“Say Maong a Balita So Nakaukolan a Nipulong ya Ununa”
“Ontan met, diad amin a nasyones et say maong a balita so nipulong ya ununa.”—MARCOS 13:10.
1. Anto so sakey a bengatlan manggawa ed saray Tasi nen Jehova a miduma ed amin na saray relihyon na Kakristianoan, tan akin?
ED AMIN na saramay mangibabagan Kristiano, saray Tasi nen Jehova lambengat so seryoson manggagawa na panangipulong ed maong a balita. Sikara so manibukel na alenleneg a grupo a kada membro et liknaen to so personal ya obligasyon na iyasingger ed kaabay to a maparanay ta pian mitongtong ed sikato nipaakar ed saray gagala na Dios. Akin ya onia? Lapud liknaen na kada Tasi a, bilang sakey a Kristiano, et nepeg a sikato so mananumbok ed bakat nen Kristo. (1 Pedro 2:21) Anto so tutukoyen na saya?
2. Panon so panmoria na dakel a totoo ed si Jesu-Kristo, balet anto so manunan kimey to ed dalin?
2 Diad kanonotan na dakel, si Jesu-Kristo so sakey lambengat a toon nanggawa na saray maabig a gawa. Tinambal toray mansasakit, pinakan toray narasan, tan imbeneg to so aro tan panangasi ed saraman so mankaukolan. Balet nagkalalo so ginawa nen Jesus. Manuna ed amin et sikato so magunaet a manangipulong ed maong a balita na Panarian na Dios. Pigaran bulan kayari na inkabautismoan to ed ilog na Jordan, inggapo nen Jesus a mapublikon impulong: “Magbabawi kayo, sikayon totoo, lapud say panarian na katawenan so inmasingger la.” (Mateo 4:17) Ibabaga na awaran nen Marcos: “Si Jesus so linma ed Galilea, ya impulong to so maong a balita na Dios tan kuanto: ‘Say aturon panaon so asumpal, tan say panarian na Dios so inmasingger la. Magbabawi kayo, sikayon totoo, tan nawalaan na pananisia ed maong a balita.’”—Marcos 1:14, 15.
3, 4. (a) Anggaman tinambal nen Jesus so amin a nengneng na sakit, anto so indanet to ed ministeryo to? (b) Akin a si Jesus so nibaki? (c) Diad anto so angiparengan nen Jesus ed kimey na panagpulong, tan anto so imbaga to ed saray babangatan to a gawaen?
3 Tinawag nen Jesus si Pedro, Andres, Santiago, tan si Juan ya ontumbok ed sikato, tan nabasa tayo: “Insan sikato so linma ed liber na interon Galilea, a nambabangat ed saray sinagoga ra tan impulong to so maong a balita na panarian tan pinaabig to so amin a nengneng na sakit tan amin a nengneng na agpakayari ed limog na totoo.” Sanen saray ulop ed Galilea so analin mamuger ed sikato, inkuanto: “Ontan met ed arum a syudades et nepeg kon iyabawag so maong a balita na panarian na Dios, lapud saya so nibakian ko.” Sirin sikato so linman nampulong ed saray sinagoga ed Judea.—Mateo 4:18-23; Lucas 4:43, 44.
4 Pinmawil lamet ed Galilea, si Jesus so “linman nambiahe ed saray syudades tan diad saray baryo, a nampupulong tan angiyaabawag na maong a balita na panarian na Dios.” (Lucas 8:1) Impareng to so kimey na panagpulong to ed panagani tan inkuanto: “Say panagani so baleg, balet saray komikimey so daiset. Sirin, kerewen ed Katawan na panagani a mangibaki na managkimey ed panagani to.” (Mateo 9:35-38) Anggan sanen saray ulop so ag-angiter ed sikato na pampainawa, “sikara so inawat ton siuuyamo tan inggapo to so mitongtong ed sikara nipaakar ed panarian na Dios, tan tinambal to raman so mankaukolan na katambal.”—Lucas 9:11.
5. Sanen imbaki nen Jesus iray apostoles to tan arum a babangatan ed ministeryo, antoran bilin so inter to ed sikara?
5 Tua, tinambal nen Jesus so mansasakit tan pinakan to so narasan. Balet nagkalalo ni, sikato so okupado diad pangibabaga to ed totoo nipaakar ed Panarian na Dios. Tan nilabay toray patumbok ton manggawa met na ontan. Diad impangipasal to ed saray apostoles, imbaki toran sanderwa a manpulong, a kuanto: “No sikayo so onla, manpulong, a kuan yo, ‘Say panarian na katawenan so inmasingger la.’” (Mateo 10:7) Ibabaga nen Lucas: “Sikara so imbaki ton mangipulong ed panarian na Dios tan manambal.” (Lucas 9:2) Diad saray 70 babangatan, inter nen Jesus so ganggan a ‘mamaabig ed saray mansasakit tan onlan mangibaga ed sikara a say panarian na Dios so inmasingger la.’—Lucas 10:9.
