“Saray Pastol ya Unong ed Pusok”

1, 2. (a) Antoy nayarin nagawa no agnaprotektaan so pulok? (b) Diad panaon na Biblia, antoray kimey na sakey a pastol?

SI Hiroyasu, a taga Japan, et ugaw ni sanen insaliwan nen nanay to na duaran karnero, kalakian tan kabatyan. Kinomponi to iraya, tan say kabatyan so manaanak na sanderwa kada taon kanian dinmakel iray karnero. Nen 12 años to, manga 12 odino 13 lay karnero to. Oniay nanonotan to: “Aminsan a kabkabuasan sanen nanaugip ak ni, arengel kon maingal ira. Agko ra nila’n tampol. Nen linma ak a siansia, anengneng ko ray atap ya aso ya ombabatik manlapud saray karnerok ya abingbingkas so eges da. Ataranta ak a nananap ed samay ina. Sikatoy aromog kon naames na dala tan manpapanabos. Samay kalakian labat so abilay. Naermenan ak a maong. Komon ta nilak iran tampol sanen nadngel koy paningal da. Agda sarag ya iyagel so inkasikara ed saraman ya aso.”

² Diad panaon na Biblia, kabisado lawari na amin so kimey na pastol. Iyaakar na pastol so kokomponien ton pulok diad karikaan tan seseguroen ton napakan iran maong. Iyaagel to met ira manlapud saray managsibar tan aanapen to iray nababalang. (1 Sam. 17:34-36) Pampapainawaen to so pulok diad mareen a pasen. Sikatoy manpapaanak met ed saray kabatyan insan to asikasoen iray kilaw da. Dakel a managsulat na Biblia, kaiba lay Jeremias, et angusar ed salitan pastol pian iyaliling so toon naikday responsabilidad a mangasikaso’d totoo, balanglan sikatoy manuley da odino espiritual a manangasikaso ra.

3. Antoy tutukoyen nen Jeremias sanen inusar to iray terminon “pastol” tan “manatagano”?

³ Walaray arum ed Kristianon kongregasyon ya iisipen dan saray elder et managpastol labat no sikaray ombisita’d agagi pian ontulong tan mamaseseg. Balet, diad impangusar nen Jeremias na saray terminon “pastol” tan “manatagano,” natalosan tayo ya inyaplika to iratan ed antokaman a pidedeneng na saray manangasikaso’d Juda diad saray totoo. Mabetbet a tinukoy na Dios iray prinsipe, propeta, tan saserdote ed Juda bilang mauges iran pastol lapud agda aanapen so pankaabigan na kaslakan a totoo. (Jer. 2:8) Minaltrato, pinalikdo, tan pinaulyanan da iray “karnero” ra lapud say aanapen da et say dili ran pankaabigan. Kanian apaulyanan iray totoo na Dios ed makapaermen ya espiritual a kipapasen. Inyabawag nen Jehova ya “abagey la” iratan a palson pastol, tan pinaseguroan toy totoo to ya ikdan to ra na saray maasikaso tan maimanon pastol a peteg a mangiyagel ed pulok.​—Basaen so Jeremias 3:15; 23:1-4.

4. Sioparay mangaasikaso ed pulok na Dios natan, tan antoy awawey da’d satan?

⁴ Sayan sipan na Dios et malaknab ya asumpal ed Manunan Pastol na saray karnero nen Jehova, si Jesus, a nagmaliw ya Ulo na Kristianon kongregasyon. Tinukoy toy inkasikato bilang “maong a managpastol,” a walaay tuan panangabagey ed saray indaulo to. (Juan 10:11-15) Pian naasikaso so pulok nen Jehova ed dalin natan, uusaren to iray pastol ya iwawanwan nen Jesus, salanti, saray elder a kabiangay matoor tan makabat ya aripen ontan met ed saray maseet ya elder a kabiangay “baleg ya ulop.” (Apo. 7:9) Panggugunaetan na sarayan pastol ya aligey masakripisyon awawey nen Jesus. Labalabay dan taganoen tan pablien so kongregasyon, a singa si Kristo. Abagey lay siopaman a mamaulyan odino pakatawan ed saray agagi ra odino mapaatagey tan andiay panangasi ed sikara! (Mat. 20:25-27; 1 Ped. 5:2, 3) Antoy iilaloan nen Jehova ed saray Kristianon pastol natan? Antoy naaralan tayo’d sulat nen Jeremias nipaakar ed manepeg ya awawey tan motibo na saray elder legan dan susumpalen iray responsabilidad da? Usisaen tayo pa iray betang da bilang manangitaryay tulong tan proteksion, bilang managbangat ed loob tan paway na kongregasyon, tan bilang ukom.

