Sikaray Siaabagey a Mamapastol ed Melag a Karnero

ED AMIN ya ayayep a maamo ed too, anggapoy kapara na karnero ed inkamaamo. Maslak ya ayayep so walaan na biskeg tan nisipor ya awawey a nakaukolan pian makaromog na tagano tan makaiwas ed saray pinalsan mamibiktima ed sikara, balet say karnero so duma. Satan so maletey ed saray mananup ed sikato, anggapoy biskeg ton mangidepensa ed inkasikato. No anggapoy pastol, say karnero so matakot tan agmakapangiyagel. Sano niyarawi ed pulok, magmainomay a nabalang. Kanian saray maamon karnero so walaan na mabiskeg iran rason a manlikna a sikaray maapit ed pastol da. No sikatoy anggapo, anggapoy tanton pankanawnawa ran makaliktar. Lapud sarayan wale-waleng, uusaren na Biblia iray karnero pian mangiyaliling ed totoon inosente, naabuso, odino agmakadepensa.

Maseguron, saray tumang na sakey a pastol so manepenepeg. Say bilay to so aliwan mainomay. Sikatoy niwalwal ed petang tan betel, tan naeeksperiensia toray panagpuyat. Kaukolan a nasalimbengan to so pulok manlapud saray umaanup, mabetbet diad dilin kapeligroan to. Lapud kaukolan a say pulok so lawas tiponen na pastol, baleg a panaon so nausar to ed pananap na saray naandi odino abalang a karnero. Kaukolan ton tambalen so mansasakit tan asugatan. Saray makapkapuy odino nakekesawan a kordero so kaukolan a sakbaten. Naynay ya asikasoen a wala so magenap a suplay na tagano tan danum. Kaslakan a say pastol so onugip a sanlabi ed uma ta pian nabantayan so pulok. Kanian, say panagpastol so sakey ya istrikton panagbilay a mankakaukolan na serbisyo na sakey a toon masebeg, makuli, tan maparaan. Nagkalautla, sikato so kaukolan a walaan na kapasidad a mangipanengneng na tuan panagpaga para’d pulok ya inmatalek ed sikato.

Panagpastol ed Pulok na Dios

Ireretrato na Biblia iray totoo na Dios a bilang maamon karnero tan saramay manaasikaso ed sikara bilang pastol. Si Jehova a mismo so ‘Pastor tan Obispo na saray kamarerwa tayo.’ (1 Pedro 2:25) Si Jesu-Kristo, “say maong a pastor,” so angibalikas na panpirawat to a naikdan na maabagey a panangasikaso iray karnero sanen imbaga to ed si apostol Pedro: ‘Pakan mo so saray korderok, pastolan mo so melag a karnerok, pakan mo so melag a karnerok.’ (Juan 10:11; 21:15-17, NW) Saray manangasikason Kristiano so walaan na importantin responsabilidad a ‘pastolan so iglesia [kongregasyon, NW] na Dios.’ (Gawa 20:28) Tan say kimey da bilang espiritual a pastol so mankaukolan na saray kalidad na sakey a literal a maong a pastol​—inkasebeg, inkakuli, inkamaparaan, tan, manuna, say impapuson panagpaga ed pankaabigan na pulok.

Diad saray agew na propeta na Dios a si Ezekiel, maslak ed saray pastol a tinuron mangasikaso ed saray pankaukolan na totoo nen Jehova diad Israel so sinmaew a manumpal ed saray kimey da. Say pulok na Dios so anagmak na baleg ya irap, a sengegay impangitalirak na karaklan ed tuan panagdayew. (Ezekiel 34:1-10) Natan, say klero na Kakristianoan so mangireretrato ed inkasikara bilang pastol ed inkuan dan Kristianon kongregasyon, balet say kipapasen ton mansasakit ed espiritual so mamapaneknek a say klero so mipadpara ed saray marelmeng a manamalingo ya amaulian tan angabuso ed totoo sanen wadiad dalin si Jesus. Saray relihyoson pangulo na Kakristianoan so singa “mioupa” ya “agmangkawanan ed saray carnero.” (Juan 10:12, 13) Diad antokaman a paraan et ag-ira mabulos, makasarag, odino onkualipikan mamastol ed pulok na Dios.

