Matamoy a Mamastol ed Mabli Iran Karnero nen Jehova

SARAY mamatatken so sigpot a tinmalineng. Akapanbaroy ira na ngalngali 50 kilometro manlapud Efeso anggad Mileto ta pian awaten iray bilin manlapud si apostol Pablo. Natan sikaray naermenan ed pakadngel a saya la’y kaunoran a pankanawnawan sikato’y nanengneng da. Kanian kabat da a saray ontumbok a salita so importantin tuloy: “Aluaran yo so inkasika yo’n dili, tan say amin a kasimpokokan ya anginan na Espiritu Santo ed sikayo a managbantay, pian pastolan yo so Iglesia na Dios, a sikato so sinaliw to ed dala ton dili.”​—Gawa 20:25, 28, 38.

Say antikey ya impanukoy nen Pablo ed saray pastol so talagan angiparungtal na dakel ya impormasyon ed saramay mamatatken ed Efeso. Amta ra so kimey ed panagkomponi na karnero diad kabangibang a kaalogan. Kabkabat da met so dakel ya inkatukoy na saray pastol ed Hebreon Kasulatan. Tan kabat da ya inyaliling nen Jehova so inkasikato ed sakey a Pastol na totoo to.​—Isaias 40:10, 11.

Sikara’y tinukoy nen Pablo bilang “saray manangasikaso” diad limog na “pulok,” tan bilang “saray pastol” ed “kongregasyon.” Bangbalet say terminon “saray manangasikaso” so mangipapanengneng no anto so asainmin da, say salitan “pastol” so manedeskribi ed no panon dan sumpalen itan a panangasikaso. On, saray manangasikaso so kaukolan a mangasikaso’d balang membro na kongregasyon ed mipadparan maaron paraan a singa ed panangasikaso na sakey a pastol ed pulok na saray karnero to.

Natan, dagdaiset a mamatatken so walaan na direktan eksperiensia ed literal a panagkomponi. Balet dakerakel so impanukoy na Biblia ed namparan karnero tan pastol, nagkalautla’d piguratibon pantalos, a saray salita nen Pablo so walaan na agnigeter a panaon a kiyaplika na saya. Tan nagkalalo ni so naaralan manlapud saray salaysay nipaakar ed saray pastol a pinaboran na Dios nen inmunan panaon. Saray makatantandan alimbawa ra so makatulong ed saray kaplesan-agew a mamatatken pian nanengneng no antoran kalidad so kaukolan dan paaligwasen ta pian makapanpastol ed kongregasyon na Dios.

Say Anggapoy Takot a Pastol a si David

Sano nonoten tayoray pastol ed panaon na Biblia, angangko ta nanonotan tayo si David, lapud sikato so ginmapo bilang managkomponi na saray karnero. Sakey ed saray unaan a leksion a naaralan tayo manlapud impanbilay nen David et say pagmaliw a pastol so aliwan sakey a posisyon na inkamatalonggaring. Diad katuaan to, sanen sinmabi si propetan Samuel ta pian lanaan so sakey ed ilalak nen Jesse bilang arapen ya ari na Israel, say tobonbalon David so sigpot ya agnaimano ed inmuna. Kayari lambengat a binaliwala nen Jehova so pitoran panguloan ya agagi to, insan to sinaglawi si David, a diad saman et walad uma a “mangiimaton ed saray carnero.” (1 Samuel 16:10, 11) Anggaman kuan, saray taon ya inusar nen David bilang sakey a pastol so angiparaan ed sikato para ed kimey na panagpastol ed nasyon na Israel. “Pinili [nen Jehova] met si David ya aripen to, tan sikato so inala to a manlapu ed saray coral na saray karcarnero . . . a magmaliw a pastol ed Jacob a totoo to,” kuan na Salmo 78:70, 71. Matukotukoy, ya isulat nen David so marakep tan kabkabat a koma-23 na Salmo, a ginmapo ed saray salitan: “Si Jehova so managpastol ed siak.”

Singa si David, saray mamatatken ed Kristianon kongregasyon so nepeg a manlingkor bilang mapaabeban katulongan-a-managpastol tan agmananap na agmakanepegan ya inkapromeninti. Singa ed insulat nen apostol Pablo ed si Timoteo, saramay manadampot ed sayan responsabilidad na panagpastol et “maong a gawa so pirawa’to,” aliwan say inkapromininti.​—1 Timoteo 3:1.

