Susuportaan na Organisasyon nen Jehova so Ministeryom
“Anengneng ko so sananey ya anghel a mantektekkiab dia ed pegley na tawen, a wala ed sikato so andi-angga a maabig a balita pian sikato so ipulong to.”—APOCALIPSIS 14:6.
1. Panon a nasusubok so Tastasi nen Jehova, tan akin a makakaliktar ira?
AKIN ya ontanlan importantin bidbiren so betang na mangatatawen ya organisasyon nen Jehova ed pananuportay Kristianon ministeryo? Bueno, nipulong kasi na Tastasi nen Jehova so maong a balita na Panariay Dios ed intiron maruksan mundo no anggapoy suporta na mangatatawen ya ehersitos nen Jehova? Agawaan la na Tastasi so ontan a panagpulong kaleganay siglo a napnoy alabas a nasyonalismo, dinidiktador iran mapolitikan sistema, sankamundoan a bakabakal, tan nambabangil ya ir-irap. No anggapoy tulong nen Jehova kasin aliktaran na Tastasi so internasyonal a kaaataki lapud panangidumaduma, panaglabi, tan mabetbet a maruksan panamasegsegang a nipapaarap ed sikara?—Salmo 34:7.
Nililiktar Anggaman ed Sankamundoan ya Isusumpa
2. Anton panpara ed baetan na tuan Kristianos ed inmunan siglo tan ed saramay wala natan?
2 Diad sayan koma-20 siglo, saray kabusol, namparan saray walad relihyon tan politika, so angisekar na amin a nengneng lawarin babeng, diad legal tan arum niran paraan, diad gunaet ya amperen odino patundaey kimey nen Jehova. Saray Kristianon agagin lalaki tan bibii so napapasegsegang, lingon nirerepresenta, pinabpabanday, tan pinabpauges—dakel so pinatey ni ingen—mabetbet diad sugsog na saray klero na Babilonia a Baleg. Nibaga, a singa ed saramay asakbay a Kristiano, a “no nipaakar ed sayan sekta, akabatan mi a nasasalita sumpa ed ganaganay pasen.” No panon a saray Judion klero ed panaon nen Kristo so pirmin akibakal pian patundaey ministeryo to, ontan met a say klero tan saray apostata, a kaibay mapolitikan kabikabit da et sinali ra lan amperey abalbaleg ya edukasyonal a panagtasi na totoo nen Jehova.—Gawa 28:22; Mateo 26:59, 65-67.
3. Antoy naaralan tayo manlapud integridad nen Henryka Żur?
3 Konsideraen pay alimbawa ya agawa ed Polandya nen Marso 1, 1946. Si Henryka Żur, marikit a Tasin mantaon na 15 a manlalapud asingger na Chelm, so akiulop ed sakey a Tasi, agin laki, pian bisitaen iray interesadon totoo ed kabangibang a purok. Inerel ira na saray membroy iskuwad a militar na Katoliko a tatawagen a Narodowe Siły Zbrojne (National Armed Forces). Pinepekpek a maong so agin laki balet ta aliktaran to. Aliwan ontan so kipapasen nen Henryka. Sikatoy pinairap a maong ed loob na dakel ya oras legan dan pipiliten a manguros a singa ed Katoliko. Inkuan na sakey ed saray mamapairap ed sikato: “Nonot mo no antoy labay mon nonoten, basta manguros ka labat a singa Katoliko. Tano andi manatalaran lay bala ed say sika!” Kinmapuy tay integridad to? Andi. Saray relihyoson payakot so angigayugoy ed sikato ed asingger a katakelan insan da pinaltog. Siansia, sikatoy nambiktorya! Agda abuyak so integridad to.a—Roma 8:35-39.