6. Sakbay na insegep to ed tawen, antoran bilin nipaakar ed ministeryo ra so inter nen Jesus ed saray patumbok to?
6 Sakbay na insegep to ed tawen, ginanggan nen Jesus iray patumbok ton mantultuloy ed kimey na panagpulong tan palaknaben ni ingen. Sikara so binilin to: “Onla kayo sirin tan manggawa na babangatan a totoo ed amin a nasyones . . . a bangatan yoran manumpal ed amin a bengatlan ingganggan ko ed sikayo.” (Mateo 28:19, 20) Nagkalalo ni, inkuanto: “Mangawat kayo na pakayari sano say masanton espiritu so onsabi ed sikayo, tan sikayo so tastasik ed Jerusalem tan ed amin a Judea tan Samaria tan angga ed sankaarawian a pasen na dalin.” (Gawa 1:8) Sirin, namparan si Jesus tan saray apostoles so angiter na manunan imano diad panangipulong ed maong a balita na Panarian na Dios.
Say Panarian so Nipulong ed Panaon Tayo
7. Anto so imbaga nen Jesus nipaakar ed kagawa na kimey na panagpulong “diad kasampotan na sistema na bengabengatla”?
7 Diad propesiya to nipaakar ed saray nagawgawa ed “kasampotan na sistema na bengabengatla,” inkuan nen Jesus: “Tan sayan maong a balita na panarian so nipulong ed amin a panaayaman a dalin ya onkanan pantasi ed amin a nasyones; tan insan onsabi so anggaan.” (Mateo 24:3, 14) Odino, a singa nibaga ed Marcos 13:10: “Ontan met, diad amin a nasyones et say maong a balita so nipulong ya ununa.”—Nengnengen met so Apocalipsis 14:6, 7.
8. (a) Anto so isakup na maong a balita diad panaon na saray apostoles? (b) Anto so isakup na mensahe na maong a balita natan?
8 Diad “saray kaunoran ya agew,” say maong a balita na Panarian so manasaglawi na nagkalalo nen say sanen wadiad dalin si Jesus. Impulong nen Jesus a say Panarian so inmasingger la, ya intawag to so imano ed katuaan a sikato so wala ed limog na totoo a bilang say Mesias tan Ari. (2 Timoteo 3:1; Mateo 4:17; Lucas 17:21) Say maong a balita ya impulong na saray inmunan Kristianos so angisakup ed pamaakaran ya inkioli nen Jesus tan say insegep to ed tawen, tan pinaseseg toray mauyamon mangiteen na pananisia ed onsasabin Panarian. (Gawa 2:22-24, 32; 3:19-21; 17:2, 3; 26:23; 28:23, 31) Natan ta asabi tayo la “so kasampotan na sistema na bengabengatla,” say panangipulong ed maong a balita na Panarian so mangisasakup ed mabiskeg a mensahe a say Panarian so niletneg la ed katawenan.—Apocalipsis 11:15-18; 12:10.
Siopa So Mangipulong ed Maong a Balita?
9. (a) Panon so nayarin pangisangsang na arum a saray panangipulong ed maong a balita so aliwan obligado ed amin a Kristianos natan? (b) Siopa so inusar nen Jehova nensaman ed kipulong na salita to, tan anto so kabaliksan na saya ed sikatayo natan?
9 Siopa, natan, so nepeg a mibiang ed kimey na panagpulong? Mapatnag, liknaen na Kakristianoan ya aliwan obligasyon na siopaman, tan tua a sanen imbaga nen Jesus a say maong a balita so nipulong, agto impiho no siopa so manggawa ed kimey. Siopa ni, anggaman kuan, so usaren nen Jehova ed ontan a kimey noagta saraman so mangiteen na pananisia ed Salita to tan ginmapon mangiyaplika ed satan diad bilay da? Sanen dinetermina nen Jehova ed saray agew nen Noe so pamasakbay ed marelmeng a mundo na katooan diad onsasabin kadederal, inusar to so sakey a toon “akipanakar ed tuan Dios.” (Genesis 6:9, 13, 14; 2 Pedro 2:5) Sanen kinaliktan to so kipasabi na saray mapropetikon mensahe ed Israel, imbaki toray ‘ariripen to, saray propeta.’ (Jeremias 7:25; Amos 3:7, 8) Say dedikadon nasyon na Israel so sakey a nasyon na saray tastasi to. (Exodo 19:5, 6; Isaias 43:10-12) On, uusaren nen Jehova iray dedikadon ariripen to a bilang tastasi to.
