Panagtasi ed “Amin a Nasyon”

“Sayan maong a balita na panarian so nipulong ed amin a panaayaman a dalin ya onkanan pantasi ed amin a nasyon; tan diad ontan et onsabi so anggaan.”​—MATEO 24:14, NW.

1. Akin a saray salita nen Jesus a nikurit ed Mateo 24:14 so nagmaliw a sakey a surpresa ed saray patumbok to?

AGAYLAN surpresa para’d saray babangatan ton Judio so asalambit iran salita nen Jesus! Say mismon ideya na pinasantos iran Judio a mitongtong ed “ag malinis” iran Hentil, “totoo na nasyones,” so sankaili ed sakey a Judio, makapadimla ni ingen.a Agayla, say sakey a matoor a Judio so agmanisip ya onloob ed ayaman na sakey a Hentil! Dakel ni so nepeg ya aralen na saray Judion babangatan nipaakar ed si Jesus, ed aro, tan ed inganggan to. Tan sikara ni nepeg a manaral na dakel nipaakar ed agpanangidumaduma nen Jehova.​—Gawa 10:28, 34, 35, 45, NW.

2. (a) Kaunongan lan kalaknab so ministeryo na Tastasi? (b) Antoran taloran sengegan so amaaligwas ed saray Tasi?

² Nipulong la na saray Tasi nen Jehova so maong a balita ed limog na nasyones, pati say modernon-panaon ya Israel, tan iyaabawag da iya natan ed mas dakel a nasyon nen kapiganman. Nen 1994, masulok ya apatira tan kapalduan milyon a Tasi so mangipupulong ed ngalngali 230 a daldalin. Sikaray mangikokondukta na ngalngali apatira tan kapalduan milyon a panangiyaral na Biblia ed totoon interesado. Saya so gagawaen anggaman ed lingon-panmoria na mundo, mabetbet lapud anggapoy-pikakabat nipaakar ed saray bangat tan motibo na Tastasi. Unong a singa nibaga nipaakar ed akaunan Kristianos, nibaga met nipaakar ed sikara: “No nipaakar ed sayan secta, akabatan mi a nasasalita sumpa ed ganagana’y pasen.” (Gawa 28:22) No ontan, anto so nibaga tayon rason ed matalonan ministeryo ra? Walay ag-onkulang ed taloran sengegan na aligwas da​—itutumbok ed saray panangiwanwan na espiritu nen Jehova, pangalig ed praktikal iran paraan nen Kristo, tan pangusar na susto iran instrumento para’d epektibon pitatalosan.

Say Espiritu nen Jehova tan say Maong a Balita

3. Akin ya agtayo nipasirayew so agawaan tayo la?

³ Ipapasirayew ta na saray Tasi nen Jehova so itatalona ra, a singano satan so rason na antokaman a nikadkaduma iran abilidad a walad sikara? Andi, lapud onaaplika iray salita nen Jesus: “Sano agawa yo so amin a nigangan ed sikayo, kuan yo, Ariripen kami, ya andi kakanaan; ginawa mi so nepeg mi a gawaen.” Bilang dedikado, bautismadon Kristianos, boluntaryon inawat na saray Tasi nen Jehova so responsabilidad a manlingkor ed Dios, antokaman so personal iran kipapasen da. Para’d arum, satan so mankabaliksan na sigpot-panaon a panlingkor bilang misioneros odino bilang boluntaryo ed saray sangan opisina tan saray pasilidad para’d pangimprinta na saray Kristianon publikasyon. Para’d arum met say ontan ya inkamabulos na Kristiano so mangipapaarap ed sikara ed kimey a panangipaalagey na saray relihyoson paalagey, anggad sigpot-panaon a panagpulong bilang payunir a ministro, odino ed part-time a panagpulong bilang manangipalapag na maong a balita ed lokal iran kongregasyon. Anggapoy anggan sakey ed sikatayo so makanepegan a mangipasirayew nipaakar ed panggagawa ed kimey tayo, ‘a gawaen so nepeg a gawaen.’​—Lucas 17:10; 1 Corinto 9:16.

