Ibabangat nen Jehova Anggad Sayan Agew
“Si Jehova [a mismo] initer to ed siak so dila na saray abangatan.”—ISAIAS 50:4.
1, 2. (a) Parad anto so angiparaanan nen Jehova ed paboriton manaaral to, tan anto so resulta? (b) Panon a binidbir nen Jesus so Lapuan na saray bangat to?
SI Jehova a Dios so sakey a Managbangat nanlapulad impagmaliw ton sakey ya Ama. Diad saginonor kayari impanrebelde pigaran ananak to, imparaan toy paboriton manaaral to, say Panguloan, parad sakey a ministeryo ed dalin. (Uliran 8:30) Mapropetikon ipaparungtal na kapitulo 50 na Isaias iyan manaaral a mangibabagan: “Si Katawan a Jehova initer to ed siak so dila na saray abangatan, pian naamtaan ko komon no panon so panamabiskeg ed saray naksawan ed panamegley na saray salita.” (Isaias 50:4) Bilang resulta na panangiyaplika ed bangat na Ama to legan a wadiad dalin, si Jesus so lapuan na pakainawaan ed amin na saramay “nasasagpotan tan nabebelatan.”—Mateo 11:28-30.
2 Dakel so ginawa nen Jesus a makapanyarin kimey legan na inmunan siglo. Nilukasan toy kamataan na saray bulag tan pinaoli to ni ingen iray inatey, ingen sikatoy manunan kabkabat na saray kapanaonan to bilang sakey a managbangat. Ontan so tawag ed sikato na saray patumbok to ontan met ed saray sumusumpa’d sikato. (Mateo 8:19; 9:11; 12:38; 19:16; Juan 3:2) Agbalot inala nen Jesus so galang ed imbangat to noagta sipapaabeban binidbir to: “Say bangat ko ag ko kien, balet kien na angibaki ed siak.” “Onong na inbangat na Ama ed siak, salitaen ko so saraya’n bengatla.”—Juan 7:16; 8:28; 12:49.
Pinagka-uliran a Siglaotan na Managbangat tan Eskuela
3. Panon ya ipapanengneng na propesiya nen Isaias so interes nen Jehova ed saramay ibabangat to?
3 Say sakey ya ekselentin managbangat so mangaalay personal, maseet, tan maaron interes ed saray eskuela to. Ipaparungtal na Isaias kapitulo 50 a si Jehova a Dios so walaan na ontan ya interes ed saramay ibabangat to. “Sikato onliing a kinabuasan,” ibabaga na propesiya, “sikato liingen to so layag ko a pandengel a singa pandengel na saray abangatan.” (Isaias 50:4) Isusuheri na say salita dia a masakbay a liliingen na sakey a managbangat iray eskuela to ed kabuasan ta pian bangatan ira. Diad pangomento ed aplikasyon na propesiya, oniay kuan na sakey ya iskolar ed Biblia: “Say ideya, et say Mananondon so magmaliw a . . . sakey a, singa panangibaga, walad eskuelaan na Dios; tan onkualipikan mangibangat ed arum. . . . Say Mesias so onkualipika, diad panamegley na panbangat na Dios, a magmaliw ya instruktor na katooan.”
4. Panon so inkiwas nen Jesus ed panangibangat na Ama to?
4 Marakep komon no saray eskuela so onkiwas ed ibabangat na instruktor da. Panon so inkiwas nen Jesus ed panangibangat na Ama to? Say kiwas to et mitunosan ed nabasa tayo ed Isaias 50:5: “Si Katawan a Jehova nilukasan to so layag ko, et agak masunggay, tan agak met binmeneg.” On, magunaet si Jesus a makaaral. Sikato, unong ed panangibaga so atentibon tuloy ed itatalineng. Sakey ni, sikatoy akaparaan a manggaway antokaman a kerewen na Ama a gawaen. Sikato so aliwan rebelyoso, imbes, inkuanto: “Aliwa a say linawak no ag say linawam so nasumpal.”—Lucas 22:42.
5. (a) Anto so mangipapanengneng ya amta la nen Jesus ed inmuna iray subok a sagmaken to ed dalin? (b) Panon ya asumpal so propesiya na Isaias 50:6?