10. Panon so pakanengneng a manlapud saray balikas ed Mateo 28:19, 20 a say ganggan ed panggawa na babangatan so onaplika ed amin a Kristianos?
10 Inkuan na arum a say ganggan na panggawa na babangatan, a niiter ed Mateo 28:19, 20, so niiter lambengat ed saray apostoles tan sirin ag-onaplika ed saray Kristianos diad inkalapagan. Balet imanoen so imbaga nen Jesus: “Onla kayo sirin tan manggawa na babangatan a totoo ed amin a nasyones . . . a bangatan yoran manumpal ed amin ya ingganggan ko ed sikayo.” Saray patumbok nen Jesus so mangibangat ed saray balon babangatan a manumpal ed amin a bengatlan ingganggan nen Jesus. Tan sakey ed saray bengatlan ingganggan to so ‘onla tan manggawa na babangatan.’ Peteg, amin na saray balon babangatan so nakaukolan a nabangatan a manumpal ed sayan partikular a ganggan met.
11. (a) Anton obligasyon so nipasakbat ed Kristianon kongregasyon nen inmunan siglo? (b) Anto so nakaukolan ed sakey pian nilaban, tan anto so isakup na saya?
11 Say Kristianon kongregasyon nen inmunan siglo so atawag na ‘totoo na Dios a para ed nikabiig a kayarian pian iyabawag da ed arawi so karlangan na samay sakey ya anawag ed sikara a nanlapud kabilungetan diad makapakelaw a liwawa to.’ (1 Pedro 2:9) Saray membro to so magunaet a mangitatarok na pantasi ed Panarian na Dios. (Gawa 8:4, 12) Amin na “saray sasantos,” alanaan a Kristianos, ed Roma et nibaga a “diad sangi et gawaen na sakey so lapag a panangiyabawag ed kilalaban” tan pian “balang sakey ya ontawag ed ngaran nen Jehova so nilaban.” (Roma 1:7; 10:9, 10, 13) Sayan mapublikon panangiyabawag ed kilalaban, a ginawa ed panaon na kabautismoan na sakey, so mangisasakup met ed mapublikon panangipulong ed maong a balita na Panarian nen Jehova.
12, 13. (a) Anto so isakup “na lapag a panangiyabawag ed ilalo tayo” ya abitla ed Hebreos 10:23? (b) Panoy pangipanengneng na Salmo 96 ed pankaukolan na lapag a panangiyabawag ed paway na kongregasyon, tan panon so panuporta na Apocalipsis 7:9, 10 ed saya?
12 Nansulat si apostol Pablo ed saray Hebreon Kristianos: “Bembenan tayon malet so inkalapagan a panangiyabawag ed ilalo tayo ya anggapo so panggiwgiw, lapud matoor iman so angisipan.” (Hebreos 10:23) Say mapublikon panangiyabawag so agnigeter ed saray miting ed kongregasyon. (Salmo 40:9, 10) Diad Salmo 96:2, 3, 10 et malinlinew a nanengneng tayo so sakey a mapropetikon ganggan na pampulong ed paway na kongregasyon, diad saray nasyones, ed sarayan salita: “Manlapud inagew-agew et ibaga so maong a balita na panangilaban to. Iyabawag ed limog na nasyones so gloria to, ed limog na amin na saray totoo so makapakelkelaw a kimey to. Ibaga ed limog na nasyones: ‘Si Jehova a mismo so nagmaliw ya ari.’” Peteg, diad Mateo 28:19, 20 tan Gawa 1:8, ginanggan nen Jesus iray Kristianos a manpulong ed saray nasyones.
