Manbangat a Tekep na Abilidad tan Seseg
“Onlakayo sirin tan manggawa na babangatan a totoo ed amin a nasyones, . . . a bangatan yo ran manumpal ed amin a bengatlan ingganggan ko ed sikayo.”—MATEO 28:19, 20.
1. Anto so impaseseg na Uliran 22:29, tan panon ya ontan?
IPAPASESEG na salita nen Jehova so abilidad tan inkakuli. Alimbawa, ibabaga to: “Kasin anengneng mo so sakey a toon onsiano ed kimey to? Ipasen to so inkasikato ed arap na arari; agto ipasen so inkasikato ed arap na kabanyakan a totoo.” (Uliran 22:29) Siempre, aliwan abeban bengatla so pankimey a para ed “kabanyakan a totoo.” Ingen say maabig a kimey na onsiano so agmansiansian maamot. Akin, say balita ed abilidad to so nayarin makarateng ed layag na sakey ya ari, a nayarin mankaukolan na serbisyo to!
2. (a) Pian nabayuboan so abilidad ed anggan anton propesyon, anto so nakaukolan? (b) Akin a say inkaepektibo na sakey a Kristianon ministro bilang managbangat so importantin tuloy?
2 Say pikakabat tan abilidad so nakaukolan ed anggan anton propesyon. Nayarin aralen na sakey a too so panagkarpentero tan nayarin makaaral met na malaglaem diad pangimaton ed saraman so onsiano ed satan a trabaho. Balet ta pian nabayuboan to so abilidad, nepeg ton usaren so agamoran ton pikakabat diad pantrabaho. Nakaukolan na sakey a manag-operan doktor so pakaaral. Balet ta pian magmaliw a magenap, nepeg ton usaren so pikakabat to diad panag-operaan a kuarto. Tan diad satan a propesyon et makanakana so inkaonsiano, lapud say abilidad so mabetbet a makabaliksan ed baetan na bilay tan patey na pasiente. Ingen, lalon abalbaleg so kaimportantian na inkamarunong diad kipapasen a ministro. Akin? Lapud say inkaepektibo na ministro a bilang managbangat so nayarin mangapektan maong ed dalan ya ikiwas na totoo ed maong a balita. Ontan met, say ikiwas da so makabaliksan diad baetan na bilay ya andi-anggaan tan maandon ipapatey ed sikara.—Deuteronomio 30:19, 20; Juan 17:3.
3. Say panggawa na babangatan so mankaukolan na anto?
3 Say kimey ya inter nen Jesu-Kristo ed saray patumbok to so manasaglawi ed panagbangat. Inkuanto: “Onlakayo sirin tan manggawa na babangatan a totoo ed amin a nasyones, a bautismoan yo ra ed ngaran na Ama tan ed Anak tan ed masanton espiritu, a bangatan yo ran manumpal ed amin a bengabengatlan ingganggan ko ed sikayo. Tan, nia! wala ak a naynay ed sikayo ed amin na saray agew ya anggad kasampotan na sistema na bengabengatla.” (Mateo 28:19, 20) Siempre, nakaukolan so abilidad diad pangibangat ed saray masimpit-impanpuso ed amin na saray bengatlan ingganggan nen Jesus.
4. (a) Say walaan na abilidad a panagbangat so nepeg a nagawa a tekep na anton awawey? (b) Panon so inkagunggunaan nen Apollo diad impiulop to’d si Aquila tan Priscilla?
4 Say ontan ya abilidad ed panagbangat so nepeg a gawaen a tekep na seseg. On, saray Kristianos so nepeg a “maseseg ed maabig iran kimey,” tan saraya so mangisakup a peteg diad pangipanabang na espiritual a bangat diad ministeryo tan diad kongregasyon. (Tito 2:14) Bilang onsianon managbangat, si Aquila tan Priscilla so “angitagar [ed si Apollo] ed ulop da [diad Efeso] tan impaliwawa ra so dalan na Dios a mas lalon susto ed sikato.” Saya so angungguna na abalbaleg ed si Apollo, lapud diad saginonor ed Achaia “et mabiskeg a pinaneknekan ton nagnap ed lapag a saray Judios so lingo, bangta impanengneng to ed Kasulatan a si Jesus so Kristo.” (Gawa 18:24-28) Malinlinew, si Apollo so nambangat a tekep na abilidad tan seseg.
