Panagsungdo a Makagamor na Pananalo
“Ta wala so pankaukolan yo ed panagsungdo, ta pian, kayari na panggawa yo na linawa na Dios, awaten yo so kasumpalan na sipan.”—HEBREOS 10:36.
1. Akin a say panagsungdo et importante ed balang sakey a manlilingkor ed si Jehova a Dios natan?
SAYAN interon mundo so mandukdukol ed pakayari na mananumlang a dios. Say agnanengneng a manuley to, si Satanas a Diablo, so mangiyapasakey na amin iran sagpot to ed isusumpa ed si Jehova tan mibabakal a sumpad kialangon na sankatalbaan ya inkasoberano nen Jehova diad panamegley na Mesianikon Panarian. Saya so manggawan agnapaliisan a siopaman a mangitalaga ed inkasikato ed Dios tan ondapag ed Sikato diad salisalan na inkasoberano so mantultuloy a sumpaen na sayan mundo. (Juan 15:18-20; 1 Juan 5:19) Kanian, balang sakey ed sikatayo so nepeg a manpakpel ed sikaton dili pian mansungdo anggad sayan mundo so napelag ed pakatalo diad Armagedon. Pian magmaliw a kabiangan na saray mananalo na Dios a tinmalona ed mundo diad panamegley na pananisia tan katooran da, nepeg tayon mantultuloy a siseseet anggad anggaan. (1 Juan 5:4) Panon tayon gawaen itan?
2, 3. Panon a si Jehova a Dios tan si Jesu-Kristo et sankabalgan iran alimbawa na panagsungdo?
2 Sakey ed dakel a bengatla, manilalo itayo parad panamaseseg ed duaran manunan alimbawa na panagsungdo? Siopa iraya? Sakey et si Jesu-Kristo, “say panguloan ed amin a pinalsa,” a walan sitotoor a nananos ed lingkor ed Dios nanlapulad kiwawala to ed sakey ya ag-amtan panaon diad apalabas. Diad anos to ed panlilingkor a sitotoor ed Dios, nagmaliw a sakey ya ehemplo si Jesus ed amin a matudion pinalsan niwala ed tawen tan ed dalin diad saginonor kayari na kiwawala to. (Colosas 1:15, 16) Anggaman ontan, say sankabalgan ya ehemplo na panagsungdo et si Jehova a Dios, ya abayag lan nansungdo ed rebelyon a sumpad sankatalbaan ya inkasoberano tan mantultuloy a manggawa ed satan ya anggad panampoten to so salisalan na inkasoberano.
3 Nansungdo si Jehova ed sakey a napanuliranan a dalan ed pamaakaran a nisiglaot ed kagalangan tan ed personal iran liknaan to. Pinokpokan to so inkasikato ed arap na baleg a panamalaw tan inamper to so inkasikato ed ikiwas a sumpad saraman so nanmodmora ed sikato—a pati si Satanas a Diablo. Misalamat itayo ed panagsungdo na Dios tan ed panangasi to. No anggapo iraya, agtayo makapangayaga anggan ed sankatikeyan a kiwawala. Peteg, ya impabidbir nen Jehova a Dios so inkasikaton agnaparengan ed panagsungdo to.
4, 5. (a) Panon a say ilustrasyon nen Pablo ed domadamili so mangipanengneng ed panagsungdo tan panangasi na Dios? (b) Panon a say panangasi na Dios et apaneknekan ya agnaagamil ed andi kana?
4 Indanet nen apostol Pablo so namparan panagsungdo tan panangasi na Dios sanen inkuanto: “Agta anggapo so katunongan na domaramili ed pitek dia ed saksakey a masa a manggawa na baseha ya onkana ed kagalangan, tan sananey a kabiangan ya onkana ed pakabaingan? Et anto, ta, no say Dios dia ed panlabay to a pangipatnag na sanok to tan ipaamta to so pakayari to, intepel to a sankamasungdoan a baseha na sanok ya ingana ed kadederal, ta pian nipakabat to so kayamanan na gloria to ed saray baseha na panangasi, ya intarya to nensaman ed gloria, salanti, sikatayo, a tinawag to ya aliwa lambengat a nanlapud saray Judios noagta ontan met ed saray Hentiles, anto so nipaakar ed satan?”—Roma 9:21-24.
