Saray Pastol tan Karnero Diad Sakey a Teokrasya
“Ta si Jehova sikato so okom tayo, si Jehova sikato so mangiiter na tunong ed sikatayo, si Jehova sikato so ari tayo; ilaban to itayo.”—ISAIAS 33:22.
1. Panon a nibaga a saray inmunan-siglon Kristiano tan Kristianos natan so sakey a teokrasya?
SAY teokrasya et kabaliksan toy uley na Dios. Lalanoren to so pangawat ed pakauley nen Jehova tan itumbok ed saray pananontonan tan panamilin to diad ankabaleg odino ankelag iran panagdesisyon tayo’d bilay. Say inmunan-siglon kongregasyon so peteg a teokrasya. Simamatua sirin a nibaga na saray Kristiano: “Si Jehova sikato so okom tayo, si Jehova sikato so mangiiter na tunong ed sikatayo, si Jehova sikato so ari tayo.” (Isaias 33:22) Manwarin say alanaan a nakdaan so pinagkasentron kabiangan to, say organisasyon nen Jehova a Dios natan so sakey met a peteg a teokrasya.
Diad Antoran Dalan a Sikatayo Natan so Teokratiko?
2. Anto so sakey a paraan a panpapasakup na saray Tasi nen Jehova ed uley nen Jehova?
2 Panon tayon nibaga a say mangaraldalin ya organisasyon nen Jehova so sakey a teokrasya? Lapud saramay kabiangan na saya so peteg a manpapasakup ed uley nen Jehova. Tan tutumboken da so panangidaulo nen Jesu-Kristo, samay introno nen Jehova bilang Ari. Alimbawa, diad panaon na anggaan, sayan direktan ganggan manlapud Baleg a Teokrata so nipapasabi ed si Jesus: “Ibakim so kompay mo, et manani ka, ta say oras na panagani sinmabila; ta say aanien na dalin wala ya amagaan.” (Apocalipsis 14:15) Tutuloken tan gagawaen nen Jesus so panagani ed dalin. Mitutulongan iray Kristiano ed Ari ra ed sayan baleg a kimey diad siseseseg a panangipulong na maong a balita tan panaggaway babangatan. (Mateo 28:19; Marcos 13:10; Gawa 1:8) Diad panggawa ed satan, sikara met so kaiban kumikimey nen Jehova, say Baleg a Teokrata.—1 Corinto 3:9.
3. Panon a manpapasakup iray Kristiano ed teokrasya ed saray pamaakaran nipaakar ed moralidad?
3 Anggan diad kondukta, met, saray Kristiano so manpapasakup ed uley na Dios. Inkuan nen Jesus: “Balet say mangawa na tua ondago ed silew, pian saray gawá to niparongtal ira ya sikara so agawa dia ed Dios.” (Juan 3:21) Natan, walaray ag-ontundan pandedebatian nipaakar ed moral iran estandarte, balet sarayan sangsangan so anggapo ed limog na Kristianos. Momoriaen da bilang imoral so imbaga nen Jehova ya imoral, tan sigpot dan papaliisan itan a singa sakey a salot! Aasikasoen da met iray pamilya ra, ontutulok ed saray ateng da, tan mansiasiansian manpasakup ed superyor iran pakauley. (Efeso 5:3-5, 22-33; 6:1-4; 1 Timoteo 5:8; Tito 3:1) Kanian, sikaray onkikiwas ed teokratikon paraan, a mitunosan ed Dios.
4. Antoran lingon awawey so impatnag nen Adan tan si Eva tan si Saul, tan panon ya ipapanengneng na saray Kristiano so sakey a duman awawey?
