Panagsungdo​—Makana Para’d Kristianos

“Itekep ed pananisia yo so . . . panagsungdo.”​—2 PEDRO 1:5, 6.

1, 2. Akin ya amin tayo so kaukolan a mansungdo anggad kasampotan?

SAY managbaroy a manangasikaso tan say asawa to so binmisita ed kaparan Kristiano a wala’d dekada na koma-90 taon. Sikatoy angusar na saray dekada ed sigpot-panaon a ministeryo. Legan na pantotongtong da, anonotan na mas matatken ya agin laki so nipaakar ed arum a pribilihyon nangayagaan to ed apalabas iran taon. “Balet,” sikato so naermenan legan ya unaagos iray lua ed lupa to, “natan et agak la tanton makagawa na antokaman.” Say managbaroy a manangasikaso so angilukas na Biblia to tan binasay Mateo 24:13, a ditan et inaon si Jesus ya angikuan: “Say misongdo ya anga ed kasampotan, sikato lamlamang so nilaban naani.” Kayari to et ninengneng na manangasikaso so inadaron agi tan nankuan: “Say kaunoran ya asainmin tayon amin, anggan kaunongan kabaleg odino kamelag so nagawaan tayo, et say pisungdo anggad kasampotan.”

² On, bilang Kristianos amin tayo so nepeg a mansungdo anggad kasampotan na sayan sistema na bengabengatla odino anggad anggaan na bilay tayo. Anggapo lay arum a paraan pian naawat so panangabobon nen Jehova para’d kilalaban. Wala tayo ed sakey a lumba para’d bilay, tan kaukolan tayo a “batiken a siaanos” anggad pakasabi tayo ed panundaan. (Hebreos 12:1) Indanet nen apostol Pedro so kaimportantian na sayan kalidad sanen pinaseseg toray kaparan Kristianos: “Itekep ed pananisia yo so . . . panagsungdo.” (2 Pedro 1:5, 6) Balet anton talaga so panagsungdo?

Panagsungdo​—No Antoy Labay Ton Ibaga

3, 4. Anto so labay ya ibaga na mansungdo?

³ Anto ta so labay ya ibaga na mansungdo? Say Griegon verbo para’d “mansungdo” (hy·po·meʹno) so literal a mankabaliksan a “mansiansia odino manmantinin nisilong.” Saya so nanengneng a 17 a danay ed Biblia. Unong ed saray leksikograpo a di W. Bauer, F. W. Gingrich, tan F. Danker, kabaliksan na satan so “pansiansia imbes ya ontaynan . . . , ontalindeg a malet, mantultuloy a milaban.” Say nombre (noun) ed Griego para’d “panagsungdo” (hy·po·mo·neʹ) so nipanengneng ed masulok a 30 a danay. Nipaakar ed saya, say A New Testament Wordbook, nen William Barclay, so nankuan: “Satan so espiritu a naanosan toray bengatla, aliwa lambengat a nawalaan na sigpot a panangabobon, noagta walaan na mabiskeg ya ilalo . . . Saya so kalidad a mamasiansia ed toon akatalindeg a say lupa to et akaarap ed dagem. Saya so kaabigan a nayarin manguman ed sankairapan a subok diad kigloriaan lapud diad labas na ot-ot et nanenengneng to so kalat.”

⁴ Kanian, say panagsungdo so ontutulong ed sikatayon mansiansian akatalindeg tan agnaandian na ilalo ed arap na saray babeng odino kairapan. (Roma 5:3-5) Legan na panasagmak na kaplesan iran ot-ot et saya so akabantag ed kalat​—say premyo, odino regalo, ya andi-anggaan a bilay, balanglan diad tawen odino diad dalin.​—Santiago 1:12.

Panagsungdo​—Akin?

5. (a) Akin ya amin a Kristiano so “mankakaukolan na panagsungdo”? (b) Diad antoran duaran kategorya a nayarin naapag iray subok tayo?