4. Panon a sinali na saray mapolitika tan relihyoson elemento a patundaey panangipulong na Panarian?
4 Diad masulok a sanlasus a taon, natratrato iray modernon-agew ya ariripen na Dios diad maruksa tan andiay respeton paraan. Lapud agkabiangan iray Tastasi nen Jehova, tan agda labay so magmaliw ya ontan, a kabiangan na manuna iran relihyon nen Satanas, sikaray momoriaen bilang matukoy a tapang parad antokaman a nilabin panangukom odino panatikon kabusol. Sikaray pirmin inaataki na saray mapolitikan elemento. Dakel a Tastasi so pinairap lapud pananisia ra. Anggan saray tatawagen a demokratikon gobierno so analin mangamper ed kipulong na maong a balita. Angga ni nen 1917 diad Canada tan Estados Unidos, pinawala na saray klero iray akusasyon a sumpa kuno ed gobierno iray Estudyante na Biblia, a singa tawag ed Tastasi ed saman. Saray opisyales na Watch Tower Society so lingon impapisok, diad saginonor labat nibulos.—Apocalipsis 11:7-9; 12:17.
5. Antoran salita so kinmanan panamaseseg ed ariripen nen Jehova?
5 Sinali la nen Satanas so amin a paraan a sarag to pian patundaey panagtasi na agagi nen Kristo tan ed matoor a kakaiba ra. Ingen, singa ipapanengneng na dakel ya eksperiensia, anggan say panamagyaw, panamatalaw, pisikal a karawalan, kipangaw, tan saray panangipangawan a kampo, nisay patey so ag-amatunda ed Tastasi nen Jehova. Tan onia so katuaan ed loob na awaran. Naulit-ulit, kinmana a pakapasesegan iray salita nen Eliseo: “Agka antakot; ta saray wala ed sikatayo sikara so dakdakel nen saray wala ed sikara.” Say sakey a rason et saray matoor ya anghel so dakdakel nen saray ulop na Diablo!—2 Arari 6:16; Gawa 5:27-32, 41, 42.
Bebendisionan nen Jehova so Maseseg a Panagpulong
6, 7. (a) Antoran akaunan impansagpot so agawa pian nipulong so maong a balita? (b) Anton makagunggunan pananguman so agawa nanlapulad 1943?
6 Kaleganay koma-20 siglo, inusar la na Tastasi nen Jehova so dakel ya aligwas diad teknolohiya ta pian napadaak tan napapeles so baleg a panagtasin kimey sakbay na isabi angaan. Nen 1914 ni, si Pastor Russell, say inmunan presidenti na Watch Tower Bible and Tract Society, so angigapo’d inmunan panangusar na slide tan pelikula, a babansagay nibase’d-Biblian komentaryo a nirekord ed saray plaka, diad waloy-oras a presentasyon nipaakar ed Biblia a tinawag a “The Photo-Drama of Creation.” Pandinayewen toray nambabantay ed dakel a bansa ed saman a panaon. Saginonor, diad saray taon 1930 tan 1940, akabatan so Tastasi lapud panagkabkaabungan da tekep na niyalis-alis a ponograpo, a papaknolen iray nirekord a paliwawa’d Biblia nen J. F. Rutherford, say komaduan presidenti na Sosyedad.
7 Nen 1943 nigapo so makpel a kundang diad direksion nen Nathan H. Knorr, say komatlon presidenti na Sosyedad, sanen adeside so kiletneg na eskuelaan parad saray ministro diad kada kongregasyon. Nepeg a nipasal iray Tastasi a manpulong tan manbangat ed kabkaabungan ya agmanguusar na saray niplakan ponograpo. Nanlapulad saman, arum niran eskuelaan so naorganisa pian mangipasal ed saray misionaryo, sigpot-panaon iran payunir a ministro, mamatatken ed kongregasyon, tan responsabli iran manangasikaso ed saray sanga na Watch Tower Society. Antoy resulta?
8. Panon ya impanengneng na Tastasi so baleg a pananisia nen 1943?
8 Nen 1943, diad kaptangan na Guerra Mundial II, wala lambengat so 129,000 a Tastasin aktibo diad 54 a daldalin. Ingen, walaan iray pananisia tan determinasyon a nasumpal so Mateo 24:14 sakbay na isabi anggaan. Kombinsido ra a paiproklaman unona nen Jehova so importantin manamasakbay a mensahe sakbay na kagaway mantutumbokan iran ebenton mangitarok na anggaan ed sayan abulok a sistema na bengabengatla. (Mateo 24:21; Apocalipsis 16:16; 19:11-16, 19-21; 20:1-3) Kasin atumangan iray sagpot da?