Saray Pastol a Talagan Mangaasikaso

Impanengneng nen Jesus so naspot ya alimbawa para’d amin a mamastol ed pulok nen Jehova. Diad amin a paraan et sikato so maaro, mapangasi, maabagey, tan matulong ed saray babangatan to. Sikato so inmunan nananap ed saramay mankaukolan. Anggaman si Jesus so okupado tan mabetbet a nakekesawan, sikato so lawas awalaan na panaon ya ontalineng ed saray problema ra tan mamaseseg ed sikara. Say inkamabulos ton mangitalaga na kamarerwa to ed biang da so manunan balikas na panangaro.​—Juan 15:13.

Natan, amin ya aturon mamatatken ed kongregasyon, pati saray ministeryal ya ariripen so walaan na onian responsabilidad ed pulok. Kanian, anggan saray materyal a bentahan posiblin nagamoran da ed sananey a bansa so agmanagyat ed dakel a tuloy ed sarayan responsablin lalaki ya onalis ed sananey a bansa pian taynan iray kongregasyon ya andian na magenap a tulong tan panangidaulo. Lapud manbibilay ed “mairap a panaon a pidenengan,” say pulok so mankakaukolan na panamaseseg tan panangiwanwan. (2 Timoteo 3:1-5) Wadtan so naynay a kapeligroan a say arum so nakalotan nen Satanas, a “singa omoang a leon a mananap na buagen to.” (1 Pedro 5:8) Natan a nagkalalo nen kapiganman, a kaukolan a ‘simbawaen [na saray Kristianon pastol] iray agnaoksoy, ibalap iray apunaw ed puso, taganoen iray makapuy.’ (1 Tesalonica 5:14) Importanti so pansiansian manbantay ta pian saray agmaligen so agniyarawi manlapud pulok.​—1 Timoteo 4:1.

Panon a nadetermina na pastol no kapigan mankakaukolan na tulong so sakey a karnero? Arum ed saray mapatnag a tanda et say isaew ya iyatendi ed saray Kristianon miting, iregular a pibibiang ed lawak a ministeryo, tan say tendensyan iyarawi ed maapit a pililimog ed arum. Saray kaleteyan so naimano met diad maalwar a pangimano ed awawey na saray karnero tan nengneng na saray tongtongan da. Ompan sikaray mabalaw ed arum, angangko ta mangipapanengneng a walay eememan da. Saray tongtongan da so nayarin alablabas a nisisiglaot ed materyalistiko iran gegemtan imbes ed espiritual iran kalat. Say gendagendat a kakulangan na entusiasmo, positibon awawey, tan gayaga so nayarin mankabaliksan a linmetey so pananisia ra. Say akakuranges a lupa so nayarin tanda a sikaray dedesdesen na onsusumpan kakanayon odino minumundon kakaaro. No naimano irayan tanda, determinaen na pastol no anton nengneng na tulong so nakakaukolan.

Sano ombisita pian tulongan so kapananisiaan, kaukolan a lawas nonoten na saray Kristianon pastol so manunan gagala ra. Satan so aliwa lambengat a sakey a sosyal a dalaw a say pantotongtongan et anggapoy kakanaan. Say kalat nen apostol Pablo diad imbisita ed saray agagi to et pian ‘nipanabang so maespiritu a palangkap, pian napaletan ira, naligliwa so balang sakey ed pananisia na sananey.’ (Roma 1:11, 12) Pian nagawaan iya, kaukolan so masakbay a panagparaan.

