Mamapastol a Kaibay Engranden Manamalsa Tayo
“Si Jehova so managpastol ed siak; agak naani onkolang. Pasimbaloen to so kamarerwak; ibasbas toak ed saray pulpulong na inkatunong ed panamegley na ngaran to.”—SALMO 23:1, 3.
1. Anton maaron pakarepreskoan so itatarok nen Jehova?
SAY koma-23 na Salmo, “sakey a salmo nen David,” so mangitatarok na pakarepreskoan ed dakel a naksawan a kakamarerwa. Mamapaseseg itan ed sikara a nawalaan na talek a nibalikas diad bersikulo 6: “Andi saew a say kaabigan tan say panangasi ontombok ira ed amin ya agew na bilay ko: tan manayam ak ed abung nen Jehova ed ando lan ando.” Kasin satan so pilalek yo, a manayam ed amin a panaon diad abung na panagdayewan nen Jehova, a mikasakey ed totoo to a natutugyop la natan ed amin a nasyones na dalin? Say “Pastor tan Obispo na saray kamarerwa yo,” say Engranden Manamalsa tayo, si Jehova a Dios so ontulong ed sikayo pian nadampot itan a kalat.—1 Pedro 2:25.
2, 3. (a) Panon a simamaaron papastolan nen Jehova iray totoo to? (b) Panon a say “papastolan” nen Jehova so biglan dinmaak?
2 Say Manamalsa na “saray tawen a balo tan dalin a balo” so Manangorganisa tan Supremon Manangasikaso met na Kristianon kongregasyon, say “sankaabungan na Dios.” (2 Pedro 3:13; 1 Timoteo 3:15, NW) Sikato so interesadon tuloy a mamapastol ed totoo to, unong a malinew ya ibabaga na Isaias 40:10, 11: “Nia, say [Soberanon, NW] Katawan a Jehova onsabi a singa sakey a makapanyari, tan manuley naani taklay to nipaakar ed sikato: Nia, say panumang to kaolop to, tan say panumang to wala ed arap to. Pakabkaben to naani so ayep [papastolan, NW] to a singa sakey a pastol, tiponen to naani so saray cordero ed taklay to, tan awiten to ra ed pagew to, tan guyoren to a makalna naani so saray walaan na kilaw.”
3 Diad malaknab a pantalos, laktipen na sayan “papastolan” iraman so abayag lan manaakar ed Kristianon katuaan tan “saray cordero” a natutugyop ed agano nin tuloy iran panaon—a singa say baleg a bilang natan na nababautismoan ed Aprika tan Mamasagur a Europa. Say mabiskeg, manalimbeng a taklay nen Jehova so mangampopo ed sikara. Anggaman sikaray singa nababalang a karnero, sikara la natan so walaan na maapit a siglaotan ed inadaron Dios tan Pastol da.
Say Kaiban Pastol nen Jehova
4, 5. (a) Siopa so “maabig a pastol,” tan panon a sikatoy tinuro na propesiya? (b) Anton panangibiig a kimey so aasikasoen nen Jesus, tekep na anton matalonan resulta?
4 Manlilingkor ed nikawanan nen Ama to ed tawen, “say maong a pastor,” si Jesu-Kristo so maabagey a mangiimano met ed say “carnero.” Inter to so bilay to pian nagunggunaan ya ununa so “daiset a papastolan [melag a pulok, NW]” na saray alanaan tan insan say baleg ya ulop natan na “arum a carnero [karnero, NW]” to. (Lucas 12:32; Juan 10:14, 16) Si Jehova a Dios, say Baleg a Pastol so nandiskurso ed sarayan karnero, diad pangibabagan: “Nia, siak, on siak, okomen ko naani so . . . carnero tan carnero. Et paalageyen ko nani so sakey a pastol ed sikara, et pakanen to ra naani, a sikato si aripen ko a David; pakanen to ra naani, tan sikato naani so pastol da. Et siak si Jehova, siak naani Dios da, tan si aripen ko a David so principe ed sikara: Siak, si Jehova, sikato so sinalitak.”—Ezequiel 34:20-24.
