Saray Tuan Kristianos so Managpulong na Panarian

“Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.”​—MATEO 24:14.

1, 2. (a) Akin a say mensahe na Panarian so nepeg a niyabawag natan ed sankamundoan? (b) Antoran tepet so nayarin itepet na kada Tasi nen Jehova?

MANGIPAPALAPAG NA PANARIAN NEN JEHOVA. Diad pigamplo lan taon, satan so manunan getma na sayan palapagan. Diad tua, sikato so kabiangan na titulo na magasin. Tan makana a say mensahe na Panarian natan so niyabawag ed sankamundoan. Akin? Nisesengeg ed saman so imbaga nen Jesus-Kristo kayari na impangisita to ed arum iran nagawgawa a manibukel “ed tanda” na agnanengneng a “kiwawala” tan say anggaan na sayan sistema. Imbaga nen Jesus: “Sayan Maong a Balita na panarian so niyabawag ed sankamundoan ya onkanan pantasi ed amin a nasyones. Tan insan say anggaan so onsabi.”​—Mateo 24:3, 14, The Jerusalem Bible.

² Natan, “say anggaan” so peteg lan asingsingger. Sirin, maabig no itepet na kada dedikadon tasi nen Jehova: Panon so liknaan ko nipaakar ed kimey na panagpulong-ed-Panarian? Kasin siak so mibibiang ed satan a maparanay? Tan kasin say ministeryok so nasusumpal a tekep na abilidad tan seseg?

Say Kimey a Manpulong

3. Saray salita nen Jesus a nikurit ed Mateo 5:14-16 so mangipatnag na anto nipaakar ed saray patumbok to?

³ Anggapo so peteg a Kristianon manepeg a makapaliis ed pribilehyon kimey na panangiyabawag ed “maong a balita” ed arum. Imbaga nen Jesus ed saray babangatan to: “Sikayo so silew na mundo. Say sakey a syudad so agnayarin niyamot sano nipasen ed tuktok na palandey. Saray totoo so manelsel na silewan tan igaton da, aliwan diad silong na panagsukatan a basket, noagta diad panangipatoonan, tan sindagan to so amin a wala ed abung. Ontan met a pasindagen yo so liwawa yo ed arap na totoo, ta pian komon nanengneng da so maabig iran kimey yo tan iter da so gloria ed Ama yo a wala ed katawenan.” (Mateo 5:14-16) Satan so mangipanengneng a saray babangatan nen Jesus so magmaliw a manangipulong ed Panarian.

4. Anto so nibaga nipaakar ed sankamanunaan a manangiyabawag na Panarian?

⁴ Nipaakar ed sankamanunaan a managpulong ed Panarian, nibaga: “Legan ya impulong na Katawan tayo so panarian intuloy To . . . ya imparaan tan inorganisa so Ministeryo to . . . Inggapo to so mapropetikon ministeryo . . . tan ginawa to so Labindua tan saray Pitumplo a mibibiang met ed satan. Legan a sikato so nampulong ed onsasabin Panarian tan saray ‘tanda.’ imbaki To ra ed imaton To a walaan na parehon mensahe tan parehon pakayari. Diad makapakelkelaw a kurang na panagbangat, . . . impasal To ra a para ed posisyon na atagtagey a panagmatalkan a niiter ed kayari to.”​—A Church History, nen Milo Mahan.

5. No nipaakar ed kimey na panagpulong ed Panarian, anto so ginawa nen Jesus?

⁵ Intarya nen Jesus so maabig a bilin ed saray apostoles to tan saray 70 babangatan ya imbaki to. (Lucas 6:12-16; 10:1-22) Nagkalalo ni, say Ehemplo tayon mismo so “linman nambiahe ed saray syudad tan diad saray baryo, a nampupulong tan angiyaabawag na maong a balita na panarian na Dios.” Kaiba to iray apostoles tan pigaran bibii “a nanlilingkor ed sikara a manlapud saray kayarian da.” (Lucas 8:1-3) On, si Jesus so maseseg a manangiyabawag na maong a balita tan inggapo to so kurang na organisasyon a panangipulong-ed-Panarian.

