Itekep ed Panagsungdo Yo so Maridios a Debosyon
“Itekep ed pananisia yo so . . . panagsungdo, dia ed panagsungdo yo say maridios a debosyon.”—2 PEDRO 1:5, 6, NW.
1, 2. (a) Diad kagapo na dekada na 1930, anto so agawa ed saray Tasi nen Jehova ed daldalin a babanlongan na Nazi, tan akin? (b) Panon so intalindeg a malet na saray totoo nen Jehova ed silong na sayan maruksan panagtrato?
SAMAN so sakey ya ambilunget a peryodo ed awaran na koma-20 a siglo. Kagapo na dekada na 1930, nilibon Tastasi nen Jehova ed daldalin a babanlongan na Nazi so agmakatunongan ya inerel tan inpisok ed panangipangawan iran kampo. Akin? Lapud sikaray nansiansian neutral tan angipulisay ed pangiyabawag na “heil Hitler.” Panon iran trinato? “Anggapo lay arum a grupo na saray priso . . . a niwalwal ed sadismo na saray sundalon SS a singa ed saray Estudyante na Biblia [Tastasi nen Jehova]. Saya so sadismo a tinandaan na nantutumbokan tan agmangangga iran panamairap ed pisikal tan ed mental, ya anggapoy salita ed mundon nayarin nausar ta pian niretrato iya.”—Karl Wittig, sakey a datin opisyal na gobiernon Aleman.
2 Panon a tinmalindeg a malet iray Tasi? Diad libro ton The Nazi State and the New Religions: Five Case Studies in Non-Conformity, si Dr. Christine E. King so nankuan: “Dia lambengat ed saray Tasi [a kasuniyan na arum a relihyoson grupo] ya agtinmalona so gobierno.” On, saray Tasi nen Jehova diad interamenti so tinmalindeg a malet, anggaman para’d nilasus ed sikara et mankabaliksan iya na pansungdo anggad ipapatey.
3. Antoy nanggawa ed saray Tasi nen Jehova a makapansungdo ed alablabas iran subok?
3 Antoy nanggawa ed saray Tasi nen Jehova ya akapansungdo ed ontan iran subok ya aliwa lambengat ed Alemanyan Nazi noagta diad sankamundoan? Say mangatatawen ya Ama ra so tinmulong ed sikaran mansungdo lapud maridios a debosyon da. “Amta na Katawan [Jehova, NW] so pangiliktar to ed saray masantos ed katokso [saray subok, NW],” so insalaysay nen apostol Pedro. (2 Pedro 2:9) Asasakbay ed saya lamlamang a sulat, saray Kristiano so sinimbawa nen Pedro: “Itekep ed pananisia yo so . . . panagsungdo, dia ed panagsungdo yo say maridios a debosyon.” (2 Pedro 1:5, 6, NW) Kanian say panagsungdo so maapit a misiglaotan ed maridios a debosyon. Diad tua, pian makapansungdo anggad kasampotan, kaukolan tayon ‘gegemtanen so maridios a debosyon’ tan ipatnag itan. (1 Timoteo 6:11, NW) Balet anton talaga so maridios a debosyon?
No Anto so Maridios a Debosyon
4, 5. Anto so maridios a debosyon?
4 Say Griegon nombre (noun) para’d “maridios a debosyon” (eu·seʹbei·a) so nayarin ipatalos ed literal a “makanepegan a panamagalang.”a (2 Pedro 1:6, Kingdom Interlinear) Satan so mangipapatnag na impapuson liknaan ed Dios. Unong ed si W. E. Vine, say adjetibon eu·se·besʹ, a literal a mankabaliksan na “manepeg a pagalangan,” so manutukoy ed “biskeg ya, iwawanwan na masanton galang ed Dios, a nipapatnag diad matoor a panaglingkor.”—2 Pedro 2:9, Int.