Anggaman say kimey nen David bilang sakey a literal a pastol so abeban tuloy, no maminsan et mankakaukolan itan na baleg a tepel. Alimbawa, sanen saray karnero ed pulok nen ama to so dinegkeman ya aminsan na sakey leon tan ed sananey et sakey ya uso, andi-takot ya inosilan tan pinatey nen David iraman a mangasiban ayayep. (1 Samuel 17:34-36) Saya so makatantandan panangipanengneng na inkakpel sano kunsideraen na sakey a say leon so nayarin mamatey ed ayayep a lalon babaleg nen say sikato. Tan say kolor-laman ya uso na Siria a datin manaayam ed Palestina, a manbelat na anggad 140 a kilo, so makapatey ed sakey ya ulsa ed panamegley labat na sakey a depak na makapanyarin sali to.

Say makpel a panagpaga nen David ed saray karnero nen ama to so sakey a maabig ya alimbawa para’d saray pastol ed Kristianon kongregasyon. Pinasakbayan nen apostol Pablo so mamatatken ed Efeso nipaakar ed “saray masiban lobo” ya “agda perdonaen [pidenengan tekep na inkamatamoy, NW] so kasimpokokan.” (Gawa 20:29) Diad modernon panaon met, onlesa iray panaon a kaukolan ya ipanengneng na saray Kristianon pastol so tepel ta pian nabantayan so espiritual a bunigas na saray karnero nen Jehova.

Legan a saray karnero so kaukolan a diretsaan ya ikdan na salimbeng, sikara met so nepeg a tratoen tekep na inkatamoy, diad pangalig ed maaron pastol a si David tan ed Maabig a Pastol, si Jesu-Kristo. (Juan 10:11) Diad pakaamta a say makankayarian na pulok et si Jehova, saray mamatatken so agnepeg a masebeg ed saray karnero, “a pakatawan ed saray tawir na Dios.”​—1 Pedro 5:2, 3, NW; Mateo 11:28-30; 20:25-27.

Pikuekuentaan

Say patriarka a si Jacob so sananey nin kabkabat a pastol. Impasen to so inkasikato a personal a responsabli ed kada sakey ed saray karneron nimatalek ed sikato. Sikatoy matoor a tuloy ya angumponi ed saray pulok na katulangan ton laki, si Laban, a kayari 20 a taon na serbisyo to, nikuan nen Jacob: “Saray carnerom tan kanding mo a kabatyan ag ira nakalan, tan agak nansira ed saray manadam. Say pinatey na saray maruksan ayep, agko inyakar ed sika; siak inakok so abalang; pinaskar mo ed limak iman, ya angan tinakew da ed agew odino tinakew da ed labi.”​—Genesis 31:38, 39.

Saray Kristianon manangasikaso ed Kristianon kongregasyon so mangipapanengneng na lalon baleg a panagpaga ed saray karnero a say Pastol na kakamarerwa tayo, si Jehova a Dios, “a sinaliw to ed dala na dilin Anak to.” (Gawa 20:28, NW; 1 Pedro 2:25; 5:4) Indanet nen Pablo iyan importantin responsabilidad sanen pinanonotan toray Hebreon Kristianos a saray lalakin mangidadaulo na kongregasyon so ‘manbabantay lapud kamarerwa yo, a singa ra mipalinewan.’​—Hebreos 13:17.

Ipapanengneng met na alimbawa nen Jacob ya anggapoy nigetar a panaon ed kimey na sakey a pastol. Saya so labi-agew a kimey tan naynay a mankakaukolan na dilin-panagsakripisyo. Imbaga to ed si Laban: “No agew kaskasian ak ed petang, tan dia ed betel no labi; tan say pakaugip tinmainan ed saray matak.”​—Genesis 31:40.

Saya so tuan nagagawa ed dakel a maaron Kristianon mamatatken natan, a singa iyiilustra na onggendan ya eksperiensia. Sakey ya agin laki so inawat ed intensive care unit na sakey ya ospital kayarin awalaan na saray komplikasyon ya inekal tan nalmoan a walaay tumor ed utek. Inyuksoy na pamilya to a sikara’y asingger ed sikato ed ospital labi-agew. Ta pian mangitarok na nakakaukolan a moral a suporta tan panamaseseg, sakey ed lokal a mamatatken so angiyuksoy ed okupadon eskedyul to ta pian nabisita to so mansasakit tan say pamilya na saman ya inagew-agew. Balet, lapud oksuyan na ospital ed rutina na panagtambal, no maminsan et imposiblin makabisita ed saman ya agew. Kanian say matatken so mabetbet a kaukolan ya ombisita ed ospital ed lablabi lan tuloy. Balet sikato so sigagayagan oonla diman a nilabilabi. “Amoriak a kaukolan kon bisitaen ed oras a matukoy para’d pasyente, aliwan ed oras a kumbiniente para’d siak,” inkuan na matatken. Sanen medyo inmabig la so agi ta pian niyalis ed sananey a lugar na ospital, nantultuloy so matatken ed makapaseseg ya inagew-agew ya ibibisita to.

