“Ag-ibabaing so Maong a Balita”
“Agko ibabaing so maong a balita; sikato so, diad tua, pakayari na Dios ed kilalaban diad siopaman a nawalaan na pananisia.”—ROMA 1:16.
1. Panon so gendagendat a kaawat na maong a balita, balet panon so panmoria na saray andian-na-pananisian totoo na mundo ed maong a balita na Panarian?
SAY ompatnag ed sakey a toon maong a balita so nayarin ag-ipasen na sananey a bilang maong a balita. Gendagendat, say manangitarok ed maong a balita so naawat ed masayaksak a kaabrasa, tan layag a magunaet ya ondengel ed balitan nipaarap ed sikato. Anggaman kuan, impasakbay na Biblia a saray andian-na-pananisian totoo na mundo so agmangipasen ed maong a balita na Panarian na Dios tan say mensahe na kilalaban to a bilang makapaliket.—Ipareng so 2 Corinto 2:15, 16.
2. Anto so imbaga nen apostol Pablo nipaakar ed maong a balita ya inyabawag to, tan akin a say mensahen inyabawag to so siansia nin maong a balita natan?
2 Si apostol Pablo so sakey ya imbakin mangitarok na maong a balita ed lapag. Panon so liknaan to ed kimey to? Inkuanto: “Wala so inkamagunaet ed biang ko a mangiyabawag ed maong a balita met ed sikayo diad Roma. Ta siak so agmangibabaing ed maong a balita.” (Roma 1:15, 16) Para ed balitan siansian maong natan, ngalngalin 2,000 taon kayari na impangisulat nen apostol Pablo ed saray Kristianos diman ed Roma, satan so peteg a nakaukolan a magnayon a maong a balita. Sikato so, diad tua, “andi-anggaan a maong a balita.”—Apocalipsis 14:6.
3, 4. Akin ya imbaga nen apostol Pablo a sikato so ag-angibaing ed maong a balita?
3 Akin ya imbaga nen apostol Pablo a sikato so agmangibabaing ed maong a balita? Akin a sikato so agmangibabaing ed satan? Lapud satan so aliwan sakey a mensahen popular, nisengeg ta walaan na kipaakaran ed sakey a toon impasak ed panamairapan a kiew ed nengneng na sakey a minudmoran kriminal, diad amin ya akinpaway ya indengan et sikato so niiyan diad sankaugesan a kipapasen a peteg. Diad talora tan kapalduan taon, sayan too so linma a tinmatdang tan linmasor ed Palestina a tekep na maong a balita tan akaabet na mabiskeg ya isusumpa a manlapud saray Judios, nagkalautla ed saray relihyoson papangulo. Tan natan si Pablo, diad impangitarok ed ngaran na satan a toon pinabanday, so nipaarap ed miulibay a pambusol.—Mateo 9:35; Juan 11:46-48, 53; Gawa 9:15, 20, 23.
4 Lapud ontan ya isusumpa, si Pablo tan saray kapara ton babangatan nen Jesu-Kristo so nayarin impasen a walaan na bengatlan pangibaingan. Peteg, si Pablo natan so pinmeket ed bengatlan sikaton mismo so datin impasen a makapabaing. Sikato so personal ya akibiang diad impangilusbo na panagbalaw ed saray patumbok nen Jesu-Kristo. (Gawa 26:9-11) Balet ta tinundaan to la itan a kurang na kiwas. Bilang nansumpalan, sikato, dingan na saray arum a nagmaliw a Kristianos, so anagmak na maruksan inkapasegsegang.—Gawa 11:26.
