Sayan Maong a Balita so Nepeg ya Ipulong ya Unona

“Say evangelio [maong a balita, NW] kaokolan ya nipulong ya unona ed saray amin a naciones.”​—MARCOS 13:10.

1, 2. Anto so tatak na saray Tasi, tan akin?

AKIN a saray Tasi nen Jehova so manpupulong ya andi-tunda? Maseguron sikatayoy kabkabat ed sankamundoan lapud mapublikon ministeryo tayo, balanglan satan so diad panagkabkaabungan, diad saray lansangan, odino ed impormal a pipiabet. Diad kada matukoy a pankanawnawa, ipapabidbir tayo so inkasikatayo bilang Tastasi tan panggugunaetan a mataktikan itongtong so maong a balitan papablien tayo. Diad tua, nibaga tayon sayan ministeryo so tatak tayo!​—Colosas 4:6.

² Isipen pa lambengat itan​—kapiganman a nanengneng na kakaabay so grupo na amisteng a lalaki, bibii, tan ugugaw a walaay awit a porpolyo, anto so kaslakan a nonoten da? Kasin satan so, ‘O wadia la lamet iray Katoliko, (odino Ortodokso)!’ odino, ‘Wadia la lamet iray Pentecostal (odino saray Baptist)!’ Andi. Kabat na totoo a saratan a relihyon so andiay interon pami-pamilyan manusumpal ed panagkabkaabungan a ministeryo. Anganko ta arum a relihyoson grupo so mangibabaki na pigaran “inkuan a misionero” para ed duay-taon a misyon ed sakey a lugar, balet kaslakan ed saray membro ra so agmibibiang ed anggan dinan ed ontan a ministeryo. Saray Tasi nen Jehova lambengat so bibidbiren ed sankamundoan ed seseg da diad pangipasabi ed arum na mensahe ra ed kada matukoy a pankanawnawa. Tan sikaray kabkabat lapud saray magasin dan, Say Panag-Bantayan tan Awake!​—Isaias 43:10-12; Gawa 1:8.

Midumaan ed Klero na Kakristianoan

3, 4. Panon a say klero na Kakristianoan so mabetbet a nipaparungtal ed media?

³ Miduman tuloy, saray balita so naulit-ulit a mangipaparungtal a dakel ed klero ed arum a daldalin so mangaabuso ed ugugaw, imoral iran switik, tan masaol. Saray gawa ra ed laman tan say alablabas ya istiloy-kabibilay da so parungtalan a nanengneng na amin. Sakey a popular a kompositor na kanta so angibalikas a maong ed saya ed kanta ton apuloan na “Mangisulong Ta si Jesus na Rolex ed Programa To ed Telebisyon?” Sikatoy nantepet: “Magmaliw ta a pulitiko si Jesus no Sikatoy ompawil ed Dalin? Nawalaan kasi na komaduan ayaman ed Palm Springs [sakey a komunidad na mayayaman ed California] tan panggunaetan ton iyamot so kayamanan To?” Matukotukoy iray salita nen Santiago: “Nambilay kayo ed saray liket dia ed dalin, tan managlawan kayo; pinataba yo so puspuso yo, a singa dia ed sakey ya agew a panagpatey na asalian.”​—Santiago 5:5; Galacia 5:19-21.

⁴ Say pisosyosyalan na klero ed saray pulitiko tan anggan say pibibiang ed saray eleksyon bilang kandidato ed pulitika so mangipaparungtal ed sikara bilang modernon-panaon iran eskriba tan Pariseo. Ontan met, diad saray bansa a singa say Estados Unidos tan Canada, saray kaban-na-kayamanan na relihyon so naeekatan lapud ankakabaleg a gastos ed saray kaso tan saray akusasyon sumpad klero, a resulta na mabanbanday a kondukta ra ed saray ugugaw tan saray susto la’d edad.​—Mateo 23:1-3.