6. Sakbay na insegep to ed tawen, anton ganggan so inter nen Jesus ed saray patumbok to?

⁶ Kayari na taloy-taon-tan-kapalduan ministeryo, asumpal nen Jesus so mangaraldalin a kurang to. Balet sakbay na insegep to ed tawen, ginanggan toray patumbok to: “Onlakayo . . . tan manggawa kayo na babangatan a totoo ed amin a nasyones, a bautismoan yo ra ed ngaran na Ama tan ed Anak tan ed masanton espiritu, a bangatan yo ran mangunor ed amin a bengatlan ingganggan ko ed sikayo. Tan, nia! wala ak ed sikayo ed amin na saray agew ya anggad kasampotan na sistema na bengabengatla.” (Mateo 28:19, 20) Sikara, peteg, so magmaliw a managpulong na Panarian.

7. Anggaman saray babangatan nen Jesus so gendat a kinmulang na suston pikakabat nipaakar ed Panarian, akin a sikara so ontalona diad pagmaliw dan tastasi to?

⁷ Sanen magano lan taynanan nen Jesus so dalin, intepet na babangatan to: “Katawan, kasin ipawil mo so panarian na Israel ed sayan panaon?” Diad ebat, imbaga to ed sikara: “Agyo kayarian so igamor na pikakabat ed saray panaon odino panpanaon ya inggeter na Ama ed dilin pakauley to.” Anggaman saray babangatan so kulang na suston pikakabat nipaakar ed Panarian, sikara so nayarian nen Jesus ya iganggan a mangiyabawag ed satan, lapud nakaukolan da so tulong diad pangisumpal ed kimey da. “Balet mangawat kayo na pakayari sano say masanton espiritu so onsabi ed sikayo,” so inyarum nen Jesus, “tan sikayo so tastasik ed amin a Judea tan Samaria tan anggad sankaarawian a pasen na dalin.” (Gawa 1:6-8) Diad panangiwanwan na masanton espiritu, saray patumbok nen Jesus so makamoria ed kaunoran a say Panarian so mangatatawen a gobierno. (Juan 16:12, 13) Tan nasabi panaon a saray katuaan nipaakar ed satan a Panarian so niyabawag “ed sankaarawian a pasen na dalin.”

8. Panon inkamaaligwas so kimey na panagpulong nen inmunan siglo?

⁸ Saraman a tastasi so anumpal a sankaabigan ed kimey da. Siempre, si Jehova so wala ed sikara, tan sikara so tutulongan na niglorian Jesu-Kristo. (Gawa 8:1-8; 11:19-21) Agpankelawan a diad asasakbay ya 60 ya anggad 61 K.P. a nayarian nen Pablo ya ibaga a say “maong a balita” so ‘nipulong [la] ed amin a pinalsa ed leksab na tawen’!​—Colosas 1:23.

9. A singa naimano tayo dia, anto so manunan kimey na Kristianon kongregasyon?

⁹ Nipaakar ed kimey na panagtasi, nisulat: “Say panangiyabawag ed ebanghelyo so . . . aliwan sakey a kimey ed limog na dakel a pibibiangan na Iglesia ed B[alon] S[ipan], noagta sikato so manuna, say sankakanaan a kimey to. . . . Imanoen a maong, ag-imbaga nen Jesus [ed Gawa 1:8], Sikayo so tastasik, odino, Sikayo so mangitarok na pantasi ed siak, noagta, Sikayo so tastasik. Say impangusar ed berbon ‘magmaliw’ dia so walaan na kablian a nepeg a talosan a tekep na sigpot tan literal ya inkaseryoso. Say balikas [ed Griego] so aglabat mangibabaga ed no anto so gawaen na Iglesia, noagta no anto so pagmaliwan na Iglesia. . . . Say Iglesia nen Jesu-Kristo so . . . sakey a managtasin ulop.” (Pentecost and the Missionary Witness of the Church, nen Harry R. Boer, pahina 110-14) On, say panagtasi so manunan kimey na tuan Kristianon kongregasyon.