4 Abalang nen Adan tan si Eva so Paraiso lapud kinaliktan dan manggawa na dili ran desisyon ed no anto so maptek tan lingo. Misuniyan a tuloy so kaliktan nen Jesus. Inkuanto: “Ag ko anapen so linawak a dili, noag say linawa na saman so angibaki dia ed siak.” (Juan 5:30; Lucas 22:42; Roma 12:2; Hebreos 10:7) Si Saul, say inmunan ari na Israel, so peteg a tinmulok ed si Jehova—balet ta aliwan sigpot. Lapud saya, sikato so inpulisay. Imbaga nen Samuel ed sikato: “Say panangonor sikato so magmaong nen say bagat, tan say panangimatlek, nen say taba na saray carnero a kalakian.” (1 Samuel 15:22) Kasin teokratiko so itumbok ed linawa nen Jehova ed sakey a paraan, nayarin diad pagmaliw a regular ed panagpulong odino iyaatendi ed saray miting, tan insan ikompromiso iray pamaakaran nipaakar ed moralidad odino ed arum niran paraan? Siempre andi! Panbabanikelan tayo a ‘gawaen a manlapu ed puso so kaliktan na Dios.’ (Efeso 6:6; 1 Pedro 4:1, 2) Aliwan singa si Saul, sigpot tayon manpapasakup ed uley na Dios.
Sakey a Modernon Teokrasya
5, 6. Panon so pidedeneng nen Jehova ed katooan natan, tan anto so resulta na pikokoopera ed sayan oksuyan?
5 Diad apalabas, si Jehova so nanuley tan angiparungtal na saray katuaan diad panamegley na totoo, a singa saray propeta, arari, tan apostoles. Natan, aliwan ontan la so kipapasen; anggapolaray apuyanan a propeta odino apostoles. Imbes, inkuan nen Jesus a legay maarin kiwawala to, ipabidbir to so sakey ya ulop na matoor iran patumbok to, say “matoor tan makabat ya aripen,” tan turoen itan a mangasikaso ed amin a kayarian to. (Mateo 24:45-47; Isaias 43:10) Nen 1919 satan ya aripen so akabatan bilang nakdaan na alanaan a Kristianos. Nanlapulad saman, bilang manangilaman na Mananguley ya Ulop na tastasi nen Jehova, saya so nagmaliw a sentro na teokrasya ed dalin. Diad interon mundo, say Mananguley ya Ulop so ilalaman na saray Branch Committee, saray managbaroy a manangasikaso, tan mamatatken ed kongregasyon.
6 Say pikokoopera ed teokratikon organisasyon so makanan kabiangan na panagpasakup ed teokrasya. Say ontan a pikokoopera so kaukolan para’d pankakasakey tan uksoy na sankamundoan diad “interon panlilimog na saray agagi.” (1 Pedro 2:17, NW) Diad ontan, saya so mamaliket ed si Jehova, ya “aliwa’n Dios na kolkol, no ag kareenan.”—1 Corinto 14:33.
Saray Mamatatken ed Teokrasya
7. Akin a nibaga a saray Kristianon mamatatken so teokratikon natotoro?
7 Amin ya aturon mamasiken, antokaman so kipapasen da ed pakauley, so manusumpal ed saray kualipikasyon a nidatak ed Biblia para’d betang a manangasikaso, odino masiken. (1 Timoteo 3:1-7; Tito 1:5-9) Nagkalalo ni, saray salita nen Pablo ed saray mamatatken na Efeso so onaaplika ed amin a mamatatken: “Aluaran yo so inkasika yo’n dili, tan say amin á kasimpokokan ya anginan na espirito santo ed sikayo á managbantay, pian pastulan yo so iglesia na Dios.” (Gawa 20:28) On, saray mamatatken so tinuro na masanton espiritu, a manlalapud si Jehova a Dios. (Juan 14:26) Say inkaturo ra so teokratiko. Nagkalalo ni, papastolan da so pulok na Dios. Say pulok so kayarian nen Jehova, aliwan saray mamatatken. Satan so sakey a teokrasya.
8. Antoray inkalapagan a responsabilidad na mamatatken natan?
8 Diad sulat to ed saray taga Efeso, indatak nen apostol Pablo so inkalapagan iran responsabilidad na mamatatken, a kuanto: “Saray arum inyan to ra ya apostoles; tan saray arum profetas; tan saray arum, manangipulong na maabig á pakabat; tan saray arum, pastor tan manangibangat, ya onkana a pakayadyarian na saray sasantos, a nipaakar ed gawa na panaglingkor, anga ed kipaalagey na laman nen Cristo.” (Efeso 4:11, 12) Anggapo laray apostol tan propeta kayari na inkaugaw na “laman nen Cristo.” (Ipareng so 1 Corinto 13:8.) Balet saray mamatatken so siansian okupado ed panag-ibanghelyo, panagpastol, tan panagbangat.—2 Timoteo 4:2; Tito 1:9.
