Mansiansian Maapit ed Teokrasya

“Si Jehova sikato so Ukom tayo, si Jehova sikato so Mangiiter na tunong ed sikatayo, si Jehova sikato so Ari tayo.”​—ISAIAS 33:22.

1. Akin a say gobierno et makapainteres ed maslak a totoo?

SAY teman nipaakar ed gobierno so makapainteres a tuloy ed amin. Say maong a gobierno so mangitarok na kareenan tan aligwas. Inkuan na Biblia: “Say ari ed panamegley na tunong iletneg to so dalin.” (Uliran 29:4) Diad biek a dapag, say mauges a gobierno so manresulta ed ag-inkahustisya, inkauges, tan panaglames. “Sano say marelmeng a too manuley, say baley maningel.” (Uliran 29:2) Diad intiron awaran, sinali la na totoo so dakel a klase na gobierno, tan makapaermen, mabetbet iran “maningel” lapud panaglames na saray manuley da. (Eclesiastes 8:9) Kasin ontalona so antokaman a pormay gobierno diad pangitarok na magnayon a kapenek na saray uuleyan to?

2. Akin a say “teokrasya” et matukotukoy a deskripsion ed gobierno na kadaanan ya Israel?

² Sinalambit nen manag-awaran a Josephus so sakey a nikadkaduman nengneng na gobierno sanen insulat to: “Inmatalek na arum a totoo so supremon mapolitikan pakayari ed saray monarkya, saray arum et diad saray oligarkya, ingen saray arum et diad kabanyakan. Balet say manangiter na ganggan ed sikatayo [si Moises], so ag-asagyat ed sarayan porma na mapolitikan organisasyon, balet inusar to’d konstitusyon to so porma a​—no abuloyan so nikabkabiig a balikas​—et natawag a ‘teokrasya,’ ya ipapalima so intiron inkasoberano tan autoridad ed Dios.” (Against Apion, II, 164-5) Unong ed Concise Oxford Dictionary, say kabaliksan na teokrasya et “sakey a porma na gobiernoy Dios.” Agnabasa iyan salita diad Biblia, balet matukotukoy itan a manideskribe ed gobierno na kadaanan ya Israel. Anggaman saray Israelita et awalaay nanengneng ya ari, say peteg a manuley da et si Jehova. Oniay inkuan na Israelitan propeta a si Isaias: “Si Jehova sikato so Ukom tayo, si Jehova sikato so Mangiiter na tunong ed sikatayo, si Jehova sikato so Ari tayo.”​—Isaias 33:22.

Anto so Tuan Teokrasya?

3, 4. (a) Anto so tuan teokrasya? (b) Diad magano lan arapen, antoran bendision so itarok na teokrasya ed amin a katooan?

³ Manlapulad nen inusar nen Josephus so salita, dakel a nasyon so nadedeskribe bilang saray teokrasya. Arum ed sikara so pinmatnag a mapeget, panatiko, tan marukduksa. Kasin tudtua irayan teokrasya? Aliwan diad pantalos ya impangusaran nen Josephus ed salita. Say problema et napapalaknab so kabaliksay “teokrasya.” Uukeran itan na say World Book Encyclopedia bilang “sakey a porma na gobierno a say estado et uuleyan na saserdote odino saray saserdote, tan saray membro na inkasaserdote et walaay autoridad ed sibil tan relihyoson pamaakaran.” Balet, say tuan teokrasya so aliwan gobierno na saray saserdote. Satan so talagan uley na Dios, gobierno na Manamalsa ed uniberso, si Jehova a Dios.

⁴ Diad magano lan arapen, say intiron dalin so nisilong ed teokrasya, tan agaylan bendision itan! “Say Dios met lanlamang so wala naani ed [katooan] . . . Tan punasen to so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:3, 4) Agnitarok na makasaserdoten uley na ag-ayadyarin totoo so ontan a liket. Say Dios lambengat so makapangitarok. Kanian, agsasalien a pakurangen na saray tuan Kristiano so teokrasya diad panamegley na politika. Maanos dan aalagarey Dios a mangiletneg na sankamundoan a teokrasya diad dilin panaon to tan diad mismon dalan to.​—Daniel 2:44.