Diad Madibinon Panangiwanwan

10, 11. (a) Manuna, panoy inkaorganisa na saray manangiyabawag na Panarian nen inmunan siglo? (b) Anto so agawa sanen tinmalindeg iray balon sirkumstansya?

¹⁰ Saray manangiyabawag na Panarian nen inmunan siglo so angawat na panangiwanwan a manlapud mananguley ya ulop. Saray managbiahen mamatatken so nanlingkor ed dalem na organisasyon, tan saray kimey ed kongregasyon so sinakbat na saray manangasikaso tan ministeryal ya ariripen. (Gawa 15:1, 2, 22-36; Filipos 1:1) Balet anto so agawa sanen binmaleg iray balon sirkumstansya?

¹¹ Bueno, imanoen so agawa ed samay kayarin tuloy na Pentecostes na 33 K.P. a saray Judion mansasalitay-Griego so ginmapon nannguronguro a sumpad saray Judion mansasalitay-Hebreo “lapud saray babalo ra so apaulianan ed inagew-agew a panangibunog.” Pian nasolbar so problema, saray apostoles so anuro na “pitoran apamintuaan a lalaki” a mangasikaso ed sayan panangibunog na tagano. (Gawa 6:1-8) Nipaakar ed saya nabasa tayo: “Diad ununa, say panangasikaso a say inagew-agew a panangan ed lapag so anggapoy panangiduman nibunog ed amin, ya anggad nibaga ed sikami, a saray ‘pitora’ so nigana, balet, siempre, arum iran kimey so niarum legan a sikara so ontalindeg, bang saray prinsipyo na balon pananisia so agnauman, say kurang tan modo na panangirungtal, a saraya so nayarin sankaabigan a niletneg tan ninatnat, so nipasakbat ed kakabatan tan praktikal ya eksperiensia na mantutumbokan a kapolian . . . Say panaggawa tan panamalaknab ed saray aliwan-makanan detalye . . . so kapilitan ed anggan anton baleg ya organisasyon.”​—Hours With the Bible, New Testament Series, tomo II, nen Cunningham Geikie.

12. (a) Anto so tinmulong ed aligwas na inmunan Inkakristiano? (b) Iner tan panon so inkatawag na saray patumbok nen Jesus a Kristiano?

¹² Say sipipikasin panagmatalek ed Dios, a dingan “na kakabatan tan praktikal ya eksperiensia” na mananguley ya ulop, so tinmulong ed aligwas na inmunan Inkakristiano. Tan saray bengatla so peteg a nagagawa diad madibinon panangiwanwan. Singa bilang, nibagan saray inmunan patumbok nen Jesus so wala ed “Say Dalan.” (Gawa 9:1, 2) Balet angangko asasakbay a singa diad 44 K.P. ed Antiokia, Syria, “saray babangatan diad panamegley na madibinon panangiwanwan so atawag na Kristianos.” (Gawa 11:26) Saman so inter-na-Dios a ngaran a sipaparaan dan inawat.​—1 Pedro 4:16.a

13. Unong a saray Tasi nen Jehova natan so manguusar na saray modernon metodo na panangipalapag, anto so inusar na saray inmunan Kristiano diad panagpulong-na-Panarian a kimey da?