‘Imanoen Mo So Ibabangat Mo’
5. Unong ed 1 Timoteo 4:16, akin a nepeg tayo so manbangat a tekep na abilidad tan maseseg?
5 Imbaga nen apostol Pablo ed si Kristianon kalimog ton Timoteo: “Imanoen mo so inkasika tan say ibabangat mo. Mansiansia ka ed sarayan bengatla, ta diad panggawam ed saya et nilaban mo so inkasika tan saraman so ontalineng ed sika.” (1 Timoteo 4:16) Lapud say mismon kilalaban na namparan managbangat tan babangatan so nipupusta, peteg a say ontan a panagbangat so nepeg a nagawan tekep na abilidad tan seseg.
6. Panon so pagmaliw yon marunong diad panangusar ed Kasulatan, tan antoran matukoy a tepet so imanoen?
6 Saray karpentero tan manag-operan doktor so seguradon nepeg dan imanoen so inkasikara. Nepeg a nayarian dan usaren iray kagawaan da odino rementa ra a tekep na abilidad. Sirin ontan met ed Kristianon ministro, a say manunan kagawaan to et say ‘kampilan na espiritu, say salita na Dios.’ (Efeso 6:17) Panon so pagmaliw yon marunong diad panangusar ed Kasulatan? Diad panamegley na maparanay a panag-aral tan panangusar, siempre. Sirin, kasin abasa yo la so Biblia a manlapud gapo ya anggad sampot, ikdan na panaon so pandalepdep ed saray sankaabigan a simbawa to? Kasin babasaen yo ya inagew-agew? Kasin uusaren yon maparanay ed lawak na ministeryo? Tan kasin nagnap ya aanamoten yo so mayaman a taganon espiritual ya itatarya nen Jehova ed panamegley “na matoor tan makabat ya aripen”?—Mateo 24:45-47.
7. Antoran suhestion so niyopresi nipaakar ed panaon na panagaral, tan panon a say pankaukolan ed panagaral so nipanengneng ed Kasulatan?
7 Seguroen so pangigana na panaon diad panaral ed salita na Dios tan diad saray tuan Kristianon palapagan. Saya so mamano ed kanonotan yo na mabunigas ya impormasyon a mangungguna ed sikayo tan nayarin usaren a pangebat ed saray masimoon a manag-usisa. (1 Pedro 3:15; Colosas 4:6) Saray panaon ed panag-aral tan panagdalepdep so manduruma ed saray pamilya tan ed sinansakey. Nayarin naromog na arum a makagungguna so panaral diad sampot na agew. Nayarin saray arum so lalon alerto diad ibangon. Siansian saray arum so nayarin makaromog a diad oras na kaaguan so sankamatukoyan ed sikara. Diad anggan anton kipapasen, say inkamaparanay tan inkamaseseg so sankaimportantian a tuloy. Si Josue tan saray arari ed Israel so nepeg a mamasan inagew-agew ed Salita na Dios.—Josue 1:7, 8; Deuteronomio 17:18-20.
Kimeyan So Pagmaliw a Magmaong a Managbangat
8. Panon a say pangusar na panangisiglaot ed kanonotan et paaligwasen to so abilidad ed panagbangat?
8 Say pamaaligwas ed abilidad na panagbangat so mankaukolan na impasyan kimey. Sakey a paraan na pangipanabang ed abilidad yo bilang sakey a managbangat et say pangusar na panangisiglaot na kanonotan sano aaralen so Biblia odino saray Kristianon palapagan. Isiglaot iray balon ideya ed saraman so kabat yo la. Saya so ontulong ed sikayon mangidatak ed impormasyon diad kanonotan yo ta pian nayarian yon ipaliwawan malinew iray bengatla sano babangatan so arum. Andi-duaruwa, inusar yo so panangisiglaot sano manaaral ed apalabas. Alimbawa, diad sakey a panaon et nayarin agyo amoria a saray Kristianos so wala ed relatibon katutulok ed saray ginogobiernon “superyor a pakauley.” Balet kabat yo la natan a say katutulok ed Dios so nepeg ya ununa. (Roma 13:1-8; Marcos 12:17; Gawa 5:29) Saya so atalosan yo lapud insiglaot yoray balon punto ed saraman so kabat yo la.