5 Unong ya ipanengneng na sarayan salita, legan na kaplesan a peryodo na panagsungdo to, itutultuloy nen Jehova so maglorian gagala to tan ipapanengneng so panangasi ed arum ya atooan a baseha. Ipaparaan torayan baseha parad andi-anggaan a gloria a taloen iray mauges a gagala na sayan baleg a sumusumpa, si Satanas a Diablo, tan ed amin a patumbok nen Satanas. Aliwan amin ed katooan et nagmaliw iran baseha na sanok, a manepeg ed kadederal. Mangidanet itan ed maanos a panagsungdo na Makapanyarin-amin a Dios. Say panangasi to so agmagmaliw ya andi-kana. Mansumpal itan ed (1) sakey a maglorian Panarian a pamilya ed katawenan ed silong na inadaron Anak nen Jehova, si Jesu-Kristo, tan (2) sakey a nipawil tan ayadyarin atooan a rasan pinalsa ed paraison dalin, amin et mananawir na andi-anggaan a bilay.
Mansungdo anggad Kasampotan
6. (a) Akin ya agnapaliisan na saray Kristiano so subok na panagsungdo? (b) Anto so gendat ya ipapanengneng na Griegon salita parad “panagsungdo”?
6 Tekep na satan a makapakelaw ya ilalo ed arapen, say manamabiskeg iran salita nen Jesus so nepeg a naolit-olit ed kalayagan tayo, salanti: “Saman so misungdo anggad kasampotan sikato lamlamang so nilaban.” (Mateo 24:13) Importante so igapon maabig ed kurson Kristianon inkadisipulo. Balet say sankaimportantian et no panon tayon mansungdo, no panon tayon sumpalen a maong so kurso. Indanet nen apostol Pablo iya sanen inkuanto: “Ta wala so pankaukolan yo ed panagsungdo, ta pian, kayari na panggawa yo na linawa na Dios, awaten yo so kasumpalan na sipan.” (Hebreos 10:36) Say Griegon salita dia a nipatalos a “panagsungdo” so hy·po·mo·neʹ. Gendat ya idadanet na saya so inkakpel, katooran, odino maanos a panagsungdo ya agmamaandi na ilalo ed arap na saray irap, panamasegsegang, subok, tan tukso. No manilalo tayon nagamoran so kilalaban, nepeg tayon manpasakup ed sakey a subok na panagsungdo bilang kabiangan na nakakaukolan a panagparaan parad satan a kilalaban.
7. Anton panamalikdo so nepeg a paliisan tayo, tan siopan alimbawa so ontulong ed sikatayon mansungdo?
7 Agtayo nepeg a papalikdoen so inkasikatayo ed say dilin-manamaliket ya ideyan napalabas tayon tamtampol so subok. Ta pian sarayan salisalan na sankatalbaan ya inkasoberano tan ed katooran na too et mapekder a naebatan, agipuepuera nen Jehova so inkasikato. Sinungdoan to so agmarakep iran bengatla anggaman sarag ton punasen iratan a tampol. Inletneg met nen Jesu-Kristo so modelo na panagsungdo. (1 Pedro 2:21; ipareng so Roma 15:3-5.) Tekep na sarayan mapatpatnag ya ehemplo ed arap tayo, maseguron tuloy a mabulos itayon mansungdo anggad kasampotan.—Hebreos 12:2, 3.
