‘Maliket Iraman so Nansungdo’
1. Nanlapulad 1914, anton kipapasen ed dalin so anumpal ed Mateo 24:3-8, tan anton ibabaga na Liga na Nasyones tan say Nasyones Unidas so sinmaew?
DIAD libro ton The Present Age, sinalita nen Robert Nisbet “so Pitomplo-tan-Liman Taon na Bakal a nantultuloy, matalag ya apultot, nanlapulad 1914.” On, “saray bakal tan balbalita ed bakal,” a pati saray sankamundoan a bakal—satan so impasakbay nen Jesus a para ed sayan panaon na anggaan. (Mateo 24:3-8) Say Liga na Nasyones so linmetaw nen 1920 “a mangamper ed bakal ed ando lan ando.” Agaylan makapasinagem a sinmaew! Say Nasyones Unidas so naorganisa nen 1945 “a mangisalba ed saray onggendan a kapolian a manlapud bakbak na bakal.” Balet say libro nen Max Harrelson a Fires All Around the Horizon so angikuan: “Mataltalag a wala so sakey ya agew nanlapulad anggaan na Guerra Mundial II ya anggapo so pambabakal ed arum a pasen.”
2. Anto so itetepet na arum a totoo nipaakar ed saray kipapasen na mundo, balet antoran tepet so nepeg tayon itepet?
2 Terorismo tan karawalan, inkabulok tan inkaid-irap, druga tan salot—amin na saraya so angarum ed makapaermen a retrato. Arum a totoo so nayarin mangitepet: ‘Panon so pakapantultuloy na katooan a mansungdo ed ontan iran makagonigon a kipapasen?’ Lalon importante, anggaman kuan, nepeg tayon itepet: ‘Panon so pakasungdo na Dios diad pandederal ed mangaraldalin a palsa to? Panon nin kabayag so pangiyabuloy to ed saray marelmeng a totoon maneral ed dalin tan ibunton da so kabalawan ed mablin ngaran to?’
3. (a) Anton tepet so intepet nen propeta Isaias, tan akin? (b) Anton ebat so inter nen Jehova, tan anto so ipanengneng na saya ed agew tayo?
3 Pinalesa nen propeta Isaias so miulibay a tepet. Sikato so apabtangan a mangiyabawag ed saray kabaleyan to na sakey a mensahen nanlapud si Jehova. Balet ta sikato so apasakbayan a sikato so agda imanoen odino say Dios ya angibaki ed sikato. Kanian intepet nen Isaias: “Kaunongan kabayag, O Jehova?” On, kaunongan kabayag so pampulong nen Isaias ed sayan anawet-tenten a totoo, tan kaunongan kabayag so pangitepel nen Jehova ed mananginsulton agda panangimano ed mensahe to? Inmebat si Jehova: “Anggad saray syudad so peteg a naderal, ya anggapo so manayam, tan saray kaabungan so naandian na mangaraldalin a too, tan say dalin a mismo so naderal ed pankibalatar.” (Isaias 6:8-11) Ontan met natan, susungdoan nen Jehova so ontan iran kabalawan ya anggad say aturon panaon to a pangidapo na panangukom ed sakey a mundon say manunan akalukso et say agmatoor a Kakristianoan.
4. Anto so nansumpalan na inpansungdo nen Job, tan anton paseguro so iter na saya ed sikatayo natan?
4 Abayaglan sinungdoan nen Jehova so pankakantiaw nen Satanas. Ngalngalin 3,600 taon lan linmabas, say matoor a Job met so nansungdo, a nilabanan to so angat nen Satanas ya agto nabembenan so katooran to ed silong na subok. Agaylan saya so nanggawa ed puso nen Jehova a manliket! (Job 2:6-10; 27:5; Uliran 25:11) A singa imbaga ed saginonor na agi nen Jesus ed ina a si Santiago: “Nia! Ibitla min maliket iraman so nansungdo. Nadngelan yo so impansungdo nen Job tan anengneng yo so nansumpalan na inter nen Jehova, a si Jehova so matamoy ed panangaro tan panangasi.” Ontan met, saraman so mansungdo ed si Jehova natan so napaseguroan na maliket a pansumpalan.—Santiago 5:11.
5. Panoy impangipanengneng nen Jesus a say panagsungdo so nakaukolan na saray totoo na Dios natan, tan legan a gagawaen so anton kimey a nakaukolan da so mansungdo?