⁵ Bilang Kristianos, amin tayo so ‘mankaokolan na anos.’ (Hebreos 10:36) Akin? Manuna lapud sikatayoy ‘napelag ed nambabangil a katoksoan.’ Say Griegon teksto dia ed Santiago 1:2 so mangipapatnag na ag-iilaloan odino ag-kaliktan a piabet, a singa sano say sakey a too so akapiabet ed matakew. (Ipareng so Lucas 10:30.) Naaabet tayoray subok a nayarin naapag ed duaran kategorya: saramay kaslakan ed totoo bilang resulta na atawir a kasalanan, tan saramay abayuboan lapud maridios a debosyon tayo. (1 Corinto 10:13; 2 Timoteo 3:12) Antoray pigara ed sarayan subok?

6. Panon ya akapansungdo so sakey a Tasi sanen nidunget ed makapaot-ot ya inagem?

⁶ Seryoson paninagem. Singa si Timoteo, kaukolan a mansungdo iray arum a Kristiano ed “mabetbet a saki-sakit.” (1 Timoteo 5:23) Nagkalautla sano nidunget ed sakey a grabe, angangko ta makapaot-ot, ya inagem a kaukolan tayon sungdoan, ag-onsusuko, ed tulong na Dios tan ag-ibabalang so Kristianon ilalo tayo. Kunsideraen so alimbawa na sakey a Tasi a masulok lambengat a 50 a taon tan abayag lan mipupuligesgesan a tuloy ed maples-ontutubo tan makapatey a tumor. Diad duaran operasyon et sikato so nansiansian mapekder ed desisyon ya agpasaksakan na dala. (Gawa 15:28, 29) Balet linmesa lamet so tumor ed eges to tan nantultuloy a binmaleg ed asingger na tenten to. Kaleganan na saman, sikatoy anagmak na agnaisip a pisikal ya ot-ot ya agnatempey na anggan anton kinarakel a tambal. Ingen, anggaman manasagmak na ot-ot, sikatoy nanilalo ed bilay diad balon mundo. Intultuloy ton ipapanabang so ampetang ya ilalo to ed saray doktor, nars, tan bisita. Sikatoy nansungdo anggad kasampotan​—anggaan na bilay to. Say problema yo ed bunigas so nayarin agmanigensigen ed bilay odino aliwan ontanlan inka-ot-ot a singa asagmak na samay pinablin agin laki, balet satan so siansian mangipaarap na sakey a baleg a subok ed panagsungdo.

7. Anton nengneng na ot-ot so sasaglawien na panagsungdo para’d arum ya agagi tayo ed espiritual?

⁷ Makapaot-ot a liknaan. Tunggal paminsan, arum ed ariripen nen Jehova so makasasagmak na “ermen na puso” a say resulta to et say “espiritu [so] nabuyak.” (Uliran 15:13) Say alablabas a gonigon so kaslakan ed ‘saray panaon a maatap.’ (2 Timoteo 3:1) Say Science News na Disyembre 5, 1992, so nanreport: “Say peles na inka-alablabas, mabetbet a makarisgon gonigon so naaruman ed kada ontumbok a kailalakan ya inyanak nanlapulad 1915.” Saray sengegan na ontan a gonigon so nambabangil, manlapud pisiolohikon nengneng ya anggad makapasakit tan agmarakep iran eksperiensia. Para’d arum a Kristianos, lalanoren na panagsungdo so inagew-agew a pipupuligesgesan a makapansiansian malet ed talindeg da anggaman ed makapaot-ot a liknaan. Ingen, sikaray ag-onsusuko. Mansiasiansia iran matoor ed si Jehova anggaman ed saray lua.​—Ipareng so Salmo 126:5, 6.

8. Anton subok ed pinansyal so nayarin kipaarapan tayo?

⁸ Saray nambabangil a subok a kipapaarapan tayo so nayarin mangitekep ed seryoson kairapan ed panagbilay. Sanen sakey ya agin laki ed New Jersey, E.U.A., so biglan nakal ed trabaho, magmainomay a natalosan so kapagaan to nipaakar ed pamakan to’d pamilya to tan agpakaremate na ayaman to. Anggaman ontan, ag-abalang so ilalo to’d Panarian. Legan a manaanap na sananey a trabaho, inanamot to so pankanawnawan man-auxiliary payunir. Diad kaunoran, sikatoy akalmo na trabaho.​—Mateo 6:25-34.