5 Ipapanengneng na propesiya a pinakabatan so Anak ed posiblin pansumpalan ed panggawa toy linawa na Dios. Saya so nipapanengneng ed ibabaga na say abangatan: “Inbeneg ko so saray mangabil tan saray aping ko inyarap ko ed saray manbabagot na buek, agko insanib so lupak ed kibabaing tan kalupdaan.” (Isaias 50:6) Unong ya ipapanengneng na propesiya, si Jesus so trinaton siruruksa diad dalin. “Nilupdaan da so lupa to,” insulat nen apostol Mateo. “Sikato’y tinampal da.” (Mateo 26:67) Saya so agawa ed kalimaan na relihyoson papangulo ed labi na Paskua na 33 K.P. Kaimbuasan nampasakop si Jesus ed saray managpekpek, a sikatoy andi-panangasin binugbog na saray Romanon sundalo sakbay a sikatoy ipasak ed palitek pian ompatey.—Juan 19:1-3, 16-23.
6. Anto so mangipapanengneng ya agbalot abalang nen Jesus so talek to ed Managbangat to, tan panon ya atumangan iyan talek?
6 Say Anak, ya akadkauna lan akaaral a maong, so agbalot naandiay talek ed Managbangat to. Saya so ipapanengneng ed tinmumbok ya imbaga to unong ed propesiya: “Ta si Katawan a Jehova tulongan toak naani, kanian agak agolo.” (Isaias 50:7) Say talek nen Jesus ed tulong na Managbangat to so atumangan a maong. Sikatoy intandoro na Ama to, a benindisyonan na sakey a superyor a posisyon ya atagey nen amin niran ariripen na Dios. (Filipos 2:5-11) Manatalaran met iray engranden bendisyon ed sikatayo no situtulok tayon tumboken so bangat nen Jehova tan ‘ag ombeneg.’ Nengnengen tayo no panon a nitatarok ed amin itan a panangibangat ya anggad agew tayo.
Nipalaknab a Programan Panagbangat
7. Panon a gagawaen nen Jehova so panangibangat to ed dalin?
7 Singa asaglawi ti’lan akadkauna, inusar nen Jehova so mangaraldalin a Representanti to, si Jesu-Kristo, pian manumpal ed madibinon bangat legan na inmunan siglo. (Juan 16:27, 28) Naynay ya inturo nen Jesus so Salitay Dios bilang say autoridad ed bangat to, ya ipapanengneng so alimbawa parad saramay babangatan to. (Mateo 4:4, 7, 10; 21:13; 26:24, 31) Kayari to, say panangibangat nen Jehova so nagagawa ed dalin diad panamegley na ministeryo na saratan ya abangatan. Tandaan ya ingganggan nen Jesus ed sikara: “Onla kayo sirin, tan mangawa kayo na saray babangatan ed amin a naciones, . . . ya ibangat yo ra’n mangonor na amin a bengabengatla ya ingangan ko ed sikayo.” (Mateo 28:19, 20) Sanen agawa iray babangatan, saraya so nagmaliw a kabiangan na “abung na Dios, a sikato so iglesia na Dios a mabilay.” (1 Timoteo 3:15) Sikara met so aporma ed indibidual iran kongregasyon a ditan ira binangatan nen Jehova. (Gawa 14:23; 15:41; 16:5; 1 Corinto 11:16) Kasin say madibinon bangat ed ontan a paraan so mantultuloy ni anggad agew tayo?
8. Panon ya impanengneng nen Jesus a say panangipulong so nidirehi ed dalin sakbay na isabi anggaan?
8 On, ontan! Taloran agew sakbay na impatey to, impasakbay nen Jesus a sakbay na anggaan na sayan sistemay bengabengatla, wala so baleg a panangipulong. “Tan saya ya evangelio na panarian nipulong naani ed sankamundoan ya onkanan pamintuaan ed saray amin a naciones,” inkuanto, “et saman la onsabi angaan.” Intuloy a deneskribe nen Jesus so instrumenton kidirehian na sayan sankamundoan a panagpulong tan programay panagbangat. Sinaglawi to so nipaakar ed “matoor tan makabat ya aripen,” a pinagkaparalanan odino ahensya a mangitarok ed ariripen To na espiritual a tagano. (Mateo 24:14, 45-47) Uusaren la nen Jehova iyan “aripen” pian mangasikaso ed intereses na Panarian ed interon dalin.
9. Siopay manitibukel na matoor tan makabat ya aripen?
9 Natan, say matoor tan makabat ya aripen so titibukelen na nakdaan a tumatawir na Panarian. Saraya so alanaan a Kristiano, saray nakdaan ed dalin na 144,000, a ‘kien nen Cristo’ tan kabiangay ‘ilalak nen Abraham.’ (Galacia 3:16, 29; Apocalipsis 14:1-3) Panon yon nabidbiran so matoor tan makabat ya aripen? Nagkalautla et diad panamegley na kimey a gagawaen da tan ed maapit a panutumbok da ed Salitay Dios, say Biblia.