5. Iner so kukurangay tuan teokrasya natan, tan antoran tepet so onlelesa nipaakar ed satan?

⁵ Balet, anggan natan et onkukurang lay tuan teokrasya. Iner? Diad limog na saramay boluntaryon manpapasakop ed uley na Dios tan mantutulongan a manggaway linawa to. Saratan a matoor so natitipon bilang sankamundoan ya espiritual a “nasyon” diad espiritual a “dalin” to. Sikara so nakekeraan na “[say] Israel na Dios” tan say masulok a limara tan kapaldua a milyon a Kristianon kakaiba ra. (Isaias 66:8; Galacia 6:16) Saraya so uuleyan nen Jesu-Kristo, say mangatatawen ya Ari ya introno nen Jehova a Dios, “[say] Ari ya andi-angga.” (1 Timoteo 1:17; Apocalipsis 11:15) Diad anton paraan a teokratiko iyan organisasyon? Panon a momoriaen na saray membro to so autoridad na sekular iran gobierno? Tan panon a mamantinien na saray totoon mangaagamil na autoridad diad loob na espiritual a nasyon da so prinsipyo na teokrasya?

Sakey a Teokratikon Organisasyon

6. Panon a nauleyan na Dios so sakey a nanengneng, atooan ya organisasyon?

⁶ Panon a nauleyan nen Jehova so sakey ya atooan ya organisasyon, anta sikato et manaayam ed agnanengneng a katawenan? (Salmo 103:19) Posibli itan lapud saramay kalimog ed satan et ontutumbok ed apuyanan a simbawa: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo.” (Uliran 2:6; 3:5) Papauleyan ira ed Dios legan dan tutumboken so “ganggan nen Kristo” tan iyaaplika so pinuyanan iran prinsipyo na Biblia diad agew-agew a kabibilay da. (Galacia 6:2; 1 Corinto 9:21; 2 Timoteo 3:16; nengnengen so Mateo 5:22, 28, 39; 6:24, 33; 7:12, 21.) Pian nagawaan iya, kaukolan a magmaliw iran estudyante na Biblia. (Salmo 1:1-3) Singa saray “mapagalang” a taga-Berea nensaman, ag-ira ontutumbok ed totoo noagta lanang dan susukayan diad Biblia iray bengatlan aaralen da. (Gawa 17:10, 11; Salmo 119:33-36) Singa say salmista, ipipikasi ran: “Bangatan moak na maong a panangisisip, tan kakabatan; ta sinisiak so saray ganggan mo.”​—Salmo 119:66.

7. Anto so uksoyan na panangasikaso diad teokrasya?

⁷ Diad kada organisasyon, walaray kaukolan a mangagamil na autoridad odino mangidirehi. Agnipuera iray Tastasi nen Jehova, tan tutumboken day uksoyan na autoridad ya indatak nen apostol Pablo: “Say ulo na balang laki si Kristo; tan say ulo na balang bii say laki; tan say ulo nen Kristo say Dios.” (1 Corinto 11:3) Mitunosan ed saya, say kualipikado labat a lalaki so manserbi bilang mamatatken ed saray kongregasyon. Tan anggaman si Jesus​—“say ulo na balang laki”​—et walad tawen, wala niran siansia diad dalin so “saray nakdaan” na alanaan ya agagi to, a walaay ilalon miuley ed sikato diad katawenan. (Apocalipsis 12:17; 20:6) Saraya so manitibukel ed tugyop na “matoor tan makabat ya aripen.” Ipapanengneng na saray Kristiano so panpapasakop da’d si Jesus, tan sirin dia ed ulo nen Jesus, si Jehova, diad pangaawat da ed panangasikaso na satan ya “aripen.” (Mateo 24:45-47; 25:40) Diad onian paraan, say teokrasya et mauksoy. “Say Dios aliwan Dios na kolkol, noag kareenan.”​—1 Corinto 14:33.