9. (a) Panon a mankakaukolan na panagsungdo so impatey na sakey ya inadaro ed bilay? (b) Antoran kasulatan so mangipapanengneng ya agmauges so pannangis lapud panermen?

⁹ No asalim la so impakabalang na inadaro ed patey, kaukolan mo so manbayag a panagsungdo ya anggan kayari isempet na saramay akaliber ed sika so pinmawil ed normal iran kimey da. Ompan nasagmak mo met a lalon mairap manaya para’d sika so tinaon ya isabi panaon na impatey na inadarom ed bilay. Say panagsungdo ed ontan ya impakabalang so agmankabaliksan a mauges so pannangis lapud ermen. Natural so panagogol ed impatey na inadaro tayo, tan saya so agmangipatnag na kakulangan na pananisia ed ilalo ed kioli. (Genesis 23:2; ipareng so Hebreos 11:19.) Si Jesus so “nannangis” ed impatey nen Lazaro, anggaman Sikato so mataletalek ya angibaga ed si Marta: “Si agim onoli ed bilay.” Tan tuan binmilay si Lazaro!​—Juan 11:23, 32-35, 41-44.

10. Akin a saray aripen nen Jehova so walaan na nikadkaduman pankaukolan a mansungdo?

¹⁰ Nilikud ed pansungdo ed saray subok a kaslakan ed amin a totoo, saray ariripen nen Jehova so walaan na nikadkaduman pankaukolan ed panagsungdo. “Gulaen da kayo naani na saray amin a nacion nisengeg ed ngaran ko,” impasakbay nen Jesus. (Mateo 24:9) Inkuanto met: “No pinasegsegang da ak, pasegsegangen da kayo met.” (Juan 15:20) Akin ya ontanlan panggula tan panamasegsegang? Lapud inerman so kawalaan tayo ed sayan dalin bilang ariripen na Dios, panggugunaetan nen Satanas a buyaken so katooran tayo ed si Jehova. (1 Pedro 5:8; ipareng so Apocalipsis 12:17.) Diad sayan gagala, si Satanas so mabetbet a panlalapuan na alablabas a panamasegsegang, a manubok a tuloy ed panagsungdo tayo.

11, 12. (a) Saray Tasi nen Jehova tan saray anak da so nidunget ed anton subok na panagsungdo nen dekada na 1930 tan diad kagapo na dekaday 1940? (b) Akin a saray Tasi nen Jehova so agmansaludo ed simbolo na nasyon?

¹¹ Alimbawa, diad dekada na 1930 tan diad kagapo na 1940, diad Estados Unidos tan Canada, saray Tasi nen Jehova tan saray anak da so nagmaliw a puntirya na panamasegsegang lapud agda pansaludo ed simbolo na nasyon makasengeg ed konsiensia. Rerespetoen na Tastasi so simbolo na nasyon a panaayaman da, balet ta ontutulok ira ed prinsipyon nidatak ed Ganggan na Dios diad Exodo 20:4, 5: “Agka mangawa na nipaakar ed sika na pinanday a talintao, odino say kapadpara na antokaman a nengneng na wala ed tawen ed tagey, odino wala dia ed danum ed leksab na dalin. Agka ondakmomo ed sikara, ni say manlinkor ed sikara: ta Siak si Jehova a Dios mo a sakey ak a maimon a Dios.” Sanen arum a Tastasin ugugaw a maneeskuela so pinaalis lapud kaliktan dan ipaarap lambengat so panagdayew da ed si Jehova a Dios, saray Tasi so angipaalagey na saray Kingdom School para’d kibangatan da. Sarayan Estudyanti so pinmawil ed publiko iran eskuelaan sanen say Korte Suprema na Estados Unidos so amidbir ed relihyoson talindeg da, a singa gagawaen na naliliwawaan iran nasyon natan. Anggaman ontan, say makpel ya panagsungdo na sarayan kalangweran so onkakana bilang sankaabigan ya ehemplo nagkalautla para’d saray Kristianon tobonbalo a nayarin nidudunget natan ed panagbalaw lapud panggugunaetan da so manbilay unong ed saray estandarti na Biblia.​—1 Juan 5:21.