Say Naaralan nen Moises Bilang Sakey a Pastol

Dedeskribien na Biblia si Moises bilang “maoyamon toloy ed saray amin a lalaki ya wala ed tapew na dalin.” (Numeros 12:3) Balet, ipapanengneng na rekord ya aliwan lanang ya onia so kipapasen. Bilang sakey a kalangweran, sikato’y amatey na sakey ya Ehipsio lapud impangabil to’d sakey a kapara ton Israelita. (Exodo 2:11, 12) Peteg ya aliwan onia so ikiwas na sakey a toon maamo! Ingen, diad saginonor inusar na Dios si Moises ta pian mangipangulo ed nasyon na nilaksalaksa ya ibasil ed kalawakan a mamaarap ed Insipan a Dalin. Malinew, sirin, a si Moises so mankakaukolan na kaaruman a panangipasal.

Anggaman si Moises so awalaan na sekular a panangipasal “ed amin a kakabatan na saray taga Ehipto,” dakel ni so nakakaukolan ta pian napastolan to so pulok nen Jehova. (Gawa 7:22) Anton nengneng kasi iyan kaaruman a panangipasal ed sikato? Bueno, diad 40 a taon et inabuloyan na Dios si Moises a manlingkor bilang sakey mapaabeban pastol ed dalin na Midian. Diad impangasikaso to ed saray pulok nen katulangan ton Jetro, abayuboan nen Moises iray maabig a kalidad a singa say anos, kaoyamoan, kaumildian, andukey a panagtepel, kaabigan, tayadno, tan dangka. Naaralan to met so manalagar ed si Jehova. On, say pangasikaso’d literal iran karnero so nanggawa ed si Moises a kualipikadon magmaliw a makayarin pastol ed nasyon na Israel.​—Exodo 2:15–​3:1; Gawa 7:29, 30.

Agta sarayan mismo so kalidad a kaukolan na sakey a matatken ta pian mantalima ed totoo na Dios natan? On, lapud si Timoteo so pinanonotan nen Pablo a say “aripen na Katawan . . . maamo ed ganagana, maong a mangibangat, matpel, a bangatan to a matayarno so saray masumpa.”​—2 Timoteo 2:24, 25.

Angangko ta wala so panaon a nadismaya so sakey a matatken lapud sikato’y nanairapan diad pamayubon sigpot ed sarayan kalidad. Anggaman kuan, sikato so agnepeg ya ontunda. Singa si Moises, ompan kaukolan so andukey a panaon ta pian sigpot a napaaligwas iray kalidad a nakakaukolan ta pian say sakey so magmaliw a maong a pastol. Anggaman ontan, onsabi panaon a satan a magunaet a sagpot so natumangan.​—Ipareng so 1 Pedro 5:10.

Bilang sakey a matatken, nayarin sikayo so agtanton nauusar a singa saray arum. Singa si Moises, agta sikayo so aabuloyan nen Jehova a mamayubon sigpot ed pigaran importanten kalidad? Aglilingwanan ya ‘aasikasoen itayo’ nen Jehova. Anggaman ontan, nepeg a lawas tayon nonoten a ‘balkesan tayoy inkasikatayo na panagpaabeba ed sinansakey, ta say Dios kaingli’to so saray atatagey a linawa, et itdan to na gracia [agkanepegan a panangasi, NW] so saray mapaabeba.’ (1 Pedro 5:5-7) No iyaplika yon mismo tan awaten so panangipasal ya iyaabuloy nen Jehova, sika so magmaliw a lalon mausar ed sikato, a singa si Moises.

Amin a Karnero nen Jehova So Mabli

Saray napanmatalkan, maaron pastol ed panaon na Biblia so walaan na responsabilidad ed sinansakey a karnero. Nepeg ya ontan met no nipaakar ed espiritual iran pastol. Saya so malinew manlapud saray salita nen Pablo: “Aluaran yo so . . . amin a kasimpokokan.” (Gawa 20:28) Siopa so nitekep ed “amin a kasimpokokan”?