5 Say inkadesignan “aripen ko a David” so mapropetikon mangituro ed si Kristo Jesus, say “bini” a manawir ed trono nen David. (Salmo 89:35, 36) Diad sayan panangukom ya agew na nasyones, say kaiban Pastol nen Jehova tan Ari, si Kristo Jesus, say Anak nen David so mantutultuloy a mangibiig ed “karnero” na katooan manlapud saramay mangibabagan “karnero” balet diad tua et “kanding.” (Mateo 25:31-33) Sayan “pastol” so nipatalindeg met a mamakan ed karnero. Agaylan maglorian kasumpalan na sayan propesiya so nanenengneng tayo natan! Legan a totongtongen na saray pulitiko so pamakasakey na katooan diad panamegley na balon mundon uksoy, saman a Pastol so peteg a mamakasakey ed karnero na amin a nasyones diad panamegley na dakel-a-lenguahen kampanyan panagtasin mairap a tuloy ya aligen na dinanman ya organisasyon ed dalin.
6, 7. Panon a seseguradoen na “matoor tan makabat ya aripen” a say “tagano ed dugan panaon” so nitatarya ed karnero?
6 Legan a lawas nipapanabang so mensahe na Panarian ed saray balon teritorya, “say matoor tan makabat ya aripen” na alanaan a Kristianos, unong ed inganggan na saman a Pastol et seseguradoen to ya amin a probisyon so nagagawa pian ipawit so “tagano ed dugan panaon to.” (Mateo 24:45) Dakel ed saray 33 panag-imprintaan a sanga na Watch Tower Society ed interon dalin so mamaparakel ed produksyon pian nakapet so ondaraak a pankaukolan parad dakel tan magmaong a panag-aralan iran libro ed Biblia tan saray magasin.
7 Say Mananguley ya Ulop na Tastasi nen Jehova so manggagaway angaay nayarian dan paaligwasey kalidad na panangipatalos ed ngalngalin 200 lenguahe tan igapo so panangipatalos ed kaaruman iran lenguahe a nakakaukolan ta pian nakobrian so interon lawak na mundo. Saya so diad panuporta ed ganggan ya inter nen Jesus ed saray babangatan to diad Gawa 1:8, NW: “Mangawat kayo na pakayari sano onsabi ed sikayoy masanton espiritu, tan sikayoy magmaliw a tastasik . . . ed sankaarawian a kabiangan na dalin.” Niarum ni, say New World Translation of the Holy Scriptures, a niimprinta la ed intero odino diad kabiangan to ed 14 lenguahe, so nipapatalos la natan ed 16 iran arum a lenguahe na Europa, Aprika, tan Oriente.
Pangagayagaan so “Deen na Dios”
8. Panon a say karnero so mayamyaman a nabebendisyonan na sipan na deen ya akipaknaan nen Jehova ed sikara?
8 Diad panamegley na sakey a Pastol to, si Kristo Jesus, migagawaan si Jehova ed naksel a karnero To na sakey a “sipan na deen.” (Isaias 54:10) Diad pangagamil na pananisia ed niyibong a dala nen Jesus, nayarian na karnero so mankurang ed liwawa. (1 Juan 1:7) Pangagayagaan da so ‘deen na Dios, a talonaan to’n amin a pakatalos, bantayan to so kapusoan da tan saray nonot da ed Cristo Jesus.’ (Filipos 4:7) A singa dedeskribien na Ezequiel 34:25-28, papastolan nen Jehova so karnero to ya ipapaarap ed espiritual a paraiso, sakey a makapaligsan kondisyon na inkaligen, makarepreskon aligwas, tan inkamabunga. Ibabaga na sayan maaron Pastol nipaakar ed karnero to: “Naamtaan da naani a siak si Jehova, sano puteren ko so saray balewet na pako ra, tan ilaban ko ra ed lima na saray angaripen ed sikara. Et ag ira la naani sakey a samsam ed saray nacion, . . . no ag ingen manayam ira naani a mataletalek, tan angapo ni manaktakot ed sikara.”
