Nibabangat a Manggawa na Linawa nen Jehova
“Ibangat mo ak a mangunor na linawam, ta sika so Dios ko.”—SALMO 143:10.
1, 2. (a) Kapigan a sikatayo so nepeg a nibangat, tan tekep na anton realistikon panmoria? (b) Akin a say pagmaliw a nibabangat nen Jehova so importanti?
KADA agew a mabilay tan aktibo so sakey a too, sikato so nabangatan na bengatlan makagungguna. Tua itan ed kipapasen mo, tan tua met itan ed arum. Balet anto so nagawa diad ipapatey? Imposibli so pakabangatan na dinanman odino panaral diad ontan a kipapasen. Malinew ya ibabaga na Biblia a saray inatey et “agda amta so bengatla.” Anggapo so pikakabat ed Sheol, say kaslakan a lubok na katooan. (Eclesiastes 9:5, 10) Kasin kabaliksan na saya a say kibabangat, panitipon tayo na pikakabat, so kaapaan? Mandedependi itan ed no anto so nibabangat ed sikatayo tan no panon tayon usaren itan a pikakabat.
2 No nibabangat labat ed sikatayo no anto so minumundo, anggapo so magnayon ya arapen tayo. Balet, makapaliket ta minilyon a totoo ed amin a nasyon so nababangatan na madibinon linawa tekep na panmoria ed andi-anggaan a bilay. Mantegteen iyan basiyan na ilalo ed kibabangat ed si Jehova, say Subol na manangiter-bilay a pikakabat.—Salmo 94:9-12.
3. (a) Akin a nibaga a si Jesus so sankaunaan ya estudyante na Dios? (b) Anton panamaseguro so walad sikatayo a saray totoo so ibangat nen Jehova, tan diad anton resulta?
3 Say panguloan ya Anak na Dios, bilang say inmunan estudyante To, so nibangat a gawaen to’y linawa na Ama to. (Uliran 8:22-30; Juan 8:28) Ontan met, inbaga nen Jesus a nilaksan totoo so ibangat na Ama to. Antoran iilaloan so niwala parad sikatayo iran manaaral nipaakar ed Dios? Inkuan nen Jesus: “Nisulat ed saray profetas, ‘Et nabangatan ira ya amin ed Dios.’ Balang sakey ya akadngel ed Ama, tan akaaral, ondago ed siak. . . . Tua, tua kuan ko ed sikayo, Say manisia walaan na maando a bilay.”—Juan 6:45-47.
4. Panon a naaapektaan na madibinon bangat iray minilyon a totoo, tan anton iilaloan so walad sikara?
4 Angaon si Jesus so Isaias 54:13, a nipaarap ed simbolikon asawa na Dios, say mangatatawen a Zion. Walaan na nikabkabiig a kiyaaplikaan itan a propesiya ed saray ananak to, say 144,000 a nailalak-ed-espiritun babangatan nen Jesu-Kristo. Say nakdaan na saraman ya espiritual ya ananak so aktibo natan, a mangidadaulo ed sakey ya englobon programa na panagbangat. Bilang resulta, minilyon na arum a tugyopen na “sakey a baleg ya ulop” so nagugunggunaan met diad pagmaliw a nibabangat nen Jehova. Walaan ira na nikadkaduman ilalon tuloytuloy a panaral ya agbalot pakseten na ipapatey. Panon ya ontan? Bueno, sikaray akadasig pian niliktar ed maples ya onsasabin ‘baleg a kairapan’ tan pian panggayagaan so andi-anggaan a bilay ed paraison dalin.—Apocalipsis 7:9, 10, 13-17.
Lalon Panangidanet ed Panggaway Linawa na Dios
5. (a) Anto so tinaon a teksto parad 1997? (b) Anto so liknaan tayo nipaakar ed iyaatendi ed saray Kristianon miting?
5 Legan na 1997, diad masulok ya 80,000 a kongregasyon ed sankamundoan, sinononot so Tastasi nen Jehova ed manangilukas iran balikas na Salmo 143:10: “Ibangat mo ak a mangunor na linawam.” Satan so magmaliw a tinaon a teksto parad 1997. Saratan a salita, a sankaimanon tuloy diad saray Kingdom Hall, so onkanan panonot a say sankatalonggaringan a pasen a pangawatan na madibinon edukasyon et diad saray miting na kongregasyon, a pakagunggunaan tayo ed peles a programan panagbangat. Sano miuulop tayo ed agagi diad saray miting pian nabangatan na Engranden Managbangat tayo, nalikna tayo so singa samay alikna na salmista, ya angisulat: “Nanliket ak nen saman nen imbaga ra ed siak: ‘Onla itayo ed abung nen Jehova.’”—Salmo 122:1; Isaias 30:20.