9. Panon so nepeg a pangiparaan na mamatatken ed inkasikara pian mangirepresenta ed linawa na Dios diad kongregasyon?
9 Lapud say teokrasya so uley na Dios, saray epektibon mamatatken so pamilyar a tuloy ed linawa na Dios. Inganggan si Josue a basaen to so Ganggan ya inagew-agew. Saray mamatatken met so kaukolan a manbasa tan ontupleg a maparanay ed saray Kasulatan tan magmaliw a pamilyar a tuloy ed literatura na Biblia ya impalapag na matoor tan makabat ya aripen. (2 Timoteo 3:14, 15) Lalaktipen na saya iray magasin a Panag-Bantayan tan Awake! tan arum niran palapagan a mangipapanengneng no panon ya iyaplika iray prinsipyo na Biblia ed espisipiko iran situasyon.a Anggaman ontan, manwarin importanti para’d sakey a matatken ya amtaen tan tumboken iray totontonen a nipalapag a literatura na Watch Tower Society, sikato komon so magmaliw met a pamilyar a tuloy ed saray Makasulatan a prinsipyo a basiyan para’d saray totontonen. No ontan et sikato so walad kipapasen a mangiyaplika ed saray Makasulatan a totontonen tekep na pakatalos tan panangabagey.—Ipareng so Miqueas 6:8.
Panaglingkor Tekep na Kristianon Espiritu
10. Anton mauges ya awawey so nepeg a bantayan na saray mamatatken, tan panon?
10 Ngalngali diad taon 55 K.P., insulat nen apostol Pablo so inmunan sulat to ed kongregasyon na Corinto. Sakey ed saray probleman niresolbi to et say nipaakar ed pigaran lalakin kaliktan day magmaliw a prominenti ed kongregasyon. Insulat nen Pablo: “Sikayo napnek kayo la, sikayo mayaman kayo la, akapanari kayo ya andi kami. Tan labay ko komon a manari kayo, ta pian makapiari kami met komon ed sikayo.” (1 Corinto 4:8) Diad inmunan siglo K.P., amin a Kristiano so awalaan na ilalon miuley ed si Jesus bilang mangatatawen ya arari tan saserdote. (Apocalipsis 20:4, 6) Anggaman ontan, mapatnag ya alingwanan na arum ed Corinto ya anggapo laray arari ed dalin ed Kristianon teokrasya. Imbes ya onkiwas a singa saray arari na sayan mundo, saray Kristianon pumapastol so mamabayubo na inkamapaabeba, kalidad a mamaliket ed si Jehova.—Salmo 138:6; Lucas 22:25-27.
11. (a) Antoray arum a matalonggaring ya alimbawa na inkamapaabeba? (b) Anton panmoria nipaakar ed inkasikara so nepeg a niwala ed mamatatken tan ed amin niran Kristiano?
11 Kasin say inkamapaabeba so kaleteyan? Andin balot! Si Jehova a mismo so nadedeskribe bilang mapaabeba. (Salmo 18:35) Saray arari na Israel so angiwanwan ed saray armada ed pibabakal tan nanuley ed nasyon ed silong nen Jehova. Ingen, balang sakey so kaukolan a magmaliw a maalwar ‘pian ag onkinon so puso to ed saray agagi to.’ (Deuteronomio 17:20) Say apaolin Jesus so sakey a mangatatawen ya Ari. Anggaman ontan, sanen wadiad dalin, inurasan to iray sali na saray babangatan to. Agaylan inkamapaabeba! Tan diad pangipanengneng a labay ton saray apostol to so magmaliw a singa sikaton mapaabeba, inkuanto: “No siak sirin so Katawan tan Managbangat, et inorasan ko so saray sali yo, sikayo met nepeg yo so manoorasan na sali sakey tan sakey.” (Juan 13:14; Filipos 2:5-8) Amin a gloria tan galang so nepeg a nipaarap ed si Jehova, aliwan ed siopaman a too. (Apocalipsis 4:11) Balanglan sikaray mamatatken odino andi, amin a Kristiano so nepeg a manisip nipaakar ed inkasikara unong ed liwawa na saray salita nen Jesus: “Ariripen kami, ya andi kakanaan; ginawa mi so nepeg mi a gawaen.” (Lucas 17:10) Antokaman ya arum a panmoria so aliwan teokratiko.