9. Iyilustra yon iretrato ed kaisipan so inkagawan nikurit ed Biblia.
9 Sananey a paraan na pangipanabang na abilidad ed panagbangat yo et diad pangiretrato ed saray agawgawan nikurit ed Biblia. Akin a saya so agyo gawaen natan diad Uko-ukom 7:19-22? Diad bilunget na labi, si Gideon tan saray 300 a lalaki so nanliktub ed kampo na Midianita ya akapuestoan na saray bantay. Tampol, nadngel yo so 100 ya ulop nen Gideon ya amaknol ed saray tambuyog da, tan anengneng yo ran angibasig ed saray angkakabaleg a buyog a sankaawit da. Ontan met so ginawa na arum a 200 ya Israelitas. Tan legan ya intagey dan amin iray mandarlang a silewan da, narengel yo ran mangikekelyaw: “Kampilan nen Jehova tan si Gideon!” Legan a saray akebbiew a Midianitas so ombabatik, saray taloran ulop nen Gideon so nantultuloy ya amaknol ed saray tambuyog da, tan aromog yon inggeter nen Jehova iray kampilan ed saray ontatakkias a kakabusol a sumpad balang sakey. Lapud sayan inkagawa so niretrato yo ed kaisipan, andi-duaruwan nanonotan yon maong tan nayarian yon usaren sano manbangat ed arum. Peteg, saman so mangibabangat na sakey a leksion a nayarian nen Jehovan iliktar so totoo to ya anggan anggapo so mabiskeg a puersa militar na too.—Salmo 94:14.
10. Diad panagbangat, panon yon nayarin usaren so ilustrasyon a naromog ed Uko-ukom 9:8-15?
10 Saray maabig ya ilustrasyon, pati saraman so walad Kasulatan, so makatulong met ed abilidad yo bilang managbangat. Bilang ehemplo, usisaen so Uko-ukom 9:8-15. Si Jotam ya ilalak nen Gideon so angibaga na sakey a panaon sanen saray kakiewan so linman nanlana na sakey a manuley ed sikara. Bang say olibon kiew, say higos, tan ubas so agmalabay ed sakey a posisyon na pananguley, say abeban dika so magunaet ya angawat ed satan. Saray makanan tantanaman so angirepresenta ed saray makanan totoo ya agnananap na pananguley ed kapara ran Israelitas. Anggaman kuan, say dika, a mausar lambengat a pansunglor so angirepresenta ed inkaarin mapaatagey, manamatey ya Abinmelec, a nankaliktan a mandomina ed arum balet ta asagmak to so mauges ya anggaan diad inkasumpal na propesiya nen Jotam. (Uko-ukom 9:50-57) Sayan ilustrasyon so nayarin nausar a pangidanet ed pankaukolan na panggawa ed saman so maptek tan say pagmaliw a mapaabeba, aliwan mapaatagey.—Salmo 18:26, 27; 1 Pedro 5:5.
11. (a) Antoran punto so indanet na ilustrasyon nen Jesus a nikurit ed Mateo 13:45, 46? (b) Say kipapasen na satan ya ilustrasyon so mangisuhiri na anto nipaakar ed saray ilustrasyon ya uusaren na saray Kristianon managbangat?