Nakakaukolan a Kualipikasyon
8. Anton kalidad so indemostra nen Pablo a nakakaukolan tayon amin?
8 Anggapo so aripen na Dios, anggan ed sankasakbayan a panaon, so nipuera manlapud pankaukolan a mamaneknek na katooran to diad panamegley na pansungdo. Saray kabkabat a tuloy iran sinansakey ed awaran na Biblian nansiansian matoor anggad patey tan kualipikado parad andi-anggaan a bilay ed katawenan so amaneknek ed inkaseet da. Alimbawa, say datin Pariseo, si Saul na Tarsus, so nankuan ed saray taga-Corinto: “Ta dia ed anggan anto apaneknekan ya anggapo so katilakan ko ed saray maong ya apostoles, anggan anggapo so kakanaan ko. Tua a saray tanda na sakey ya apostol so niwala ed sikayo dia ed panagsungdo, tan ed panamegley na saray tanda tan saray milagro tan saray makapakelaw a gawa.” (2 Corinto 12:11, 12) Anggaman ed belat na kimey, impasen nen Pablo so ministeryo to ya ontanlan atagey a sikato so akapansungdo tan siseseseg ya agto sinalin mangitarok na pakabalawan ed satan.—2 Corinto 6:3, 4, 9.
9. (a) Panon ya impanengneng na alanaan a nakdaan so panagsungdo, tan tekep na anton pansumpalan? (b) Anto so manserbi a bilang ayat parad sikatayon mantultuloy a sitotoor ed madibinon serbisyo?
9 Diad modernon panaon, kabat na saray alanaan a Kristianon manlilingkor ed Dios sakbay na inmunan bakal ed mundo a say 1914 so mananda ed anggaan na Panaon na Hentiles, tan dakel ed sikara so maniilalo a makaawat na mangatatawen a tumang ed saman a makatandan taon. Balet ag-agawa iya. A singa ipanengneng na katuaan natan, walaan ira na dekadan taotaon a niyarum ed sikara. Legan na sayan ag-iilaloan ya innatnat na mangaraldalin a kurso na bilay da, sikaray apino ed lima nen Jehova a Dios. (Zacarias 13:9; Malaquias 3:2, 3) Say nantultuloy a panagsungdo so amaaligwas ed sikara. Bilang ariripen nen Jehova, nangayagaan da so kidesigna a bilang ningaran a totoo to. (Isaias 43:10-12; Gawa 15:14) Natan, diad inlabas ed duaran guerra mundial tan dakel ya ankelag iran gutgutan, panliliketan da so pitutulongan ed panangilaknab na maong a balita na say ombubulaslas a baleg ya ulop na arum a karnero, a manbibilang la natan a na masulok nen apatiran laksa. Say espiritual a paraison pangagayagaan da so linmaknab ed sankadalinan, angga ed sankaarawian iran pulo na dayat. Sayan paborablen panangasikaso, a nagkalalon naapresya tayo ed dukey na panagbilay tayo, so walan nanserbi bilang sakey ya ayat a mantultuloy a sitotoor ed madibinon serbisyo ya anggad say linawa tan gagala nen Jehova so sigpot a nasumpal.
10. Diad takot ompan lamang walaray pakakapuyan ed sikatayo, anto so maparanay a nakaukolan?
10 Lapud say tumang tayo et mandependi ed inkaseet tayo, maparanay a nakaukolan tayo so pananimbawa ed sayan makanan bengatla. (1 Corinto 15:58; Colosas 1:23) Ta pian anggapo so mamakapuy ed limog na totoo nen Jehova, nepeg tayon maparanay a napaseseg a mamenben ed katuaan tan ed mablin pribilehyo na pangiwakawak na katuaan, a singa ed balobalo nin aporma iran kongregasyon ed inmunan siglo diad panamegley na panagpawil nen Pablo tan Bernabe. (Gawa 14:21, 22) Gawaen tayo komon a mapekder a desisyon tan determinasyon, a singa impangibalikas nen apostol Juan, a say katuaan so mansiansia ed sikatayo, “tan wala ed sikatayo ed ando lan ando.”—2 Juan 2.