9. Antoran pankanawnawa so nilukas parad saray totoo na Dios diad ‘inpamuter na balewet na saray pako’?
9 Diad agano niran taon, saray Tasi nen Jehova ed dakel a bansa so makakaeksperiensia la ed panamuter na “saray balewet na pako ra.” Sikaray bulos a mangipulong ya agnin balot agawa nensaman. Tan amin tayo komon, diad amin a dalin so manganamot ed kaligenan ya itatarok nen Jehova legan a mantultuloy tayon sumpalen so kimey. Agaylan paseguro so iiter nen Jehova legan a manasingger tayo ed panaon na sankabalgan ya irap a nanengneng na katooan!—Daniel 12:1; Mateo 24:21, 22.
10. Siopa so itatarok nen Jehova a mangasiste ed Maabig a Pastol, si Kristo Jesus, tan panon so impanawag nen apostol Pablo ed arum na saraya?
10 Diad panparaan ed satan ya agew na panamales to sumpad marelmeng, itatarok nen Jehova iray katulongan a pastol pian tulongan so Maabig a Pastol, si Kristo Jesus, diad pangasikaso ed pulok. Nadedeskribe iraya ed Apocalipsis 1:16 bilang kumpleton bilang na “pitora’n bitewen” diad nikawanan a lima nen Jesus. Diad inmunan siglo, nandiskurso si apostol Pablo ed manangilaman ya ulop na sarayan katulongan a pastol, ya angikuan: “Imanoen yo so inkasikayo tan say amin a kasimpukokan, unong ya anuroan ed sikayo na masanton espiritu bilang manangasikaso, pian pastolan yo so kongregasyon na Dios, a sinaliw to ed dala na Anak ton dili.” (Gawa 20:28) Natan, walaray samplon nilibon katulongan-iran-pastol a manlilingkor ed 69,558 kongregasyon ed sankadalinan.
Nepeg a Mangidaulo Iray Katulongan-a-Pastol!
11. Panon ya arum ed saray pastol so sitatalonan angidaulo ed saray teritoryan mabetbet a natatayek?
11 Diad dakel a paspasen sarayan pastol so nepeg a mangipangulo diad saray teritoryan naulit-ulit a kokobrian legan na sarayan kaunoran ya agew. Panon dan napansiansian atagey so entusiasmo na pulok? Marakep a tuloy so nagagawaan na saray pastol, tan sakey ed saray dalan a sikaray matalona et diad pangipaseseg ed auxiliary tan regular payunir a kimey. Dakel a mismo ed saray pastol so mibibiang ed sayan serbisyo, tan anggan saramay manangipalapag ya agmakasarag a manggawa ed ontan so angipanengneng na espirituy payunir, a manlilingkor tekep na gayagan ontulong diad panalonay agpananginenen diad teritorya. (Salmo 100:2; 104:33, 34; Filipos 4:4, 5) Kanian, unong a say karelmengan tan asingsingger ya anarkya so manasakbong ed mundo, dakel a malakarneron totoo so naliliing ed ilalo na Panarian.—Mateo 12:18, 21; Roma 15:12.