4. Panon ya atalonaan so sankamundoan ya isusumpa ed Kristianon ministeryo?

⁴ Antokaman ya itatalona a walad sikatayo so nisesengeg ed espiritu, odino aktibon puersa nen Jehova. Makatunongan ya ibaga natan so singa imbaga ed saray agew nen propeta Zacarias: “Saya so salita nen Jehova ed Zorobabel, a kuan to, Ag nisengeg ed kabayanian, odino dia ed pakayari, no ag ingen dia ed Espirituk, kuan nen Jehova na saray ejercito.” Kanian, say sankamundoan ya isusumpa ed panagpulong a kimey na saray Tasi so natatalonaan, aliwan diad panamegley na sagpot na too, noagta diad panamegley na panangiwanwan tan proteksyon a manlalapud si Jehova.​—Zacarias 4:6.

5. Anto so betang a gagawaen nen Jehova ed panangilaknab na mensahe na Panarian?

⁵ Nipaakar ed saramay onkikiwas ed mensahe na Panarian, inkuan nen Jesus: “Nisulat ed saray profetas, Et nabangatan ira ya amin ed Dios. Balang sakey ya akadngel ed Ama, tan akaaral, ondago ed siak. . . . Ya angapo so too a makadago ed siak, likod no sikato so niiter ed sikato manlapu ed Ama.” (Juan 6:45, 65) Si Jehova so makakabasa ed kapusoan tan kanonotan, tan amta to no siopa iramay maseguron onkiwas ed panangaro to anggaman sikatoy agda ni kabat. Uusaren to met iray anghel to pian mangidirihe ed sayan nikadkaduman ministeryo. Satan so rason no akin a diad pasingawey et anengneng nen Juan so betang ya akibiangan na saray anghel tan insulat to: “Anengneng ko so sananey ya angel a mantektekiab dia ed pegley na tawen, ya wala ed sikato so andi anga a maabig a balita pian sikato so ipulong to ed saray manaayam dia ed dalin, tan diad balang nacion tan poli tan salita tan baley.”​—Apocalipsis 14:6.

Sinononot ed Espiritual a Pankaukolan

6. nton manunan awawey so nakakaukolan pian onkiwas so sakey a too ed maong a balita?

⁶ Sakey nin sengegan ed pangiyaabuloy nen Jehova ed sakey a too na pankanawnawan awaten so maong a balita et samay imbalikas nen Jesus: “Mapalar iray duruka [sinononot, NW] ed espiritu; ta sikaray makankien na panaria’y tawen.” (Mateo 5:3) Say toon apenek ed inkasikato odino agmanaanap na katuaan so agmagmaliw a sinononot ed espiritual a pankaukolan. Iisipen to lambengat so nipaakar ed saray bengatlan materyal, silalaman. Say agpangingalngalep so magmamaliw a sakey a babeng. Kanian, sano dakel so agmangawat ed mensahe diad pankabkaabungan tayo, kaukolan ya ikunsidera tayo so amin a nanduruman rason na ontan a reaksyon na totoo.

7. Akin a dakel so ag-onkikiwas ed katuaan?

⁷ Dakel so ompaliis ya ontalineng lapud sikaray inmawet ed relihyon ya abangonan da tan aglukas ed antokaman a tongtongan. Say arum et nasasagyat ed sakey a relihyon a matukoy ed personalidad da​—labay na arum so mistisismo, onkikiwas so arum ed emosyonalismo, tan say arum met so manaanap na sosyal iran aktibidad ed simbaan da. Dakel natan so mamipili ed sakey ya istiloy kabibilay a sumlang ed saray estandarte na Dios. Anganko ta sikaray mambibilay ed imoral a paraan, a sengegay pangibabaga ra na, “Aga’k interesado.” Ingen say arum, a mangibabagan edukado tan sientipiko, so mangipupulisay ed Biblia bilang masyadon simple.​—1 Corinto 6:9-11; 2 Corinto 4:3, 4.