8. Panon so panusuportay Kristianon mamatatken ed prinsipyo na teokrasya?

⁸ Susuportaan na Kristianon mamatatken so prinsipyo na teokrasya lapud bibidbiren dan sikaray walaay eebatan ed si Jehova ed no panon dan aagamiley limitadon sukat na autoridad da. (Hebreos 13:17) Tan diad panagdesisyon, manmamatalek ira ed kakabatan na Dios, aliwan ed sikaran dili. Diad sayan aspekto et natutumbok day alimbawa nen Jesus. Sikato so sankakabatan a too a nambilay ed kapiganman. (Mateo 12:42) Anggaman kuan, inkuanto ed saray Judio: “Say Anak anggapoy nagawaan to ed inkasikato, noag say nanengneng to a gagawaen na Ama.” (Juan 5:19) Mipadpara so awawey na mamatatken ed si Arin David. Inagamil toy ambelat ya autoridad diad teokrasya. Ingen, nilabay ton tumboken so dalan nen Jehova, aliwan sikaton dili. Impikasi to: “Ibangat mo ed siak so dalan mo, O Jehova, tan itabin moak ed mapatar a basbas.”​—Salmo 27:11.

9. Nipaakar ed nanduruman ilalo tan pribilihyo na serbisyo diad teokrasya, anto so asimbang a panmoria na dedikadon Kristianos?

⁹ Susuppiaten na arum no kasin agpanaglabi so pangaagamil labat na kualipikadon lalaki ed autoridad diad kongregasyon odino say arum et walaay mangatatawen ya ilalo bangta say arum et walaay mangaraldalin ya ilalo. (Salmo 37:29; Filipos 3:20) Balet, aapresiaen na saray dedikadon Kristiano irayan uksoyan a nidatak ed Salitay Dios. Teokratiko iratan. No walay manuppiat ed saratan, kaslakan et saramay agmamibidbir ed saray prinsipyo na Biblia. Likud ni, amta na Kristianos a parepareho so lalaki tan bibii ed imaton nen Jehova no nipaakar ed kilalaban. (Galacia 3:28) Parad saray tuan Kristiano, say pagmaliw a managdayew na Soberano na uniberso so sankatagyan a posiblin pribilihyo, tan maliket iran mangawat ed antokaman a betang ya indatak ed sikara nen Jehova. (Salmo 31:23; 84:10; 1 Corinto 12:12, 13, 18) Niarum ni, say andi-anggaan a bilay, balanglan diad tawen odino diad paraison dalin, so talagan makapakelkelaw ya ilalo.

10. (a) Anton maabig ya awawey so impatnag nen Jonatan? (b) Panon a nipapanengneng na Kristianos natan so awawey a singa si Jonatan?

¹⁰ Kanian, mipadpara iray Tastasi nen Jehova ed si Jonatan, say matakot ed Dios ya anak nen Arin Saul. Maseguron magmaliw komon ya ekselentin ari si Jonatan. Balet, lapud ag-inkamatoor nen Saul, pinili nen Jehova si David bilang mikaduan ari na Israel. Kasin nan-imbelan iya nen Jonatan? Andi. Sikatoy nagmaliw a maong a kaaro nen David tan sinalimbengan to ni ingen manlapud si Saul. (1 Samuel 18:1; 20:1-42) Mipadpara, agpan-iimonan na saramay walaay mangaraldalin ya ilalo iramay walaay mangatatawen ya ilalo. Tan agpaniimonan na saray tuan Kristiano iramay mangaagamil na teokratikon autoridad diad loob na kongregasyon. Imbes, ‘papablien [da] ira na sankatagyan ya aro,’ a bibidbiren so pansasagpot da nisesengeg ed saray espiritual ya agagi ra.​—1 Tesalonica 5:12, 13.