5. Akin ya apaneknekan a say Kakristianoan so aliwan “say matoor tan makabat ya aripen”?

⁵ Dugaruga, a nibaga nen Jesus ed klero ed agew to: “Kasi kayo la, ya escribas tan Fariseos, a mansimpisimpitan! ta mipadpara kayo ed saray pinaputin lobok, ya dia’d paway nengneng toy marakerakep, balet dia’d dalem napno na pokepokel na saray totoo ya inaatey, tan amin a karutakan. Ontan yo met ya nengneng yo so matunong ed saray totoo, balet dia ed loob napno kayo na pansimpisimpitan tan kaugsan.” Kanian ag-inter na Dios ed klero na Kakristianoan, nisay diad Katoliko, Protestanti, Ortodokso, odino ed saray andiay denominasyon, so kimey a pangipulong na maong a balita. Napapaneknekan ya aliwan sikara so nipasakbay a “matoor tan makabat ya aripen.”​—Mateo 23:27, 28; 24:45-47.

Akin a Kaukolan ya Ipulong ya Unona so Maong a Balita?

6. Antoran ebento so asingger lan nagawa?

⁶ Diad antikey tan makabaliksan a ganggan nen Jesus a mangipulong na maong a balita ed amin a nasyon, si Marcos lambengat so manguusar na salitan “unona.” (Marcos 13:10; ipareng so Mateo 24:14.) Onia so patalos nen J. B. Phillips: “Lapud sakbay na isabi na anggaan say ebanghelyo so nepeg a niyabawag ed amin a nasyon.” Say impangusar na “unona” bilang advervio so mangipapatnag ya arum niran ebento so tumbokan na sankamundoan a panag-ebanghelyo. Saraman ya ebento so mangilaktip ed insipan a baleg a kairapan tan say matunong a pananguley nen Kristo ed balon mundo.​—Mateo 24:21-31; Apocalipsis 16:14-16; 21:1-4.

7. Akin a labay na Dios a nipulong ya unona so maong a balita?

⁷ Kanian akin a labay na Dios a nipulong ya unona so maong a balita? Say sakey a rason et lapud sikato so Dios na aro, inkahustisya, kakabatan, tan pakayari. Diad kasumpalan na balikas nen Jesus a nikurit ed Mateo 24:14 tan Marcos 13:10, naromog tayo so sakey a napanisiaan a panangipatnag na sarayan atributo nen Jehova. Usisaen tayon magano iraya tan imanoen no panon a nisisiglaot iratan ed panangipulong na maong a balita.

Say Maong a Balita tan say Aro nen Jehova

8. Panon a say panangipulong na maong a balita so sakey a panangipatnag na aro na Dios? (1 Juan 4:7-16)

⁸ Panon a nisindag na panangipulong na maong a balita so aro na Dios? Manuna ed amin, lapud satan so aliwan sakey a mensahen ginetma para lambengat ed saksakey a rasa odino grupo. Satan so maong a balita para’d “amin a naciones.” Inaro na Dios a tuloy so atooan a pamilya, ya imbaki to so bogbogtong ya Anak to ed dalin pian magmaliw a dondon bagat para’d saray kasalanan na amin a katooan, aliwa lambengat a para’d sakey a rasa. Insulat nen apostol Juan: “Ta ontan la’y inpangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan. Ta say Dios ag to inbaki so Anak ed mundo ya mangokom ed mundo; no ag ingen pian say mundo nilaban ed panamegley to.” (Juan 3:16, 17) Maseguron say maong a balita, sakey a mensahen mangisisipan ed sakey a balon mundo na kareenan, pantutunosan, tan inkahustisya, so ebidensya na aro na Dios.​—2 Pedro 3:13.

Say Maong a Balita tan say Pakayari nen Jehova

9. Akin ya ag-inusar nen Jehova so makapanyari iran relihyon na Kakristianoan pian mangipulong na maong a balita?

⁹ Panon a nipapatnag so pakayari nen Jehova ed panamegley na panangipulong na maong a balita? Kunsideraen so onggendan, siopa so uusaren to a manumpal ed sayan kimey? Kasin saray makapanyarin tuloy a relihyoson organisasyon na Kakristianoan, a singa say Iglesia Katolika Romano odino saray prominintin denominasyon na Protestanti? Andi, say pibabali ra ed pulitika so angekal ed sikara na kanepegan pian sumpalen itan a kimey? (Juan 15:19; 17:14; Santiago 4:4) Say relatibon kayamanan da tan saray koneksyon tan impluensya ra ed apilin nengneng na totoon manuuley so ag-amaliket ed si Jehova a Dios, nisay teolohya ran nisiglaot a tuloy ed tradisyon. Agnakaukolan so pakayari na too pian nagawa so linawa na Dios.​—Zacarias 4:6.