8. Akin a say panangipulisay so agnepeg a mamakesay ed seseg tayo? (Juan 15:18-20)

⁸ Kasin say pangipulisay na karaklan so nepeg a mamaletey ed pananisia tan seseg tayo ed ministeryon manangisalbay bilay? Naligliwa tayo manlapud saray salita nen Pablo ed saray taga Roma: “Anto ta no saray arum ed sikara andian ira’y pananisia? say kakulangan da na pananisia pagmaliwen to kasi ya andi kakanaan so katooran na Dios? Andin balot: on, naromog a say Dios komon so matua, balet balang too [tila]; onong na nisulat, Pian napatunong ka ed saray salitam tan manaeg ka sano onla ka ed pangokom.”​—Roma 3:3, 4.

9, 10. Anto so ebidensya a say isusumpa so natatalonaan ed dakel a daldalin?

⁹ Napaseseg itayo na dakel ya alimbawa ed interon mundo nipaakar ed saray bansan singano agtanton onkikiwas a tuloy tan ingen, nasabi panaon et napaneknekan so kasuniyan na saya. Kabat nen Jehova tan saray anghel a walaray maong-impanpuso a naromog ni​—balet saray Tasi nen Jehova so kaukolan a magmaliw a maseseg tan mananos ed ministeryo ra. Alaen tayo pan alimbawa so pigaran bansa no iner a say Katolisismo so singano mangipaparungtal na agnatalonaan a babeng 50 a taon la so linmabas​—Argentina, Brazil, Colombia, Espanya, Irlandya, Italia, Mexico, tan Portugal. Dagdaiset iray Tasi nen 1943, wala lambengat so 126,000 ed sankamundoan, 72,000 ed saraya so walad Estados Unidos. Say anggapoy-pikakabat tan lingon panmoria a nipapaarap ed saray Tasi so singano sakey a langan pader ya agnabungaw. Ingen, natan et pigara ed sankamatalonaan iran resulta ed panagpulong so naromog ed sarayan bansa. Tua met itan ed dakel a dati iran Komunistan bansa. Say bautismo na 7,402 ed sakey a kumbension ed Kiev, Ukraine nen 1993 so amaneknek ed saya.

¹⁰ Antoran paraan so uusaren na saray Tasi pian nipasabi so maong a balita ed saray kaabay da? Kasin sikaray manguusar na materyal a panangingganyo pian makakumberte, a singa ibabaga na arum? Saray duruka tan ag-akapanaral ta lambengat so mankaukolan na dalaw, a singa ibabaga na arum?

Matalona Iran Paraan ed Panangipasabi na Maong a Balita

11. Anton maabig ya alimbawa so impanengneng nen Jesus ed ministeryo to? (Nengnengen so Juan 4:6-26.)

¹¹ Inletneg nen Jesus tan saray babangatan to so padron a tutumboken na saray Tasi anggad sayan agew ed panaggaway-babangatan a kimey da. Linma si Jesus ed inerman a wala so too, mayaman odino duka​—diad saray ayaman, publiko iran lugar, gilig na saray linok, saray gilig na palandey, anggan diad saray sinagoga.​—Mateo 5:1, 2; 8:14; Marcos 1:16; Lucas 4:15.

12, 13. (a) Panon ya intarok nen Pablo so sakey a padron para’d Kristianos? (b) Panon a tutumboken na saray Kristiano so alimbawa nen Pablo?

¹² Nipaakar ed dilin ministeryo to, susto so inkuan nen apostol Pablo: “Sikayo a dili amta yo, nanlapu ed inmuna’n agew ya inloob ko ed Asia, no panon so inpanayam ko ed sikayo ed amin ya agew, A nanlinkor ed Katawan, . . . Ya angapo so antokaman a pakapinabangan yo a pinaulian ko ya inpaliwawa ed sikayo tan inbangat ko ed sikayo a lapag, tan dia ed saray kaabungan.”​—Gawa 20:18-20.