¹² Saray nambabangil a subok a kipapaarapan tayo​—namparan saramay kaslakan ed totoo tan saramay kidudungetan tayo lapud Kristianon pananisia tayo so mangipapanengneng no akin a kaukolan tayo so panagsungdo. Balet panon tayon makapansungdo?

Mansungdo Anggad Anggaan​—Panon?

13. Panon a mangitatarok si Jehova na panagsungdo?

¹³ Saray totoo na Dios so walaan na pihon bentaha ed saramay agmandadayew ed si Jehova. Bilang tulong, sikatayoy nayarin onasingger ed “say Dios na anos.” (Roma 15:5) Balet, panon nen Jehova ya ipapagamor so panagsungdo? Say sakey a paraan et diad saray alimbawa na panagsungdon nirekord ed Salita to, say Biblia. (Roma 15:4) Diad pannononot tayo ed saraya, sikatayo so aglambengat napaseseg a mansungdo noagta dakel met so naaralan tayo nipaakar ed no panon so mansungdo. Kunsideraen pa so duaran matalonggaring ya alimbawa​—say makpel a panagsungdo nen Job tan say anggapoy-kabalawan a panagsungdo nen Jesu-Kristo.​—Hebreos 12:1-3; Santiago 5:11.

14, 15. (a) Antoran subok so sinungdoan nen Job? (b) Panon nen Job ya asungdoan iray subok ya asagmak to?

¹⁴ Antoran kipapasen so anubok ed panagsungdo nen Job? Sikatoy anagmak na kairapan ed panagbilay sanen abalang to so karaklan ed kaykayarian to. (Job 1:14-17; ipareng so Job 1:3.) Alikna nen Job so sakit ed impakabalang sanen saray samploran anak to so kinabil na maksil a dagem. (Job 1:18-21) Sikatoy anagmak na seryoso, agaylan makapaot-ot ya inagem. (Job 2:7, 8; 7:4, 5) Sikatoy dinesdes na asawa ton dili a mangikaindan ed Dios. (Job 2:9) Saray maapit a kakaaro so nansalita na saray bengatlan makapasakit, maramsak, tan anggapoy katuaan. (Ipareng so Job 16:1-3 tan Job 42:7.) Anggaman ontan, ed amin na saya et si Job so tinmalindeg, nansiansian matoor. (Job 27:5) Saray bengatlan sinungdoan to so mipadpara ed saray subok a naaabet na ariripen nen Jehova natan.

¹⁵ Panon nen Job ya asungdoan so amin na saraman a subok? Say nagkalautlan amabiskeg ed si Job et say ilalo. “Ta wala so ilalo ed sakey a kiew,” inyabawag to. “No nabatang, ya onsimit lamet, tan say malangoer a sanga to ag ontonda.” (Job 14:7) Anto so ilalo nen Job? Singa naimano ed onggendan a pigaran bersikulo, inkuanto: “No say sakey a too ompatey, ombilay ta lamet? . . . Ontawag ka, et onebatak ed sika: manpilalek ka ed gawa na saray limam.” (Job 14:14, 15) On, si Job so ninmengneng ed labas na kaplesan a paniirap to. Kabat ton mangangga iray subok ed sikato. Diad sankabayagan, sikatoy kaukolan a mansungdo anggad patey. Say mailalon iilaloan to et si Jehova, a maaron manpilalek a mamaoli ed saray inaatey, so mamaoli ed sikato.​—Gawa 24:15.

16. (a) Anto so naaralan tayo nipaakar ed panagsungdo manlapud alimbawa nen Job? (b) Say ilalo ed Panarian so kaunongan inkapeteg ed sikatayo, tan akin?