10. Antoran instrumento so uusaren na aripen a klase pian iyalibansay bangabangat nen Jehova?
10 Uusaren nen Jehova iyan “aripen” bilang say paraan na pangibabangat to ed totoo natan. Saramay kabiangan na aripen a klase so angadapta ed ngaran a Tastasi nen Jehova nen 1931. Nanlapulad saman minilyon so mililimog ed sikara tan mangaawat ed satan a ngaran tan mibibiang ed panangiyabawag na Panariay Dios. Sayan magasin, Say Panag-Bantayan Mangipapalapag na Panarian nen Jehova, so manunan instrumenton uusaren na say “aripen” diad panagbangat a kimey. Anggaman ontan, nauusar met niray arum a palapagan, pati saray libro, bokleta, brosyur, tract, tan say magasin ya Awake!
11. Antoran eskuelaan so iyaalibansa na “aripen”, tan parad anton gagala so balang sakey ed sarayan eskuelaan?
11 Niarum ni, say “aripen” so walaay nanduruman eskuelaan. Laktipen na saraya so Watchtower Bible School of Gilead, a limay-bulan a kurson mangipaparaan ed saray kalangweran a ministros parad panagmisionero’d biek-taew, tan say duay-bulan a Ministerial Training School a kurso, a mangisasanay ed anggapoy asawan mamatatken tan ministeryal ya ariripen parad espisyal a teokratikon asainmin. Wadtan met so Kingdom Ministry School, a saray Kristianon matatken tan ministeryal ya ariripen so tunggal paminsan a nibabangat ed saray responsabilidad da ed kongregasyon, tan say Pioneer Service School, a mangikinlong ed saray walad sigpot-panaon ya ebanghelisador pian magmaliw a lalon epektibo ed panagpulong da.
12. Anto so sinimban kabiangay programay panagbangat?
12 Sananey nin kabiangay programay panagbangat et say limaran miting a sinimban gagawaen ed masulok nen say 75,500 a kongregasyon na totoo nen Jehova ed sankamundoan. Kasin sikayoy sigpot a nagugunggunaan manlapud sarayan miting? Diad inka-atentibo yo ed niiiter ya instruksion, kasin ipapanengneng yon talagan sisiaen yo a sikayo so, singa panangibaga et walad eskuelaay Dios? Kasin say iyaaligwas yo ed espiritual so mangipapabitar ed arum a sikayo so walaan na “dila na saray abangatan.”—Isaias 50:4; 1 Timoteo 4:15, 16.
Nababangatan ed Saray Miting ed Kongregasyon
13. (a) Anto so sakey ya importantin dalan ya ibabangat nen Jehova iray totoo to natan? (b) Panon tayon nipanengneng so apresasyon tayo parad Say Panag-Bantayan?
13 Nagkalautlan ibabangat nen Jehova so totoo to diad panamegley na sinimban panagaral na Biblia, ya uusaren so Say Panag-Bantayan bilang katulongan ed panagbangat. Kasin momoriaen yo iyan miting bilang pasen a kibangatan yo nipaakar ed si Jehova? Anggaman say Isaias 50:4 so manunan onaaplika ed si Jesus, satan so onaplika met ed amin na saramay makagamor ed inkasikara na saray probisyon na Dios ed pakaawat na “dila na saray abangatan.” Sakey a dalan a nipanengneng yon papablien yo so Say Panag-Bantayan et say panbasa yo ed kada paway bektaman a posibli kayari impakaawat yo. Insan, sano Say Panag-Bantayan so naaralan ed kongregasyon, nipanengneng yo so apresasyon ed si Jehova diad pagmaliw a presenti tan akaparaan a mangiyabawag ed publiko ed ilalo yo.—Hebreos 10:23.
14. (a) Akin a say pankomento ed saray miting so importantin pribilihyo? (b) Antoran nengneng na komento na saray ugugaw ni so makapaseseg a tuloy?
14 Kasin aapresyaen yo itan diad pankokomento yo diad saray miting, a mibibiang kayo’d engranden programay panagbangat nen Jehova? Anggapoy panduaruwa ed satan, say pankomento ed saray miting so importantin dalan a makapansasagyatan “ed sakey tan sakey ed aro tan dia ed saray maabig a gawa.” (Hebreos 10:24, 25) Kasin saray anak so walaan na biang ed sayan programa na panangibangat met? On, nayarian da. Saray impapuson komento na saray ugugaw ni so mabetbet a makapaseseg ed saray maedad la. No maminsan, saray balo ni ed saray miting tayo so napapakiwas na saray komentoy ugugaw pian ipapuson nagkalalo so katuaay Biblia. Iyuugali na arum a kalangweran a direktan basaey komento ra manlapud parapo odino uliten itan kayari pangiyesaes na sakey a susto-la’d-edad. Anggaman ontan, makapaseseg a tuloy sano niparaan a maong iray komento ra. Say ontan a komento et talagan pagalangan toy Engranden Instruktor tayo tan say nitandoron programay panagbangat.—Isaias 30:20, 21.