MANANGITARYA NA PROTEKSION

5-7. (a) Antoy iilaloan nen Jehova a paraan na pangasikaso ed saray karnero to, tan akin? (b) Panon a nipanengneng na saray elder so tuan panangaro ed agagi ra, pati saramay nisian ed pulok?

⁵ Tinukoy nen apostol Pedro si Jehova bilang “managpastol tan manangasikaso na saray kamarerwa [tayo].” (1 Ped. 2:25) Antoy awawey na Dios ed saray “karnero” to? Naromog tayoy ebat no repasoen tayoy agawa’d panaon nen Jeremias. Kayarin kinondena nen Jehova iray mauges a pastol ya amuyak tan amaulyan ed pulok, inkuan to a “tiponen” to iray karnero to, ya ipawil to ra ed panagpastolan da. Insipan ton sikatoy manuro na saray maong a pastol, ‘a managano ed sikara’ tan seguroen ton naprotektaan iray totoo to manlapud manag-anamot a kakabusol. (Jer. 23:3, 4) Talagan mabmabli ed si Jehova iray karnero to nensaman. Ontan met iray karnero to natan. Mabmabli imbayar to parad andi-anggaan a pankaabigan da.​—1 Ped. 1:18, 19.

⁶ Singa saray literal a pastol, saray Kristianon manangasikaso et nepeg ya agmapaulyan ed pangaasikaso ra ed kongregasyon. No sakey kan elder, alerto ka kasi ed antokaman a pakapatnagan na paniirap na agagim, tan mabulos mo ra kasin tulongan? Oniay insulat na makabat ya Arin Solomon: “Kulian mo ya amtaen so kipapasen na saray karnerom, tan imatonan mo a maong so saray bakam.” (Uli. 27:23) Ipapabitar na satan so inkakuli na saray literal a pastol; ingen, onaplika met itan ed panangasikaso na saray pastol ed kongregasyon. No manlilingkor ka bilang elder, panggugunaetan mo kasin talonaay tendensian dominaen so arum? Papaneknekan na mismon impanalambit nen Pedro ed balikas a “pakakatawan ed saramay kayarian na Dios” a walay ontan a tendensia na sakey ya elder. Antoy nagawaan mo pian magmaliw a tua so walad Jeremias 33:12? (Basaen.) Saray mansusulon ateng, balo, ikit tan sioman, maedad la, tan kalangweran so nayarin mankaukolan na nikadkaduman imano tan tulong.

⁷ Singa gagawaen na pastol ed literal a karnero, no maminsan et kaukolan na managpastol ed kongregasyon ya anapen tan tulongan iramay nisian ed pulok lapud nanduruman rason. Nakaukolan toy panagsakripisyo tan inkamapaabeba diad panggawa to’d satan. Maanos ton ipapanaon so pangasikaso ed saray pankaukolan na saray nimatalek ed sikato. Maabig no saray elder ed kongregasyon et matuan tepetan day inkasikara: ‘Kaunongan so panggugunaet kon mamaseseg tan mamabiskeg imbes a mangondena o mankritiko? Talaga kasin labay koy onaligwas ed saya?’ No maminsan et kaukolan ni maminpigan pansagpot pian natulongan so sakey a namoria iray bengatla unong ed panmoriay Dios. No ag-awaten a tampol na sakey ya agi so Makasulatan a bilin (aliwan personal ya opinyon), nonoten so Sankatagyan a Pastol tan Manangasikaso, si Jehova. Sikatoy maan-anos a ‘nansalita’ ed saray benger a totoo to tan nanggunaetan ton tulongan ira. (Jer. 25:3-6) Maslak a totoo na Dios natan et agmet manggagaway mauges, balet no kaukolan iran simbawaen, nepeg a gawaen itan na sakey ya elder a singa ginawa nen Jehova.