¹³ Saray Tasi nen Jehova so kabkabat ed interon mundo lapud panutumbok da ed padron na saray apostol, say panagkabkaabungan a ministeryo. Imbes ya iyapasakey so imano ed sakey a magastos, ataptapew, tan agpersonal a ministeryo ed TV, oonla iray Tasi ed totoo, mayayaman tan duruka, tan arap-arapan a mitongtong ed sikara. Panggugunaetan dan itongtong so nipaakar ed Dios tan say Salita to.b Agda sasalien a manggawa na saray rice Christian, a mangukumberte diad panamegley na pangiiter na materyal iran bengatla. Diad saray akaparaan a mikatunongan, idadanet da a say mogmon solusyon ed saray problema na katooan et say pananguley na Panarian na Dios, a manguman ed saray kipapasen ed dalin tayo para’d magmaong.​—Isaias 65:17, 21-25; 2 Pedro 3:13; Apocalipsis 21:1-4.

14. (a) Panon ya angiletneg na mabiskeg a pundasyon so dakel a misionero tan payunir? (b) Anto so naaaralan tayo manlapud eksperiensia na Tastasi nen Jehova ed Hapon?

¹⁴ Pian nasumpal so kimey ed sankarakelan a daldalin no posibli, akapangiletneg iray misionero tan saray payunir na sakey a pinagka-taytay ed dakel a bansa. Sikaray angiletneg na sakey a pundasyon, tan kayari et saray lokal a Tasi so angidaulo la. Kanian, agla kaukolan so dakel a Tasin taga biek-taew pian nituloy so panagpulong tan pansiansiaen itan a mauksoy. Sakey a matalonggaring ya alimbawa et samay agawa ed Hapon. Nen 1949, manuna iray Australiano tan Britanon misionero a linmad man, nanaral na lenguahe, akibagay ed singano primitibo iran kipapasen ed saman a panaon na kayari bakal, tan linma pian mantasi ed kabkaabungan. Legan na Guerra Mundial II, saray Tasi so sinebelan tan pinasegsegang ed Hapon. Kanian sanen sinmabi iray misionero et aromog da so pigpigaran aktibon Tastasin Hapones. Balet natan, sikaray dinmakel ya anggad masulok lan 187,000 ed masulok a 3,000 a kongregasyon! Anto ta so sekreto na asakbay ya itatalona ra? Onia so imbaga na sakey a misionero a masulok lan 25 a taon a manlilingkor diman: “Sankaimportantian so pakaaral na pitongtong ed totoo. Diad pakaamta na lenguahe ra, naaralan mi mitoo ed sikara, talosan tan apresyaen so paraan na kabibilay da. Kaukolan ya ipanengneng min pinabli miray Hapones. Siempre, nanggunaetan min sipapaabeban magmaliw a kabiangan na lokal a komunidad da ya ag-ikokompromiso iray Kristianon estandarte mi.”

Say Kristianon Kondukta so Sakey Met a Pantasi

15. Panon ya ipapanengneng na Tastasi so Kristianon kondukta ra?

¹⁵ Anggaman ontan, agkinmiwas lambengat iray totoo ed sakey a mensahe ed Biblia. Naimano ra met so Inkakristiano ed kakikiwas. Naimatonan da met so panaaroan, pantutunosan, tan pankakasakey na saray Tasi anggano diad silong na sankairapan iran situasyon, a singa bilang saray sibil a bakal, gulaan na saray tribo, tan panbubusolan lapud rasa. Pansiasiansiaen na saray Tasi so malinew a talindeg na Kristianon neutralidad ed amin a gutgutan tan anumpal ed saray salita nen Jesus: “Sakey a balo’n gangan so iter ko ed sikayo, a manaaroan so sakey tan sakey ed sikayo: salanti unong na inpangarok ed sikayo, pian manaaroan met so sakey tan sakey ed sikayo. Lapu ed saya amin a too nabirbiran da’ya sikayo ray babangatan ko, no wala so aro yo ed sakey tan sakey.”​—Juan 13:34, 35.

