Akin a Saray Tasi so Mantultuloy ya Ondadalaw?

‘NITAN la’ra lamet! Balet ta nanlapu la ra’d dia nen imbeneg iran simba lambengat!’ Ontan ta so iisipen mo sano sakey ed saray Tasi nen Jehova so ondadalaw ed sika? Minilyon natan so maparanay a bibisitaen na saray Tasi nen Jehova. Nayarin itepet mo, Akin a sikaray mapilit, anta amta ra met a maslak a totoo so walaan lay relihyon odino ag-interesado? Satan a tepet so makanepegan na ebat.

Responsabilidad ed Imaton na Dios

Naaralan na saray Tasi nen Jehova manlapud Kasulatan a nanlapulad 1914, say taon nen ginmapo so Guerra Mundial I, a saray ebento ed mundo so kasumpalan na saray propesiya ed Biblia nipaakar ed anggaan na peles a sistema na mundo tan ed onsasabin uley na Panarian na Dios ed sayan dalin. Ngalngalin sakey a siglo na karawalan, panag-paagus na dala, tan pangugulaan so nagkalalo nen kapigan man et ompatnag ya angiyarawi’d mundo ed sakey a pulitikal a solusyon na saray problema ra. Saray bakal tan terorismo a mamapairap ed katooan so paneknek a say uley na too so sinmaew a mamasimbalo ed kapusoan, kanonotan, tan awawey na too. Say kapaitan na saray ebenton agawa ed awaran so manederal ni ingen ed saray siglaotan ed baetan na saray etnikon grupo, rasa, tan relihyoso. Satan so tua ed saray pasen a nagkalautlan arawi a singa say Abalaten ya Aprika, Afghanistan, India, Mamaamianen ya Irlandya, say Pegley Bukig, tan say datin Yugoslavia. Anto, sirin, so mogmon magnayon a solusyon?

Anto so Mamapakiwas ed saray Tasi?

Bibidbiren na saray Tasi nen Jehova so solusyon ya iiter na Dios​—say insipan ton Panarian ed panamegley nen Kristo Jesus—​so mogmon praktikal ya ebat. Intekep ni ingen nen Jesus so sakey a kerew para’d uley na satan a Panarian ed bantog a modelon pikakasi: “Ama mi’n wala ka ed tawen, Nagalang komon so ngaran mo. Onsabi komon so panarian mo. Nagawa komon so linawam, onong ed tawen, ontan met ed dalin.” Sisiaen na saray Tasi a sayan pikakasi so peteg a mangekerew ed isalet na Dios ed saray kurang na katooan.​—Mateo 6:9, 10.

Kanian akin a liknaen na saray Tasi nen Jehova a kaukolan so mantultuloy ya iyakar ed kabkaabungan diad gunaet a nipasabi itan a mensahe? Lapud duaran ganggan ya impabitar nen Jesus: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon ya nonot mo. Sikatoya so baleg tan unona’n gangan. Tan say komadua a mipadpara ed sikato saya, Aroen mo so kaparam a too onong ed sikan dili.”​—Mateo 22:37-39.

Kaliktan na saray Tasi so panamendisyon na Dios para’d inkasikara, tan lapud aaroen da so kaabay da, labay da met a sikaray nabendisyonan. Kanian, diad itumbok ed alimbawa nen Jesus, liknaen dan sikaray nadagdag na andi-siblet ya aro a bisitaen iray kakaabay da. Labay dan sikaray naikdan na pankanawnawan naamtaan no anto so insipan na “say maliket a Dios” para’d matulok a katooan ed sakey ya alinisan a dalin.​—1 Timoteo 1:11, NW; 2 Pedro 3:13.

Sinisia na Kristianon misionero a si Pablo iray sipan na Dios tan sirin et nayarian ton isulat: “Si Pablo, ya aripen na Dios tan apostol nen Jesu-Cristo, onong ed pananisia na saray pinili Dios, tan say pikakabat ed katuaan, a sikato so matokoy ed kasantosan, nipaakar ed panangilalo ed bilay ya andi anga, a say Dios, ya ag to nayari manburi, insipanton akaona nen saray panaon na saray nilasus a taon.” On, sikatoy Dios ya “ag to nayari manburi,” ya “insipanto” so andi-anggaan a bilay ed saray mapaabeban mangugunaet a nakabatan tan panlingkoran.​—Tito 1:1, 2; Sofonias 2:3.

Kasin Babayaran Iray Tasi?

Tunggal paminsan et ibabaga na arum a saray Tasi so babayaran ed ministeryo ra. Anggapoy katuaan na saya! Ipapapuso ra iray salita nen Pablo ed kongregasyon na Corinto: “Aliwa kamin singa saray dakel a manderal na salitay Dios: no ag ingen dia ed katuaan, singa salitay Dios, ed arap na Dios mansalita kami dia ed biang nen Cristo.”​—2 Corinto 2:17.