12. Akin a say aro so makanan kualidad a nepeg a bayuboan na Kristianon mamatatken?
12 Katekep na inkamapaabeba, babayuboan na Kristianon mamatatken so aro. Impanengneng nen apostol Juan so kaimportantian na aro sanen inkuanto: “Say ag mangaro ag to kabat so Dios; ta say Dios sikato so aro.” (1 Juan 4:8) Saray agmaaron totoo so aliwan teokratiko. Agda kabat si Jehova. Nipaakar ed Anak na Dios, kuan na Biblia: “Inaro to [nen Jesus] so saray totoo to ya wala ed mundo, inaro to ra anga ed kasampotan.” (Juan 13:1) Diad pitotongtong ed 11 a lalakin magmaliw a kabiangan na mananguley ya ulop ed Kristianon kongregasyon, inkuan nen Jesus: “Saya so gangan ko, a manaaroan so sakey tan sakey ed sikayo, salanti singa inpangarok ed sikayo.” (Juan 15:12) Say aro so pakabidbiran a tanda na tuan Inkakristiano. Sasagyaten toray nadidismaya, saray mannangis, tan saray adakep ed espiritual a manpipirawat na kawayangan. (Isaias 61:1, 2; Juan 13:35) Saray mamatatken so nepeg a magmaliw ya uliran ed panangipanengneng na aro.
13. Anggaman saray problema natan so mairap, panon a diad amin a situasyon et magmaliw a sakey a puersan pankaabigan so sakey a matatken?
13 Natan et mabetbet a kekerewen iray mamatatken ya ontulong a manresolbi ed maselewet iran problema. Saray problema ed panamaley so nayarin nilamot a tuloy tan mantutultuloy. Saray kalangweran so walaan na saray probleman mairap a natalosan na saray susto la’d edad. Saray emosyonal a sakit so mabetbet a mairap a talosan. Nayarin ag-amta na sakey a matatken no antoy gawaen to sano nipaparap ed saratan a bengatla. Balet sikato so matalek a no sikatoy sipipikasin maniilalo ed kakabatan nen Jehova, no sikato so talagan mansusukimat ed Biblia tan ed impormasyon ya impalapag na matoor tan makabat ya aripen, tan no sikato so midedeneng a sipapaabeba tan maaro ed saray karnero, sikato so magmaliw a makagunggunan impluensya anggan ed sankairapan a situasyon.
14, 15. Antoray arum a balikas a mangipapanengneng a bebendisyonan nen Jehova iray totoo to na dakel a maabig a mamatatken?
14 Mayamyaman a binendisyonan nen Jehova so organisasyon na saray “langkap [a] totoo.” (Efeso 4:8, NW) Tunggal paminsan, makakaawat so Watch Tower Society na makapaligsay-puso iran sulat a mamapaneknek ed aron ipapanengneng na mapaabeban mamatatken a siaabagey a mamapastol ed saray karnero na Dios. Alimbawa, sakey a matatken ed kongregasyon so nansulat: “Agko nalingwanan so impanbisita na manangasikaso na sirkito ya akaapektan tuloy ed siak odino siansia nin nikokomento ed kongregasyon. Tinulongan ak na manangasikaso na sirkito a nanengneng so kaimportantian na positibon awawey diad pitutuyaw ed saray agagi, a say idadanet et komendasyon.”