Manalagar a Tekep na Agnagiing a Sungdo
11. Anto so ompatnag a totontonen na Dios ed saray ariripen to, tan panon a saya so niyilustra ed kipapasen nen Jose?
11 Nakaukolan so panaon parad subok ed sikatayo a nakumpleto. (Santiago 1:2-4) Manalagar! Manalagar! Manalagar! so ompatnag a totontonen na Dios ed saray ariripen to nensaman sanen sikaray asubok nipaakar ed determinasyon da a mantultuloy ed pananisia. Balet say panalagar, ed kasampotan et lawas apaneknekan a makagungguna ed saramay matoor ya ariripen. Alimbawa, si Jose, so nanalagar na 13 taon bilang sakey ya aripen tan sakey a priso, balet say eksperiensia so amapino ed personalidad to.—Salmo 105:17-19.
12, 13. (a) Panon a si Abraham so sakey ya alimbawa na matoor ed panagsungdo? (b) Diad anton dalan a say pananisia tan panagsungdo nen Abraham so niopresin padron parad sikatayo?
12 Si Abraham so manedad la 75 taon sanen tinawag na Dios ya ompaway ed Ur na Caldeo pian onla ed Nisipan a Dalin. Sikato so ngalngali la 125 taon sanen naawat to so samba ed kaletan na sipan na Dios—ya agawan tampol kayari impangidemostra nen Abraham ed biskeg na pananisia to diad punton pangibagat na inadaron anak to, si Isaac, a tinmunda lambengat sanen pinokpokan na anghel nen Jehova so lima to tan pinatunda ed pambagat. (Genesis 22:1-18) Say limamplon taotaon so andukey a panaon parad si Abraham a manalagar bilang sakey a managbakasyon ed sankailin dalin, balet akapansiansia ni ed sananey a 50 taotaon ya anggad sikato so inatey ed edad a 175. Diad amin na satan a panaon, si Abraham so matoor a tasi tan propeta nen Jehova a Dios.—Salmo 105:9-15.
13 Say pananisia tan sungdo nen Abraham so niparungtal bilang sakey a padron ed amin ya ariripen na Dios a malabay a mangawat ed nisipan iran bendisyon ed panamegley nen Jesu-Kristo, say Bini nen Abraham. (Hebreos 11:8-10, 17-19) Nipaakar ed sikato, nabasa tayo ed Hebreos 6:11-15: “Ta pirawat mi a balang sakey ed sikayo so mangipanengneng na onman a seet pian nawalaan na naspot a panamaseguro ed ilalo ya angga ed kasampotan, ta pian agkayo manngiras, noag ingen umaalig ed saramay diad panamegley na pananisia tan anos et manawir ed sipasipan. Ta sanen ginawa na Dios so sipan ed si Abraham, lapud anggapoy arum nin babaleg a pansambaan to, insamba to ed sikaton dili, ya angikuan: ‘Tua a diad bendisyon bendisyonan ta ka, tan ed pamarakel parakelen ta ka.’ Et kayari impangipanengneng nen Abraham na anos, agamoran toyan sipan.”
14. Akin ya agtayo isipen a say subok ed panagsungdo et agmanampot tan say tumang et mairap a talosan?
14 Anengneng la na alanaan a nakdaan so inlabas na 77 taotaon nanlapud impanampot na Panaon na Hentil nen 1914, sanen pigara ed sikara so nanilalo ed kigloria na tuan Kristianon kongregasyon ed tawen. No panon nin kabayag so panalagar na nakdaan et agtayo kabat. Kasin ontunda tan isipen tayon say panalagar so anggapoy anggaan tan say tumang so mapalikdon kalat? Andi! Satan so agbalot mangialangon ed inkasoberano na Dios odino mangigalang ed ngaran to. Sikato so andian na maabig a rason ed arap na mundo sano niiter ed sikatayo pananalo tan say resultan tumang ya andi-anggaan a bilay. Anggaman ed andukey a panaon, say nakdaan, a pati ed matoor a mala-karneron kaulop da, so determinadon manalagar ed si Jehova ya onakto ed dilin panaon to. Diad pangipanengneng na ontan ya ehemplon seseg, tutumboken da so kurso nen Abraham.—Roma 8:23-25.