5 Say balikas a “maridios a debosyon” sirin so manutukoy ed panamagalang odino debosyon ed si Jehova a mamapakiwas ed sikatayo a gawaen so makapaliket ed sikato. Saya so gagawaen anggaman ed arap na mairap iran subok lapud inaro tayo so Dios manlapud puso. Satan so matoor, personal a siglaotan ed si Jehova a nipapatnag ed kabibilay tayo. Saray tuan Kristiano so papasesegen a manpikasi pian nawalaan komon na “sakey a bilay a mareen tan mapayapa ed amin a kasimpitan tan kabintaan.” (1 Timoteo 2:1, 2) Unong ed saray leksikograpon di J. P. Louw tan E. A. Nida, “diad dakel a pansasalita say [eu·seʹbei·a] ed 1 Tm 2.2 so matukoy ya ipatalos bilang ‘manbilay unong ed labay na Dios a panbilay tayo’ odino ‘manbilay unong ed imbaga na Dios ed sikatayon nepeg a kabibilay tayo.’”
6. Anto so siglaotan na panagsungdo tan maridios a debosyon?
6 Natan et lalon naapresya tayo so siglaotan na panagsungdo tan maridios a debosyon. Lapud sikatayoy manbibilay unong ed panlabayan na Dios—tekep na maridios a debosyon—gugulaen itayo na mundo, a mantultuloy a mangitatarok na saray subok ed pananisia. (2 Timoteo 3:12) Balet sikatayoy agpakiwasen na motibon sungdoan iratan a subok no aliwan lapud personal a siglaotan tayo ed mangatatawen ya Ama tayo. Nilikud ed saya, si Jehova so onkikiwas ed ontan ya impapuson debosyon. Isipen pa no antoy liknaan to ed ibantag manlapud katawenan tan imatonan iraman so, lapud debosyon da ed sikato, so manbabanikel a mamaliket ed sikato anggaman ed amin a nengneng na isusumpa. Agpankelawan a sikatoy marunong a “mangiliktar manlapud tukso [saray subok, NW] ed totoon walaay maridios a debosyon”!
7. Akin a kaukolan a bayuboan so maridios a debosyon?
7 Anggaman ontan, sikatayoy agniyanak a walaay maridios a debosyon, nisay automatikon nagamoran tayo itan manlapud maridios ya atateng. (Genesis 8:21) Imbes, satan so kaukolan a nabayuboan. (1 Timoteo 4:7, 10) Kaukolan tayon kimeyan ya itekep so maridios a debosyon ed panagsungdo tan ed pananisia tayo. Saya, kuan nen Pedro, so mankakaukolan na “pangyan yo na seseg.” (2 Pedro 1:5) No ontan, panon tayon nagamoran so maridios a debosyon?
Panon Tayon Nagamoran so Maridios a Debosyon?
8. Unong ed si apostol Pedro, anto so tombok ed pangamor na maridios a debosyon?
8 Insalaysay nen apostol Pedro so tombok ed pakagamor na maridios a debosyon. Inkuanto: “Gracia tan kareenan komon so ondakel ed sikayo dia ed pikakabat ed Dios tan Katawan tayo a Jesus; bangta ganagana a bengatla a nipaakar ed bilay tan kasantosan initer ed sikatayo na madibino’n pakayari to, lapu ed pikakabat ed anawag ed sikatayo a nisesengeg ed gloria tan kasimpitan to.” (2 Pedro 1:2, 3) Kanian pian say pananisia tan panagsungdo so nitekep ed maridios a debosyon, sikatayoy kaukolan ya onaligwas ed susto, salanti, sigpot, odino kumpleto, ed pikakabat ed si Jehova a Dios tan ed si Jesu-Kristo.
9. Panon a niyilustra a say pakawalaan na suston pikakabat ed Dios tan ed si Kristo et lalanoren to so nagkalalo nen say pangamta no siopa ra?
9 Anto so kabaliksan na pakawalaan na suston pikakabat ed Dios tan si Kristo? Malinew, sasaglawien to so nagkalalo ni nen say pikabat no siopa ’ra. Diad pangiyilustra: Nayarin kabat mo no siopa so sankaasinggeran a kaabay mo tan nayarin ibabanom ni ingen ed ngaran to. Balet kasin pautangen mo na baleg a kantidad? Andi nilikud no talagan kabkabat mo no antoy inkatoo to. (Ipareng so Uliran 11:15.) Ontan met, say susto, odino sigpot a pikabat ed si Jehova tan ed si Jesus so mankabaliksan na nagkalalo ni nen say panisia lambengat a sikaray wala tan ed pakaamta ed ngaran da. Pian sikatayoy makapansungdo ed saray subok nisesengeg ed sikara anggad patey, nepeg a kabaten tayoran tuloy. (Juan 17:3) Anto so lalanoren na saya?