15 Sakey ya agin bii a kaukolan a manbaroy pian manpatambal ed sakey ya ospital so nansulat: “Agaylan makapaseguro so pakapiabet ed sakey a matatken ed saman ya inmunan makapaaburidon labi ed ospital ya arawin tuloy ed ayaman mi! Sikato tan arum ya agagi so angusar na baleg a panaon para’d siak. Anggan saray totoo ed mundo a makaamta ed nasasagmak ko ed saman so makaliknan agak akalegyas no aliwan lapud ligliwa, panagtalima, tan saray pikakasi na saramay maaro tan debotadon agagi.” Sananey nin agin bii so nansulat: “Siak so mabilay ni anggad natan lapud ulop na mamatatken a siaanos a tinmulong ed siak ed pipupuligesgesan ed alabas a gonigon. . . . Ag-amta na agin laki tan say asawa to no antoy ibaga ra ed siak . . . Balet say akatenyeg ed siak a tuloy et say bengatlan anggaman agda natalosan no antoy sasagmaken ko ed saman, et simamaaron tinalima da ak.”
16. Anton simbawa so iiter nen Pedro ed saray mamatatken?
16 On, dakel a mamatatken so mangiyaaplika ed simbawa nen apostol Pedro: “Pastolan yo so saray polok na Dios a wala ed sikayo, panpagaan yo ra ya ag iparalan ed kabiskegan, no ag dia ed kalakal a mabolos unong ed linaway Dios; aliwan lapu’d mabanday a pananobo no ag lapu ed ataria’n kalakal. Ni say pakatawan kayo ed nimatalek a nitandad sikayo, no ag ingen gawaen yoy inkasikayo a panagkauliran a tomboken na saray polok.” (1 Pedro 5:1-3) Agaylan bendisyon iratan a teokratikon mamatatken!
Saray Karnero ed Teokrasya
17. Mamitla na pigaran kualidad a nepeg a bayuboan na amin a membro na kongregasyon.
17 Anggaman ontan, say sakey a teokrasya et agtutugyopen na saray mamatatken labat. No saray pumapastol et kaukolan a magmaliw a teokratiko, ontan met ed saray karnero. Diad antoran paraan? Bueno, pareho iran prinsipyo a mangiwawanwan ed saray pumapastol so nepeg a mangiwanwan ed saray karnero. Amin a Kristiano, aliwan saray mamatatken lambengat, so nepeg a magmaliw a mapaabeba no labay dan awaten so panamendisyon nen Jehova. (Santiago 4:6) Amin so nepeg a mamayubo na aro lapud no anggapo itan saray bagat tayo ed si Jehova so agmamaliket ed sikato. (1 Corinto 13:1-3) Tan amin tayo, aliwa lambengat iray mamatatken, so nepeg a ‘napano komon na kakabatan na linawa to [nen Jehova] ed amin a karonongan a maespiritu tan pakatalos.’—Colosas 1:9.
18. (a) Akin a say ataptapew a pikakabat ed katuaan so agmagenap? (b) Panon ya amin tayo so napano na suston pikakabat?
18 Saray kalangweran tan saray maedad la so naynay a nidudunget ed mairap iran desisyonan legan a panggugunaetan dan mansiansian matoor anggaman sikaray manbibilay ed mundo nen Satanas. Saray uso ed mundo nipaakar ed panangawes, musika, saray sine, tan literatura so manitibukel ed pakasubokan na espiritualidad na arum. Say ataptapew a pikakabat ed katuaan so agmagenap pian ontulong ed sikatayon mansiansian asimbang. Pian naseguro so pansiansian matoor, sikatayo so nepeg a napano na suston pikakabat. Nakaukolan tayo so pakatebek tan kakabatan a niiter lambengat na Salita na Dios ed sikatayo. (Uliran 2:1-5) Kabaliksan na saya a bayuboan so maabig a niyugalin panagaral, panagdalepdep ed naaralan tayo, tan panangiyaplika ed saratan. (Salmo 1:1-3; Apocalipsis 1:3) Sinulatan nen Pablo so amin a Kristiano, aliwa lambengat iray mamatatken, sanen inkuanton: “Say taganon anawet sikato so kien na saray ayadyarin totoo, salanti saraman so lapud panagagamil, saray pakalikna ra apasal ed panangibiig na maong tan mauges.”—Hebreos 5:14
Saray Pumapastol tan Saray Karnero so Mankakasakey a Mankikimey
19, 20. Anton simbawa so niiter ed amin a mikokoopera ed saray mamatatken, tan akin?