5. Panon so impangipaliwawa nen Pablo ed balikas to nipaakar ed agpangibaing ed maong a balita?
5 No abuloyan na sakey a too so inkasikaton ombaing diad kipapasen a patumbok nen Jesu-Kristo, sikato so manmomoria ed atooan a punto de bista na saray bengatla. Si apostol Pablo so aliwan ontan. Imbes, diad impangipaliwawa to ed ag-impakalikna na imbaing ed maong a balita ya impulong to, inkuanto: “Sikato so, diad tua, pakayari na Dios ed kilalaban diad siopaman a nawalaan na pananisia.” (Roma 1:16) Say pakayari na Dios so aliwan sengegan na kababaingan no satan so onkikiwas ed panamegley na sakey a babangatan nen Jesus diad pananumpal ed makanakanan gagala na maglorian Dios a si Jesu-Kristo a mismo so sakey a managdayew tan manangigalang.—Ipareng so 1 Corinto 1:18; 9:22, 23.
Niyabawag So Maong a Balita ed Sankamundoan
6, 7. (a) Anton responsabilidad nipaakar ed maong a balita so pambabanikelan na saray Tasi nen Jehova a pambilayan, tan tekep na anton resulta? (b) Anggaman agtayon balot labay ya abuloyan so takot a mangamper ed sikatayo a manlapud pangiter na pantasi, anto so nayarin nakaukolan no maminsan? (Nengnengen so paimanod-leksab.)
6 Singa si Pablo, saray Tastasi nen Jehova natan so babangatan na niglorian Anak To, si Jesu-Kristo. Diad sarayan Tastasi to, si Jehova so angimatalek ed sayan kayamanan “na maglorian maong a balita.” (1 Timoteo 1:11) Saray Tasi nen Jehova so agsinmaew a nambilay a tukoy ed sayan ambelat a responsabilidad, tan sikara so apaseseg ya agmangibaing ed satan. (2 Timoteo 1:8) Makanan agbalot abuloyan so takot odino baing a mangamper ed sikatayo diad pangiter na pantasi tan pangipabidbir na inkasikatayo a bilang Tastasi nen Jehova.a
7 Say ontan a makpel tan andi-takot a panagtasi so nansumpal diad kiyabawag ed ngaran na Sankatagyan ed sankadalinan tan diad kipulong na maong a balita na Panarian to ed sankamundoan a kalaknab. Imbaga na Anak na Dios: “Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan,” tan say pasakbay to so agbalot naabuloyan a makasagmak na isaew. (Mateo 24:14) Say maong a balita so nipupulong la natan ed masulok a 210 daldalin, tan say anggaan na sayan kimey na panagpulong so agni asabi. Ag-ambaing ed maong a balita tan aarapen so arapen a tekep na tepel, ipikasi tayo a singa ginawa na saray inmunan babangatan nen Jesu-Kristo: “Tan natan, Jehova, . . . iter mo ed saray ariripen mo so pantultuloy a mansalita ed salitam a tekep na amin a tepel.”—Gawa 4:29.
8. Akin a saray Tasi nen Jehova so agnepeg a nadismaya diad isusumpa ed amin a nasyones na dalin?
8 Manwarin tua a saray Tasi nen Jehova so ginula tan sinumpa ed amin a nasyones na dalin, saya so diad kasumpalan na saman so nipasakbay a pakabidbiran a tanda na saray puron managdayew na sakey a mabilay tan tuan Dios. (Juan 15:20, 21; 2 Timoteo 3:12) Sirin imbes a nadismaya tan onkapuy ed saya, saray manangiyabawag ed maong a balita so apaseguroan a walaan na madibinon panangabobon tan kabiangan na naabobonan ya organisasyon na Sankatalbaan a Soberano, si Jehova.