9. Antoran katuaan so pakapatnagan a say panagtasi et inmaligwas la?
9 Wala la natan so ag-onkulang a 13 bansa a kada sakey et walaay masulok a 100,000 aktibon Tastasi. Pigara ed saraya so daldalin a dominadoy Iglesia Katolika. Ingen, nengnengen pay situasyon. Say Brazil so walaan na 450,000 a manangipalapag na maong a balita, tan masulok a 1,200,000 so inmatendi ed Memoryal na impatey nen Kristo nen 1997. Say Mexico so sakey nin alimbawa, a walaay ngalngali 500,000 a Tastasi tan masulok a 1,600,000 ed selebrasyon na Memoryal. Arum niran Katolikon bansa a singa say Italya (manga 225,000 a Tastasi), Pransya (ngalngali 125,000), España (masulok a 105,000), tan Argentina (masulok a 115,000). Diad Estados Unidos, a manunaan iray Protestanti, Katoliko, tan Judion relihyon, walay manga 975,000 a Tastasi tan masulok a 2,000,000 so inmatendi ed Memoryal. Maseguro, say baleg ya ulop so ompapaway la’d Babilonia a Baleg, say sankamundoan ya imperyo na palson relihyon, pati saray makawetwet a bangat to tan ombaling ira ed simpli tan seguradon sipasipan na Dios a “saray balo a tawen tan sakey a balon dalin.”—2 Pedro 3:13; Isaias 2:3, 4; 65:17; Apocalipsis 18:4, 5; 21:1-4.
Panangitukoy ed Saray Pankaukolan na Totoo
10. Panoy impanguman na saray sirkumstansia ed pigaran lugar?
10 Dakel ed saramay binmaling ed si Jehova diad panamegley nen Kristo Jesus so aromog diad panagkabkaabungan. (Juan 3:16; Gawa 20:20) Balet arum niran metodo so nauusar. Anguman laray sirkumstansia, tan say kipapasey ekonomya so inmirap a dakel a bibii so mantratrabaho la natan ed paway na kaabungan da. Mabetbet, legan na sakey simba, daiset a totoo so naromog ed kaabungan. Kanian saray Tastasi nen Jehova so onaadapta’d saray situasyon. Singa si Jesus tan saray akaunan babangatan to, oonla ra ed lugar tan ed panaon a naromog so totoo.—Mateo 5:1, 2; 9:35; Marcos 6:34; 10:1; Gawa 2:14; 17:16, 17.
11. Iner so panpupulongan natan na Tastasi nen Jehova, tan tekep na anton resulta?
11 Unoona la ray Tastasi tan sikakabat a manpupulong ed totoo diad saray maawang a panpaparadaan, shopping malls, pabrika, saray opisina tan panagnegosyoan, eskuelaan, istasyon na polisya, gasolinaan, saray hotel tan restawran, tan diad saray lansangan. Diad tua, manpupulong ira inerman a pakaromogay totoo. Tan sano walad abung iray totoo, sirin itutuloy na Tastasi a dalawen ira ditan. Sayan maadapta tan mataktikan iyaasingger so mamapadaak ed kibubunog na literaturay Biblia. Naroromog iray kinmarneron totoo. Nigagapo iray balon panangiyaral na Biblia. Say sankabalgan a pan-edukasyonal a kimey so gagawaen na masulok a limara tan kapalduan milyon a maseseg a boluntaryon ministros! Pribilihyom ta so pakapibilang ed sikara?—2 Corinto 2:14-17; 3:5, 6.
Anto so Mamapakiwas ed Tastasi nen Jehova?
12. (a) Panon a babangatan nen Jehova so totoo to? (b) Antoy epekto na sayan panagbangat?