5 Impanengneng nen Jesus a malinlinew a say panagsungdo so nakaukolan ed saray totoo na Dios ed agew tayo. Diad impangipasakbay ed tanda na “kasampotan na sistema na bengabengatla,” inkuanto: “Saman so mansungdo ya angga ed kasampotan sikato so nilaban.” Mansungdo legan a manggawa na anto? Say mismon ontumbok a salita nen Jesus so onebat: “Tan sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones.” (Mateo 24:3, 13, 14) Diad satan lambengat ‘a say anggaan so onsabi.’—Nengnengen met so Marcos 13:10, 13; Lucas 21:17-19.
No Akin a Mansungdo Si Jehova
6. Akin a si Jehova so matalonan ehemplo na panagsungdo, tan anto so sakey a rason a sikato so nansungdo?
6 Impaliwawa nen apostol Pablo a say “Dios, anggaman walaan na panlabay a mangipatnag ed sanok to tan mangipaamta ed pakayari to, intepel to ed ontanlan panagsungdo iray baseha na sanok ya agawan manepeg ed kadederal.” (Roma 9:22) Akin a sinungdoan nen Jehova so pantultuloy a kiwawala na marelmeng, sarayan baseha na sanok? Sakey a rason et saya: pian idemostra a say uley na too, independente ed Manamalsa na too, so niganan onsaew. (Jeremias 10:23) Magano la, say inkasoberano na Dios so naalangon legan a paneknekan ton sikato lambengat so makapangitarok na kareenan, pantutunosan, tan liket ed pamilya na too, diad panamegley na uley na Panarian nen Jesus.—Salmo 37:9-11; 45:1, 6, 7.
7. Nisengeg ed anton sananey a rason a si Jehova so nansungdo, tan anton gungguna so intarok na saya ed saray minilyon nanlapulad 1930’s?
7 Nagkalalo ni, si Jehova so nansungdo “ta pian nipaamta to komon iray kayamanan na gloria to ed saray baseha na panangasi.” (Roma 9:23) Sarayan baseha na panangasi et saray manamemben-katooran ya alanaan a “sinaliw a manlapud limog na katooan” a miuley ed si Kristo Jesus diad mangatatawen a Panarian to. Say panagtatak ed 144,000 so nantultuloy a nanlapud saray panaon na apostol. Manasingger la natan ed sampot to. (Apocalipsis 7:3; 14:1, 4) Tan nia! Nanlapulad 1930’s et say mantultuloy ya anos nen Jehova so angiyabuloy ed katipon na saray nilaksalaksa nin arum, “sakey a baleg ya ulop . . . a manlapud amin a nasyones,” a manggayaga diad ilalo na pakaliktar ed kaunoran a kairapan pian tawiren so andi-anggaan a bilay ed paraison dalin. (Apocalipsis 7:4, 9, 10, 13-17) Kasin sakey ka ed satan a baleg ya ulop? No ontan, agta sika so maliket a si Jehova so nansungdo ed kiwawala na saray baseha na sanok ya anggad natan? Anggaman kuan, nepeg mo so mantultuloy a mansungdo, a singa si Jehova so nansungdo.
Atumangan So Panagsungdo
8. Akin ya amin tayo so mankaukolan na panagsungdo, tan anton ehemplo na panagsungdo so nepeg tayon imanoen a mapetepet?
8 Amin tayo so mankaukolan na panagsungdo no labay tayon awaten iray sipan. Kayari na impangibaga ed sayan katuaan ed Hebreos 10:36, dineskribe nen apostol Pablo ed detalye so puron pananisia tan panagsungdo na sakey a baleg a “lurem na saray tastasi” ed kadaanan a panaon. Insan sikatayo so bibilinen ton “ombatik a tekep na panagsungdo ed babatiken a niiyan ed arap tayo, legan a sikatayo so onnengneng a mapetepet ed Manunan Ahente tan Manamayadyari na pananisia tayo, si Jesus. Nisengeg ed gayagan niiyan ed arap to,” si Jesus so nansungdo ed sigpot-puson serbisyo, ya agton balot imbalang so tumang. Agaylan say ehemplo to so mamabiskeg ed sikatayo met a mansungdo!—Hebreos 12:1, 2.