15. Antoy nagawaan na saray ateng ta pian natulongan iray anak a nagkalalon epektibon mankomento?
15 Sakey a gayaga so pakanengneng ed ananak a labay day mibiang ed pangidayew ed Dios tayo. Pinabli nen Jesus iray balikas na dayew manlapud saray malangwer. (Mateo 21:15, 16) Oniay naimatonan na sakey a Kristianon matatken: “Sanen siak so ugaw ni, labay koy mankomento ed Panagaral na Panag-Bantayan. Kayari impanulong ed siak a manparaan ed pankomento, kinaukolan nen amak ed siak ya ipasal kon ikomento itan ya ag-onkulang ed maminpiton danay.” Nayarin diad panagaral na pamilya yo ed Biblia et natulongan yoran atateng iray anak yo pian manparaan a mankomento ed dili ran salita ed pinili iran parapo diad Say Panag-Bantayan. Tulongan yoran mangapresya ed baleg a pribilihyo ran mibiang ed programay panagbangat nen Jehova.
16. Anto so nagmaliw a gungguna na Eskuelaan na Teokratikon Ministeryo, tan sioparay nayarin manpalista ed eskuelaan?
16 Say panangibangat met ed arum iran miting Kristiano so nepeg met ya ikdan na seryoson panangonsidera, nampara ed saramay apribilihyoan a mangipasabi ed impormasyon tan ed saramay ontalineng ed niparungtal ya instruksion. Diad masulok a 50 taon la natan, uusaren nen Jehova so sinimban Eskuelaan na Teokratikon Ministeryo pian ipasal so minilyon a lalaki tan bibii a mangiparungtal ed mensahe na Panarian a lalon epektibo. Saramay aktibon mililimog ed saray kongregasyon so nayarin manpalista, pati ed totoon agano niran ginmapon inmatendi ed saray miting, basta sikaray manbibilay a mitunosan ed saray Kristianon prinsipyo.
17. (a) Diad anton gagala a nagkalautlan niletneg so Miting Publiko? (b) Antoray bengatlan nepeg a tandaan na saray mapublikon espiker?
17 Sananey nin abayag lan kabiangay programay panagbangat et say Miting Publiko. Unong ya ipapanengneng na termino, sayan miting so niletneg nagkalautla pian nikabisadoy aliwan-Tastasi iray manunan bangat ed Biblia. Kanian, say espiker so nakaukolan a mangiparungtal ed impormasyon ta pian natalosan na saramay onderengel ed mensahe diad onunan pankanawnawa. Kabaliksan na saya so pangipaliwawa’d saray termino a singa say “arum a karnero,” “agagi,” tan “nakdaan,” terminon nayarin agnatalosan na aliwan-Tastasi. Lapud saray onaatendi ed Miting Publiko so nayarin walaan na saray sisiaen odino istiloy kabibilay a mapatnag ya agmitunosan ed Kasulatan—anggaman naawat ed sosyedad natan—nepeg a lawas magmaliw a mataktika so espiker tan agbalot ludlureyen iratan a sisiaen odino istiloy kabibilay.—Ipareng so 1 Corinto 9:19-23.
18. Anto niray walan sinimban miting ed kongregasyon, tan antoray gagala na saratan?
18 Say Panagaral na Libro ed Kongregasyon so sakey a miting a ditan et saray palapagan so niparaan ed silong na panangidirehi na matoor tan makabat ya aripen a naaralan ed kada simba a kaibay Biblia. Say libron Revelation—Its Grand Climax At Hand! so kaplesan ya aaralen ed dakel a daldalin. Say Miting ed Serbisyo so adesinyo pian kinlongan toy totoo nen Jehova a nawalaan na sigpot a pibibiang diad pangipulong na maong a balitay Panarian tan ed panggaway babangatan.—Mateo 28:19, 20; Marcos 13:10.