9. Akin ya andian na pamaakaran a say interon mundo so onsumpa ed sikatayo?
9 Agbalot lilingwanan: Walaan itayo na tulong na Sankatagyan a Dios ed amin a talba. Sirin, anto so pamaakaran no say mundo ed amin na saray relihyoson sekta to tan pulitikal a partido to so sumpa ed sikatayo? Say bogbogtong ya Anak na Dios so sinumpa na interon mundo, tan sikatayo so ag-ambaing a naromog ed parehon kipapasen. Unong ya inkuanto ed saray apostoles to: “No sikayo so gulaen na mundo, amta yo a siak so ginula to sakbay a sikayo so ginula to. No sikayo so kabiangan na mundo, say mundo so manliket ed kayarian to. Natan lapud sikayo so agkabiangan na mundo, noagta sikayo so pinilik a nanlapud mundo, nisengeg ed saya et sikayo so gulaen na mundo.”—Juan 15:18, 19.
10. Manlapud anton sengegan so nanlapuan na malaem a panamasegsegang ed saray Tastasi, tan akin a sikara so ag-ambaing ed satan?
10 Saray Tasi nen Jehova so angisungdo ed saray panamasegsegang ed interon mundo balet ta lalon matalona ed saraman so nasyones a manitibukel na Kakristianoan. Say ontan a panamasegsegang na Kakristianoan so ag-amaneknek a saray Tastasi so aliwan-Kristiano. Imbes, pabiskegen to so ibabaga ra a sikara so tuan Kristianos, Tastasi na Dios tan Ama nen Jesu-Kristo, salanti, si Jehova. Lapud sikara so Tastasi na Dios, sikara so agbinmaing sanen sinagmak da so kapasegsegang ed ontan iran relihyoson sengegan. Sirin, say simbawa nen apostol Pablo ed saray inmunan-Kristianos ya ag-ombaing so matukotukoy ya onaplika ed saray Tasi nen Jehova natan.—Nengnengen so Filipos 1:27-29.
Sankaabigan a Balitan Iyabawag
11. Diad impangala ed ngaran a Tastasi nen Jehova, akin a sikatayo so ag-ontundan magmaliw a patumbok nen Jesu-Kristo?
11 Saray Tasi nen Jehova so sitetepel ya angawat ed ngaran da diad kasumpalan na sipan nen Jehova ed nisipan a totoo to ed Isaias 43:10. Agkabaliksan na saya, anggaman kuan, ya agda la tutumboken si Jesu-Kristo. Si Jesus so Pangulo ra, say sakey a say padron to so tutumboken da. Sikato a mismo so sakey ed saray Tasi nen Jehova. Diad tua, sikato so manunan Tasi nen Jehova.—1 Timoteo 6:13; Apocalipsis 1:5.
12. Anton nengneng na balita so ipupulong na saray Tasi nen Jehova ed sankamundoan, tan akin?
12 Say mensahen ipupulong na sarayan Tasi nen Jehova ed sankamundoan so sankaabigan a balita a lawas niyabawag. Anggapo so gobiernon magmaong a para ed katooan nen say Mesianikon Panarian ya inletneg nen Jehova a manguley ed mundo na katooan a manondon ed saman so angibakian to ed bogbogtong ya Anak to. (Isaias 9:6, 7) Saray manaayam ed dalin a kipupulongan na maong a balita na Panarian so nanaikdan na pankanawnawan mangawat ed satan tan mamaneknek a makana ed langkap ya andi-anggaan a bilay ed atooan ya inkayadyari ed paraison dalin.
13. Akin a maseguro itayon say Mesianikon Panarian a gobierno so sankaabigan, tan anto so ag-ambaing ya irerekomenda na saray Tastasi?
13 Segurado, no si Jesus so mabulos a managmak na maruksan ipapatey ta pian dondonen iraman so magmaliw ya uleyan to, sikato so seguradon mangiter ed sikara na saman so sankaabigan ya agniiter na arum a gobierno. Irerekomenda mi ed amin a toon pinalsa ed dalin: Magmaliw a matoor, matulok ya uleyan na satan a gobierno. Sikatayo so ag-ambaing ed gobierno a sisisimoon ya irerekomenda mi ed amin a katooan. Sikatayo so ag-onsener a manlapud panangipulong ed Panarian, anggaman sayan kurang so mangitarok na kapasegsegang. Singa si apostol Pablo, balang sakey ed sikatayo so mangikuan: “Siak so ag-ambaing ed maong a balita.”
