman! (Marcos 12:41-44) Kasin ibaliwala na mamatatken so maaro iran sagpot na saramay amin a wala ed sikara so mas abeba nen say “promedyo”? Diad walan panangaro ed si Jehova, saratan a sagpot so nayarin palampasan toy promedyo!
16. (a) No saray manangasikaso so mangusar na saray numero ed saray paliwawa ra, akin a kaukolan day nawalaan na pakatebek tan inkasimbang? (b) Panon a sankaabigan a natulongan iray agagin napadaak so serbisyo ra?
16 Kasin sarayan balikas natan so nayarin gawaen a sakey a balon “pananontonan” a saray numero—anggan saray promedyo—so agbalot saglawien? Aliwa met ya ontan! Say punto et saray manangasikaso so nepeg a magmaliw ya asimbang ed pamaseseg ed saray agagin mamalaknab ed ministeryo ra tan diad panulong ed sikaran gawaen itan ed anggaay nayarian da tekep na gayaga. (Galacia 6:4) Diad ilustrasyon nen Jesus ed saray talento, inmatalek na katawan iray kayarian to ed ariripen to “ed balang sakey unong ed nanbabangil a nasamel to.” (Mateo 25:14, 15) Ontan met a nepeg ya ikunsidera na mamatatken iray abilidad na balang manangipalapag na Panarian. Saya so mankakaukolan na pakatebek. Nayarin say arum so aktual a mankakaukolan na panamaseseg a manggawa na nagkalalo ni. Nayarin apresyaen da so tulong ed lalon magmaong a panangorganisa na aktibidad da. Diad antokaman a kipapasen, no sikaray natulongan a manggawa na anggaay nayarian da tekep na gayaga, satan a gayaga so maseguron mamabiskeg ed sikaran mangilaknab ed Kristianon aktibidad da no posibli.—Nehemias 8:10; Salmo 59:16; Jeremias 20:9.
Say Kareenan a Manlalapud Sigagayagan Panagpasakup
17, 18. (a) Panoon a say sigagayagan panagpasakup so mangitarok na kareenan tan inkatunong? (b) Anto so nakayarian tayo no peteg ya imanoen tayo iray ganggan na Dios?
17 Say sigagayagan panagpasakup ed lehitimon inkasoberano nen Jehova so mangitatarok ed sikatayo na baleg a kareenan. Inkuan na salmista ed pikakasi to ed si Jehova: “Abalbaleg a kareenan so wala ed saray mangaro na gangan mo: tan angapo a balot so sengegay kigapolan da.” (Salmo 119:165) Diad itulok ed ganggan na Dios, nagunggunaan tayon mismo. Imbaga nen Jehova ed Israel: “Onia so kuan nen Jehova, say Mananondon mo, say Santo na Israel: Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon. O no komon ta dinengel mo so saray bilin ko! dia ed ontan say deen mo singa komon sakey a ilog, tan say inkatunong mo singa komon daluyon na dayat.”—Isaias 48:17, 18.
18 Say dondon bagat nen Kristo so mangitatarok ed sikatayo na pikakareenan ed Dios. (2 Corinto 5:18, 19) No walaan tayo na pananisia ed mananondon a dala nen Kristo tan sigugunaet a panbanikelan ya ekalen iray kakapuyan tayo tan gawaen so linawa na Dios, nainawaan tayo ed saray liknaan na kasulitan. (1 Juan 3:19-23) Say ontan a pananisia, a tetekepan na saray gawa, so mangiiter ed sikatayo na matunong a talindeg ed arap nen Jehova tan say makapakelaw ya ilalo na pakaliktar ed “baleg a kairapan” tan panbilay ya ando lan ando ed balon mundo nen Jehova. (Apocalipsis 7:14-17; Juan 3:36; Santiago 2:22, 23) Amin na saya so nakayarian tayo ‘no dengelen iray bilin [na Dios].’
19. Anto so pandedependian na liket tayo natan tan say ilalo tayon andi-anggaan a bilay, tan panon ya imbalikas nen David so impapuson pananisia to?
19 On, say liket tayo natan tan say ilalo tayon andi-anggaan a bilay ed paraison dalin so misiglaotan ed sigagayagan panagpasakup tayo ed autoridad nen Jehova bilang Soberanon Katawan ed talba. Komon ta minanabang tayo ed saray liknaan nen David, ya angikuan: “Kien mo, O Jehova, so kinabalgan, tan saray pakayari, tan say gloria; tan say palabo, tan say katageyan: ta amin ya wala ed saray tawen tan dia ed dalin sikato so kien mo; kien mo so nanarian, O Jehova, tan nipatagey ka a singa olo ed labas na amin. Nanpadpara so saray kayamanan tan galang a manlapu ed sika, tan manuley ka ed amin; et dia ed limam wala so pakayari, tan pakapanyari; et dia ed limam wala so panamabaleg, tan panamabiskeg ed amin. Natan sirin, Dios mi, misalamat kami ed sika, tan idayew mi so magloria a ngaran mo.”—1 Awaran 29:11, 13.
Saray Punton Nepeg a Tandaan
◻ Anton nengneng na panagpasakup tan katutulok so kaliktan nen Jehova ya ipanengneng na ariripen to?
◻ Panon ya atumangan si Jesus lapud katutulok to, tan anto so nepeg a paneknekan tayo ed kundang a gawaen tayo?
◻ Panon a nepeg ya aligen na amin a manangasikaso si Jesus diad dalan na impantrato to ed saray karnero?
◻ Anto so lalanoren na pagmaliw a teokratiko?
◻ Antoran bendisyon so itatarok ed sikatayo na sigagayagan panagpasakup?
[Litrato ed pahina 24]
Papasesegen na mamatatken so pulok a manggawan sigagayaga ed antokaman a nayarian da
[Litrato ed pahina 26]
Panliketan nen Jehova iramay ontutulok ed sikato manlapud puso ra