10. Anton duaran bengatla so nalalanor diad pakawalaan na suston pikakabat ed si Jehova tan ed si Jesus, tan akin?
10 Say pakawalaan na susto, odino kumpleton pikakabat ed si Jehova tan si Jesus so manlalanor ed duaran bengatla: (1) pangamta ed sikara bilang persona—saray kalidad, liknaan, tan paraan da—tan (2) pangalig ed alimbawa ra. Lalanoren na maridios a debosyon so impapuso, personal a siglaotan ed si Jehova tan saya so napatnagan diad panamegley na kabibilay tayo. Kanian, pian nagamoran itan, kaukolan a nakabatan tayon personal si Jehova tan sigpot a naamtaan tayo so linawa tan saray paraan to anggad posiblin nagawaan na too. Tua a diad pangamta ed si Jehova, a sikatayoy apalsa unong ed olibay to, kaukolan ya usaren tayo so ontan a pikakabat tan pambanikelan so pagmaliw a singa sikato. (Genesis 1:26-28; Colosas 3:10) Tan lapud sigpot ya inalig nen Jesus si Jehova ed imbaga tan ginawa to, say suston pikabat ed si Jesus so makanan tulong diad pamaaligwas na maridios a debosyon.—Hebreos 1:3.
11. (a) Panon tayon nagamoran so suston pikakabat ed Dios tan ed si Kristo? (b) Akin ya importantin dalepdepen so abasa tayo?
11 Balet, panon tayon nagamoran so ontan a suston pikakabat ed Dios tan ed si Kristo? Diad panamegley na maseet a panaral na Biblia tan nibase’d-Biblia iran palapagan.b Anggaman ontan, pian say personal a panagaral tayo na Biblia so mansumpal ed pakagamor tayo na maridios a debosyon, importanti so pangitalaga tayo na panaon a mandalepdep, salanti, umamengen, odino morekdeken so binasa tayo. (Ipareng so Josue 1:8.) Akin a saya so importanti? Tandaan a say maridios a debosyon so sakey ya ampetang, impapuson liknaan ed Dios. Diad Kasulatan, say panagdalepdep so naulit-ulit a nisisiglaot ed piguratibon puso—say akindalem ya inkatoo. (Salmo 19:14; 49:3; Uliran 15:28) Sano walaay panamablin umamengen tayoy binasa tayo, saya so manasagyat anggad akindalem ya inkatoo, diad ontan et manasagyat ed liknaan tayo, tan mangimpluensya ed panagnonot tayo. Diad ontan lambengat a napabiskeg na panagaral so personal a siglaotan tayo ed si Jehova tan managdag ed sikatayon manbilay ed paraan a makapaliket ed Dios anggan diad arap na makaangat iran sirkumstansya odino mairap iran subok.
Pangagamil na Maridios a Debosyon ed Ayaman
12. (a) Unong ed si Pablo, panon a naagamil na sakey a Kristiano so maridios a debosyon ed ayaman? (b) Akin a saray tuan Kristiano so mangasikaso ed maedad lan atateng da?
12 Say maridios a debosyon so nepeg ya agamilen ya ununa ed ayaman. Kuan nen apostol Pablo: “Bangbalet no wala so balo ya wala’ra so anak to odino apo, amtaen na saraya komon ya onona ya ipanengneng so kasimpitan da ed kaamong da’n dili tan tomangan da so kaatengan da: ta saya sikato so makapalikliket ed arap na Dios.” (1 Timoteo 5:4) Say panangasikaso ed saray matatken lan atateng, a singa ibabaga nen Pablo, so sakey a panangipanengneng na maridios a debosyon. Say ontan a panagtalima so gagawaen na saray tuan Kristianos aliwa lambengat a lapud saya so obligasyon da noagta lapud panangaro ed saray ateng da. Balet, nagkalalo nen satan, bibidbiren da so kaimportantian ya ipapasen nen Jehova ed panangasikaso ed pamilya. Amta ran tuloy a say pangipulisay a mangasikaso ed pamilya na sakey so mipetekan ed ‘pangitalirak ed pananisian Kristiano.’—1 Timoteo 5:8.