14. Unong ed si Jesus, panon so kalaknab so panangipulong ed Panarian diad agew tayo?
14 Impasakbay nen Jesus a say panangipulong ed maong a balita na Panarian so diad sankamundoan a kalaknab tan sayan malaknab, nikayat a propesiya so matukoy ed ontan a mensahe. (Marcos 13:10) Sikato so aliwan masugnar a mangipasakbay ed kipulong na Panarian nen Jehova ed sankaarawian a kalaknab—on, anggad saray sampot na dalin. (Gawa 1:8) Kabat nen Jesus ya inerman a pakaromogan ed totoo, saray matoor a patumbok to so manggawa na masimoon a sagpot a manabi ed sikara diad maong a balita na Panarian.
15, 16. (a) Siopa so manepeg a nasabi ed maong a balita? (b) Akin a say kimey na panagpulong so nasumpal anggaman ed panamasegsegang na organisasyon na Diablo?
15 Saray manaayam ed dalin natan so manbilang ed saray nilasus minilyon tan nikaykayat ed amin a kontinente tan saray manunan isla na saray kadayatan. Ingen, anggapo so pasen ed panaayaman a dalin ya arawin tuloy a panggawaan na saray Tasi nen Jehova na pambanikel a manabi ed satan diad maong a balita. Amin a panaayaman a dalin so simbolikon gagatinan-na-sali nen Jehova a Dios. (Isaias 66:1) Saray totoon pinalsa a manguukopa ed anggan anton pasen na gagatinan-na-sali to so makana a sabien na sayan mensahe na kilalaban.
16 Say maong a balita natan so makapaliket a balita ed sakey ya maarin gobierno a niletneg la ed saray lima na Mesias. Kabat nen Jesus ya anggaman ed sankasebegan a panamasegsegang ed biang na organisasyon na Diablo, say espiritu na Dios so mamapakiwas ed saray tuan patumbok na Mesias ya onla ed saray mismon getar ta pian “sayan maong a balita na panarian” bilang niletneg a katuaan so “nipulong ed amin a panaayaman a dalin.”—Mateo 24:14.
Ag-ibaing Si Jesu-Kristo tan Si Jehova
17. (a) Ed anto so ag-ibabaing na saray tuan managdayew? (b) Anton totontonen so indatak nen Jesus ed Marcos 8:38, tan anto so kakanaan to?
17 Say Sankatagyan a Dios so aliwan masuyat a mangiter ed inkasikato na sakey a ngaran, Jehova; nisay saray matoor a managdayew ed sikato so mangibaing ed satan a ngaran. Saray tuan managdayew so maliket a nakabatan tan nabidbir a bilang saraman so mangiter na agnaapag a panagdayew tan katutulok ed sikato. Nipaakar ed sikato, si Jesus so angidatak na totontonen, odino prinsipyo, diad Marcos 8:38: “Siopaman a mangibaing ed siak tan saray salitak ed sayan managkalugoran tan makasalanan a kapolian, say Anak na too so mangibaing met ed sikato sano onsabi ed gloria nen Ama to a kaiba toray masanton angheles.” Miulibay, siopaman a mangibaing ed Dios tan Ama na Katawan a Jesu-Kristo, si Jehova so manepenepeg ya ibaing na satan a sakey. Tan anggan siopan pinalsa ya ibaing nen Jehova lapud aliwan matoor a kurang to so agmakanan manggayaga ed kiwawala ed anggan dinan a pasen na nanarian na Dios ed tawen odino diad dalin.—Lucas 9:26.
18. (a) Akin a saray salita nen Jesus ed Mateo 10:32, 33 so nipaslep ed saray kapusoan tan kanonotan tayo? (b) Anto so nagawa ed saraman so mangitapat ed si Jesus tan si Jehova nisengeg ed takot ed totoo? (Mangiter na saray ehemplon nibase ed paimanod-leksab.)