10. Siopa so pinili na Dios pian manpulong?

¹⁰ Kapara iman na imbaga nen apostol Pablo ed sulat to ed kongregasyon na taga Corinto: “Nengneng yo, agagi, so katawagan yo, ta angapo so dakel a makabat onong ed laman, angapo so dakel a makapanyari, angapo so dakel a mabli a too, ed saray natawag. No ag ingen pinili Dios so saray bengatla a makulangkulang na mundo ya onkana a pamabaing to ed saray makabat; ta pinili to so saray bengtla a makapuy na mundo, ya onkana a pamabaing to ed saray bengatla a mabiskeg; Tan saray bengatla ya andi kana ed mundo, tan saray ag pinabli, sikara so pinili Dios, tan saray bengatla ya angapo, pian paandien da so saray bengatla ya wala. Ta pian angapo so laman a manpangta ed arap na Dios.”​—1 Corinto 1:26-29.

11. Antoran katuaan nipaakar ed Tastasi so nanggawa ed sikaran nikadkaduma?

¹¹ Dagdaiset lambengat iray mayaman a membro na Tastasi nen Jehova ed oganisasyon da tan talagan anggaporay makapanyari ed pulitika. Say mapeget a neutralidad da ed pulitika so mankabaliksan a sikaray agmangiimpluensya ed pulitika. Diad pidumaan, mabetbet a sikaray magmamaliw a biktima ed inaayep a panamasegsegang ya idadaulo na relihyoso tan pulitikal iran lider ed sayan koma-20 a siglo. Ingen, anggaman ed maruksan isusumpan pinalesa sumpad sikara na saray disipulo na Nazismo, Pasismo, Komunismo, nasyonalismo, tan palson relihyon, saray Tasi so aglambengat mangipupulong ed maong a balita ed sankamundoan noagta makapakelkelaw met so idaraak da.​—Isaias 60:22.

12. Akin a matalona iray Tasi?

¹² Anto ta so ipapasen na saray Tasi a panlalapuan na itatalona ra? Insipan nen Jesus ed saray babangatan to: “Mangawat kayo na pakayari, no onsabi ed sikayo so Espiritu Santo: et sikayo so tasik ed Jerusalem, tan ed amin a Judea tan Samaria, tan anga ed kasampotan na dalin.” Kanian, anto so maseguron sengegan na itatalona ra? Inkuan nen Jesus: “Mangawat kayo na pakayari, no onsabi ed sikayo so Espiritu Santo.” Ontan met natan, say pakayarin manlalapud Dios, aliwan say abilidad na too, so manunan sengegan na itatalona na Tastasi ed sankamundoan a ministeryo. Manwarin singano saray sankakapuyan a totoo so nauusar, nagagawaan na Dios so sankabalgan ya edukasyonal a kimey ed awaran.​—Gawa 1:8; Isaias 54:13.

Say Maong a Balita tan say Kakabatan nen Jehova

13. (a) Akin a saray Tasi so manlilingkor a boluntaryo tan andian na bayar? (b) Panon ya inebatan nen Jehova so pamabalaw nen Satanas?

¹³ Say maong a balita so ipupulong na saray boluntaryo. Inkuan nen Jesus, “Andibayar ya inawat yo, andibayar met ya iter yo.” (Mateo 10:8) Kanian, anggapo so anggan sakey ed saray Tasi nen Jehova a mangaawat na sueldo ed panaglingkor ed Dios, nisay panpipirawatan da itan. Diad tua, ag-ira anggan mangokolekta ed saray miting da. Diad panamegley na debotado tan agsinisiblet a panaglingkor da, sikaray naliliketan a mangiter para’d Dios na ebat ed manaakusa ed sikato, si Satanas a Diablo. Sayan sumusumpan espiritu ed Dios so mangibabagan saray totoo so agmanlingkor ed Dios tekep na agsinisiblet a motibo. Diad kakabatan to si Jehova so amawala na agnasuppiat ya ebat ed balaw nen Satanas​—diad saray minilyon a matoor a Kristianon Tasi a mangipupulong na maong a balita ed kabkaabungan, ed saray lansangan, tan ed impormal a paraan.​—Job 1:8-11; 2:3-5; Uliran 27:11.