Ununa, surien so indibidual, tan panggunaetan ya amtaen no anto so espiritual a kipapasen to. Sano agawa la itan, nonoten no anton nengneng na panangidirihi, panamaseseg, odino simbawa so magmaliw a makagunggunan tuloy. Say Salita na Dios, say Biblia, so nepeg a manunan lapuan na impormasyon lapud satan so “mabiskeg.” (Hebreos 4:12) Nayarin sukayan ed saray magasin a Panag-Bantayan tan Awake! iray artikulon nipaakar ed ispisipikon pankaukolan na karnero a walaay nikadkaduma iran problema. Saray makapaligsa tan makaligliwa iran eksperiensia so naromog ed Yearbook of Jehovah’s Witnesses. Say kalat et say panginabang ed bengatlan espiritual ‘para’d kaabigan to ed kipaalagey.’​—Roma 15:2.

Panagpastol a Makapabiskeg

Kabat na sakey a pastol ed sakey a pulok na literal iran karnero a sikaray mandedependi ed sikato para’d proteksion tan panangasikaso. Saray kaslakan a tuloy a kaatapan ed pakabalang et say paninagem, inkakesaw, sugat, tan manaatakin kakabusol. Diad mipadparan paraan kaukolan a nabidbir tan pidenengan na espiritual a pastol iray mipadparan kaatapan a manisigensigen ed bunigas na say pulok. Saray onggendan so arum ed kaslakan iran problema tan pigaran suhestion no anto so nibaga ta pian ipanabang so impormasyon a makapaseseg ed espiritualidad.

(1) Singa say anggapoy liknaan a karnero, arum a Kristiano so onaarawi manlapud pulok na Dios lapud sikaray sasagyaten a singano inosenti tan makapaliket a pakaingganyoan. Nayarin sikaray nasigensigen tan niarawi ni ingen lapud pangegemtan ed saray kalat a nisiglaot ed materyalismo, panagpasyar, odino panligliwaan. (Hebreos 2:1) Saratan ya indibidual so nayarin napanonotan ed pankaganatan na panaon, ed pankaukolan a mantultuloy a maapit ed organisasyon nen Jehova, tan ed kaimportantian na panangiyuna ed bilay ed intereses na Panarian. (Mateo 6:25-33; Lucas 21:34-36; 1 Timoteo 6:8-10) Makatulong so konsehon naromog ed artikulon “Keep Your Balance​—How?” diad The Watchtower a Mayo 15, 1984, pahina 8-11.

(2) Kaukolan a tambalen na pastol iray karneron maniinagem. Diad mipadparan paraan, saray espiritual a pastol so kaukolan ya ontulong ed saray Kristianon mansasakit ed espiritual lapud saray negatibon bengatlan agawa ed bilay da. (Santiago 5:14, 15) Ompan anggapoy trabaho ra, nayarin walaay problema ed bunigas, odino manasagmak na saray problema ed bilay na pamilya ra. Saratan a totoo so nayarin agtanton walaay ganas para’d espiritual a tagano odino diad pililimog ed totoo na Dios. Say resulta na saya so panbukbukor tan pakadismaya. Kaukolan da so panamaseguro a sikaray inaro nen Jehova tan tulongan tora ed panaon na kairapan. (Salmo 55:22; Mateo 18:12-14; 2 Corinto 4:16-18; 1 Pedro 1:6, 7; 5:6, 7) Makatulong met so panrepaso ed artikulon “Look Straight Ahead as a Christian,” a naromog ed The Watchtower Hunyo 1, 1980, pahina 12-15.