19 Kaunoran, nepeg a nibaga a say tuan teokratikon espiritu so ipapanengneng na saramay mikokoopera ed mamatatken. Si Pablo so nansulat ed si Timoteo: “Saray mamasiken a manuley a maong nibilang ira komon a manepeg ed mamidua’n dayew, nagkalalo la ed saray mansagpot ed salita tan dia ed panagbangat.” (1 Timoteo 5:17; 1 Pedro 5:5, 6) Say pagmaliw a sakey a matatken so maabig a pribilihyo, balet maslak a mamatatken so lalakin walaan na pamilya ya inagew-agew a manaanap na panbilay tan walaan na asawa tan ananak ya aasikasoen. Anggaman sikaray naliliketan a manlingkor, say panaglingkor da so mas mainomay tan lalon makatumang sano say kongregasyon so mitulongan, ag-alablabas a mamabalaw tan makapabelat.—Hebreos 13:17.
20 Inkuan nen apostol Pablo: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na inpanbilay da, alig yo so pananisia’ra.” (Hebreos 13:7) Andi, agpinaseseg nen Pablo iray agagi a tumboken iray mamatatken. (1 Corinto 1:12) Say itumbok ed sakey a too so aliwan teokratiko. Balet peteg a makabat so pangalig ed asubok a pananisia na sakey a teokratikon matatken ya aktibo ed panag-ebanghelyon kimey, a regular ed iyaatendi ed saray miting, tan midedeneng tekep na inkamapaabeba tan aro ed kongregasyon.
Sakey a Pantasi ed Pananisia
21. Panon a nipapatnag na saray Kristiano so mabiskeg a pananisia a singa ed pananisia nen Moises?
21 On, say kiwawala na teokratikon organisasyon ed sayan sankaugsan a panaon na awaran na too so sakey a pantasi ed pakayari na Baleg a Teokrata. (Isaias 2:2-5) Satan met so sakey a pantasi ed pananisia na ngalngali limaran milyon a Kristianon lalaki, bibii, tan ugugaw, a mipupuligesgesan ed saray problema ed inagew-agew a kabibilay balet agdan balot lilingwanan a si Jehova so Manuley da. No panon a si Moises so matoor a “nansiansia a singa to nengnengnengen so ag nanengneng,” ontan met a saray Kristiano natan so nepeg a walaan na mipadparan mabiskeg a pananisia. (Hebreos 11:27) Sikaray apribilihyoan a manbilay ed sakey a teokrasya, tan sikaray inagew-agew a misadsalamat ed si Jehova para’d satan. (Salmo 100:4, 5) Legan a naeeksperiensia ra so manangiliktar a pakayari nen Jehova, maliket iran mangiyabawag: “Si Jehova sikato so okom tayo, si Jehova sikato so mangiiter na tunong ed sikatayo, si Jehova sikato so ari tayo.”—Isaias 33:22.
[Paimano ed leksab]
a Arum ed saratan a palapagan et say libron “Imanoen Yo so Inkasikayo tan Amin a Kasimpukokan,” a mankarga na saray Makasulatan a totontonen tan nitatarok itan para’d aturo iran manangasikaso na kongregasyon, odino mamatatken.
Anto so Ipapanengneng na Biblia?
◻ Diad anton dalan a manpapasakup iray Kristiano ed sakey a teokrasya?
◻ Panon a naoorganisa so teokrasya natan?
◻ Diad anton dalan ya iparaan na saray mamatatken so inkasikara pian sumpalen iray responsabilidad da?
◻ Antoran Kristianon kualidad so makana para’d mamatatken a bayuboan tan ipanengneng?
◻ Diad teokrasya, anton siglaotan so nepeg a niwala ed baetan na saray karnero tan saray pastol?
[Litrato ed pahina 16]
Abalang nen Adan tan si Eva so Paraiso lapud kaliktan dan manggaway dilin desisyon da nipaakar ed maptek tan lingo
[Litrato ed pahina 18]
No say sakey a matatken so midedeneng a sipapaabeba tan maaro ed saray karnero, sikato so lawas magmaliw a puersan pankaabigan