14. Anto so “inamot a kakabatan” a tutukoyen nen Pablo?

¹⁴ Sananey nin ebidensya na kakabatan na Dios ed pangipupulong na maong a balita et say mismon sipan nipaakar ed Panarian so sakey ya ebidensya na kakabatan na Dios. Insulat nen apostol Pablo: “Bangbalet sasalitaen mi kakabatan ed saray matatken: ya aliwa a say kakabatan ed saya a mundo, tan saray mamakauley ed saya a mundo, ta saraya onandi ra: No ag say sasalitaen [mi kakabatan] na Dios ed inkamisterio, a salanti, inamot a kakabatan, a say Dios intadia to nen agni apalsa so mundo ya onkana a gloria tayo.” Satan ya “inamot a kakabatan” so manutukoy ed makabat a paraan na Dios a panganggaen so rebelyon a ginmapo ed Eden. Say kakabatan na satan a sagradon sekreto so niparungtal ed si Jesu-Kristo, a sikatoy manuna ed maong a balita na Panarian na Dios.a​—1 Corinto 2:6, 7; Colosas 1:26-28.

Say Maong a Balita tan say Inkahustisya na Dios

15. Panoy pikabat tayo a si Jehova so sakey a Dios na inkahustisya? (Deuteronomio 32:4; Salmo 33:5)

¹⁵ Nagkalautla ed inkahustisya a nanengneng tayo so kaimportantian na salitan “unona” ed Marcos 13:10. Si Jehova so sakey a Dios na inkahustisya a tinekepan na maaron-kaabigan. Ibabaga to ed propeta ton si Jeremias: “No ag ingen say manpasirayew manpasirayew komon ed saya, a sikato walaan na pakatalos tan amta to ak, a siak si Jehova a mangawa a managamil na maaro ya abig na linawa, inkatunong, tan kaptekan, dia ed dalin; ta dia ed saraya a bengatla manliket ak, kuan nen Jehova.”​—Jeremias 9:24.

16. Panon a niyilustra a say inkahustisya so mankakaukolan na panangiter ya unona na sakey a pasakbay?

¹⁶ Panon a nipanengneng so inkahustisya nen Jehova no nipaakar ed panangipulong na maong a balita? Iyilustra tayo iya ed sakey ya ina a nanggawa na masamit a chocolate cake a kanen sano onsabi iray bisita ed bandad ngarem. No satan so itilak to ed lamisaan ed kusina ya ag-ibabaga ed saray anak to no kapigan itan kanen, anto ta so natural a gawaen na saray anak? Amin tayo so dinmalan ed inka-ugaw! Kaliktan na saray gamet na ugaw a salien a tawayan iman a cake! Natan no say ina so ag-angiter na makanepegan a pasakbay, anggapo so mabiskeg a basiyan pian disiplinaen tora. Diad biek a dapag, no impalinew ton say cake so kanen sano onsabi iray bisita a kaukolan ya agnadiwit, mabitar a sikatoy angiter na pasakbay. No walay onsunggay, sikato so walaan na kanepegan a manggawa na mapeget tan makanepegan a panagdisiplina​—Uliran 29:15.

17. Panon ya impatnag nen Jehova so inkahustisya ed sakey a nikadkaduman paraan nanlapulad 1919?

¹⁷ Si Jehova, diad inkahustisya to, so agmangukom sumpad sayan marelmeng a sistema na bengabengatla ya agmangiter nin unona na manepeg a pasakbay. Sirin, nagkalautla nanlapulad 1919, kayari na inmunan guerra mundial ya angitarok na “kairapan,” ginawa nen Jehova a saray Tasi to so onla’d interon dalin a siseseseg a mangipulong ed maong a balita. (Mateo 24:7, 8, 14) Agniburi na saray nasyon ya agda amta iyan nikadkaduman pasakbay.

Kaunongan Lan Kalaknab ya Apulongan so Mundo?