12 Antoy betang na mangatatawen ya organisasyon ed amin na saya? Impropesiya na Isaias: “Amin iray anak mo nibangat ira ed Jehova; et baleg naani deen na saray anak mo.” (Isaias 54:13) Si Jehova so mangibabangat ed sayan sankamundoan a nankakasakey ya impanaagi diad panamegley na nanengneng ya organisasyon to ed dalin—diad saray Kingdom Hall, diad saray kombension, tan diad saray asamblea. Mansusumpal ed pankakasakey tan kareenan. Napapawalay panangibangat nen Jehova iray nikaduman totoo, abangatan a mangaro ed balang sakey tan ed kapara ran too a singa ed sikaran dili, ya agbubusoley kapara ran totoo, inerman so kawalaan da ed sayan agnankakasakey tan naapag a mundo.—Mateo 22:36-40.
13. Panon tayon makaseguro a say panangiwanwan na angheles et nalalanor ed sayan panagpulong a kimey?
13 Say aro so mamapakiwas ed Tastasi nen Jehova a mantultuloy ed panagpulong anggaman ed agpananginenen odino panamasegsegang. (1 Corinto 13:1-8) Amta ra a manlalapud tawen so kiwawanwan na manangisalbay bilay a kimey da, a singa ibabaga na Apocalipsis 14:6. Antoy mensahen niproproklama ed silong na panangiwanwan na anghel? “Takotan yo so Dios, tan iter yo ed sikato so gloria; ta say oras na panangukom to sinmabi la; tan igalang yo so nanggawa ed tawen tan dalin tan say dayat tan saray subol na saray danum.” Nitatandoro na kipupulong na maong a balitay Panarian so ngaran nen Jehova. Naiimbitaay totoo a mangigloria ed say Manamalsa, say Dios, aliwan ed saray palsa tan makawetwet ya ebolusyon. Tan akin ya ontanlan maganat so panagpulong a kimey? Lapud say oras na panangukom so sinmabi la—panangukom sumpad Babilonia a Baleg tan ed amin niran aspekto na nanengneng a sistema na bengabengatla nen Satanas.—Apocalipsis 14:7; 18:8-10.
14. Sioparay nalalanor ed sayan baleg a panagbangat a kampanya?
14 Anggapoy dedikadon Kristiano a nipuera’d sayan panagpulong a kimey. Saray mamatatken ed espiritual so mangidadaulo ed panagpulong a kaibay kongregasyon. Saray nipasal a payunir so okupadon tuloy ed sayan kimey. Saray maseseg a manangipalapag na mensahe na Panarian, balanglan sarag day manpulong ed loob na pigaran oras odino dakel ni ed loob na sakey bulan, so mangikakayat ed mensahe ed amin a suyok na dalin.—Mateo 28:19, 20; Hebreos 13:7, 17.
15. Anto so pakapatnagan na epekto na sayan panagpulong na Tastasi nen Jehova?
15 Kasin amin iyan sagpot et walaan na epekto’d mundo? Sakey a simplin prueba et say aminpigan kipaparungtal na Tastasi nen Jehova ed saray programa ed TV tan ed saray dyaryo. Mabebet irayan mangipapabitar ed inkagunaet tan determinasyon tayon nasabi so amin. On, say seseg tan naynay a presensia tayo so pandidinayewan a tuloy, anggano karaklan na totoo so agmalabay ed mensahe tan ed saray mensahero!
Say Seseg Tayon Sumpalen so Pantasi
16. Anton awawey natan so kaukolan a nipatnag diad natitilak a limitadon panaon?
16 Agtayo amta no kaunongan ni panaon a natitilak parad sayan sistema na bengabengatla nisay kaukolan tayon amtaen itan, basta say motibo tayo ed panlingkor ed si Jehova et malinis. (Mateo 24:36; 1 Corinto 13:1-3) Balet amta tayo a pian say aro, pakayari, tan inkahustisya nen Jehova et nipatnag, nepeg a nipulong ya “unona” so maong a balita. (Marcos 13:10) Kanian, anggano pigay taon tayo lan magunaet a tatalaranay anggaan na sayan marelmeng, agmaptek, tan marawal a mundo, nepeg tayon siseseseg a sumpaley dedikasyon tayo unong ed saray sirkumstansia tayo. Anganko ta maedad tayo la odino walaay sakit, balet sarag tayo nin lingkoran si Jehova tekep na seseg a singa nen kaugawan odino kabisbiskegan tayo ni. Anganko ta agtayo la nayarian so pakapangusar na babaleg a panaon ed ministeryo a singa nensaman, balet ta maseguron napansiansia tayo so kualidad na sakripisyo tayo ed panagdayew ed si Jehova.—Hebreos 13:15.