9. Anto so nansumpalan na modernon-agew iran ehemplo na panagsungdo?
9 Saray modernon-agew ya ehemplo na panagsungdo so daakan met. Nayarin kabat yo, odino akabatan yo, iray agagin lalaki tan bibii a matalona ed panagsungdo ra. Agaylan say katooran da so amaliing ed sikatayo! Tan kada taon, legan ya ireport na saray Tasi nen Jehova so sankamundoan a kimey da ed Watch Tower Society, saray makapasagyat a salaysay na panagsungdo tan panamemben-na-katooran so nanaawat. Say tsart ed apatiran pahina ya ontumbok so manegek ed engranden kimey ya agawaan kaleganan na 1989 legan a sarayan Tastasi so ‘angarum ed pananisia ra na panagsungdo.’—2 Pedro 1:5, 6.
Sankaengrandean a Taon Tayo
10. (a) Panon karakel na daldalin tan pulpulo so akibiang diad panangipulong ed maong a balita na Panarian nen 1989, tan panon karakel so akibiang ed sayan kimey? (b) Panon karakel na payunir so nanreport ed pantok a bulan, tan anto so dagup a bilang na oras a nausar ed lawak na kimeyan?
10 A singa ipanengneng na tsart ed imbeneg iran pahinas, 212 daldalin tan pulpulo so akibiang ed kimey na panagpulong ed onsasabin Panarian nen Jehova. Pinabli min bumabasa na Watchtower, kasin sika so apribilehyoan a sakey ed saray 3,787,188 ya akibiang ed sayan engranden kimey? Kasin sakey ka ed saray 808,184 a nanreport bilang payunir ed pantok a bulan ed satan a serbisyo? Antokaman a nitulong yo ed 1989 a sankagloboan a dagup a bilang na 835,426,538 ya oras a nausar ed lawak na kimeyan, walaan ka na rason ed panliket.—Salmo 104:33, 34; Filipos 4:4.
11. (a) Anton karakel na inmatendi ed Memoryal ed abenegan a Marso 22 so sakey a sengegan na panliket, tan akin? (b) Panon karakel so abautismoan, tan antoran daldalin ed tsart so matalona ed sayan pamaakaran?
11 Manliket, met, ed satan a sankarakpan a dagup na 9,497,064 ya inmatendi, nen apalabas a Marso 22, diad sankamundoan a selebrasyon na Memoryal ed impatey nen Jesus! Saya so mangipanengneng na potensyal a say 5,691,876 a kaaruman iran manangiyabawag ed Panarian, no sarayan interesadon malakarneron totoo lambengat so simamaaron napastolan ed simpukokan, a nawalaan na maparanay a pibiang diad panaglingkor ed si Jehova. Panon so pakatulong tayo ed sikara ed saya? (Juan 10:16; Apocalipsis 7:9, 15) Dakel la so onkikiwas, a singa impanengneng na dagup a 263,855 ya balon Tastasin abautismoan kaleganan na 1989 a taon serbisyo.
12. Anto so arum a kimey ya ag-impanengneng na tsart (a) nipaakar ed saray pabrika na Watch Tower Society? (b) nipaakar ed nipaliman magasin tan suskripsion?
12 Walaray arum a kimey ya ag-impanengneng na tsart. Say inkapgaan ed saray palapagan—Biblia, libro, brosyur, magasin—so agmakapera. Bilang nansumpalan, saray pabrika na Watchtower ed Nueva York so angusar na 25,999 tonilada na papel diad impangimprinta na 35,811,000 Biblia, libro, tan brosyur, 101-porsienton indaak ed 1988. Diad arum iran ankabaleg a pabrika na Watch Tower Society, diad Germany, Italya, tan Hapon, so nankimey na kaaruman iran panagtrabaho, a nansuporta “ed matoor tan makabat ya aripen” diad panangiter na espiritual a “tagano ed manepeg a panaon.” (Mateo 24.45) Kaleganan na Abril tan Mayo, nikadkaduman maabig a nipaliman magasin tan suskripsion so nireport ed pigaran daldalin, tekep na nikabiig a danet ed panangibunog diad saray paway na Watchtower ed “Babilonia a Baleg.” (Apocalipsis 17:5) Agpanduaruwaan, sayan arapen ya Abril, saray auxiliary payunir tan arum iran Tastasi so ondupag ed sankamundoan a lawak a sikato lamet so mansumpal a sankaabigan a kampanya na panagtasi ed 1990 taon serbisyo.—Ipareng so Isaias 40:31; Roma 12:11, 12.