8. Panon a naalig na saray espiritual a pastol so ehemplo nen Jeremias?

⁸ Legan a wala ni pankanawnawa na saray Judio a makapawil ed si Jehova, impikasi ira nen Jeremias. Imbaga to’d Dios: “Nonoten mo no panon so impanalagey ko ed arap mo a nansalita na maong nipaakar ed sikara, pian ekalen mo so sanok mo ed sikara.” (Jer. 18:20) Napatnagan mo ed sarayan salita a si Jeremias et onnenengneng ed kamaongan na saray agagi to, ya agto nononoten a mauges ira. Natan, nepeg ya aligen na saray Kristianon manangasikaso so awawey nen Jeremias, likud labat no walay malinew ya ebidensyan say too et agmagbabawi tan gagagalaen toy manggaway mauges. Marakep no komendaan so arum ed maabig a gagawaen da tan ipikasi ira tan manpikasin kaiba ra.​—Mat. 25:21.

“SIKARA NAANI MANAGANO ED SIKAYO”

9, 10. Akin a say maong a pastol (elder ed kongregasyon) et sakey a managbangat?

⁹ Mitukoyan ed Jeremias 3:15, saray Kristianon pastol so “managano” ed arum panamegley na “pikakabat tan pakatalos,” salanti, manbangat ira. (1 Tim. 3:2; 5:17) Insipan nen Jehova ed totoo to ya ontan so gawaen na saray maong a pastol. Tan pinaseseg to iray Judio ya awaten day panangibangat nen propeta ton Jeremias pian nipetek ira. (Basaen so Jeremias 6:8.) Kaukolan a napakan iray karnero pian magmaliw iran mabiskeg. Mipadpara, kaukolan na totoo na Dios so napakan tan niwanwan panamegley na Salita to pian mansiansia ran mabiskeg ed espiritual.

¹⁰ No nipaakar ed panagbangat, walay duaran betang na saray elder​—unona, itulong ed saray kabiangan la na kongregasyon tan komadua, itulong ed saramay aliwa nin tuan Kristiano. Nipaakar ed komadua, tandaan: Say sakey ed saray manunan rason no akin a walay Kristianon kongregasyon et pian nipulong so maong a balita na Panarian na Dios. Lapud saya, nepeg a saray elder et maseseg a managpulong. (Jer. 1:7-10) Diad ontan et susumpalen day responsabilidad da ed Dios tan ipapanengneng day maabig ya ehemplo ed agagi ra. No sakey kan elder, agta say maparanay a pampulong a kaibay nanduruman agagi et mangiter ed sikay pankanawnawa pian natulongan mo iran onaligwas ed panagbangat da ontan met ed panagbangat mo? Tan no maseet kan mangidaulo ed panagpulong, makapaseseg itan a maong, tan ontulong itan pian onaligwas so interon kongregasyon.

11, 12. Antoy nepeg ya imanoen na sakey ya elder no labay toy magmaliw a maong a pastol?

¹¹ Nepeg ya ibase’d Biblia na saray elder so ibabangat da pian magmaliw itan a makagunggonan espiritual a tagano. Natalosan mo sirin, a pian magmaliw a maong a managbangat iray pastol ed kongregasyon, nepeg a maseet iran manaral na Salitay Dios. Ikomparam iya ed samay impabitar nen Jeremias a rason no akin a saray mangidadaulo ed saray kabaleyan to et aliwan maong a managbangat: “Saray pastol nagmaliw ira a makulnet tan ag-ira pinmanon ed Jehova. Kanian ag-ira inmaligwas, et amin iray pulok da nikayat ira.” (Jer. 10:21) Saramay nepeg a manbangat komon et agda tinumbok iray Makasulatan a prinsipyo tan agda inanap so Dios. Sirin, agnapatnagan so tuan kakabatan ed saray gagawaen da. Kanian inyabawag nen Jeremias so mas ambelat a panangondena ed sarayan palson propeta.​—Basaen so Jeremias 14:14, 15.