15. (a) Anto so diparan tayo, tan ed panamegley na anto iran eksperiensia a sikatayo so mananalon tinulongan na Dios? (b) Anton simbawa nen Pablo so siansian matukoy ed agew tayo?
15 Sirin, say diparan, so siansia nin say panagsungdo ed panggawa na linawa na Dios. (Roma 2:6, 7) Diad apalabas sinuportaan to itayo ed alablabas iran kairapan, a mangilaktip ed inkipisok tan inkipangaw, tan intarok to itayon mananalo ed kigloria na ngaran tan gagala to.a Legan na panaon a nakekeraan ni parad kakumpleto na subok tayo, parehon ontulong si Jehova. Say simbawa nen Pablo so siansian matukotukoy ed agew tayo: “Ta wala so pankaukolan yo ed maseet ya anos tan panagsungdo, pian nagawaan yo tan naspot a nasumpal so linawa na Dios, tan sirin naawat tan manliket tan mangayagan nagnap ed nisipan.”—Hebreos 10:36, The Amplified Bible; Roma 8:37.
16. Akin ya agtayo moriaen so dedikasyon tayo ed si Jehova ed limitado lambengat a dalan odino tekep na saray kondisyon?
16 Sirin, basta wala ni so kimey a pagawa nen Jehova ed sikatayo ed leet na sayan magulon mundo, diad itumbok ed alimbawa nen Jesus et labay tayon mankimey ed satan ya anggad kasumpal to. (Juan 17:4) Say dedikasyon tayo ed si Jehova so aliwan ed paknaan a manlinkor itayo ed sikato ed antikey lambengat a panaon tan insan onsabi so Armagedon. Say dedikasyon tayo so maando. Agmanampot so kimey na Dios parad sikatayo ed bakal na Armagedon. Anggaman ontan, dia lambengat ed pakasumpal tayo ed kimey a nepeg a gawaen sakbay na Armagedon a nanengneng tayoray engranden bengatla ya onsabi kayari na satan a baleg a bakal. Insan, niarum ed maliket a pribilehyo ed pantultuloy a gawaen so kimey to, a sikatayo so natumanggan ed abayag lan ilalon bendisyon ya insipan to.—Roma 8:32.
Say Panangaro ed Dios so Ontulong ed Sikatayon Mansungdo
17, 18. (a) Diad panaon na panaburido, anto so ontulong ed sikatayon mansungdo a tekep na abobon na Dios? (b) Anto so ontulong ed sikatayon makagamor na pananalo, tan anto so agtayo nepeg ya ikuan nipaakar ed nakekeraan a panaon?
17 Palagi, no sarayan panaon et makapaaburido, nayarin itepet itayo: ‘Panon tayon makapansungdo ni?’ Say ebat? Diad panamegley na pangaro ed Dios ed amin a puso, kanonotan, kamarerwa, tan biskeg tayo. “Say aro so manangitepel tan mapangasi. Say aro agmaimon, agmapasirayew, aliwan mapangta. Amin itepel to, amin sisiaen to, amin ilaloan to, amin sungdoan to. Say aro agbalot manganga. (1 Corinto 13:4, 7, 8) Anggad agtayo mansungdo ed pangaro ed Dios, say panagsungdo tayo so anggapoy kana to. Balet no mantepel itayo ed leksab na saray pakabelatan lapud debosyon tayo ed si Jehova, kayari to say panagsungdo tayo so walaan na epekto a mamaaralem na aro tayo ed sikato. Say aro ed Dios, say Ama to, so nanggawa ed si Jesus a nansungdo. (Juan 14:30, 31; Hebreos 12:2) No say tuan motibo so aro ed Dios, say Ama tayo, wala ta so agtayo nasungdoan?