13. Antoran bansa so nilista ed tsart ya agnilista nen katantaon? Ipaliwawa.
13 Onnengneng lamet ed tsart. Kasin nanengneng yoray pigaran bansa ya agnilista nen katantaon? Say Hungary tan Poland, a say kimey tayo so agano nin alegalisa. Misalsalamat itayo ed saray autoridad ed sarayan daldalin a sikara natan so mangipanengneng na ontanlan konsiderasyon ed saray Tastasi nen Jehova. Diad sayan pamaakaran, saray pikakasi na sankamundoan ya impanaagi so naebatan, “ta pian sikatayo komon so mantultuloy a mangipakurang na maulimek tan mareen a bilay a tekep na sigpot a maridios a debosyon tan kabintaan.”—1 Timoteo 2:1, 2.
14. Iter so pigaran manunan-punto ed “Maridios a Debosyon” iran Kumbension Distrito ed Poland.
14 “Maridios a debosyon”! Akin, say “Maridios a Debosyon” iran Kumbension Distrito so agawa ed anggan diad Poland, ed taloran pasen, kaleganan na Agosto! Agaylan makapakelkelaw so impangabrasa na saray agagi tayo a Polisa ed 91,024! (Hebreos 13:1, 2, 16) A singano diad milagro, pigamplon libulibon agagi—Czechs, Aleman, Ruso, tan arum nira—so akala na visa ya onsabi ed panamegley na bus, tren, tan anggan diad impanakar. Arum niran nilibulibo so nambiahe a nanlapud America, Sagur a Europa, tan anggad sankaarawian iran isla na Pasipiko tan Hapon. Sarayan ankakabaleg ya estadyum, nilinisan a maong na saray agagi tayo, so maawang a tuloy a mangarga ed 65,710 ed Chorzów, 40,442 ed Poznan, tan 60,366 ed Warsaw—sakey a dagup na inmatendin 166,518! Diad kada sentro, say impakanengneng ed bautismo so amatedter na lua diad magayagan emosyon. Diad Poznan et sakey a 9-anyos tan sakey a 90-anyos so abautismoan, tan say dagup na 6,093 ya abautismoan ed saray taloran kumbension et pati saray dakerakel a tinedyer, dakel ed saraya so nanlapud daldalin a nibagan say relihyon so ompatey a kaiba na saray matatatken. Aliwan ontan ed tuan relihyon a nibase ed Salita na Dios! (Ipareng so Salmo 148:12, 13; Gawa 2:41; 4:4.) Agaylan makapakelaw a say impansungdo na saray agagi tayo ed Bukig a Europa so atumangan!
Mantultuloy a Katooran Nasusubok
15. Panoy impangipanengneng na saray Tastasi ed Lebanon na panagsungdo tan inkaagnagiing, tan tekep na antoran maabig a resulta?
15 Singa si apostol Pablo, saray Tasi nen Jehova so kinaukolan a mangipanengneng na panagsungdo ed leksab na dakel tan nanduruman sirkumstansya. (2 Corinto 11:24-27) Diad Lebanon et nagagawa so guerra sibil. Panon so ikikiwas na saray agagi tayo? Diad inkaagnagiing tan determinasyon. Say taon 1989 so akanengneng na mabiskeg iran impanbomba, balet anggan diad saray pasen a sankabiskegan, saray agagi tayo so determinadon agtinmayer. Inreport na sakey a kongregasyon ed Beirut: “Saray maparanay a grupo a para ed lawak na kimeyan so inyuksoy ed amin na saray labi ed simba. Anggaman ed mairap iran kipapasen na seguridad, saray agagi so agkinmapoy. Nakokobrian mi a nagkalalo iray teritorya nen say nensaman. Nen Abril et walaan kami na sakey a pantok ed bilang na payunir. Saray balon panangiyaral ed Biblia so nigapo, tan lalon dakel a magasin tan libro so nipalima.”
16. Panoy impangipanengneng na saray agagi tayo ed Colombia na panagsungdo diad impangitarok na maong a balita ed saray balbaley ya anggaporay Tastasi?