18. (a) Anto so walan ebidensya ed kimey na Tastasi ed nisulinek a lugar? (b) Antoray arum nin alimbawa ya amtam?

¹⁸ Say sakey a paneknek ed inka-epektibo na sayan sankamundoan ya edukasyonal a kimey so nanengneng ed libron Last Places​—A Journey in the North. Sasaglawien na autor na saya a sanen sinuri toray tsart diad kadayatan para’d saray nisian ya isla na Foula, sakey ed saray Shetland Island ed amianen na Scotland, impanengneng na saray tsart a diad “interon liber na isla say WKS (wrecks), RKS (rocks), LDGS (ledges), tan OBS (obstructions).” Saraya so “mangipapasakbay ed saray marinero ya onarawi diman. Say kadayatan na Foula so makapataktakot a tuloy a minaan, a say isla so mapeligro para’d saray mahilig a manlayag, saray manbabaroy no agew, tan anggan saray brigada na Reyna na Inglatera para’d saray proyekton panpubliko, anggaman​—pigaran agew lambengat nanlapulad impikabat ko—​ya aliwan ontan para’d Tastasi nen Jehova.” Intuloy to: “No panon so sigpot a tuloy ya impananap da ed saray kaabungan ed ankakabaleg a syudad tan say Third World ed pananap na saray kumberti, ontan da met a mangukumberti para’d pananisia ra ed arawin Foula.” Inaksobi to a sakey a taga diman, si Andrew, so walaan na kopya na Say Panag-Bantayan ya intilak ed pinto to ed apalabas a pigaran bulan. Insan inkuan to ni: “Kalabas na sakey a simba siak so makanengneng na sakey a kopya [na Awake! ed Daneso] ed Faeroes [saray isla ed North Sea] tan kalabas na duay bulan sakey a kopya met [na Say Panag-Bantayan ed Daneso] ed Nuuq, Greenland.” Agaylan marakep a paneknek na maseseg a kimey na Tastasi nen Jehova ed saraman a mamaamianen a rehyon!

Anto so Manadagdag ed Saray Tasi Pian Mantultuloy a Manpulong?

19, 20. (a) Anto so manadagdag ed saray Tasi nen Jehova pian mantultuloy a manpulong? (b) Antoran tepet so ontumbok ya ebatan?

¹⁹ Siempre, agmainomay so pankabkaabungan ed totoon agyo kabat, anggan pigaran taon kayo lan sakey a Tasi. Anto sirin so managdag ed sarayan Kristiano pian mantultuloy? Saman et say dedikasyon da tan say liknaan a walaay responsabilidad bilang Kristiano. Insulat nen Pablo: “No ipulong ko so evangelio, angapo so pangloriaan ko; ta say kapilitan sikato so amasuut ed siak; et abagey ak la no ag ko ipulong so evangelio.” Saray tuan Kristiano so walaan na sakey a mensahen mankabaliksay bilay, kanian panon dan iyamot ed inkasikara iyan mensahe? Say mismon prinsipyo na pankasalanan ed dala lapud isaew a pangiter na pasakbay ed panaon na kapeligroan so sakey a manadagdag a rason pian ipulong so maong a balita.​—1 Corinto 9:16; Ezequiel 3:17-21.

²⁰ Panon, sirin, a nipupulong so maong a balita? Anto so tombok na itatalona na Tastasi? Antoray kabiangan na ministeryo tan organisasyon da so makatulong a mangipabidbir ed sikara bilang say tuan relihyon? Ebatan na onggendan ya artikulo iratan a tepet.

[Paimano ed leksab]

Kasin Natandaan Mo?

◻ Anto so pakabidbiran a duma iray Tasi nen Jehova manlapud klero?

◻ Panon a say panagpulog so mangisisindag ed aro, pakayari, tan kakabatan na Dios?

◻ Panon a say panagpulong na maong a balita so mangisisindag ed inkahustisya na Dios?

◻ Anto so manadagdag ed saray Tasi nen Jehova pian mantultuloy ed ministeryo ra?

[Saray litrato ed pahina 15]

Anggan panon lay kasulinek na totoo, sikaray kaliktan na Tastasi nen Jehova a nasabi