13. Akin a peteg ya angat so pangagamil na maridios a debosyon ed ayaman, balet anton inkapnek so resulta na pangasikaso na sakey ed ateng to?
13 Aksobien, aliwan naynay a mainomay ya agamilen ed ayaman so maridios a debosyon. Saray membro na pamilya so ompan nanaarawian na ayaman ed balang sakey. Ompan saray ankabaleg lan ananak so walaan la na dilin pamilya ra tan nayarin mipupuligesgesan ed kabibilay. Say nengneng odino sukat na panangasikason kakaukolanen na ateng so nayarin makaapektan tuloy ed pisikal, mental, tan emosyonal a bunigas na manaasikaso. Anggaman kuan, wala so tuan inkapnek diad pakaamta a say pangasikaso ed ateng na sakey so aglambengat makapangiter na “sakey a kaukolan a bayar” noagta mamaliket met ed Samay “pangalaan na ngaran na amin a sankaamongan ed tawen tan dia ed dalin.”—Efeso 3:14, 15.
14, 15. Mangisalaysay na sakey ya alimbawa na maridios a panangasikaso na ananak ed ateng.
14 Kunsideraen pa so sakey a tuan makapatiknan alimbawa. Si Ellis tan limara ed agagi ton lalaki tan bibii so nipapaarap ed peteg ya angat na pangasikaso ed ama ra diad ayaman. “Nen 1986 say amak so naataki, a sengegay sigpot ya inkaparalisis to,” kuan nen Ellis. Saray anemiran anak so akibiang ed panangasikaso ed ama ra, a sikatoy amesen da a seguroen da a sikatoy regular ya ipatirakyang pian agnawalaan na lanok so beneg to. “Sikatoy ibabasaan mi, kakatongtongen, tugtogan mi na musika. Agmi naseguro no amta toray nagagawa ed liber to, balet sikatoy pidedenengan mi a singa sikatoy sigpot a makaamta ed amin a nagagawa.”
15 Akin a saray anak so mangaasikaso ed ama ra a singa onman? Intuloy nen Ellis: “Kayari impatey na ina mi nen 1964, si Tatay lambengat so amabaleg ed sikami. Diad saman, say edad mi so manlapud 5 ya anggad 14. Sikatoy wadman ya akaparaan ya ontulong ed sikami ed saman; sikami met so wadia pian ontulong ed sikato natan.” Malinew, aliwan mainomay so pangitarok na ontan a panangasikaso, tan talagan no maminsan et nadismaya iray anak. “Balet namoria mi a say kipapasen nen ama mi so agmanbayag a problema,” kuan nen Ellis. “Iilaloan mi so panaon sano si ama mi so nipawil lamet ed maabig a bunigas tan sikami so mankakasakey lamet a kaibay ina mi.” (Isaias 33:24; Juan 5:28, 29) Maseguro, say ontan a nitalagan panag-asikaso ed ateng so talagan mamaliket ed puso na Samay mangigaganggan ya igalang na saray anak iray ateng da!c—Efeso 6:1, 2.