16 Say Colombia so wala ed balita lapud trapiko ed druga tan karawalan. Balet say matoor a panagsungdo na saray Kristianos ditan so nibabalita met. Agano ni, saray temporaryon espesyal payunir so nibaki ed 31 a baley a walaan na samplon libo odino onsulok nin manaayam ya anggaporay Tastasi. Diad sakey a baley, sanen nalmoan na saray balobalon interesadon totoo a saray payunir so wadman ed pigara lambengat a bulan, sikara so akikasi ed saray payunir ya agni onaalis. Diad sananey, 18 interesadon totoo so nampirma na sakey a sulat na apresasyon ed niiter ya espiritual a tulong kaleganan na taloran-bulan ya impanayam na saray payunir tan kinmerew ira na kaaruman a tulong. “Saya so seryoson kimey,” inkuan da. Agla nakaukolan ya ibaga, diad saratan ya oksuyan so agawan mantultuloy a manbayubo ed interes. Say amayubo ed ontan ya arawin teritorya so mankaukolan na panagsungdo, balet say impasyan kimey na saray payunir a nanggawa na ontan so siyayaman ya abendisyonan.
17, 18. (a) Diad leksab na antoran sirkumstansya a saray Tastasi nen Jehova so nansungdo ed Italya? (b) Panoy kipapasen na saray Tastasi anggaman ed panangikayat na katilaan nipaakar ed sikara?
17 Diad Italya, inarap na saray Tasi nen Jehova so mabiskeg ya isusumpa na klero, balet diad biskeg nen Jehova et sikara so akapansungdo. Diad nanduruman simbaan, saray klero so angibunog na saray sulsulat ya ipeket ed puerta na saray kaabungan na membro ra ya mangibabaga ed saray Tasi nen Jehova ya agmamapaknol ed doorbell. Dakel iran papari so anugyop na saray walad kalangweran a lalaki a mangipeket ed sayan sulsulat ed amin a puerta diad sakey a pasen—anggan diad kaabungan na saray pamilyan Tasi! Saray Tastasi, anggaman kuan, so aliwan magmainomay a natakot, tan mabetbet ya uusaren daray sulsulat diad pangigapo na tongtongan. Nagkalalo ni, say diaryo tan nasyonal a telebisyon so angiter na malaknab ya impangobre ed pamaakaran, a kokondenaen da so impanengneng a relihyoson panameget tan indanet da a satan iran taktika so peteg a tanda na kakapuyan ed biang na simbaan. Sakey a propesor na unibersidad so naopendin tuloy diad kontrobersyal a sulsulat a sumpad-Tasi a sikato so nansuskribe ed The Watchtower tan Awake!
18 Say Iglesia Katolika ed Italya so angusar ni ed saray apostata a mangikayat na katilaan nipaakar ed saray totoo nen Jehova, balet saya so aliwa met ya epektibo lapud say 172,382 a manangipalapag so kabkabat-a-tuloy tan respetado. Imbaga na sakey a laki ed saray ondadalaw a Tastasi a saratan a mauges a bengatla nipaakar ed sikatayo so abasa to diad literaturan insulat na saray datin-Tastasi. Sikato so sumpan tuloy, sirin, sanen say agi ton laki so nagmaliw a sakey ed saray Tasi nen Jehova. Agnambayag, anggaman kuan, naimano to so maabig ya epekto diad impansalat na agi to na relihyon. Inumameng to: ‘Panon a posibli ed bengatlan mauges a tuloy a mamawala na ontan iran maabig a resulta?’ Sirin, sikato so kinmerew na panangiyaral ed Biblia diad saray Tastasi.—Ipareng so Colosas 3:8-10.
Pananalona ed Agpananginenen
19, 20. (a) Anton kipapasen so nankaukolan na panagsungdo ed biang na saray Tastasi ed Finland, tan anto so peteg a makatantanda nipaakar ed sakey ya impanusisa na iglesia? (b) Anton eksperiensia so mangiyilustra ed kaimportantian na panagsungdo ed panangipulong ed maong a balita?
19 Diad saray daldalin a saray Tastasi so mabetbet ya ondalaw, wala so mabetbet a laganap ya agpananginenen ed maong a balita. Saya so peteg a kipapasen ed Finland. Say iglesia ed satan a dalin so angikondukta na impanusisa tan aromogan a 70 porsiento ed populasyon so agmalabay ed idadalaw na saray Tastasi ed kaabungan da. Anggaman kuan, 30 porsiento so aliwan mabiskeg ya anuppiat, tan ed saraya, 4 porsiento so nibagan peteg a labay daray Tasi nen Jehova. Say apatiran porsiento na populasyon ed Finland et irerepresenta to so 200,000 totoo. Ipareng itan ed peles a bilang na manangipalapag a 17,303!