12. Anto so walan seryoson problema ed saray maples ya ombabaleg a lawak, tan panon a saraya so naaasikaso no maminsan?
12 Sananey a problema et mabetbet a kulang iray kualipikadon pastol a mangasikaso ed pulok. No iner a wala so maples ya ibabaleg a singa ed Mamabukig a Europa, dakel iray balon kongregasyon ya andian a balot na aturon mamatatken. Say mabulos iran karnero so manasakbat ed responsabilidad, balet sikaray agtanton eksperiensiado ni, tan nakakaukolan so tulong ed pangipasal na karneron ondadagup ed saray kongregasyon. Diad daldalin a singa say Brazil, Mexico, tan Zaire, no iner a maples a tuloy so ibubulaslas, saray medyo kalangweran a Tastasi so nakaukolan a nausar ed pangorganisa na serbisyo tan pangipasal ed arum niran balo. Saray payunir so mangiiter na maabig a tulong, tan diad sayan lawak a saray agagin bibii so makapangipasal ed balon agagin bibii. Si Jehova diad panamegley na espiritu to so mamebendisyon ed saray resulta. Say idaraak so mantutultuloy.—Isaias 54:2, 3.
13. (a) Lapud ta ontanlan baleg so panagani, anto so nepeg ya ipikasi na amin a Tastasi? (b) Panon a saray pikakasi na totoo na Dios so naebatan sakbay tan kayari na komaduan guerra mundial?
13 Diad daldalin a niletneg a maong so panagpulong a kimey, diad daldalin ya agano nin nakal iray panameget, tan diad balo nin alukasan iran teritorya, saray salita nen Jesus ed Mateo 9:37, 38 so siansian onaplika. “Dakel a tua so aaniyen, daiset ira balet so manani. Pikasi yo sirin ed Katawan na aaniyen, pian mangibaki na saray manani ed aaniyen to.” Kaukolan tayo met so manpikasi a si Jehova so mamatalindeg na dakel a pastol. Idedemostra ton nagawaan to iya. Sakbay tan legan na Guerra Mundial II, saray maruksan singa-Asiryanon diktador so nanggunaet a maneral ed saray Tasi nen Jehova. Balet diad ebat ed saray pikakasi ra, pinaralus nen Jehova so organisasyon da, a ginawa to itan a peteg a teokratiko, tan intarok to so nakakaukolan “iran pastol.”a Saya so mitunosan ed propesiya: “Sano say Asirio onsabi ed dalin tayo, tan sano ongatin ed saray palacio tayo, saman la paalageyen tayo sumpa ed sikato so pitora a pastol, tan walora a manonaan a lalaki”—a nagkalalo nin supisienten dedikadon mamatatken a mangiwanwan.—Miqueas 5:5.
14. Anton matalonan pankaukolan so wala ed organisasyon, tan anton panamaseseg so iiter ed saray agagi?
14 Wala so matalonan pankaukolan parad amin a bautismadon lalakin Tastasi a dampoten so kaaruman iran pribilihyo. (1 Timoteo 3:1) Say situasyon so maganat. Maples ya onaasingger so anggaan na sayan sistema. Kuan na Habacuc 2:3: “Ta say pasingawey sikato ni nipaakar ed nigeter a panaon, tan mansiglat ya onarap ed angaan, et ag naani mantila: . . . ta petepeteg ya onsabi, ya ag manbayag.” Agagi, kasin nayarian yon dampoten so pakakualipika ed kaaruman iran pribilihyo diad sayan panagpastol a kimey—sakbay na isabi anggaan?—Tito 1:6-9.
Teokratikon Panagpastol
15. Diad anton dalan a saray totoo nen Jehova so sakey a teokrasya?
15 Ta pian sigpot a mibiang ed panangilaknab na organisasyon nen Jehova, kaukolan a saray totoo to so magmaliw a teokratiko ed panmoria ra. Panon dan nagawaan iya? Bueno, anto so kabaliksan na terminon “teokratiko”? Dedepinaen na Webster’s New Twentieth Century Dictionary so “teokrasya” bilang “say panguley na Dios ed estado.” Diad sayan pantalos a say “masanton nasyon” na totoo nen Jehova so sakey a teokrasya. (1 Pedro 2:9; Isaias 33:22) Bilang membro odino kaiba na satan a teokratikon nasyon, saray tuan Kristianos so nepeg a manbilay tan manlingkor diad katutulok ed Salita na Dios tan saray prinsipyos to.