¹² Aliwan singa saraman a palson pastol, aaralen tan aaligen na saray Kristianon manangasikaso so ehemplo nen Jesus. Kanian makapanlingkor ira bilang makabat a pastol na pulok. Nayarin aliwan mainomay ed sikara so pangiyeskedyul na regular a panagaral lapud dakdakel so aarapen da. Balet no sakey kan elder, kasin kombinsido kan maong a magmaliw labat a makagunggona tan tua so ibabangat mo, a pakapatnagay pikakabat tan pakatalos, no ibasem itan ed Salitay Dios tan panangiwanwan na matoor tan makabat ya aripen? No nalilikas mo ya aliwa lan regular so personal a panagaral mo, antoy gawaen mo pian mansiansia kan duma ed saramay palson pastol ed panaon nen Jeremias?

13. Antoy tinmulong ed si Jeremias pian magmaliw a maong a managbangat, tan antoy naaralan ed sikato na saray Kristianon pastol natan?

¹³ Say sakey ya akatulong ed si Jeremias pian magmaliw a maong a managbangat et say impangusar toy ilustrasyon. Siempre, sikatoy binangatan nen Jehova. Seguradon makatantanda so pakaimaton ed impangibasig to na banga diad dalin, insan to imbaga ya ontan so kamisimisi na Jerusalem tan saray totoo ditan! (Jer. 19:1, 10, 11) Angusar met si Jeremias na ilustrasyon sanen sikatoy nanggawa tan anakbat na pako pian iyaliling so panirap na kabaleyan to manlapud panangaripen na Babilonia. (Jer., kap. 27-28) Agmet igaganggan na Dios iray elder ed kongregasyon yo a mangiyakto na saray ilustrasyon pian ipabitar iray punto. Balet, agta apresyaen mo no mangusar iray matukoy ya ilustrasyon tan eksperiensya ed panagbangat da? Talagan mapuersa tan makapakiwas iray ninonot a maong tan matukoy ya ilustrasyon tan alimbawa.

14. (a) Antoy angibasiyan nen Jeremias sanen tinukoy toy “balsamo ed Galaad”? (b) Panon a napabiskeg na saray Kristianon elder so espiritualidad na agagi ra?

¹⁴ Agaylan pisalamatan tayo so panagbangat na saray Kristianon pastol! Diad panaon nen Jeremias, anengneng ton kaukolan a natambal ed espiritual iray kabaleyan to. Oniay intepet to: “Anggapo ta so balsamo ed Galaad? Anggapo ta so mananambal diman?” (Jer. 8:22) Walan talagay literal a balsamo ed Galaad (Gilead), say pasen ed Israel diad bukig na ilog Jordan. Sayan ambalingit a tanaman a panlalapuay larak et kabkabat lapud nayari iyan pantambal, a mabetbet ya ipupuyok ed sugat pian onkepay sakit tan onabig. Balet, ag-ira natatambal ed espiritual. Akin? Oniay naobserbaan nen Jeremias: “Saray propeta manpropeta ra a sititila, tan saray saserdote manuley ira lapu ed saray gawa ra; et say baley ko sikato so aroen to ya ontan.” (Jer. 5:31) Komusta balet natan? Agta miabobon ka a walan talaga so “balsamo ed Galaad,” diad mismon kongregasyon yo? Sarag tayon iyaliling so makapaabig a balsamo ed ligliwan iiter na saray maasikason Kristianon pastol. Maaron iwawanwan da iray agagi ed Makasulatan iran prinsipyo, papabiskegen da ra, tan ipipikasi da ra tan manpipikasin kaiba ra.​—Sant. 5:14, 15.

“ONIA SO KUAN NEN JEHOVA”

15, 16. Akin a mankaukolan na panangasikaso so literal tan espiritual a pulok?