Say Teokratikon Panmoria ed Sekular ya Uley

11. Panon a momoriaen na saray Kristiano a manpapasakop ed teokratikon pananguley iray sekular ya autoridad?

¹¹ No saray Tastasi nen Jehova et walad silong na teokrasya, uley na Dios, panon dan momoriaen iray manuley na nasyones? Inkuan nen Jesus a saray patumbok to et “ag-ira taga-mundo.” (Juan 17:16) Balet, bibidbiren na saray Kristiano so obligasyon da’d si “Cesar,” saray sekular a gobierno. Inkuan nen Jesus a nepeg dan “bayaran . . . ed si Cesar so kien nen Cesar, tan ed Dios so kien na Dios.” (Mateo 22:21) Unong ed Biblia, saray gobierno na too et “impasen na Dios ed relatibon posisyon da.” Aabuloyan nen Jehova, say Lapuan na amin ya autoridad, iray gobierno a niwala, tan iilaloan toran manggaway maong ed saramay walad asakopan da. Sano gawaen da itan, sikaray “ministro na Dios.” Saray Kristiano so manpapasakop ed gobierno na nasyon a kawalaan da “nisesengeg ed konsiensia [ra].” (Roma 13:1-7, NW) Siempre, no say kaukolanen na estado et kontra ed ganggan na Dios, ‘nakaukolan ya unoren [na Kristiano] so Dios, nen saray totoo.’​—Gawa 5:29.

12. Sano saray Kristiano et pasegsegangen na saray autoridad, siopan alimbawa so tutumboken da?

¹² Komusta balet no saray tuan Kristiano et pasegsegangen na saray ginogobiernon autoridad? Tumboken da’d satan so alimbawa na inmuunan Kristiano, a nansungdo ed saray peryodo na baleg a panamasegsegang. (Gawa 8:1; 13:50) Nailaloan irayan subok ed pananisia, lapud impasakbay la nen Jesus ya onsabi iratan. (Mateo 5:10-12; Marcos 4:17) Ingen, saraman ya inmuunan Kristiano so agbinmales ed saray mamapasegsegang ed sikara; nisay linmetey so pananisia ra lapud pananesdes. Imbes, tinumbok day alimbawa nen Jesus: “Sanen ayew-ayewen da agto binmales ya angayew; sanen apagpairap, agnan-ingongot; noag ingen inmatalek to so laman to ed manangiter na tunong.” (1 Pedro 2:21-23) On, dinaeg na saray Kristianon prinsipyo iray panamasulag nen Satanas.​—Roma 12:21.

13. Panoy ikikiwas na Tastasi nen Jehova ed saray kampanyan panamasegsegang tan panagpauges ed sikara?

¹³ Tua met itan natan. Kaleganan na sayan siglo, saray Tastasi nen Jehova so maniirap a tuloy ed saray lima na maruksa iran manuley​—a singa impasakbay la nen Jesus. (Mateo 24:9, 13) Diad arum a daldalin, saray katilaan tan panagpauges so ikakayat na saramay mamapaskar ed saray autoridad ya onsumpa ed masimoon a Kristiano. Siansia, anggaman ed ontan iran “mauges a report,” saray Tastasi diad panamegley na maabig a kondukta ra et irerekomenda ray inkasikara bilang ministros na Dios. (2 Corinto 6:4, 8) Sano posibli, iprepresenta ra so kaso ra ed saray opisyal tan diad saray korte na say dalin ta pian ipanengneng da so inkainosenti ra ed gawan-mauges. Uusaren da so antokaman a paraan a lukas ed sikara pian mapublikon naidepensa so maong a balita. (Filipos 1:7) Balet, kayari ran ginawa so anggaay nayarian da unong ed ganggan, ipapalima ray bengabengatla ed si Jehova. (Salmo 5:8-12; Uliran 20:22) No nakaukolan, sikara, singa saray inmuunan Kristiano, so ag-antakot a manirap nisesengeg ed inkatunong.​—1 Pedro 3:14-17; 4:12-14, 16.