6. Diad saray salita nen David, anto so bibidbiren tayo?
6 On, pilalek tayon nabangatan pian gawaen so linawa na Dios imbes a say linawa na kabusol tayon Diablo odino say linawa na saray ag-ayadyarin totoo. Kanian, singa si David, bibidbiren tayo so Dios a dadayewen tan panlilingkoran tayo: “Ta sika so Dios ko. Say espiritum maong; ibasbas moak ed loob na dalin na kaptekan.” (Salmo 143:10) Imbes a midupong ed matitila a totoo, nilabay nen David so pasen a pakakagawaan ed panagdayew ed si Jehova. (Salmo 26:4-6) Tekep na espiritu na Dios a mangidirihe ed saray basbas to, makapanakar si David ed dalan na inkatunong.—Salmo 17:5; 23:3
7. Panon ya onkikiwas so masanton espiritu ed Kristianon kongregasyon?
7 Pinaseguroan na Babaleg a David, si Jesu-Kristo, so apostoles to ya ibangat ed sikara na masanton espiritu so amin a bengatla tan ipanonot na saya so amin a bengatlan imbaga to ed sikara. (Juan 14:26) Manlapud Pentecostes a manpatuloy, progresibon ipaparungtal nen Jehova so “saray kaaralman na bengatla na Dios” a lugan na nisulat a Salita to. (1 Corinto 2:10-13) Gagawaen to iya ed panamegley na sakey a nanengneng a paralanan a tinawag nen Jesus a “matoor tan makabat ya aripen.” Itatarya na saya so espiritual a taganon kokonsideraen ed panagbangat a programa ed saray kongregasyon na totooy Dios ed sankamundoan.—Mateo 24:45-47.
Nibabangat so Linawa na Dios ed Saray Miting Tayo
8. Akin a say pibibiang ed Panagaral ed Panag-Bantayan et makanakana?
8 Say materyal diad sinimban Panagaral na Panag-Bantayan ed kongregasyon so mabetbet a manasaglawi ed panangiyaplika ed saray prinsipyo na Biblia. Maseguron ontutulong iya ed sikatayo pian natalonaan iray kapagaan ed bilay. Nakokonsidera met diad arum iran panagaral so aralem iran espiritual a katuaan odino saray propesiya ed Biblia. Agaylan karakel so nibabangat ed sikatayo legan na saratan a panagaral! Napapano iray Kingdom Hall ed dakel a daldalin parad sarayan miting. Balet diad pigaran nasyon, inmabeba so bilang na onaatendi ed miting. Akin kasi? Agkasi aabuloyan na arum so sekular iran trabaho ya onsalet ed regular a pititipon da pian “manaayatan ed aro tan diad ed saray maabig a gawa”? Odino agkasi dakel ya oras so uusaren ed sosyal iran aktibidad odino diad panagbantay na telebisyon, a pagmamaliwen dan masyadon lan okupado so eskedyul da pian onatendi ed saray miting? Nonoten so apuyanan a simbawa ed Hebreos 10:23-25. Agta nagkalalon importanti natan so pandoroypo a mankakasakey parad madibinon panangibangat legan a “nanengneng yo a manasingger so agew”?
9. (a) Panon tayon nakinlongan na Service Meeting diad ministeryo? (b) Anto so kaukolan ya awawey tayo nipaakar ed panagtasi?
9 Sakey ed saray sankamanunaan a responsabilidad tayo et say panaglingkor bilang ministros na Dios. Adesinyo so Service Meeting pian nibangat tayon epektibon nasumpal iya. Naaaralan tayo no panon ya asinggeran so totoo, no anto so ibaga, say paraan na ikiwas sano wala so paborablin ebat, tan anggan say gawaen sano ipulisay na totoo so mensahe tayo. (Lucas 10:1-11) Legan a nasisingbat tan nidedemostra iray epektibon metodo ed sayan sinimban miting, lalon akaparaan tayo a sabien so totoo aliwan sano onla labat ed panagkabkaabungan noagta ontan met sano manpupulong diad saray lansangan, diad saray paradaan, diad panpublikon luluganan, diad saray airport, diad saray pasen na negosyo, odino diad saray eskuelaan. Mitukoyan ed kerew tayon, “Ibangat mo ak a mangunor na linawam,” labay tayon anamoten so amin a pankanawnawa pian gawaen so impaseseg na Katawan tayo: “Ontan met pasindagen yo komon so silew yo ed arap na saray totoo, pian . . . galgalangen da so Ama yo a wala ed tawen.”—Mateo 5:16.