16. Manuna, panon a nayarian tayon ipanengneng a sikatayoy teokratiko?
16 Malinew ya isasalaysay nen apostol Pablo no panon a saray Kristiano so nepeg a magmaliw a teokratiko. Ununa, kuanto a nepeg ya ‘ikawes da so too a balo, a sikato so pinalsay Dios ed loob na kaptekan tan matuan kasantosan.” Say Kristianon personalidad so nepeg a moldien unong ed matunong iran prinsipyo na Dios a nidatak ed Salita to. Nepeg a sikato so magmaliw a matoor ed si Jehova tan ed saray ganggan To. Kayari impangiyilustra no panon iyan gawaen, isisimbawa nen Pablo: “Aligen yo sirin so Dios, singa anak to kayon inararo.” (Efeso 4:24–5:1) Singa matulok ya ananak, nepeg ya aligen tayo so Dios. Satan so tuan teokrasyan kiwas, a mangipapanengneng a sikatayoy peteg ya uuleyan na Dios!—Nengnengen met so Colosas 3:10, 12-14.
17, 18. (a) Anton matalonggaring a kalidad na Dios so nepeg ya aligen na teokratikon Kristianos? (b) Diad saray salita to ed si Moises, panon so impangidanet nen Jehova ed manunan kalidad To, balet anto so inyarum Ton impasakbay?
17 Anto so manunan kalidad na Dios a nepeg tayon aligen? Onebat si apostol Juan diad 1 Juan 4:8 sanen kuanton: “Say Dios sikato so aro.” Waloran bersikulo ed saginonor, diad bersikulo 16, inulit to iyan makanan prinsipyo: “Say Dios sikato so aro; tan say mansiansia ed aro, mansiansia ed Dios, tan say Dios mansiansia ed sikato.” Say Baleg a Pastol, si Jehova, so pakapatnagan na aro. Sikato so aaligen na saray teokratikon pastol diad pangipanengneng na aralem a panangaro parad karnero nen Jehova.—Ipareng so 1 Juan 3:16, 18; 4:7-11.
18 Inparungtal na Baleg a Manuley na teokratikon gobierno so inkasikato ed si Moises bilang “Jehova, Jehova, Dios a mapangasi tan mapaaro, mapalna ya onsanok, tan daakan ed maaro ya abig na linawa, tan katuaan; a mangigagana na maaro ya abig na linawa ed saray nilibu, mamerdona na inkauges, tan inpakasumpa, tan kasalanan; tan angan anton pamaakaran agto ibilang ya malinis so nankasalanan, dalawen to so kaugsan na saray ama ed saray anak, tan saray anak ed saray anak, diad komatlo tan dia ed komapat a kailalakan.” (Exodo 34:6, 7) Idadanet nen Jehova sirin so nanduruman nengneng na matalonggaring a teokratikon kalidad ton aro, legan a mapekder a mamapasakbay a dusaen to so lingo no makanepegan.
19. Miduma ed saray Pariseo, panon so nepeg ya ikiwas na saray Kristianon pastol ed teokratikon dalan?
19 Parad saraman so walaan na saray posisyon na responsabilidad diad organisasyon, antoy kabaliksan na pagmaliw a teokratiko? Inkuan nen Jesus ed saray eskribas tan Pariseos ed agew to: “Sikara mamerber ira na ambebelat ya awiawit tan makapairap ya awiten, tan sikara’y ipasakbat da ed abala na saray totoo; balet sikara lanlamang ag da ra labay a galawen ed tamoro ra.” (Mateo 23:4) Agaylan mamapairap tan agmaaro! Say tuan teokrasya, odino uley-na-Dios so mankakaukolan parad panagpastol na pulok diad pangiyaplika ed maaro iran prinsipyo na Biblia, aliwan diad pamabelat ed karnero na andian na geter iran ginaway-toon totontonen. (Ipareng so Mateo 15:1-9.) Ontan met, saray teokratikon pastol so nepeg a mangalig ed Dios diad pangarum ed panangaro ra na inkamapekder diad pansiansian malinis ed kongregasyon.—Ipareng so Roma 2:11; 1 Pedro 1:17.