18 Say agnagiing a panangaro tayo ed si Jehova a Dios so nanggawa ed sikatayon makapansiansian mananalo ed mundo legan na sayan sankaatapan a panaon na panagsubok. Tan si Jehova, ed panamegley nen Jesu-Kristo, so mantultuloy a mangiter ed sikatayo na tulong a nakaukolan tayo anggan kapigan ni so pansiansia na sayan daan a sistema et niyabuloy a niwala. (1 Pedro 5:10) Siempre, agtayo manpalbeng nipaakar ed katikey ni na nakekeraan a panaon, tan agtayo mangigegeter na antokaman ya espisipikon panaon. Ipalima tayo itan ed Baleg a Managbantay na Panaon, si Jehova a Dios.—Salmo 31:15.
19, 20. (a) Panon so nepeg a panmoria tayo ed kada ilabas na agew a panagsungdo tayo? (b) Anton kabaglan so labay tayon arawian, tan akin?
19 Anggaman kuan, say kailalakan a nipasakbay a makatasi tan makaeksperiensia ed “anggaan na sistema na bengabengatla” so matatken lan tuloy ed edad. (Mateo 24:3, 32-35) Kanian agtayon balot lilingwanan a kada agew ya onlalabas a susungdoan tayo so sakey ya agew a nababawas ed si Satanas tan dedemonyos to a mandurutak ed talba so mismon kiwawala ra tan kada agew so manasingger ed panaon sano agla makapansungdo si Jehova ed kiwawala na “saray baseha na sanok a makanepegan ed kadederal.” (Roma 9:22) Agla mabayag, a say panangitepel nen Jehova so mangangga et ipaway to so sanok to ed agmaridios a lalaki tan bibii. Sirin, iparungtal to so madibinon agpangabobon to ed kurso na kiwas da, anggaman inabuloyan tora a mantultuloy ed sayan peryodo na panaon.
20 Sankabagelan so itunda tayo ed maaron sagpot tayo pian makagamor na maglorian regalo ya inyopresi ed sikatayo ed panamegley nen Jesu-Kristo. Imbes, sikatayo so determinadon mantultuloy a sitotoor a bilang Tastasi parad si Jehova ed sayan sankaimportantian a panaon sano si Jehova et asingger lan mangalangon ed inkasikato a bilang Sankatalbaan a Soberano.
[Paimano ed leksab]
a Alimbawa, insulat nen Christine Elizabeth King: “Sumpa lambengat ed saray Tasi ya agtinmalona so gobiernon [Nazi], ta anggaman pinatey da so nilibon Tastasi, say panagtasin kimey so nantultuloy tan nen Mayo 1945 say kimey na saray Tasi nen Jehova so mantultuloy ni, bangbalet say National Socialism so naandi. Say bilang na saray Tasi so dinmaak tan anggapo so agawan pikokompromiso. Say kiwas so akagamor na saray martir tan matalonan akibakal ed bakal nen Jehova a Dios.”—The Nazi State and the New Religions: Five Case Studies in Non-Conformity, pahina 193.
Panon so Pangebat Yo?
◻ Akin ya agtayo naarawian a say panagsungdo tayo et nasubok?
◻ Anton panamalikdo so labay tayon paliisan?
◻ Pian naarawian so antokaman a mamakapuy ed sikatayo, anto so nakaukolan?
◻ Anto so slogan tayo?
◻ Diad panaon na panaburido, anto so ontulong ed sikatayon makapansungdo?
[Litrato ed pahina 22]
Saray totoo na Dios, a singa sarayan Tasi ed Puerto na Espanya, Trinidad, so lawas sibubulos a manalagar ed si Jehova