11 Say Baleg a Managbangat, si Jesu-Kristo, so bantog ed saray ekselentin ilustrasyon to. Alimbawa, imanoen iray salita to: “Say panarian na katawenan so singa sakey a manbibiahen managlako a manaanap na saray sankaabigan a perlas. Sanen sikato so akalmo na sakey a perlas a mabli, sikato so linma tan tampol ya inlako to so amin a bengatlan walad sikato tan saman so sinaliw to.” (Mateo 13:45, 46) Sirin inyilustra nen Jesus so kablian na Panarian tan impanengneng to a say sakey a toon mangapresya ed tuan pakagamor ed satan so maliket a mangipanabang ed antokaman ta pian satan so nagawaan to. Anggapo so kumplikasyon nipaakar ed saman ya ilustrasyon, tan saray Kristianon managbangat et maabig no saman ya estandarte so pansiansiaen da ed kanonotan da sano manguusar na ilustrasyon a bilang katulongan ed panagbangat.
Saray Tipon So Manggawa Ed Sikatayon Lalon Onsiano
12. Panon a say iyaatendi ed saray paliwawa ed publiko so ontulong ed sikayon mamaaligwas na abilidad yo ed panagbangat?
12 Makabaliksan a betang so kiwasan na saray Kristianon pantitipon diad panggawa ed saray ariripen nen Jehova ya onsiano tan maseseg a managbangat. A singa ipanengneng na Sermon nen Jesus ed Palandey, saray paliwawa ed publiko so maabig a paraan diad pangitarya na espiritual a bangat. (Mateo 5:1–7:29) Sirin, saray paliwawa ed publiko so sakey ed saray pantitipon na saray Tasi nen Jehova natan. Kasin sikayo so onaatendin maparanay? Kasin sikayo so atentibon managtalineng? Kasin bubukayen yo so Biblia yo sano saray teksto so basaen na manpapaliwawa? Kasin ugali yo so manlista na nota? Saraya so paraan na pamaaligwas ed abilidad yo bilang managbangat, tan say maabig a makasulatan a kibangat so mamadaak na abilidad tan seseg yo a bilang managgawa na babangatan?
13, 14. (a) Kapigan a say kimey na panaggaway-babangatan so ginmapon makabaliksan ed limog na saray ariripen nen Jehova? (b) Antoran tepet so maabig ya itepet nipaakar ed Panagaral na Panag-Bantayan tan say Panagaral na Libro ed Kongregasyon?
13 Say kimey na panaggaway-babangatan so nagkalautlan makabaliksan ed limog na saray ariripen nen Jehova diad tawag ya ‘Iyabawag so Ari tan Panarian,’ ya inmunan nipaknol legan na kumbension da ed Cedar Point, Ohio, nen 1922. Ontan met ed saman a taon, saray inggrupon panag-aral ed The Watch Tower so inmunan naorganisa. Sayan palapagan so peteg a nansiansian angiyuna ed bangat na Biblia tan say panangipulong ed Panarian, unong a say mismon ngaran to so Say Panag-Bantayan Mangipapalapag na Panarian nen Jehova. Kasin sakey kayon magunaet a managbasa ed Salita na Dios a kaiba na Say Panag-Bantayan a bilang katulongan? Kasin sikayo so aktibon mibibiang ed sinimban panagaral ed Panag-Bantayan?
14 Say sinimban Panagaral na Libro ed Kongregasyon so mangitarya met ed saray pankanawnawan pamaaligwas ed abilidad yo a bilang managbangat na maong a balita. Sano eebatan iray tepet ed sarayan angkelag a pantitipon, ontan met ed Panagaral na Panag-Bantayan, kasin ibabalikas yoray pamaakaran ed dilin salita yo? Kasin saray komento yo so mangipapatnag no anto so sisisiaen yo ed puso yo?