¹⁶ Anto so naaralan tayo manlapud panagsungdo nen Job? Pian makapansungdo anggad kasampotan, agtayon balot ibabalang so ilalo tayo. Tandaan met, a say inkaseguro na ilalo ed Panarian so mankabaliksan ya anggan dinan a kairapan a sagmaken tayo so “magano” no ipareng. (2 Corinto 4:16-18) Say mablin ilalo tayo so nibasen tuloy ed sipan nen Jehova ed sakey a panaon diad asingger ya arapen sano “punasen to so amin a lua ed kamataan da [tayo]; tan andi gapo la naani ipatey; tan angapo la naani onnangis o dageyem, o ot-ot: ta saray ona a bengatla sikara so linmabas la.” (Apocalipsis 21:3, 4) Satan ya ilalo, ya “ag mangibabaing,” so nepeg a manbantay ed panagnonot tayo. (Roma 5:4, 5; 1 Tesalonica 5:8) Saya so kaukolan a magmaliw a tua ed sikatayo​—petepeteg a diad panamegley na saray mata na pananisia et niretrato tayo so inkasikatayon walad balon mundo​—ya agla mipupuligesgesan ed inagem tan gonigon noagta ombangon a kada agew a walaan na bunigas tan malinew a kanonotan; ya agla manaburido nipaakar ed alablabas a desdes ed panagbilay noagta manbibilay ed inkaligen; agla managogol ed impatey na saray inadaro tayo ed bilay noagta makaeksperiensia na liket ed pakanengneng a sikaray napaoli. (Hebreos 11:1) No anggapoy ontan ya ilalo sikatayoy nayarin natalonaan na saray kaplesan a subok a sikatayoy ontunda la. Tekep na ilalo tayo, agaylan baleg a panamaseseg so niwala ed sikatayo pian mantultuloy a mibakal, mantultuloy a mansungdo anggad kasampotan!

17. (a) Antoran subok so sinungdoan nen Jesus? (b) Say alablabas a kairapan a sinungdoan nen Jesus so posiblin nanengneng ed anton katuaan? (Nengnengen so paimano’d-leksab.)

¹⁷ Sikatayoy papasesegen na Biblia a ‘nengnengnengen’ si Jesus tan ‘motektek yo sirin.’ Antoran subok so sinungdoan to? Arum ed saraya et resulta na kasalanan tan ag-inkayadyari na arum. Sinungdoan nen Jesus so aliwa lambengat a say “insumlang na saray managkasalanan” noagta pati saray probleman linmesa ed limog na saray babangatan to, a pati saray naulit-ulit a sangsangan da ed no siopa so sankabalgan. Nagkalalo nen say satan, sinagmak to so anggapoy kaparan subok ed pananisia. Sikatoy “nansungdo ed panamairapan a kiew.” (Hebreos 12:1-3; Lucas 9:46; 22:24) Mairap ni ingen ya isipen so kairapan ed kanonotan tan laman a nalalanor ed ot-ot na inkipasak tan say kababaingan ed pamatey ed sikato bilang sakey a manag-ayew.a

18. Unong ed si apostol Pablo, anton duaran bengatla so amabiskeg ed si Jesus?

¹⁸ Anto so nanggawa ed si Jesus a makapansungdo anggad kasampotan? Si apostol Pablo so manasalambit ed duaran bengatlan amabiskeg ed si Jesus: ‘say pikakasi tan pikekerew’ tan ontan met ed “gayaga a niyan ed arap to.” Si Jesus, say ayadyarin Anak na Dios, so ag-ambaing ya onkerew na tulong. Sikatoy nampikasi “tekep na mabiskeg a tagleey tan saray lua.” (Hebreos 5:7; 12:2) Nagkalautla sanen manasingger la so kapantokan a subok ed sikato a kaukolan a sikatoy manpikasin naulit-ulit tan sisisimoon pian onkerew na biskeg. (Lucas 22:39-44) Diad impangebat ed saray pikekerew nen Jesus, ag-inekal nen Jehova so subok, noagta pinabiskeg to si Jesus pian nasungdoan itan. Si Jesus so nansungdo met lapud sikatoy onnenengneng ed tumang to ed labas na panamairapan a kiew​—say gayagan nagamoran to diad impangitarok na kialangonan na ngaran nen Jehova tan kadondon na atooan a pamilya manlapud patey.​—Mateo 6:9; 20:28.