(3) Say pastol so kaukolan ya akabantay ed saray karneron nakekesawan. Arum so sitotoor ya akapansungdo ed serbisyo nen Jehova ed loob na dakel a taon. Sikaray akipuligesgesan ed dakel a subok tan pakasalsali. Natan et nanengneng ed sikara iray tanda na ikekesaw ed panggawa na maong tan nayarin mangibalikas ni ingen na saray panduaruwa nipaakar ed pankaukolan na impasyan panagpulong. Kaukolan a pabilayen lamet so espiritu ra, ipawil lamet so panamabli ra para’d saray gayaga tan bendisyon a manlalapud sigpot-puson serbisyo ed Dios diad panangalig ed si Jesu-Kristo. (Galacia 6:9, 10; Hebreos 12:1-3) Angangko ta natulongan iran ontalos a papablien nen Jehova so matoor a serbisyo ra tan sikaray napabiskeg ed arapen iran kimey diad kirayewan to. (Isaias 40:29, 30; Hebreos 6:10-12) Nayarin makagungguna so panginabang na saray kanonotan a manlalapud artikulon “Do Not Give Up in Doing What Is Fine,” a walad The Watchtower a Hulyo 15, 1988, pahina 9-14.

(4) Singa saray karneron asakitan, arum a Kristiano so nasasakitan ed nababaloan dan makapasanok a kondukta. Ingen, no sikatayo so manamerdona ed arum, say mangatatawen ya Ama tayo so mangipagamor ed sikatayo na nakakaukolan a panamerdona. (Colosas 3:12-14; 1 Pedro 4:8) Arum ya agagi so nayarin asimbawa odino adisiplina a liknaen dan agmakatunongan. Anggaman ontan, amin tayo so nagunggunaan ed espiritual a simbawa tan disiplina, tan makaligliwan naamtaan a didisiplinaen nen Jehova iramay aaroen to. (Hebreos 12:4-11) Lapud sikaray agnaikdan na saray pribilihyo ed serbisyo ya ilaloan dan sikaray kualipikado, saray arum so angiyabuloy ed imbel-na-linawa a sengegay siblangan ed baetan da tan say kongregasyon. Balet no sikatayo so onarawi ed organisasyon nen Jehova, anggapolay lugar a laen para’d kilalaban tan tuan gayaga. (Ipareng so Juan 6:66-69.) Say makatulong ya impormasyon a mitukoyan ed sarayan pamaakaran so naromog ed artikulon “Maintaining Our Christian Oneness,” a walad The Watchtower na Agosto 15, 1988, pahina 28-30.

(5) Saray karnero so nepeg a nasalimbengan manlapud saray kabusol da. Diad mipadparan paraan, arum so nayarin sumlangen tan taktakoten na saray agmananisian kakanayon odino katrabahoan. Say katooran da so nayarin naataki sano sikaray dedesdesen pian bawasan da so serbisyo ra’d Dios odino ontunda ed pibibiang ed Kristianon ministeryo. Anggaman ontan, sikaray napapabiskeg sano natulongan iran manmorian kaukolan ya ilaloan so isusumpa tan satan so sakey ed saray aktual a prueba a sikatayoy tuan babangatan nen Jesu-Kristo. (Mateo 5:11, 12; 10:32-39; 24:9; 2 Timoteo 3:12) Nayarin makagungguna a saglawien a no sikaray matoor, sikaray agbalot kaindanan nen Jehova tan tumangan to so panagsungdo ra. (2 Corinto 4:7-9; Santiago 1:2-4, 12; 1 Pedro 5:8-10) Say artikulon apauloan na “Enduring Joyfully Despite Persecution” ed The Watchtower na Abril 15, 1982, pahina 21-7, so mangitatarok na kaaruman a panamaseseg.