13 Sayan mapublikon panagpulong so atukoy ed kaaruman nin salita nen Pablo ed saray alanaan a Hebreon Kristianos: “Diad panamegley to et sikatayon naynay so mangiyapay ed Dios na sakey a bagat na panangidayew, salanti, say bunga na saray bibil a manggawa na lapag a panangiyabawag ed ngaran to.” (Hebreos 13:15) Diad libro na Apocalipsis, say “baleg ya ulop,” ya atipon ed amin a nasyones so anengneng met a mankekelyaw ed baleg a boses: “Say kilalaban so utang tayo ed Dios, ya akayurong ed trono, tan ed Kordero.” (Apocalipsis 7:9, 10) Sirin, diad sayan panaon na kasampotan na sistema na bengabengatla, say panangipulong ed maong a balita so gagawaen na saray dedikadon Tastasi nen Jehova, say nakdaan na espiritual iran agagi nen Kristo tan saray malakarneron kakaiba ra a manitibukel na “baleg ya ulop.” Balet panon so aktual a panggagawa ra ed sayan kimey?
“Lapag tan diad Kabkaabungan”
14. Iner so nanggawaan nen Jesus na panagpulong, tan antoran prinsipyo so naaralan tayo a manlapud saya?
14 Si Jesus so direktan nampulong ed saray totoo. Nabasa tayo, alimbawa, a sikato so nampulong ed saray sinagoga. Akin? Lapud saray totoo so nandaragup diman ed Sabaton tan tinmalineng ed panagbasa tan singbatan ed Kasulatan. (Mateo 4:23; Lucas 4:15-21) Si Jesus so nampulong met ed totoo diad gilig na dalan, gilig na dayat, diad alusadsar na palandey, diad abay na bobon ed paway na syudad, tan diad kaabungan. Inerman a walaray totoo, sikara so pinulongan nen Jesus.—Mateo 5:1, 2; Marcos 1:29-34; 2:1-4, 13; 3:19; 4:1, 2; Lucas 5:1-3; 9:57-60; Juan 4:4-26.
15. (a) Antoran bilin so inter nen Jesus ed saray babangatan to sanen sikara so imbaki ton manpulong? (b) Panon so impangipaliwawa na arum a komentarista na Biblia ed saya?
15 Sanen imbaki nen Jesus iray babangatan to a manpulong, sikara met so imbaki ton direkta ed totoo. Saya so nanengneng diad saray bilin to a nikurit ed Mateo 10:1-15; 40-42. Diad bersikulo 11 et imbaga to: “Diad antokaman a syudad odino baryo a looban yo, anapen so makanepegan, tan manayam diman ya anggad sikayo so ontaynan.” Say The Jerusalem Bible so angipatalos ed sayan bersikulo: “Kerewen so sakey a napanmatalkan,” a singano saray babangatan so mangerew ed arum iran prominente odino sikakabat a totoo ed baryo pian anapen no siopa so walaan na maabig a pakatongtongan tan sirin makanepegan ed mensahe. (Nengnengen met so Weymouth tan say King James Version.) Tan saya so paliwawan inter na arum a komentarista na Biblia ed bersikulo 11.
16. Anton lalon walaan na getman panangonsidera ed saray salita nen Jesus ed Mateo 10:11 so mangipanengneng no panon a saray apostoles so manaanap ed saray makanepegan?
16 Nepeg a lawas nonoten, anggaman kuan, a diad maslak a kabiangan, saray teologo na Kakristianoan so ag-oonla ed kabkaabungan, tan dakel iran komentarista na Biblia so nanggetman mangipatalos ed Kasulatan diad konteksto na dilin eksperiensia ra. Say lalon walaan na getman konsiderasyon ed bilin nen Jesus so mangipanengneng a sikato so mansasalita nipaakar ed pananap na saray babangatan to ed sinansakey a totoo, balanglan diad kabkaabungan odino diad lapag, tan ipresenta ed sikara so mensahe na Panarian. (Mateo 10:7) Say kiwas da so mangipanengneng no kasin sikara so makanepegan odino andi.—Mateo 10:12-15.
17. Anto so mamaneknek a saray babangatan nen Jehova so aglambengat ondalaw ed saray makanepegan a totoo a nibase ed rekomendasyon odino pananuro?
17 Saya so anengneng ed saray salita nen Jesus ed Mateo 10:14: “Inerman a say siopaman so agmangawat ed sikayo odino ontalineng ed saray salita yo, diad ipaway ed satan ya abung odino satan a syudad et ipagpag yoray dabok ed sali yo.” Sasalitaen nen Jesus so nipaakar ed panggawa na saray babangatan to ed ag-inimbitaan ya idalaw ed totoo pian manpulong ed sikara. Tua, awaten da met so pipundo ed sakey ed saray sankaabungan a kinmiwas ed mensahe. (Mateo 10:11) Balet say manunan bengatla et say kimey na panagpulong. Diad Lucas 9:6 et nibaga: “Insan sikara so linma ed teritorya ed saray baryo, ya inyaabawag da so maong a balita tan nantatambal ed amin a pasen.” (Nengnengen met so Lucas 10:8, 9.) Saray makanepegan ya angawat ed babangatan diad kaabungan da a bilang propetas, anganko ta angiter ed sikara na “sakey a kupa na ambetel a danum” odino pampundo ni ingen, so agmakabalang na tumang da. Sikara so makadngel ed mensahe na Panarian.—Mateo 10:40-42.