15. Anto so gagala na Tipon ed Panagserbi, tan panon so inkitarya na giya ed satan?
15 Asasakbay nen 1922, saray ariripen nen Jehova so niugalin mantitipon ed pegley simban Panagpikasi, Panagdayew, tan Panagtasin Pantitipon. Saman so panaon na panagkanta, panangiter na pantasi, tan panagpikasi. Balet diad binmiskeg a danet ed kabkaabungan a panangiyabawag ed Panarian, sayan panagtitipon so nansumpal diad Tipon ed Panagserbi, a mangidadanet ed kimey na panagpulong. Nagkalautlan makatulong et say Bulletin, a kinarga toray instruksion ed lawak na kimeyan tan “panagkambas,” odino testimonyan nayarin usaren ed ministeryo. Natan, say Ministeryo Tayo Ed Panarian so mangitatarya na miulibay a tulong, ontan met ed panangiwanwan a para ed sinimban “Miting ya Ontulong ed Panggawa Tayo na Babangatan.” Kasin sikayo so maparanay a mibibiang ed saratan a pantitipon? Kasin iyaaplika yo so konsehon niganan ontulong ed sikayon mangibangat a tekep na abilidad tan seseg?
16. A singa nibaga ed inggapo to, anto so gagala na Teokratikon Eskuelaan na Ministeryo?
16 Pian niyalibansa so onsianon panagbangat, say Teokratikon Eskuelaan na Ministeryo so inggapo ed kongregasyon na saray Tasi nen Jehova nen 1943. Nipaakar ed manunan gagala na eskuelaan, say inmunan giyan-libro to so angikuan: “Sayan kurso so agnigana a mangekal ed panaon yon usaren diad lawak na kimeyan, noagta niyuksoy a manggawa ed sikayon lalon walaan na abilidad ed satan. Nibalikas ed lalon espesipikon termino, say gagala na sayan ‘Kurso ed Teokratikon Ministeryo’ et say pangiparaan ed amin a ‘matoor a lalaki’, saraman so akadngel ed Salita na Dios tan ditan et pinaneknekan da so pananisia ra, pian ‘makayarin manbangat ed arum’ diad iyakar ed saray puerta, diad panagpawil, diad panangikondukta na modelon panangiyaral tan panangiyaral ed libro, tan, diad antikey, diad pibiang ed kada nengneng na serbisyo ed Panarian. Sikato so sakey a paraan ed panggawa ed balang sakey a lalon marunong a Teokratikon ministro diad kirayewan na ngaran na Katawan; pian sikato so nayarin magmaong a nakinlongan ed mapublikon pangiparungtal ed ilalo a wala ed dalem to; pian komon sikato so ‘manepeg a manbangat, maanos, ed kauyamoan diad panagbangat’. (2 Tim. 2:24, 25) Anggapo komon so makabalang na pakanengneng ed sayan manunan gagala na kurso.” (Course in Theocratic Ministry, pahina 4) Saya so nansiansian manunan gagala na Teokratikon Eskuelaan na Ministeryo. Kasin iyaaplika yo so maabig ya impormasyon ed panagbangat, panagbasa, mapublikon panagsalita, tan saray ontan a nengneng, ya ompatnag ed saray aaralen a libro ed sayan eskuelaan?a Kasin sikayo la so nampalista? Kasin sikayo so misalsalamat a mangawat tan manumpal ed saray nipabtang ed sikayo diad programa ed eskuelaan? Sayan tarya nen Jehova ed panamegley na muyongan to so ontulong a manggawa ed sikayon nawalaan na abilidad tan maseseg a ministro.
Panagpasal a para ed Maseseg a Panagbangat
17. Antoran espiritual a tarya so ginawa nen Jehova a para ed saraman so mangibangat na arum ed sagradon katuaan to?
17 Si Jehova so mangitatarya na daakan ed espiritual a para ed saraman so apribilehyoan a manbangat ed arum na sagradon katuaan to. Diad limog na arum a bengatla, intarya toray literatura na Biblia, saray sinimban pantitipon, tan saray angkabkabaleg ya asamblea. Saray ontan a probisyon so manggawa ed saray dedikadon Tastasi to a lalon nawalaan na abilidad tan maseseg a managbangat.
18. Diad panumbok ed saray ehemplo nen Jesus tan Pablo, antoran oksuyan so nayarin gawaen na saray mamatatken diad pangiyabante ed lawak na ministeryo natan?