20 Nitawag ed imano na sakey a manangipalapag ed kimeyan iyan impanusisa tan atepetan: “Agmo ta amta a 70 porsiento ed sikami so mangipapasen ed sikayon totoon aglabalabay? Akin ya itutultuloy yo so onla ed saray kapuertaan mi?” Inmebat so manangipalapag: “On, balet satan a parehon impanusisa so angipanengneng ya 4 porsiento ed sikayo so malabay ed sikami. Sasalien min anapen iratan a totoo. Anggan sikara labat so 1 porsiento, siansian sikami so onla ed kabkaabungan a manalin mananap ed sikara.” Say unabung so nanumameng a magano tan kuanto: “Kasin say mensahe yo so ontanlan importante ed sikara?” Inmebat so manangipalapag ed impangitepet: “Kasin labay mon dengelen?” Agnambayag et sayan unabung so angipanengneng na interes ed maong a balita.
No Anto So Itatarya na Arapen
21. (a) Anton nengneng na pibabakal so nepeg tayon pibakalan ed sayan sistema, tan akin? (b) Anto so nayarin nakaukolan tayon sungdoan tan ed anto so ipapaseguro na propesiya nen Habacuc ed sikatayo?
21 Anto so nipaakar ed sikatayon amin natan? Kasin sikatayo so determinadon mansungdo a kaiba si Jehova tan si Jesu-Kristo ya anggad anggaan? Nayarin aliwalan mabayag a tuloy, balet nakaukolan tayo so mansungdo! Diad sistema nen Satanas, nakaukolan tayo so mibakal na impasyan pibabakal ed pananisia, unong a say imoralidad na mundo, inkabulok, tan panggugulaan so nanliktub ed sikatayo ed amin a dapag. (Judas 3, 20, 21) Nayarin nakaukolan tayon sungdoan so panamasegsegang ed sakey a nengneng odino sananey. Anggan natan, nilibulibo ed saray agagi tayo so maniirap ed saray pangawan, tan arum so maruksan pinekpek. Saraya so misalsalamat ed saray pikakasi tayo. (2 Tesalonica 3:1, 2) Agla mabayag, say peles a sistema so naandi la! A singa imbaga nen Habacuc: “Say pasingawey so wala ni ed aturon panaon, tan mantultuloy ya angga ed anggaan, tan agmantila. Anggan satan so naabala, itultuloy ya alagden; ta satan so ag-onsaew ya ontua. Agmanabala.”—Habacuc 2:3.
22. Anton pansumpalan so nayarin sitatalek ya ilaloan tayo no agamilen tayo so anos na saray propetas tan say impansungdo nen Job?
22 Say babangatan a Santiago so simamaaron mangibabaga ed sikatayo: “Agagi, alaen ya uliran so impanagmak na mauges tan impangagamil na anos na saray propetas, a nansalita ed ngaran nen Jehova.” Sikatayo natan a mansasalita ed ngaran nen Jehova so makapagmaliw a manamemben na katooran kaleganan na saray ampait a subsubok, a singa si Isaias, Jeremias, Daniel, tan saray arum. Singa si Job, nayarian tayo so mansungdo. Agaylan makapakelaw so inkatumangan to diad impansungdo to! Say panangasi tan maaron-kaabigan nen Jehova so mangitarok ed sikatayo ed agnaparaan iran tumang—no sikatayo so mansungdo ya angga ed anggaan. Tan komon ta saray salita nen Santiago so nasumpal ed balang sakey ed sikatayo: “Nia! Ibitla min maliket iraman so nansungdo.”—Santiago 5:10, 11; Job 42:10-13.
Panon So Pangebat Yo?
◻ Anton pankaukolan na panagsungdo so indanet nen Jesus?
◻ Nisengeg ed antoran rason a si Jehova so nansungdo?
◻ Anto so arum ed saray manunaan a punto ed baleg a kimey ya agawaan kaleganan na 1989?
◻ Panon a say impansungdo na saray agagi tayo ed Poland so atumangan?
◻ Panon so impangipanengneng na saray Tastasi ed Lebanon, Colombia, tan Italya na katooran ed leksab na subok?
[Tsart ed pahina 18-21]
1989 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)