Nababangatan ed Ankabaleg Iran Miting
19. Antoran ankabaleg a pandaragup so iyuuksoy na “aripen” ed kada taon?
19 Diad masulok a sanlasus a taon, say ‘matoor ya aripen’ so mangiyuuksoy na saray kumbension tan asamblea parad kibangatan tan espisyal a kapasesegan na tuan Kristianos. Talora ed ontan iran ankabaleg a miting so nagagawa natan ed kada taon. Wadtan so sakey-agew ya asamblea ya aatendian na sakey a grupo na saray kongregasyon a titibukelen na sakey a sirkito. Legan na taon, kada sirkito so walaan met na duay-agew a pandaragup a tatawagen a sirkiton asamblea. Niarum ni, wala so pandaragup a tatawagen a distriton kumbension, ya aatendian na pigaran sirkito. Panapanaon et wala so internasyonal iran kumbension. Sarayan ankabaleg a pandaragup a kaiba iray bisitan Tastasi manlapud dakel a bansa so talagan makapabiskeg na pananisia ed totoo nen Jehova!—Ipareng so Deuteronomio 16:16.
20. Anto so ag-anguman a nidadanet ed saray ankabaleg a pandaragup na Tastasi nen Jehova?
20 Nen 1922, sanen ngalngali 10,000 a totoo so nantitipon ed Cedar Point, Ohio, E.U.A., saray delegado so asagyat ed panamaseseg na espiker: “Saya so agew na amin ya agew. Nia, manuuley lay Ari! Sikayoray representanti ton manangibalita. Kanian iyabawag, iyabawag, iyabawag, so Ari tan say panarian to.” Ag-anguman so panangidanet ed panagpulong ed saratan ya ankabaleg a kumbension. Alimbawa, diad internasyonal a kumbension diad New York City nen 1953, inyanunsio so kiletneg na sakey a programay panangipasal ed panagkab-kaabungan ed amin a kongregasyon. Say panangimplemento na satan so walaan na positibon tuloy ya epekto ed panagpulong na Panarian ed dakel a daldalin.
Nababangatan na Dios pian Manbangat
21. Anton pribilihyo so labay tayon awaten, ya agsasaewey gagala to?
21 Maseguro, si Jehova so walaay makapakelaw a programay panagbangat diad sankadalinan natan! Amin a manganamot ed satan so nabangatan na Dios, on, magmaliw a kabiangan na saramay naikdan na “dila na saray abangatan.” Agaylan pribilihyo so kiwala, a singa panangibaga, diad eskuelaan na Dios! Ingen, sano aawaten iyan pribilihyo, agtayo komon sasaewey gagala to. Imbangat nen Jehova si Jesus ta pian nibangat toray arum, tan imbangat nen Jesus iray babangatan to ta pian gawaen da met so mipadparan kimey a singa ed ginawa to balet ed nagkalalon babaleg a laknab. Mipadpara, sikatayoy nipapasal ed engranden programay panagbangat nen Jehova diad gagalan bangatay arum.—Juan 6:45; 14:12; 2 Corinto 5:20, 21; 6:1; 2 Timoteo 2:2.
22. (a) Antoy niwalan problema di Moises tan Jeremias, balet panon iman ya aresolbi? (b) Anton panamaseguro so nayarin niwala ed sikatayo a seguroen na Dios a say panangipulong na Panarian et nasumpal?
22 Kasin ibabaga yo so singa ed imbaga nen Moises, ‘aliwa ak a toon maong a mansalita,’ odino a singa ed imbaga nen Jeremias, “Agko amta so mansalita”? Tulongan kayo nen Jehova a singa ed impanulong to’d sikara. “Onla ka sirin natan ta wala ak ed sangim,” imbaga to’d si Moises. Tan inkuan to’d si Jeremias: “Agka antakot . . . wala ak ed sika.” (Exodo 4:10-12; Jeremias 1:6-8) Sanen labay na saray relihyoson pangulo ya agpansalitaen iray babangatan to, inkuan nen Jesus: “No saraya ag ira komon onesel, saray bato maningal ira.” (Lucas 19:40) Balet agkaukolan ya onkelyaw iray bato ed saman, tan agda kaukolan a gawaen itan natan lapud uusaren nen Jehova so dila na saray abangatan to pian mangipasabi ed mensahe na Panarian to.
Kasin Naebatan Yo?
◻ Anton pinagka-uliran a siglaotan na Managbangat tan eskuela so nipapabitar diad kapitulo 50 na Isaias?
◻ Panon a susumpalen nen Jehova so sakey a malaknab a programay panagbangat?
◻ Antoray pigaran kabiangan na programa na panagbangat nen Jehova?
◻ Akin ya engranden pribilihyo so pibiang ed programay panagbangat nen Jehova?
[Litrato ed pahina 16]
Saray impapuson komento na saray anak so mabetbet a makapaseseg ed saray maedad la