18 Komon ta saray onggendan a salita nen Jesu-Kristo so nipaslep ed saray kapusoan tan kanonotan tayo: “Siopaman, sirin, a mangipatua na pikakasakey ed siak ed arap na totoo, ipatuak met so pikakasakey ed sikato ed arap nen Amak a wala ed katawenan; balet siopaman a mangitapat ed siak ed arap na totoo, sikato met so itapat ko ed arap nen Amak a wala ed katawenan.” (Mateo 10:32, 33; Lucas 12:8, 9) Diad parehon letnegan, siopaman a mangitapat ed Dios tan Ama na Katawan a Jesu-Kristo so itapat To. Sikato so agnibilang a makana a magmaliw a kabiangan na sankaabungan a si Jesu-Kristo so manunan Anak. Sikato sirin so naderal diad tinuro na Dios a panaon.b
19, 20. (a) Akin a saraman so angipikasi ed ngaran nen Jehova a napasantos so andian na bengatlan ibaing? (b) Anto so agawaan na saray andi-takot a manangiyabawag ed Panarian, tan diad anton pananulong?
19 Say modelon pikakasin imbangat nen Jesus ed saray babangatan to so naebatan: “Ama min wala ed katawenan, napasantos komon so ngaran mo. Onsabi komon so panarian mo. Nagawa komon so linawam, a singa ed tawen, ontan met ed dalin.” (Mateo 6:9, 10) Sano satan so nagawa, saray maaron babangatan nen Jesus so andian na ibaing. Say ngaran nen Jehova so galgalangen, pasantosen, aliwa lambengat a saray minilyon a manbibilay natan ya agnakaukolan ya ompatey noagta ontan met ed saray nilasus minilyon a totoon tawagen to a manlapud saray lubok da legan na sanlibon-taon ya uley na Panarian. Sikara so nawalaan na pankanawnawan manbilay ed paraison dalin ed ando lan ando.
20 Anggapoy baing, sarayan andi-takot a manangiyabawag ed maong a balita na Panarian so akayarin manumpal ed sankagloboan a panagtasi anggaman ed sankamundoan ya isusumpa lapud sikara so walaan na mabiskeg-nen-toon pakayari ed benegan da—say pananulong na saray mangatatawen ya angheles. Sirin, saray Tastasi nen Jehova so “ontakot ed Dios tan mangiter ed sikato na gloria.”—Apocalipsis 14:6, 7.
Ag-ambaing ya Ontakot ed Dios tan Mangiter ed Sikato na Gloria
21. Anto so ag-ibabaing na saray Tasi nen Jehova a gawaen, tan tekep na anton nansumpalan?
21 Pinaneknekan na saray Tasi nen Jehova ed inkasikara ya ag-ambaing ya ontakot ed Dios tan mangiter ed sikato na gloria, anggan mangusar ed personal a ngaran to, Jehova. Saya so nansumpal ed agnibalikas iran bendisyon ed sikara. Sarayan bendisyon so sinmabi ed matoor a kasumpalan na saray sipan na Sankatagyan a Dios. Agaylan kaalangonan na saya ed sikato a bilang say sakey a mabilay tan tuan Dios, say Soberano na talba!