¹⁵ Isipen pay liket na sakey a pastol no natumangan so dakel ya oras na impansagpot to diad kianak na saray maligligsan kilaw! Balet amta to a kaukolan iran asikasoen pian ombaleg iran mabiskeg. Kanian, seguroen to a napakan iray susto. Lapud saray kilaw et nianak ya andukey so ikol da, nayarin nisagar da iratan ed nambabangil a dutak. Labay na pastol a mansiansian malinis tan mabiskeg iray karnero to, kanian putotan toy ikol da, ya asigtaen ton maong pian ag-ira tanto nasakitan. Saray espiritual a pastol so maaron mangaasikaso ed saray karnero, salanti, saray membro na kongregasyon da. (Juan 21:16, 17) Panliketan met na saray elder so iyaaligwas na saray interesado pian magmaliw a tuan Kristiano. Labay na sarayan Kristianon manangasikaso a magmaliw a mabiskeg tan napakan a susto so amin a karnero, malangwer man o maedad la, kanian ag-ira ontutundan mangasikaso’d sikara, tan no nakaukolan et mibali ra. Kaiba ed sayan kimey so pangipanonot ed agagi ra no antoy “kuan nen Jehova,” salanti, say ibabangat na Kasulatan.​—Jer. 2:2, 5; 7:5-7; 10:2; Tito 1:9.

¹⁶ Kaukolan nen Jeremias so inkakpel pian niyabawag toy mensahe na Dios. Ontan met iray manangasikaso ed kongregasyon, nagkalalo la ed saray kipapasen a nepeg day manimbawa pian protektaan so agagi ra. Singa bilang, naimano na sakey ya espiritual a pastol a kaukolan ton tulongan so sakey a ‘kapkapangiyanak a kilaw’ odino anggan matatken lan “karnero” pian agnadutakan na mundo nen Satanas. Nayarin agmet onkekerew na simbawa imay napepeligron agi. Anggaman ontan, kasin manpareen labat so maasikason pastol anta nanenengneng ton napepeligro lay sakey a membro na pulok to? Siempre, andi! Agto met ipasen ya aliwan seryoso so situasyon, ya isipen ton anggapoy problema anta mapatpatnag a wala tan nayarin manresulta ed pakaandi relasyon ed si Jehova na kapara ton lingkor.​—Jer. 8:11.

17. Kapigan tan panon a niiter na sakey a pastol so nikadkaduman imano ed indibidual a karnero?

¹⁷ No say agmaalwar a karnero et nibalang manlapud pulok, nepeg ya alisto so pastol a mangipawil ed satan diad pasen a protektado. (Basaen so Jeremias 50:6, 7.) Mipadpara, no maminsan et nepeg a mapekder balet maaron simbawaen na sakey a manangasikaso iramay walad mapeligron kipapasen. Alimbawa, nayarin naimano ton walay saninaro a mabetbet lan manuulop ya anggapoy tsaperon diad saray pasen a mairap dan nakontrol so liknaan da. Say mapangasi tan makatalos ya elder so makatulong pian napaliisan na saninaro iray makapatukson situasyon. Sarag ton ipabitar iray nayarin nagawa a manresulta ed konduktan bubusolen nen Jehova, balet manalwar ya agto ra aakusaan. Singa si Jeremias, bubusolen na saray matoor ya elder iray bengatlan bubusolen na Dios. Diad saya et aaligen day Jehova, ya anggaman aliwan maruksa, sikatoy akikasi ed totoo to panamegley na propeta to: “O, agyo gawaen so saya a bengatla a kagulak.” (Jer. 5:7; 25:4, 5; 35:15; 44:4) Kasin peteg ya aapresyaen mo so panagpaga na saray maaron pastol ed pulok?