Pastol​—Sumpalen Yoray Responsabilidad Yo

Saray pankaukolan na pulok na Dios so dakel, tan say suston panagbantay tan panangasikaso so sakey a kimey a mankakaukolan na anos. Saray Kristianon pastol sirin so nepeg a magmaliw a maabagey, walaan na tuan panagpaga, tan interesadon ontulong. Importanti so anos tan pakatebek. Bangta arum a sinansakey so mankaukolan na simbawa tan panonot, say arum so nagugunggunaan a tuloy manlapud panamaseseg. Say pigaran personal ya ibibisita so nayarin magenap la ed arum a pankanawnawa, bangbalet para ed arum et ompan kaukolan so regular a panagaral na Biblia. Diad amin a kaso, say manunan kalat et say panginabang na makapabiskeg a panangiwanwan ed espiritualidad odino maaron simbawa a mamakiwas ed indibidual pian onggapon ontumbok ed maong ya inkailuam ed panagaral, magmaliw odino mantultuloy a regular diad iyaatendi ed saray miting ed kongregasyon, tan mangayaga ed aktibon pibibiang ed Kristianon ministeryo. Saraya so manunan paraan pian natulongan iray kapananisiaan tan natulongan iran mangilukas na dalan para’d bulos ya agos na masanton espiritu nen Jehova.

Saray pastol a mangitatarok na ontan a nengneng na suporta so manggagawa na mablin tuloy a serbisyo ed biang na pulok na Dios. (Nengnengen so The Watchtower na Nobyembre 15, 1985, pahina 23-7.) Say gagawaen na espiritual iran pastol so aapresyaen a tuloy na say pulok. Kayari impakaawat na ontan a tulong, inkuan na sakey ya ulo na pamilya: ‘Kayari inkiwala mi’d katuaan ed loob la na 22 a taon, sikami so atangguyor na mundo diad panamegley na materyalismo. Mabetbet a kaliktan mi so onatendi ed saray miting, balet singano agkami ontalonan makaatendi. Talagan agkami matukoy ed sistema nen Satanas, kanian sikami so sigpot a nisian, niarawi. Sikami so nanlikna na insaew tan gonigon. Kaukolan miray makapaseseg a salita. Sanen binisita kami na sakey a matatken, sigagayaga min inawat so probisyon na sakey a panagaral na Biblia ed ayaman mi. Natan amin mi so nipawil ed maligen ya organisasyon nen Jehova. Agko nibalikas so liket a naliliknak!’

Wala so sengegan na baleg a gayaga sano saray nababalang odino adismayan agagi tayo so nipawil tan nagmaliw ya aktibo lamet ed espiritual. (Lucas 15:4-7) Say gagala nen Jehova ed totoo to so nagawa sano sikaray mankakasakey a “singa saray carnero na Bosra.” (Miqueas 2:12) Diad sayan maligen ya amotan et ‘naromog [da] so inawa na saray kamarerwa’ ra diad tulong na Maabig a Pastol, si Jesu-Kristo. (Mateo 11:28-30) Say nankakasakey a sankamundoan a pulok so mangaawat na panangiwanwan, ligliwa, tan proteksion tekep na inkadaakan ed espiritual a tagano.

Natan, diad panamegley na sayan panagpastol, pagagawa nen Jehova iyan maaron kimey a mitunosan ed kadaanan a sipan to: “Manosisaak naani nipaakar ed saray carnerok, tan anapen ko ra naani . . . ilaban ko ra naani ed saray amin a pasen a nitayakan da. . . . Pakanen ko ra naani ed maong a pankabkaban. . . . Anapen ko naani so abalang, . . . tan bedberan ko naani so aputer, tan pabiskegen ko naani so mabeblay.” (Ezequiel 34:11-16) Agaylan ligliwa a naamtaan a si Jehova so Pastol tayo!​—Salmo 23:1-4.

Lapud madibino iran probisyon para’d panagpastol ed pulok na Dios, bilang ariripen nen Jehova nayari tayon milikna ed liknaan nen David, a nankuan: “Siak ondokol ak naani ed kareenan tan naugip ak; ta sika labat, Jehova, so mamaayam ed siak ed andi kaatapan.” (Salmo 4:8) On, saray totoo nen Jehova so makakalikna na inkaligen ed maaron panagtalima to tan sikaray misadsalamat a saray Kristianon mamatatken so maabagey a mamapastol ed melag a karnero.

[Picture Credit Lines ed pahina 20, 21]

Potter’s Complete Bible Encyclopedia