16. Anton eksperiensia so mangiyilustra a praktikal so Kristianon aro?

¹⁶ Say aro ed kaabay so inyilustra ed kaso na sakey a masiken a nansulat ed sakey a lokal a palapagan nipaakar ed si “Mr. and Mrs. Nice Guy.” Insalaysay to a saray kaabay to so nagmaliw a maong ed sikato sanen manpapanabos so akulaw to. “Nanlapud impatey to . . . agaylay abig da,” so insulat to. “Nanlapulad saman et ‘inampon’ daak . . . , gagawaen so amin a nengneng na kimey tan ontutulong pian naresolbi iray problema na sakey a 74-años a retirado. Say lalon makapakelkelaw ed sayan bengatla et sikaray andeket, siak so amputi. Sikaray Tasi nen Jehova, siak so tinmunda lan magmaliw a sakey a Katoliko.”

17. Anton kurang so nepeg tayon paliisan?

¹⁷ Iyiilustra na sayan eksperiensia a makapantasi tayo ed dakel a paraan, pati say inagew-agew a kondukta. No aliwan singa-Kristo so kondukta tayo, say ministeryo tayo so magmamaliw a singa saray Pariseo, anggapoy epekto. Agtayo labay a magmaliw a singa saramay deniskribe nen Jesus: “Amin a bengabengatla sirin ya antokaman ya ibaga ra naani ed sikayo, gawaen yo tan imanoen yo: ingen ag kayo mangawa na onong ed saray gawa ra; ta ibaga ra, et ag da gawaen.”​—Mateo 22:37-39; 23:3.

Say Aripen a Klase so Mangitatarya na Susto Iran Instrumento

18. Panon a mangikinlong so saray literatura ed Biblia ed sikatayo pian natulongan iray matua-impanpuso a totoo?

¹⁸ Sakey nin makanan sengegan ed pangipulong na maong a balita ed amin a nasyon et say pakaala na literatura ed Biblia a pinawala na Watch Tower Bible and Tract Society. Sikatayoy walaan na saray libro, brosyur, tract, tan saray magasin a makapenek ed ngalngali kada masimoon a mantetepet. No makaabet tayo na sakey a Muslim, Hindu, Buddhista, Taoista, odino sakey a Judio, nausar tayo so libron Mankind’s Search for God odino say nanduruman tract tan saray pulyeto pian makapangigapo na tongtongan tan posiblin magmaliw a sakey a panangiyaral ed Biblia. No mantepet so sakey ya ebolusyonista nipaakar ed inkapalsa, nausar tayo so libron Life​—How Did It Get Here? By Evolution or by Creation? No mantepet so sakey a kalangweran, ‘Anto ta so gagala na bilay?’ nayarin ipaarap tayo so libron Questions Young People Ask​—Answers That Work. No say sakey et apektadon tuloy lapud personal iran problema​—gonigon, kesaw, panagpasoot, diborsyo—​walaray magasin tayo a manisingbat ed satan a tema ed sakey a praktikal a paraan. On, say matoor ya aripen a klase ya impasakbay nen Jesus so mangitatarya na “tagano ed panaon a kinepegto” so manusumpal ed inka-betang to.​—Mateo 24:45-47.

19, 20. Panon a napapapeles so kimey ed Panarian diad Albania?

¹⁹ Balet ta pian nasabi iray nasyon, kaukolan a napawala iyan literatura ed dakel a pansasalita. Panon ya agawan nipatalos so Biblia tan Makasulatan a literatura ed masulok a 200 a lenguahe? Say antikey a pangunsidera ed sakey ya alimbawa, say Albania, so mangiyilustra no panon a say matoor tan makabat ya aripen a klase so makayarin mangiyalibansa ed maong a balita anggaman ed ankakabaleg a problema tan anggapoy agawan modernon-panaon a Pentecostes pian biglaan a makaaral na saray lenguahe.​—Gawa 2:1-11.