18. Antoray makapaseseg a resulta na pansasagpot na saray espiritual a pastol?

¹⁸ Siempre, aliwan amin a sinimbawa nen Jeremias et dinmengel ed sikato. Balet, walara met so dinmengel. Singa bilang, sanen mankaukolan na ambelat a simbawa so kaaro tan sekretaryo ton si Baruc, mabulos ton inter itan. (Jer. 45:5) Antoy resulta? Naawat nen Baruc so panangabobon na Dios tan niliktar sanen aderal so Jerusalem. Ontan met natan, saray maabig a resulta’d intulong ed saray kapananisiaan so mamaseseg ed saray elder ed kongregasyon a ‘mantultuloy a manseet’ ed manangiliktar-bilay a ‘panamilin tan panagbangat.’​—1 Tim. 4:13, 16.

“ONKANEPEGAN” A DISIPLINA

19, 20. Antoy responsabilidad na saray elder no walaray makagaway kasalanan?

¹⁹ Say sananey nin betang na saray manangasikaso natan et sikaray espiritual ya ukom. No maminsan et kaukolan ya asikasoen na saray elder iray kaso na saramay gagagalaen day mankasalanan, a panggunaetan da ran tulongan pian magbabawi ira. Mapangasi balet diretsaan a pinaseseg nen Jehova iray managkasalanan a tundaan da lay mauges a kagagawa ra. (Jer. 4:14) Balet, no say sakey ya agi et agto tundaan so panggagawa toy kasalanan, nepeg iyan aksionan na saray manangasikaso pian naprotektaan so pulok manlapud makaderal ya impluensya. Singa ibabagay Kasulatan, ompan sikatoy kaukolan dan ekalen ed kongregasyon. Diad onia ran kipapasen, iilaloan nen Jehova ya onkiwas iray elder unong ed hustisya to. Si Arin Josias so maabig ya ehemplo’d saya. “Inukom to so sengegan na duka tan naukolan.” Talagan inalig toy panangaro na Dios ed hustisya. Kanian nipaakar ed saya, oniay intepet nen Jehova: ‘Aliwa ta a saya so pangamta ed siak?’ Lapud impatnag nen Josias so hustisya tan inkatunong, maong so nagmaliwan to. Agta naliknam a mas protektado ka sano panggugunaetan na saray elder yo ya aligen so ehemplo nen Josias?​—Jer. 22:11, 15, 16.

²⁰ Manmatalek ka a disiplinaen nen Jehova iray managkasalanan diad paraan ya “onkanepegan” ed sikara. (Jer. 46:28) Lapud saya, nakaukolan a saray elder et manimbawa, mamilin, odino mamaat ed saray kaagian, depende’d kipapasen tan awawey ya impatnag na saraya. Tan ompan nakaukolan ni ingen a dispelosipen so agmagbabawin managkasalanan. Diad saya et ag-ipikasi ed publiko na saray elder so sakey ya adispelosip tan mantutultuloy a mankakasalanan; anggapo lan lamang so kakanaan na satan.a (Jer. 7:9, 16) Balet, naalig day Dios diad pangipanengneng da’d sikato no panon ton napapawil so relasyon to’d Dios. (Basaen so Jeremias 33:6-8.) Anggaman ansakit no walay nadispelosip, makaseguro itayo a saray estandarte nen Jehova et matunong tan maptek, tan pankaabiganan na amin.​—Tag. 1:18.

21. Antoy nepeg a kipapasen na pulok na Dios, tan panon kan makatulong pian magmaliw ya ontan?

²¹ No saray estandarte na Dios et kabisado tan usaren na saray elder , say pulok et napakan, napabiskeg, tan naprotektaan a maong. (Sal. 23:1-6) Say ibabaga ed sikatayo nen Jeremias nipaakar ed awawey tan motibo, saramay matukoy tan agmatukoy, et nayarin iyaplika na saray Kristianon manangasikaso legan dan susumpalen so ambelat a responsabilidad dan mangasikaso ed saray karnero na Dios. Kanian, oniay nayarin itepet na kada sakey ed sikatayo, ‘Mantultuloy ko kasin apresyaen so uksoyan nen Jehova ya ibangat, igiya, tan protektaan so totoo to diad pikooperak ed saray pastol a ‘manatagano’ ed pulok panamegley na “pikakabat tan pakatalos”?’​—Jer. 3:15; 23:4.