Arum a relihyoson lider so manpupulong lapud kuarta, balanglan satan so bayar ed saray relihyoson serbisyo odino diad panangiyalibansa na komersyal a pambilay diad saray ministeryo ra ed TV. Maslak a relihyon so walaay babayaran iran klero.

Diad kasuniyan, saray Tasi so andian na babayaran a klero, tan mabetbet a say literatura ra ed Biblia so iyoopresi ya andiay bayar ed saray masimoon a manaanap na katuaan, anggaman dakel ed saraya so napapakiwas a mangidona. Saraya so nauusar pian sapotan iray gastos ed sankamundoan a panagpulong a kimey. Mitunosan ed simbawa nen Jesus: “Andibayar ya inawat yo, andibayar met ya iter yo,” sibubulos ya uusaren na saray Tasi iray kayarian da, pati say panaon tan biskeg da, diad pangidedeboto na minilyon ya oras ed kada taon ed panaglingkor ed Dios. Diad ontan, babangatan daray interesadon totoo diad panagkabkaabungan tan diad panamegley na panangiyaral na Biblia.​—Mateo 10:8; 28:19, 20; Gawa 20:19, 20.

Papaneknekan na saray katuaan a saray Tasi nen Jehova bilang indibidual so andian na motibon makatipon na kuarta para ed lokal iran kongregasyon da, odino para ed Watch Tower Society. Anggapon balot so mangaawat na antokaman a bayar para’d panagkabkaabungan. Sirin, panon dan gagastosan itan a kimey? Diad panamegley na mabulos a panangidona manlapud totoo ed interon mundo a walaay panamabli. Anggapo so panangolekta na kuarta.

Say Epekto na Panagtasi Ra

Naiimano ta na totoo so panagkabkaabungan a ministeryo tan impormal a panagpulong na Tastasi? Say ebidensya ed medya so sakey a makbaw ya on ed satan a tepet. Saray Tasi nen Jehova so nasasalambit ed saray programa ed TV tan saray pelikula sano walay nipapanengneng ya ontotoktok ed puerta. Nasasalambit iray Tasi ed saray cartoon. Say maseseg a kimey da so kabkabat a tuloy, a saray mandrodrowing na cartoon ed sankamundoan so manutukoy ed saray Tasi nen Jehova. Saraya so singano panamalaw, balet gendagendat a nibase iraya ed sakey a positibon katuaan​—a saray Tasi so kabkabat ed maseet a panagkabkaabungan a kimey da. ​—Gawa 20:20.

Diad sakey ya agano nin cartoon et impanengneng so sakey a toon onkakalab ed sakey a palandey pian ontupleg ed sakey a “guru.” Inkuanto: “Ibagam ed siak iray makapakelkelaw a nagawgawa!” Panon so inyebat na “guru”? “Nengnengen ta . . . Wala naani iray eras, saki-sakit, tan yegyegyeg. Say agew so magmaliw a bilunget, tan say bulan magmaliw a dala.” Say manuupapet so tinmepet: “Anto so maong a balita?” Saya so inebatan na “guru” na onia: “Punasen na Dios so amin a lua . . . tan anggapo la naani patey nisay ermen nisay ot-ot!” Tinmepet so bisita: “Panon mon naamtaan iratan a bengatla?” Say ebat? “Anggapon balot so nasasaew na saray Tasi nen Jehova!” Tan satan so nayari met a tua no nipaakar ed nandrowing a mismo na cartoon!

Say kaimportantian na saya tan ed mipadpara ed saraya et say bengatlan ipaparungtal na satan ya aliwa lambengat ed say pantultuloy ya ibibisita na saray Tasi noagta pati say pantutunosan na mensahe ra. Diad pigaran salita lambengat, niiter na nandrowing so sakey a manunan kabiangan na panagpulong ed kabkaabungan tan angaon ed saray kasulatan.​—Ipareng so Mateo 24:7, 29; Apocalipsis 21:3, 4.

Anggan ipupulisay na maslak a totoo so mensahe ra et agnadidismaya iray Tasi nisay nababawasan so seseg da. Impasakbay nen apostol Pedro: “Dia ed kaonoran ya agew onsabi so saray managlurey a pati panaglurey, a manakar irad dilin lawan da, Tan kuanen da: Iner so kawalaan na sipan ed idateng to? ta nanlapu la ed saman so agew ya inkaplag dad ugip na atateng, ganagana a bengatla, ontotoloy a singa nen gapu na inkapalsa.” Anggaman ed saya, lapud papakiwasen na aro, mantutultuloy a dadalawen na saray Tasi so kakaabay da tan gawaen da itan anggad panampoten la na Dios so kaplesan ya abulok a sistema.​—2 Pedro 3:3, 4.

Inkuan nen Jesus a diad kaunoran iran agew, say maong a balita so kaukolan a nipulong nin unona. Para’d nagkalalon panangusisa no akin tan panon, nengnengen so duaran onggendan ya artikulo.​—Marcos 13:10.

[Saray litrato ed pahina 9]

Saray Tasi nen Jehova so andian na suesueldoan a kleron klase​—amin so boluntaryo iran ministro