²⁰ Pigaran taon lambengat so apalabas, say Albania so impasen bilang mogmon bansan ateistan Komunista. Onia so sasaglawien na magasin a National Geographic nen 1980: “Isesebel na Albania [so relihyon], ya inyabawag to so inkasikato nen 1967 bilang ‘say manunan ateistan estado ed mundo.’ . . . Ateismo lambengat so kabkabat na balon kailalakan na Albania.” Natan ta kinmesay so Komunismo, saray taga Albania a mamibidbir ed espiritual iran pankaukolan da so onkikiwas ed panagpulong a gagawaen na saray Tasi nen Jehova. Sakey a melag a grupo na panangipatalos so titibukelen na kalangweran a Tastasi a walaay pikakabat ed Italiano tan Ingles so aporma ed Tiranë nen 1992. Sikaray imbangat na kualipikadon agagi a nanlapud arum a daldalin pian mangusar na laptop iran computer pian mangipatalos ed lenguahen Albaniano. Ginapoan dan ipatalos iray tract tan say magasin a Panag-Bantayan. Legan a nagagamoran da so eksperiensia, sikaray mangipapatalos na arum niran importantin publikasyon na Biblia. Diad kaplesan et wala so 200 ya aktibon Tasi na saman a melag a bansa (a walaay populasyon a 3,262,000), tan 1,984 so inmatendi ed Memoryal nen 1994.

Amin Tayo so Walaan na Responsabilidad

21. Anton nengneng na panaon so panbibilayan tayo?

²¹ Akasabi lad kapantokan iray nagagawa ed mundo. Diad idaraak na krimen tan karawalan, say panagpatey tan panagpasoot diad lokal iran bakal, a kasmak so inkalukak ed moralidad tan say palelesaen toran makaalis a sakit lapud sekso, say agpanrerespeto ed legal ya autoridad, say mundo so ompatnag a magmamaliw ya anarkiya, agla nauleyan. Sikatayo so walad panat na panaon a mipadpara ed saray panaon sakbay na Delap a dedeskribien na Genesis: “Si Jehova anengneng to a say kabaglan na too ed dalin abalbaleg, tan mauges labat a lanang so amin a pimorekdek na nonot na puso to. Et impangoli-oli to so linawa nen Jehova a nangawa na too ed dalin, tan sikato so amasinagel ed puso to.”​—Genesis 6:5, 6; Mateo 24:37-39.

22. Anto so Kristianon responsabilidad na amin a Tastasi nen Jehova?

²² Singa met ed agew nen Noe, onkiwas si Jehova. Balet diad inkahustisya tan aro, labay ton nipulong nin unona ed amin a nasyon so maong a balita tan say pasakbay a mensahe. (Marcos 13:10) Diad onian paraan saray Tasi nen Jehova so walaay responsabilidad​—anapen iramay makana ed kareenan na Dios tan bangatan ira na saray dalan na kareenan to. Agla mabayag, diad aturon panaon na Dios, say kimey na panagpulong so matalonan nakumpleto. “Saman la onsabi anggaan.”​—Mateo 10:12, 13; 24:14; 28:19, 20.

[Saray paimano ed leksab]

Kasin Natandaan Yo?

◻ Anton itatalona so niwala ed modernon-panaon iran Tasi ed ministeryo ra?

◻ Akin a dakel so mangipupulisay ed Kristianon mensahe?

◻ Anton apostolikon paraan na panagpulong so uusaren na Tastasi?

◻ Walaan tayo na antoran instrumento para’d sakey ya epektibon ministeryo?

◻ Anto so nepeg a gawaen tayon amin unong ed Marcos 13:10?

[Kahon ed pahina 19]

BANSA TASTASIN AKTIBO NEN 1943 NEN 1993

Argentina 374 102,043

Brazil 430 366,297

Chile 72 44,668

Colombia ?? 60,854

Pransya Guerra Mundial II​—anggapoy rekord 122,254

Irlandya 150? 4,224

Italia Guerra Mundial II​—anggapoy rekord 201,440

Mexico 1,565 380,201

Peru Anggapoy rekord na aktibidad 45,363

Pilipinas Guerra Mundial II​—anggapoy rekord 116,576

Polandya Guerra Mundial II​—anggapoy rekord 113,551

Portugal Anggapoy rekord na aktibidad 41,842

Espanya Anggapoy rekord na aktibidad 97,595

Uruguay 22 9,144

Venezuela Anggapoy rekord na aktibidad 64,081

[Litrato ed pahina 17]

Ondarakel iray Tasi ed dakel a Katolikon bansa, a singa say Espanya

[Saray litrato ed pahina 18]

Saray Tasi nen Jehova so aktibo ed saray bansa ed sankagloboan