Angiter si Jesus na ilustrasyon nipaakar ed toon walaay sanlasus a karnero balet ta tampol ton inanap so sakey ya abalang ta pian nipawil to lamet ed pulok. (Mateo 18:12-14; Lucas 15:3-7) Diad mipadparan paraan say sakey a manangasikaso so nepeg a walaan na paga ed balang membro na kongregasyon. Say inka-inaktibo’d ministeryo odino diad iyaatendi’d saray Kristianon miting et agto labay ya ibaga a say karnero so agla kabiangan na pulok. Sikato ni so siansian kabiangan na “amin a kasimpokokan” a diad sikara et ‘pipalinewan’ na mamatatken ed si Jehova.

Sakey ya ulop na mamatatken so napapagaan a tuloy ta pigara ed akilimog ed kongregasyon so nagmaliw ya inaktibo. Sansakey iran inlista, tan ginawa so nikadkaduman sagpot a sikaray dalawen tan tulongan a makapawil ed pulok na saray karnero nen Jehova. Agaylan pisasalamat na sarayan mamatatken ed Dios a diad loob na duara tan kapalduan taon et atulongan da so masulok a 30 a totoo a magmaliw ya aktibo lamet ed panaglingkor ed si Jehova. Sakey ed saramay atulongan so inaktibo la ed 17 a taon!

Say belat na sayan responsabilidad so lalon nidanet ed saray manangasikaso na say katuaan a saray karnero so “sinaliw ed dala na dilin Anak [na Dios].” (Gawa 20:28, NW) Saman so sankatagyan a presyo a nibayar para’d sarayan mablin karnero. Tan nonoten pa so amin a panaon tan sagpot ya inusar diad ministeryo ta pian anapen tan tulongan so kada toon malakarnero! Agta mipadparan sagpot so nepeg a gawaen ta pian amin da so napansiansia ed kasimpukokan na Dios? On, kada karnero ed kongregasyon so mabli.

Anggan say sakey a membro na pulok so nalalanor ed seryoson gawan-mauges, say responsabilidad na mamatatken so agmanguman. Mantultuloy ira a mapagan pastol, matamoy tan mauyamon manbabanikel a mangisalba ed managgaway-mauges no nayari. (Galacia 6:1, 2) Makapaermen, a diad arum a pankanawnawa et ompapaway a say sakey membro na kongregasyon so kulang na maridios a panagbabawi ed saray seryoson kasalanan ya agawa to. Saray maaron pastol sirin so walaan na Makasulatan a responsabilidad pian salimbengan so nakekeraan ed pulok sumpa’d sayan makadutak ya impluensya.​—1 Corinto 5:3-7, 11-13.

Anggaman kuan, si Jehova a Dios so angiletneg na ayadyarin alimbawa ed panangipanengneng na panangasi ed nababalang a karnero. Say maabagey a Pastol tayo so angikuan: “Anapen ko naani so abalang, tan ipawil ko naani so pinatainan, tan bedberan ko naani so aputer, tan pabiskegen ko naani so mabeblay.” (Ezekiel 34:15, 16; Jeremias 31:10) Diad pangalig ed sayan maabig a tuloy ya alimbawa, sakey a maaron oksuyan so agawa ta pian saray modernon espiritual a pastol so ombisita’d saray adespilo, a nayarin onkiwas natan ed tulong da. Sarayan mapangasin sagpot ta pian nipawil iratan a nababalang a karnero so awalaan na maabig a bunga. Inkuan na sakey ya agin bii a nipawil: “Sanen dinmalaw iray mamatatken, saman so nakakaukolan kon panamaseseg ta pian ompawil.”

Anggapoy panduaruwa a saray salita nen Pablo ed mamatatken ed Efeso ed Mileto so napnapno na kabaliksan​—para’d sikara tan para’d saray manangasikaso natan. Say impanukoy to ed saray pastol so sakey a panonot ed makaingganyon kalidad a nepeg a nanengneng ed saray manangasikaso​—saray kalidad a singa say kaumildian tan tepel, a singa impanengneng na alimbawa nen pastol-ya-arin David; say personal a liknaan ed responsabilidad tan mananalimbeng a panagtalima, a nanengneng ed impanlingkor nen Jacob ed agew tan labi; tan say inkamabulos ed siaanos a panangawat ed kaaruman a panangipasal, a singa impanengneng nen Moises. On, sarayan alimbawa’d Biblia so ontulong ed mamatatken na kongregasyon ta pian napaaligwas da tan nipanengneng daray kalidad a kaukolan ta pian sikara’y matamoy ed “pamastol ed kongregasyon na Dios, a sinaliw [to] ed dala na dilin Anak to.”