Iyuna so Pangigloria ed Dios

14, 15. (a) Anto so sankamanunaan ed saramay manusuporta’d prinsipyo na teokrasya? (b) Diad anton inkagawa ya impanengneng nen Solomon so maabig ya alimbawa na inkamapaabeba ed panangasikaso to?

¹⁴ Sanen binangatan nen Jesus iray patumbok to a manpikasi, say pilimeron bengatla a sinalambit to et say kapasantos na ngaran nen Jehova. (Mateo 6:9) Mitunosan ed saya, saramay manbibilay ed silong na teokrasya so mangiglogloria ed Dios, aliwan diad sikaran dili. (Salmo 29:1, 2) Irereport na Biblia a nen inmunan siglo, saya so impakasbelan na arum ya ag-tinmumbok ed si Jesus lapud “inaro ra so dayew na totoo,” labalabay day paigloria ed totoo. (Juan 12:42, 43) On, nakaukolay panagpaabeba ed pangiyuna ed si Jehova nen say dilin-kaimportantian na sakey.

¹⁵ Impanengneng nen Solomon so maabig ya awawey nipaakar ed saya. Ikompara iray salita to ed dedikasyon na maglorian templo ya impaalagey to ed saramay salita nen Nabucodonosor nipaakar ed makatantandan panagpaalagey to. Tekep na alablabas a kinon, inlastog nen Nabucodonosor: “Aliwa a saya a Baleg a Babilonia a sikato so impaalagey ko a nipaakar ed maari a palasyo, ed biskeg na pakapanyarik tan nipaakar ed gayaga na kaatageyan ko?” (Daniel 4:30) Midumaan, mapaabeban tinukoy nen Solomon so agawaan to, a mangibabagan: “Say Dios dia ed katuaan mipanayam kasi ed totoo ed dalin? Nia, saray tawen tan saray tawen na saray tawen agda ka nalugan; panon kasi ya aglalo so sayan abung ya impaalagey ko?” (2 Awaran 6:14, 15, 18; Salmo 127:1) Ag-intandoro nen Solomon so inkasikato. Amta ton sikato lambengat et manangilaman nen Jehova tan nansulat: “Sano onsabi so pangta, onsabi so baing; balet ed saray mapaabeba wala so kakabatan.”​—Uliran 11:2.

16. Panon a napaneknekan a peteg a bendision iray mamatatken diad agda pangiglogloria ed inkasikara?

¹⁶ Ontan met so pangiyaatagey na saray Kristianon mamatatken ed si Jehova, aliwan ed inkasikaran dili. Tutumboken da so simbawa nen Pedro: “No wala so mangiter, mangiter met ya unong na pakayari ya iter na Dios, ta pian dia ed ganaganay bengatla nagalang so Dios lapu ed Jesu-Kristo.” (1 Pedro 4:11) Deniskribe nen apostol Pablo so “betang ya obispo [“manangasikaso,” NW],” ya aliwan importantin posisyon na inkaprominenti, noagta bilang “maong a gawa.” (1 Timoteo 3:1) Aturo iray mamatatken a manlingkor, aliwan manuley. Managbangat tan managpastol ira ed pulok na Dios. (Gawa 20:28; Santiago 3:1) Saray mapaabeba, walaay dilin-panagsakripisyon mamatatken so tuan bendision ed sakey a kongregasyon. (1 Pedro 5:2, 3) “Itultuloy yon pablien so lalakin ontan a nengneng,” tan pisalamatan si Jehova ta intarya toy dakerakel a kualipikadon mamatatken pian itandoro so teokrasya ed sarayan “kaunoran ya agew.”​—Filipos 2:29, NW; 2 Timoteo 3:1.