Say Maridios a Debosyon tan say Ministeryo
16. Anto so nepeg a manunan rason ed gagawaen tayo ed ministeryo?
16 Sanen inawat tayo so imbitasyon nen Jesus a sikatoy maparanay a ‘tumboken,’ nisilong itayo ed madibinon ganggan a manpulong na maong a balita na Panarian tan manggawa na saray babangatan. (Mateo 16:24; 24:14; 28:19, 20) Malinew, say pibiang ed ministeryo so sakey a Kristianon obligasyon ed sarayan ‘kaonoran ya agew.’ (2 Timoteo 3:1) Anggaman ontan, say motibo tayo ed panagpulong tan panagbangat so nepeg a nagkalalo nen say liknaan lambengat na sakey a kimey odino obligasyon. Say aralem a panangaro ed si Jehova so nepeg a manunan rason ed gagawaen tayo tan kaunongan so gagawaen tayo ed ministeryo. “Dia ed inkadaakan na puso say sangi mansalita,” kuan nen Jesus. (Mateo 12:34) On, sano say kapusoan tayo so manlepwa ed panangaro’d si Jehova, nalikna tayon sikatayoy napapakiwas a mantasi ed arum nipaakar ed sikato. Sano say panangaro ed Dios so motibo tayo, say ministeryo tayo so sakey a makabaliksan a panangibalikas na maridios a debosyon tayo.
17. Panon tayon nayarin bayuboan so dugan motibo ed ministeryo?
17 Panon tayon nabayuboan so dugan motibo ed ministeryo? Umamengen a tekep na apresasyon iray taloran rason ya inter nen Jehova ed sikatayo diad pangaro ed sikato. (1) Aaroen tayo si Jehova lapud ginawa to para’d sikatayo. Anggapolay babaleg ya aro a nipapanengneng nen say impangitarok na dondon. (Mateo 20:28; Juan 15:13) (2) Aaroen tayo si Jehova lapud gagawaen to natan para’d sikatayo. Sikatayo so walaan na kawayangan a mitongtong ed si Jehova, ya oneebat ed saray pikakasi tayo. (Salmo 65:2; Hebreos 4:14-16) Legan ya iyuuna tayoray intereses na Panarian, pangagayagaan tayoray pankaukolan ed bilay. (Mateo 6:25-33) Mangaawat itayo na mantultuloy a suplay na espiritual a taganon ontutulong ed sikatayon manalona ed saray probleman kidudungetan tayo. (Mateo 24:45) Tan walaan tayo na bendisyon ed pagmamaliw a kabiangan na sakey a sankagloboan a Kristianon impanaagi a talagan mangibibiig ed sikatayo manlapud arum ed mundo. (1 Pedro 2:17) (3) Aaroen tayo met si Jehova lapud gawaen to ni para’d sikatayo. Lapud panangaro to, sikatayo’y ‘mamebenben a malet ed tuan bilay’—say andi-anggaan a bilay ed arapen. (1 Timoteo 6:12, 19, NW) Sano kunsideraen tayo so panangaro nen Jehova ed sikatayo, maseguron pakiwasen itayo na puso tayon nawalaan na sakey a matoor a biang diad pangibaga ed arum na nipaakar ed sikato tan ed mabli iran gagala to! Agla kaukolan ya ibaga ed sikatayo na arum no anto so nepeg a gawaen odino kaunongan so nepeg a gawaen ed ministeryo. Say puso tayo so mamakiwas ed sikatayon gawaen so anggaay nayarian tayo.
18, 19. Anton babeng so tinalonaan na sakey ya agin bii ta pian makapibiang ed ministeryo?
18 Anggan diad arap na mairap iran sirkumstansya, say puson pinakiwas na maridios a debosyon so nasagyat a mansalita. (Ipareng so Jeremias 20:9.) Saya so nipanengneng ed kipapasen nen Stella, sakey a mabaing a tuloy a biin Kristiano. Sanen sikato so ginmapo ed panagaral na Biblia, naisip to, ‘Agak makapankabkaabungan anggan kapigan!’ Say salaysay to et: “Siak so talagan mabaing. Agak makaasingger ed arum pian nigapok so tongtongan.” Legan na pantutultuloy ton manaaral, binmaleg so panangaro to ed si Jehova, tan abayuboan to so ampetang a pilalek ya itongtong ed arum so nipaakar ed sikato. “Nanonotan ko ni impangibagak ed managbangat ko na Biblia, ‘Talagan labalabay ko so mansalita, balet ta agko nagawaan, tan satan so mangogonigon ed siak.’ Agko nalingwanan so imbaga to ed siak: ‘Stella, misalamat ka ta labay mo so mansalita.’”