22. Akin a saray Tasi nen Jehova so nidunget ed masebeg a kapasegsegang, balet anton gayaga so kayarian da?
22 Diad onsasabin arapen, saray sekular a gobierno so ombueltan onsumpa ed saray relihyoson pananguley tan punasen daran amin—a pati say Kakristianoan—a manlapud kiwawala. (Apocalipsis 17:16, 17) Sirin, saray Tastasi nen Jehova so nidunget ed sakey a panaon na masebeg a panamasegsegang na minumundon elemento. Agda nayarian a sungdoan tan naliktaran no say andi-anggaan a Dios so anggapo ed sikara. Balet sikato so, tan sirin panggayagaan da so pakanengneng ed amin na satan a sumpa-ed-Kristiano, sumpa-ed-Jehova a kakabusol a punasen ed kiwawala na Dios ya agnabier a dadayewen na saray Tastasi. Sikara so agmanagmak na kibabaing diad kiparungtal tan kaderal bilang kakabusol na tuan teokrasya noagta nasagmak da so agnibalikas a gayaga diad pangikanta ed si Jehova: “Anggan manlapud panaon ya andi-geter ya angga ed panaon ya andi-geter sika so Dios.”—Salmo 90:2.
23. Akin a saray Tasi nen Jehova so andian na bengatlan ibaing, tan anto so pansumpalan?
23 Sikara so nigloria ed Dios, say Ama nen Jesu-Kristo, diad panamegley to et say atooan a pamilya so arondon a manggayaga na andi-anggaan a bilay ed atooan ya inkayadyari tan liket ed paraison dalin. Agaylan mabiskeg a Dios so impangipanengneng nen Jehova na inkasikato diad panamegley nen Kristo Jesus! Agaylan sankarakpan so impangiparungtal nen Jehova na inkasikato a sakey a makabat tan maaron manangusar, aliwan manag-abuso, ed makapanyarin-amin a pakayari to! Matukoy, andian itayo na ibaing a nisengeg ed sikato odino ed bogbogtong ya Anak to, si Jesu-Kristo. Sikatayo so ag-ambaing a manangiyabawag ed maglorian maong a balita, ya angidatak ed lawas-mananalon pakayari nen Jehova a Dios diad panamegley nen Kristo Jesus, ya angikuan ed saray manangisaran oras ed mangaraldalin a bilay to: “Manpakpel! Tinalok so mundo.” (Juan 16:33) Diad impangala ed sayan kurang, komon ta sikatayon naynay so manumbok ed ehemplo nen apostol Pablo, ya agbalot binmaing ed maong a balita. No satan so gawaen tayo, say Makapanyarin-amin a Dios so agmangibaing ed sikatayo.
[Saray paimano ed leksab]
a Anggaman agtayo labay so ombaing ed katuaan a sikatayoray Tastasi, walaray panaon sano nakaukolan tayo so magmaliw a “masilib a singa saray uleg.” (Mateo 10:16) Saray Tastasi ed Nazi Aleman so mikabat a wala so panaon na pangipabidbir na inkasikara tan sakey a panaon na agpanggawa na ontan.—Ipareng so Gawa 9:23-25.
b Naulitulit, saraman so angitapat ed si Jesus tan si Jehova nisesengeg ed takot ed totoo so ag-akaromog na pabor a manlapud mundo. Alimbawa, nengnengen so The Watchtower na Mayo 1, 1989 pahina 12; 1982 Yearbook, pahina 168; 1977 Yearbook, pahina 174-6; 1974 Yearbook, pahina 149-50, 177-8. Diad biek a dapag, anggan saray determinadon sumusumpa ed maong a balita so mangibabagan saray Tastasi so agmangitapat ed si Jesus tan si Jehova. (1989 Yearbook, pahina 116-18) Nengnengen met so Mateo 10:39 tan Lucas 12:4.
Tepetepet ed Sumarya
◻ Singa si apostol Pablo, anton awawey so nepeg a wala ed sikatayo nipaakar ed panangiyabawag ed maong a balita, tan akin?
◻ Akin a say balitan iyaabawag na saray Tasi nen Jehova so sankaabigan a balita?
◻ Anton pasakbay so inter nen Jesus nipaakar ed siopaman a mangibaing ed sikato diad isabi to ed gloria na Panarian?
◻ Anto so nagawa ed saraman so mangitapat ed si Jesus tan si Jehova?
◻ Anto so ayarian a gawaen na saray manangiyabawag ed maong a balita ya andi-baing, tan akin?