“Aligen Yo Sirin so Dios”

17. Diad antoran paraan ya aaligen na saramay walad silong na teokrasya so Dios?

¹⁷ Impaseseg nen apostol Pablo: “Aligen yo sirin so Dios, singa anak to kayon inararo.” (Efeso 5:1) Saramay papauleyan ed teokrasya so mangaalig ed Dios diad posiblin nayariay ag-ayadyarin totoo. Alimbawa, oniay inkuan na Biblia nipaakar ed si Jehova: “Say Dampay, ayadyari so gawa to, ta kaptekan so saray amin a dalan to. Sakey a Dios a napanmatalkan tan anggapo so kaugsan, sikato so matunong tan maptek.” (Deuteronomio 32:3, 4) Pian naalig so Dios nipaakar ed saya, ombabaling iray Kristiano ed inkamatoor, inkatunong, tan balansin pantalos ed inkahustisya. (Miqueas 6:8; 1 Tesalonica 3:6; 1 Juan 3:7) Papaliisan day dakel a bengatlan aabobonan na mundo, a singa say imoralidad, inkaagap, tan agum. (Efeso 5:5) Lapud tutumboken na saray lingkor nen Jehova iray estandarte na Dios, aliwan ed too, say organisasyon to et teokratiko, malinis, tan maligen.

18. Anto so matalonggaring a kualidad na Dios, tan panon ya ipapatnag na Kristianos iyan kualidad?

¹⁸ Say matalonggaring a kualidad nen Jehova a Dios et aro. “Say Dios sikato so aro” so inkuan nen apostol Juan. (1 Juan 4:8) Lapud say kabaliksan na teokrasya et uley na Dios, ipapabitar na satan so uley ya unong ed aro. Inkuan nen Jesus: “Lapu ed saya amin a too nabirbiran da a sikayoray babangatan ko, no wala so aro yo ed sakey tan sakey.” (Juan 13:35) Matalonggaring a nipapanengneng na teokratikon organisasyon so aro diad sayan mairap a kaunoran iran agew. Legan na palaspas a pampapateyan lapud rasa diad Aprika, impatnag na Tastasi nen Jehova so aro ed amin, anggan anto so etnikon grupo a nanlapuan da. Legan na bakal ed datin Yugoslavia, nantutulongan iray Tastasi nen Jehova ed amin a lugar, bangta akibabali so arum a relihyoson grupo ed tatawagen ya etnikon panaglinis. Bilang indibidual, panggugunaetan na Tastasi nen Jehova so panumbok ed simbawa nen Pablo: “Saray amin a kapaitan, tan sanok, tan ingongot, tan ingal, tan mauges a panagsalsalita, naekal komon ed sikayo, pati amin a mauges a kanonotan. Tan manaanosan kayo ed sakey tan sakey, mapangasi, manpeperdonaan so sakey tan sakey, a singa met say Dios pinerdona to kayo ed Kristo.”​—Efeso 4:31, 32.

19. Antoran bendision so onsabi natan tan diad arapen ed saramay manpapasakop ed teokrasya?

¹⁹ Panggagayagaan na saramay manpapasakop ed teokrasya so dakel a bendision. Walaan iray pikakareenan ed Dios tan ed kaparan Kristianos. (Hebreos 12:14; Santiago 3:17) Walaan iray gagala ed bilay. (Eclesiastes 12:13) Walaan iray kaligenan ed espiritual tan seguradon ilalo ed arapen. (Salmo 59:9) On, panggagayagaan day kipapasen a sigpot a nagawa ed arapen sano amin a katooan so niwalad silong na teokratikon uley. Insan, ibabaga na Biblia, “ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed Jehova, a singa saray danum sakbongan da so dayat.” (Isaias 11:9) Agaylan maglorian panaon itan! Komon ta seguroen tayon amin so pasen tayo ed satan ya arapen a Paraiso diad pansiansian maapit natan ed teokrasya.

Kasin Nisalaysay Yo?

◻ Anto so peteg a teokrasya tan iner so pakaromogan tayo natan?

◻ Panoy panpapasakop na saray totoo ed teokratikon uley diad kabibilay da?

◻ Diad antoran paraan ya amin a walad silong na teokrasya et mangiglogloria ed Dios imbes a sikara?

◻ Anto so arum a maridios a kualidad ya inalig na saramay manusuporta’d teokrasya?

[Litrato ed pahina 17]

Inggloria nen Solomon so Dios imbes a sikaton dili