¹³ Diad limog na saraman ya inmunan Kristianos, arum iran agawgawa met so walad dalem na madibinon panangiwanwan. Alimbawa, unong a saray Tasi nen Jehova so manguusar natan na saray modernon metodo na panagpalapag, ontan met a saray inmunan Kristianos so inmuna diad impangusar ed codex​—peteg a bendisyon ed maseseg a kimey na panagpulong da ed Panarian. Diad sayan pamaakaran, insulat nen C. C. McCown: “Saray relihyoson libro na Kristianos, namparan say Daan a Sipan tan saray balon sulsulat . . . so aliwan para ed pampalabasay-panaon a panagbasa na saray maong-bilay. Saray impasyan-komikimey a negosyantin totoo so malabay a makaasol ed sakey a libro. Sikara tan saray magunaet a Kristianon misionero so nankaliktan a makayarin manukoy ed saya odino ed satan a prueban teksto a tampol, ya agda la nakaukolan a buskagen so amayamay a pie na papiro.”​—The Biblical Archaeologist Reader, pahina 261.

14. Saray apostoles nen Jesus so magunaet a manpulong ed leksab na antoran sirkumstansya?

¹⁴ Diad “pakayarin manukoy ed saya odino ed satan a prueban teksto a tampol” so sankaimportantian lapud saray metodo na panagpulong-ed-Panarian ya inusar na saray inmunan Kristianos. No maminsan, siempre, sikara so mantatasi ed totoo ya impormal, a singa mabetbet a gagawaen natan na saray Tasi nen Jehova. Diad saya nibaga: “Sakey ed saray nikaduman nengneng na apostolikon panagpulong et say agginagalan nengneng. Anggapo so panalagar na sakey ya apostol ed babaleg a pankanawnawa. Say alenleneg ya okasyon ed estado et sanen, singa si Pablo ed arap nen Felix, nitonton a bilang sakey a pinangaw ed arap na sakey a manuley ed purpura a mangiter na salaysay ed inkasikato tan onebat ed dalem na impanumlang ed saray ganggan. Sikato so aliwan andian na saray pankanawnawa, noagta sikara so niiter ed sikato diad pangawan, diad saray gilig na dalan, tan diad mapaabeban ayaman pian nasiruman ed labi. . . . Alikna ton say mensahe to so malaknab a para ed saray totoo, anggaman parehon akaparaan a mangiparungtal ed karaklan. Sikato so parehon walad abung a walaan na anggan anton dumerengel. Agto nilingwanan so ehemplo nen Kristo, . . . [a say] entablado to et say marabuk a dalan, odino say matoon lansangan, odino saray mabaton aplaya na Judion Galilea . . . [Saray apostoles] so ag-akalingwan ya inikdan tora ya asakbay diad pipiiba ra’d sikato na nikabiig iran bilibilin no nipaakar ed sankaabigan iran metodo na panagpulong ed doktrina to, sarayan inmunan leksion na arum so apabiskeg, tan, sakbay a tuloy na intukotuk to, inturo to ed sikara so mundo a bilang uma ra tan balang pinalsa a bilang auditor da.”​—History of the Christian Church, nen John F. Hurst, tomo I, pahina 96.

“Diad Kabkaabungan”

15. Panon so impangitarok na saray apostoles ed kimey na panagpulong diad saray agew kayari na Pentecostes nen 33 K.P.?

¹⁵ Diad saray agew kayari na Pentecostes nen 33 K.P., saray babangatan nen Jesus so manguusar la na sankaabigan a metodo na panangipulong ed “maong a balita.” Kayari inkamudmura na saray apasegsegang ya apostoles lapud ngaran nen Jesu-Kristo, anto so ginawa ra? Akin, “kada agew diad templo tan diad kabkaabungan et intultuloy dan andi-tunda so nambabangat tan angiyabawag ed maong a balita nipaakar ed Kristo, Jesus”! (Gawa 5:41, 42) On, saray apostoles so nantasi ed kabkaabungan.