20. Anton organisasyonal ya oksuyan so bibidbiren na saray teokratikon pastol?
20 Bibidbiren na saray tuan pastol a legan na sarayan kaunoran ya agew, tinuro nen Jesus so matoor tan makabat ya aripen to ed amin a kayarian to tan say masanton espiritu so mangiwawanwan ed sayan aripen diad panuturo na mamatatken parad panagpastol ed karnero. (Mateo 24:3, 47; Gawa 20:28) Kanian, say pagmaliw a teokratiko et lalanoren to so pakawalaan na aralem a respeto ed sayan aripen, parad organisasyonal ya oksuyan ya ileletneg na aripen, tan parad oksuyan na matatken ed loob na kongregasyon.—Hebreos 13:7, 17.
21. Anton maabig ya ehemplo so inletneg nen Jesus ed saray katulongan-a-pastol?
21 Inletneg a mismo nen Jesus so maabig ya ehemplo, a naynay ya onnenengneng ed si Jehova tan ed Salita To parad panangiwanwan. Inkuanto: “Angapo so nagawaan ko ed inkasiak: onong na narengel ko, mangokomak, et say panangokom ko matonong; ta ag ko anapen so linawak a dili, noag say linawa na saman so angibaki dia ed siak.” (Juan 5:30) Nepeg a bayuboan na saray katulongan-a-pastol nen Katawan a Jesu-Kristo so mipadparan mapaabeban awawey. No say sakey a matatken so lawas onsaral ed Salita na Dios parad panangiwawan, a singa ginawa nen Jesus, sirin sikato so peteg a teokratiko.—Mateo 4:1-11; Juan 6:38.
22. (a) Diad anton dalan ya amin so nepeg a manbanikel a magmaliw a teokratiko? (b) Anton mapangasin imbitasyon so inter nen Jesus ed karnero?
22 Sikayoran bautismadon lalaki, dampoten so pakakualipika parad saray pribilihyo ed kongregasyon! Amin yon pinablin karnero, gegemtanen so pagmaliw a teokratiko, ya aligen so Dios tan si Kristo ed panangipanengneng na aro! Komon ta namparan saray pastol tan pulok so mangayaga lapud oneebat ira ed imbitasyon nen Jesus: “Dago kayo’d siak, amin yo’n nasasagpotan tan nabebelatan, et itdan ta kayo’y pampainawa. Ala yo’y pakok ed sikayo, tan manaral kayo’d siak; ta maoyamo ak tan mapaabeba ak a puso: et naromog yo’y inawa nipaakar ed saray kamarerwa yo.”—Mateo 11:28-30.
[Paimano ed leksab]
a Nengnengen iray artikulo na Watchtower ya apauloan na “Organization,” diad saray paway na Hunyo 1 tan 15, 1938.
Kasin Nisalaysay Yo?
◻ Anto so “papastolan” nen Jehova, tan siopa so laktipen to?
◻ Panon so inkiwas nen Jesus bilang “maabig a pastol” diad inmunan siglo, tan natan?
◻ Anto so manunan betang na saray katulongan-a-pastol diad pangasikaso ed pulok?
◻ Anto so importanten kabaliksan na salitan “teokrasya”?
◻ Panon so nepeg ya ikiwas na sakey a Kristiano—nagkalautla ed sakey a katulongan-a-pastol—ta pian magmaliw a teokratiko?
[Litrato ed pahina 20]
Singa sakey a maaron pastol, tatalimaen nen Jehova so pulok to
[Litrato ed pahina 23]
Say panangalig ed kalidad nen Jehova a Dios ya aro so teokrasyan kiwas