19 Ag-abayag, si Stella so nampulong ed sankaasinggeran a kaabay to. Kayari to et sikatoy nanggawa na sankabalgan a kundang—sikatoy akibiang ed panagkabkaabungan a ministeryo ed sankaunaan a pankanawnawa. (Gawa 20:20, 21) Nanonotan to: “Insulat ko so presentasyon ko. Balet ta agaylay nerbiyos ko ya anggaman walad arapan ko iman, lapud nerbiyos et agak makanengneng ed saray notak!” Natan, ed apalabas lan 35 a taon, si Stella so siansian mabaing. Ingen, inadaro to so lawak a ministeryo tan mantutultuloy a makabaliksan a mibibiang ed satan.
20. Anton alimbawa so mangipapanengneng ya anggan say panamasegsegang odino panangipangaw so agmakapepe ed saray matoor a Tastasi nen Jehova?
20 Anggan say panamasegsegang odino panangipangaw so agmakapepe ed saray matoor a Tastasi nen Jehova. Kunsideraen pa so alimbawa nen Ernst tan Hildegard Seliger na Alemanya. Lapud pananisia ra, no panaruman so nausar da et masulok a 40 a taon ed saray panangipangawan a kampo na Nazi tan ed saray prisoan na Komunista. Anggan ed prisoan, sikaray nantultuloy a nantasi ed arum iran priso. Nanonotan nen Hildegard: “Siak so imbiig na saray opisyal na prisoan a bilang nagkalautlan peligroso, lapud ta, singa imbaga na sakey a biin guardia, a siak so mansasalita nipaakar ed Biblia a sanagew. Kanian siak so inyan ed sakey a selda diad silongan.” Diad kaunoran kayari inkibulos da, si Brother tan Sister Seliger so angitalaga na sigpot a panaon da ed Kristianon ministeryo. Sikara so namparan sitotoor a nanlingkor anggad impatey da, si Brother Seliger nen 1985, tan say asawa to nen 1992.
21. Anto so nepeg a gawaen tayo pian natekepan na maridios a debosyon so panagsungdo tayo?
21 Diad maseet a panagaral ed Salita na Dios tan pangitalaga na panaon ed pandalepdep tekep na panangapresya ed naaralan tayo, sikatayoy ombulaslas ed suston pikakabat ed si Jehova a Dios tan ed si Jesu-Kristo. Saya, diad kaunoran, so mansumpal ed pakagamor tayo na nagkalalon baleg a kabiangan na satan a mablin kalidad—maridios a debosyon. No anggapo so maridios a debosyon et agtayo nasungdoan iray nambabangil a subok ya onsasabi ed sikatayo bilang Kristianos. Kanian tumboken tayo so simbawa nen apostol Pedro, a mantultuloy ya ‘itekep ed pananisia so panagsungdo tan ed panagsungdo et say maridios a debosyon.’—2 Pedro 1:5, 6.
[Saray paimano ed leksab]
a Nipaakar ed eu·seʹbei·a, ibabaga nen William Barclay: “Saya so seb- a kabiangan [a lamot] na salitan mankabaliksay panamagalang odino panagdayew. Say eu- so salitan Griego para’d makanepegan; kanian, say eusebeia so panagdayew, say panamagalang ed makanepegan tan matunong ya iter.”—New Testament Words.
b Para’d diskusyon ed paraan na panagaral pian napalaknab so pikakabat tayo ed Salita na Dios, nengnengen so Say Panag-Bantayan na Agosto 15, 1993, pahina 12-17.
c Para ed interamentin diskusyon no panon a naagamil so maridios a debosyon ed saray maedad lan atateng, nengnengen so The Watchtower a Hulyo 1, 1987, pahina 13-18.
Anto so Ebat Mo?
◻ Anto so maridios a debosyon?
◻ Anto so siglaotan na panagsungdo tan maridios a debosyon?
◻ Anto so tombok ed pakagamor na maridios a debosyon?
◻ Panon a naagamil na sakey a Kristiano so maridios a debosyon ed ayaman?
◻ Anto so nepeg a manunan rason ed gagawaen tayo ed ministeryo?
[Litrato ed pahina 18]
Say panagsungdo tan maridios a debosyon so impatnag na Tastasi nen Jehova a nipangaw ed Kampo na panangipangawan na Nazi diad Ravensbrück