16. Diad anton nengneng na kimey na panagpulong so angiter na inkipasal na mamatatken ed Efeso?

¹⁶ Saginonor, nayarian nen apostol Pablo a panonotan iray aturon mamatatken ed Efeso: “Agko inkibot ya imbaga ed sikayo so antokaman a bengatlan pinabangan nisay manlapud impangibangat ed sikayo diad lapag tan diad kabkaabungan. Balet nagnap ya intarok ko so pantasi ed saray Judios tan Griego nipaakar ed panagbabawi ed Dios tan pananisia ed Katawan tayon Jesus.” (Gawa 20:20, 21) Aglabay nen Pablo ya ibaga a sikato so manbabangat ed saray aturon mamatatken ed kaabungan da. Noag ingen, sikato so mantatasi ed saray agmananisian Judios tan Griego nipaakar ed panagbabawi ed si Jehovan Dios tan pananisia ed si Jesu-Kristo. Anggapoy suppiat, imbangat met nen Pablo iraman a mamatatken ed no panon so pantasi ed kabkaabungan.

17. Anto so imbaga na nanduruman eskolar nipaakar ed kabkaabungan a ministeryo nen Pablo ed Efeso?

¹⁷ Nipapaakar ed ministeryo na apostol ed Efeso, nibaga: “Say inkalapagan ya ugali nen Pablo et say pankimey ed anapan to a manlapud ipaway na agew ya anggad alas 11 n.k. (Gawa 20:34-35) a diad satan ya oras et asumpal la nen Tirano so panagbangat to; insan manlapud alas 11 n.k. ya anggad alas 4 n.k. et nampulong diad panagtiponan, a mangiyuksoy na kumperensya ed saray katulong tan pribadan pitotongtong ed saray kandidato, manplano na panangilaknab ed saray walad dalem; insan kaunoran et manggawa na panagkabkaabungan a panag-ebanghelyon mantultuloy a manlapud alas 4 n.n. ya anggad aralem a labi. (Gawa 20:20-21, 31).” (A. E. Bailey) Imbaga na arum iran eskolar: “Sikato so aliwan kontento ed basta pampaliwawa ed mapublikon asamblea, tan ipadngel to’d arum iran instrumentalidad, noagta maseseg ya anumbok ed baleg a kimey to diad pribada, diad kabkaabungan, tan literal ya intarok to ed abung so katuaan na tawen diad kapusoan na saray taga Efeso.” (A. A. Livermore) “Diad lapag tan diad kabkaabungan, diad syudad tan diad interon luyag, impulong to so ebanghelyo.” (E. M. Blaiklock) “Makanan imanoen a sayan sankabalgan ed saray managpulong so nampulong ed kabkaabungan tan agto ginawa iray dalaw to a basta sosyal ya idadalaw.”​—A. T. Robertson.

18. (a) Akin a nibaga yon wala so mabiskeg a letnegan ed Kasulatan diad kabkaabungan a ministeryo na saray Tasi nen Jehova? (b) Singa si Jesus tan saray inmunan babangatan to, iner tan panon so pangipupulong na saray Tasi nen Jehova ed mensahe na Panarian?

¹⁸ Say panagtasi ed kabkaabungan so ginawa na saray apostoles nen Jesus nen 33 K.P. Saman so kabiangan na ministeryo nen Pablo ed Efeso tan andi-duaruwa ed amin a pasen. Sirin wala so mabiskeg a letnegan ed Kasulatan diad panagkabkaabungan a ministeryo na saray Tasi nen Jehova. Tan saya so tua ed saray nanduruman arum a metodon uusaren da diad pangikayat ed mensahe na Panarian. Makapasagyat, imbaga na McClintock and Strong’s Cyclopedia: “Say Katawan tayo tan saray apostoles to so akaromog na pasen a pampulongan inerman a pantitiponan na saray totoo. Diad gilig na palandey, diad aplaya na dayat tan ilog, diad mapublikon lansangan, diad pribadan kaabungan, diad lolooban na Templo, diad Judion sinagoga, tan diad nanduruman arum a pasen a pangiyabawag ed Ebanghelyo.” (Tomo VIII, pahina 483) Singa si Jesus tan saray inmunan babangatan to, saray Tasi nen Jehova so mangipupulong ed mensahe na Panarian “diad mapublikon lansangan, diad pribadan kaabungan . . . tan diad nanduruman arum a pasen.” Alimbawa, sikara so manggagawa na panagbunog ed magasin a kimey diad lansangan (a tekep na sayan palapagan tan say kaiba ton Awake!) tan sikara so nagkalautlan kabkabat diad panagtasi ra ed kabkaabungan.