18, 19. (a) Unong ed Gawa 5:42, panon so impanggawa na saray inmunan Kristianos ed kimey na panagpulong da? (b) Panoy pangipanengneng na saray salita nen Pablo ed Gawa 20:20, 21 a sikato so manutongtong na nipaakar ed sakey a ministeryo ed saray agmananisia, aliwan diad akindalem a kimey na panagpastol?
18 Kayari inkiletneg na Kristianon kongregasyon, nabasa tayo so nipaakar ed saray apostoles: “Tan kada agew ed templo tan diad kabkaabungan et intultuloy dan andi-tunda so nambabangat tan angiyaabawag ed maong a balita nipaakar ed Kristo, Jesus.” (Gawa 5:42; nengnengen so Reference Bible, paimanod-leksab) Say balikas ed Griegon nipatalos a “manlapud kabkaabungan” so kat’ oíʹkon. Dia et say ka·taʹ so diad nibunog a pantalos. Sirin, nibaga a say panagpulong na babangatan so nibunog a manlapud kabkaabungan. Sikara so agmanggawa na basta inyuksoy-lan-akaunan sosyal ya idadalaw. Say miulibay ya impangusar ed ka·taʹ so naromog ed Lucas 8:1 diad balikas a “manlapud saray syudad tan manlapud baryo.”
19 Say parehon balikas ed plural, kat’ oíʹkous, so inusar nen apostol Pablo ed Gawa 20:20. Diman et imbaga to: “agko inkibot a manlapud . . . impangibangat ed sikayo diad lapag tan manlapud kabkaabungan.” Say balikas a “manlapud kabkaabungan” so nipatalos “ed saray abung yo” ed arum iran patalos. Arum iran komentarista na Biblia na Kakristianoan so mangibabaga a tutukoyen dia nen Pablo so panagpastol iran idadalaw ed kaabungan na saray mananisia. Balet saray ontumbok a salita nen Pablo so mangipanengneng a sikato so manutongtong na nipaakar ed sakey a ministeryo ed saray agmananisia, lapud inkuanto: “Balet siak so angitarok na nagnap a pantasi ed saray Judios tan ed saray Griego nipaakar ed panagbabawi ed Dios tan pananisia ed Katawan tayo a Jesus.”—Gawa 20:21.
20. (a) Diad anton kalaknab so angipulongan na saray Tasi nen Jehova ed maong a balita na Panarian diad panaon tayo? (b) Panon so nayarin panmoria na arum ed pamaakaran na pantultuloy ed panagpulong?
20 Sayan metodo na idampot ed totoo so nepeg sirin ya usaren ed panaon tayo sano say “maong a balita na panarian” so nepeg a “nipulong ed amin a panaayaman a dalin ya onkanan pantasi ed amin a nasyones.” (Mateo 24:14) Diad masulok lan 65 taon, saray Tasi nen Jehova so sigugunaet a mangipupulong ed maong a balita na niletneglan Panarian na Dios diad lapag tan manlapud kabkaabungan—natan diad 210 daldalin. Agaylan engranden panagtasi so nagagawaan! Tan saya anggaman ed katuaan a maslak ed totoo natan so makakadngel ed mensahe ya “andian na kiwas,” arum ni ingen so manggulo. (Mateo 13:15) Akin a saray Tasi nen Jehova so mantutultuloy ed panagpulong ed saray pasen a saray totoo so ag-ontalineng odino onsumpa ni ed sikara? Sayan tepet so nasalaysay ed onggendan ya artikulo.
Panon So Pangebat Yo?
◻ Anto so ipapanengneng na Kasulatan a niyugali ed ministeryo nen Jesus?
◻ Antoran panangiwanwan so niiter ed saray apostoles ed ministeryo ra?
◻ Anton kimey so nagawa ed panaon tayo, tan akin?
◻ Siopa so usaren nen Jehova a mangipulong ed maong a balita ed agew tayo?
◻ Iner tan panon so kagawaan na kimey na panagpulong?