17. Mangisalaysay na makapaseseg ya eksperiensian makatulong ed sikatayon amin.
17 Kanian, ugaw man odino matatken, ipanengneng tayo so seseg tan ipanabang tayoy positibon balon mundon mensahe ed amin a naabet tayo. Magmaliw itayo komon a singa say mabaing ya ugaw a bii diad Australia ya akila’d nanay ton linma ed sakey a puesto. Nadngel to ed Kingdom Hall so kaimportantian a pulongay amin, kanian angiyan na duaran brosyur a nipaakar ed Biblia diad bag to. Kaleganan ya okupadoy nanay ton manbabayar ed kahera, say ugaw so naandi. Sanen anapen lay nanay to, niman a mangiyoopresi na brosyur ed sakey a bii! Say ina so inmasingger tan akidespensa lapud impanisturbo na anak to’d sikato. Balet ta malugor so biin angawat ed brosyur. Sanen bukor da lan san-ina, tinepetan to no panon a sikatoy akapanpakpel ed inyasingger to’d istranghero. Inyebat to: “Basta imbagak ed sarilik, Ready, Set, Go! Et nilak!”
18. Panon tayon nipanengneng so napandinayewan ya awawey?
18 Kaukolan tayon amin so singa ontan ya espiritu na taga-Australia ya ugaw, nagkalalo la pian naasingeran iray istranghero odino opisyales ni ingen tekep na maong a balita. Natatakot tayo ompan agda labay. Agtayon balot lilingwanan so inkuan nen Jesus: “Agyo kapagaan no panon ono anto so yebat yo, ono anto so kuanen yo; ta say espiritu santo ibangat to kayo naani ed satan met lanlamang ya oras no anto so nepeg yon salitaen.”—Lucas 12:11, 12.
19. Panoy panmoriam ed ministeryom?
19 Kanian manmatalek ed tulong na espirituy Dios legan ya asinggeran moray totoo diad mapangasin paraan tekep na maong a balita. Mabetbet a say panmamatalekan na minilyon et diad agmakanepegan a totoon say kiwawala ra et agmanbayag. Manmamatalek itayo ed si Jehova tan ed mangatatawen ya organisasyon to—Kristo Jesus, masanton angheles, tan apaolin alanaan a Kristianos—a mabilay a maando! Kanian, tandaan: “Saray wala ed sikatayo sikara so dakdakel nen saray wala ed sikara”!—2 Arari 6:16.
[Paimano ed leksab]
a Parad kaaruman ya alimbawa, nengnengen so 1994 Yearbook of Jehovah’s Witnesses, pahina 217-20.
Panon Yon Ebatan?
◻ Antoy betang na mangatatawen ya organisasyon na Dios ed kiliktar na totoo nen Jehova?
◻ Antoran mapolitika tan relihyoson elemento so nanataki la ed Tastasi nen Jehova diad koma-20 siglo?
◻ Panon ya intukoy na Tastasi nen Jehova so ministeryo ra ed saray pankaukolan na panaon?
◻ Antoy mamapakiwas ed sikan manpulong?
[Litrato ed pahina 17]
Henryka Żur
[Saray litrato ed pahina 18]
Hapon
Martinique
Estados Unidos
Kenya
Estados Unidos
Manpupulong so Tastasi nen Jehova inerman tan kapiganman a naromogan iray totoo
[Litrato ed pahina 20]
Asasakbay diad sayan siglo, saray ponograpo so inusar ta pian nikayat so mensahey Panarian