19. Panoy inkagawa na saray desisyon nipaakar ed saray metodo na panagpulong ya uusaren natan na saray Tasi nen Jehova?

¹⁹ Say manunan nengneng na ministeryo natan ya uusaren na saray Tasi nen Jehova so niletneg a maong nen inmunan siglo, tan, likud ed saya, manepeg ed kaplesan-agew a Mananguley ya Ulop na saray alanaan a Kristianos so pandesidi ed no antoran metodo na panagpulong so matukoy ed sayan panaon. Saray ontan a desisyon so niletneg “ed kakabatan tan praktikal ya eksperiensia” na sarayan lalaki. Nagkalautla, anggaman kuan, a gawaen daray desisyon a singa ginawa na inmunan-siglon Kristianon mananguley ya ulop. Say panangidirihe na Dios tan say panangiwanwan na masanton espiritu to so kinerew diad pikakasi, tan saray Makasulatan a basiyan so tinumbok diad panitermina no antoran metodo na panagpulong so sankamakanepegan ed sarayan “kaunoran ya agew.”​—2 Timoteo 3:1; Gawa 15:23, 28.

20. (a) Akin a maseguro itayon wala so madibinon panangabobon ed saray metodo na panagpulong ya uusaren na saray Tasi nen Jehova? (b) Anton awawey so nepeg ya onwala ed amin na saray ariripen nen Jehova diad kimey na panagpulong ed Panarian?

²⁰ Mapatnag a saray metodo ed panagpulong ya uusaren na saray Tasi nen Jehova so walad dalem na madibinon panangiwanwan, lapud sarayan sagpot so binalangetan na Dios na daakan ya aligwas tan bendisyon. (Uliran 10:22) Saray dakerakel ya ulop na totoo so mangaabrasa ed tuan panagdayew tan miuulop ed nakdaan na saray alanaan a patumbok nen Jesus bilang kabiangan na alenleneg ya organisasyon a mangigagalang ed masanton ngaran nen Jehova tan andi-takot a mangiyabawag ed maong a balita na niletneglan mangatatawen a Panarian. Komon sirin ta amin na saray ariripen nen Jehova so mantultuloy a mangibanikel na inkasikara diad kimey na panaggaway-babangatan legan a sayan sistema so manasingger ed anggaan to. Saya so nepeg tayon gawaen a matoor, lapud saray tuan Kristianos so andi-suppiat a managpulong ed Panarian.

[Paimano ed Leksab]

Anto So Pakatalos Yo?

◻ Akin a say mensahe na Panarian so nepeg natan a niyabawag ed sankadalinan?

◻ Anto so manunan kimey na amin a tuan Kristiano?

◻ Akin a nibagan diad limog na ariripen nen Jehova et saray bengatla so nagagawa diad madibinon panangiwanwan?

◻ Say kimey na panagpulong ed kabkaabungan na saray Tasi nen Jehova so walaan na anton maabig a letnegan?

[Litrato ed pahina 9]

Imbaga nen Jesus ed saray patumbok to: ‘Onlakayo, manggawa na babangatan.’ Kasin gagawaen yon maseseg iyan manunan kimey na amin a tuan Kristiano?

[Litrato ed pahina 11]

Kasin sikayo so maparanay a mantatasi ed kabkaabungan? Ontan so ginawa na saray inmunan apostoles nen Jesus. Ontan met nen maseseg a manangiyabawag na Panarian a Pablo