18 Balet anto no sikatayo so aturo a bilang mamatatken odino lalon eksperiensiadon tastasi nen Jehova? Sirin say aro ed arum so nepeg a mamakiwas ed sikatayon ontulong ed saray balo tan aliwa nin tanton eksperiensiadon Kristianos a magmaliw a lalon onsiano tan maseseg iran managbangat. Peteg a saya so manepeg lapud saray 70 babangatan so imbaki labat nen Jesus kayari na impangiter to’d sikara na instruksion ed ministeryo ra. (Lucas 10:1-24) Imbangat nen Pablo iray manangasikaso ed Efeso ed “lapag tan diad kabkaabungan,” tan saya so manasaglawi na panangipasal ed sikara a mantasi ed saray agmananisia legan a sikara so onla ed saray puerta diad lawak na ministeryo. (Gawa 20:20, 21) Mipadpara, saray matatatken, payunirs, tan arum so nayarin maliket a mangipasal ed kaparan Tastasi diad lawak na ministeryo natan. Kasin nalikna yo so pankaukolan ed ontan a kipasal? Sirin diad amin a paraan et satan so kerewen tan awaten. Kasin sakey ka a matatken? Sirin gawaen so oksuyan na pangipasal ed arum diad ministeryo legan a sika so maseseg a mangipangulo ed lawak na kimeyan.
Mantultuloy a Bayuboan So Abilidad
19. Anto so nepeg tayon ipikasi nipaakar ed ministeryo tayo?
19 Saray manag-operan doktor, karpentero, tan saray arum so makapagmaliw a lalon onsiano diad panamegley na mantultuloy a panagaral tan panangiyaplika ed agamoran a pikakabat. Satan met so tua ed saray Kristianon ministros. Sirin, agaylan makana a kada dedikadon tasi nen Jehova so manbanikel a mamadaak na abilidad to bilang sakey a managbangat na maong a balita! Tan lapud saya so kimey nen Jehova, nepeg a satan so tema na magunaet iran pikakasi tayo. No kerewen tayo so tulong tan panangiwanwan na Dios, makapanmatalek itayo a bendisyonan to so maseseg a ministeryo tayo. A singa inkuan nen apostol Juan: “Antokaman a kerewen tayo so naawat tayo a manlapud [si Jehova a Dios], lapud susumpalen tayoray ganggan to tan gagawaen iray bengatlan makapaliket ed mata to.”—1 Juan 3:22.
20. Bilang Tastasi nen Jehova, anto so nepeg a determinasyon tayo legan a manasingger so anggaan na sayan sistema?
20 Legan a manasingger so anggaan na peles a marelmeng a sistema na bengabengatla, sirin, komon ta impasyan ibanikel tayo so inkasikatayo ed ministeryo. Komon ta ‘imanoen tayo so inkasikatayo tan say ibabangat tayo,’ diad dilin kilalaban tayo tan diad saraman so ontalineng ed mensahe na Panarian. On, komon ta sikatayo so mamaspasya ed panagbangat a tekep na abilidad tan seseg.
[Paimano ed Leksab]
a Alimbawa, ipangasin nengnengen so Theocratic Ministry School Guidebook tan Qualified to Be Ministers (Revised Edition), ya impalapag na Watchtower Bible and Tract Society of New York, Inc.
Anto So Nibaga Yo?
◻ Nilikud ed panagpulong, say kimey a panaggaway-babangatan so mankaukolan na anto?
◻ Akin ya ontan lan importante ‘so pangimanom ed ibabangat mo’?
◻ Anto so arum a dalan ya ontulong ed onsianon panagbangat?
◻ Panon so itulong na saray Kristianon pantitipon ed sikatayo diad pagmaliw ya onsiano tan maseseg a managbangat ed Salita na Dios?
◻ Anto so nayarin gawaen na saray mamatatken tan arum iran eksperiensiadon Tastasi no nipaakar ed lawak na ministeryo?
[Litrato ed pahina 15]
Ontulong ed sikan magmaliw a maong a managbangat so pangiretrato ed kaisipan diad saray agawa ed Biblia
[Litrato ed pahina 17]
Say managbangat ed Teokratikon Eskuelaan na Ministeryo so ontulong ed saray estudyantin nawalaan na abilidad ed kimey na Panarian