19, 20. Panon itayon tutulongan na alimbawa nen Jesus pian nawalaan na realistikon panmoria no anto so lalanoren na panagsungdo?

¹⁹ Manlapud alimbawa nen Jesus, naaralan tayoray dakel a bengatlan ontutulong ed sikatayo pian nawalaan na realistikon panmoria no anto so nasasaglawi ed panagsungdo. Say kurso na panagsungdo so aliwan mainomay. No naiirapan tayon sungdoan so sakey a subok, wala so ligliwa ed pakaamta ya ontan met so agawa ed si Jesus. Pian makapansungdo anggad kasampotan, kaukolan ya ulit-uliten tayo so manpikasi a naikdan itayo na biskeg. Sano walad silong na subok nayarin iisipen tayo no maminsan a sikatayoy agmakanepegan a manpikasi. Balet sikatayoy iimbitaan nen Jehova ya ipakabat ed sikato iray walad puso tayo ‘ta asikasoen to itayo.’ (1 Pedro 5:7) Tan lapud insipan nen Jehova ed Salita to, inobliga to so inkasikato a mangitarok na “biskeg ed labas na normal” ed saramay ontatawag ed sikato diad pananisia.​—2 Corinto 4:7-9, NW.

²⁰ No maminsan et sikatayo so kaukolan a mansungdon tekep na lua. Para ed si Jesus say ot-ot a pinawala na panamairapan a kiew so aliwan sengegan a mismo na pangayaga. Imbes, say gayaga so walad tumang a niiyan ed arap to. Diad kaso tayo agrealistiko so panilalo a sikatayo so lawas manliknay inkasayaksak tan liket sano sikatayo so nisilong ed subok. (Ipareng so Hebreos 12:11.) Anggaman ontan, diad paniilalo ed tumang, nayarin nasarag tayon ‘ibilang ya amin a liket’ anggano naaabet tayoray sankairapan a kipapasen. (Santiago 1:2-4; Gawa 5:41) Say importantin bengatla et say pansiansia tayon malet​—anggan satan so sengegay panlua tayo. Tandaan, ag-inkuan nen Jesus a, ‘Samay daiset so panlua to et nilaban’ noagta, “Say misungdo ya angga ed kasampotan, sikato lanlamang so nilaban naani.”​—Mateo 24:13.

21. (a) Diad 2 Pedro 1:5, 6, napapaseseg itayon tekepan na anto so panagsungdo tayo? (b) Antoran tepet so nakunsidera ed ontumbok ya artikulo?

²¹ Say panagsungdo so makana sirin para’d kilalaban. Anggaman ontan, diad 2 Pedro 1:5, 6, napapaseseg itayon itekep so maridios a debosyon ed panagsungdo tayo. Anto so maridios a debosyon? Panon iyan nisisiglaot ed panagsungdo, tan panon mon nagamoran itan? Sarayan tepet so nakunsidera ed ontumbok ya artikulo.

[Paimano ed leksab]

Panon Mon Ebatan?

◻ Anto so labay ya ibaga na mansungdo?

◻ Akin a saray totoo nen Jehova so walaan na nikadkaduman pankaukolan a mansungdo?

◻ Anto so tinmulong ed si Job pian makapansungdo?

◻ Panon itayon tutulongan na alimbawa nen Jesus pian nawalaan na realistikon panmoria ed panagsungdo?

[Litrato ed pahina 10]

Saray Kingdom School, so impaalagey pian bangatan iray Kristianon ugugaw a pinaalis ed eskuelaan lapud pangipapaarap ed panagdayew da ed si Jehova a Dios lambengat

[Litrato ed pahina 12]

Determinado’d pangigalang ed Ama to, si Jesus so nampikasi pian onkerew na biskeg pian makapansungdo