10. Panon tayon peteg a natulongan ‘iray makana’?
10 Nibabangat itayo met ed saratan a miting ed kongregasyon pian manggawa na babangatan ed arum. Bektaman ya aromog so interes odino akapalima na literatura, say getma tayo sano manggawa na panagpawil et say pangigapo na saray panangiyaral na Biblia ed ayaman. Diad sakey a pantalos, saya so mipadparad ‘idawes [na saray babangatan] ed saray makana’ pian bangatan ira ed saray bengatlan inganggan nen Jesus. (Mateo 10:11; 28:19, 20) Diad impakawalaan na ekselenti iran katulongan, a singa say libron Pikakabat a Mangitonton ed Andi-Anggaan a Bilay, peteg ya akinlongan itayon maong pian sumpalen a nagnap so ministeryo tayo. (2 Timoteo 4:5) Kada simba legan ya onaatendi kayo ed Service Meeting tan Teokratikon Eskuelaan parad Panagministro, panggunaetan a talosan tan usaren so makatulong iran punton mangirekomenda ed sikayo bilang sakey ed saray nagnap a kualipikadon ministro na Dios, a manggagawa na linawa to.—2 Corinto 3:3, 5; 4:1, 2.
11. Panon a nidemostra na arum so pananisia ed saray salita a naromog ed Mateo 6:33?
11 Linawa na Dios ya ‘anapen tayon . . . unona so panarian tan say inkatunong to.’ (Mateo 6:33) Tepetan yo pay inkasikayo, ‘Panon kon niyaplika iyan prinsipyo no saray kakaukolanen ed sekular a trabahok [odino ed say asawak] et onsalet diad iyaatendi ed saray miting?’ Aalaen na dakel a matatken ed espiritual so kundang pian itongtong so pamaakaran ed saray amo ra. Impaamta na sakey a sigpot-panaon a ministro ed amo to a kaukolan ton nawalaay libren panaon kada simba pian makaatendi ed saray miting na kongregasyon. Inabobonan to so kerew. Balet lapud mausisa ed no anto so nagagawa diad saray miting, kinerew ton onatendi. Nadngelan to diman so pakabat nipaakar ed sakey a manasingger a distriton kombension. Bilang resulta, inyareglo na samay amo misanagewan ed kombension. Anton leksion so naalam manlapud sayan alimbawa?
Nibabangat so Linawa na Dios na Maridios ya Atateng
12. Pian nibangat iray ananak ed linawa nen Jehova, anto so nepeg a gawaen na Kristianon atateng tekep na anos tan inkamasekder?
12 Aliwa labat a saray miting ed kongregasyon tan kombension so mogmon probisyon parad kibabangat a gawaen so madibinon linawa. Niganggan ed atateng ya ipasal, disiplinaen, tan pabalegen daray anak da a mangidayew ed si Jehova tan gawaen so linawa to. (Salmo 148:12, 13; Uliran 22:6, 15) Say panggawa na ontan et kakaukolanen toy pangitagar ed saray “angkelag” tayo ed saray miting pian sikaray ‘makarengel tan makaaral,’ balet komusta met so pangibabangat ed sikara na masanton sulsulat diad ayaman? (Deuteronomio 31:12; 2 Timoteo 3:15) Sinononot ya inggapo na dakel a pamilya iray regular a programan pampamilyan panagaral na Biblia, balet ag-abayag et inabuloyan dan saraya et aliwa lan maparanay tan nitunda la. Naeksperiensia yo ta la so ontan? Isipen yo kasin say ontan a nirekomendan regular a panagaral et agmatukoy odino say sirkumstansya na pamilya yo et duman tuloy ya agnagawaan iya ed kipapasen yo? Antokaman so situasyon, ipangasi yo pan atateng a repasoen iray maabig ya artikulon “Say Mayaman Ya Espiritual a Tawir Tayo” tan “Say Tumang na Inkamapilit” ed Say Panag-Bantayan na Agosto 1, 1995.
13. Panon a nagunggunaan iray pamilya diad pangonsidera ed inagew-agew a teksto?
13 Papasesegen iray pamilya ya iyugali so pangonsidera ed inagew-agew a teksto manlapud Usisaen so Kasulatan ya Inagew-agew. Say pambasa lambengat na teksto tan saray komento so maabig, balet say paningbat ed teksto tan pangiyaplika ed satan so lalon makagungguna. Alimbawa, no kokonsideraen so Efeso 5:15-17, NW, nayarin makapankatunongan iray membro na pamilya no panon dan ‘saliwen so pankanawnawan panaon’ parad personal a panagaral, pibiang ed arum a nengneng na sigpot-panaon a ministeryo, tan pangasikaso ed arum a teokratikon asainmin. On, say sakey a pandiskusyon na pamilya ed inagew-agew a teksto so mangitonton ed sakey odino dakel a “talosan [a nagkalalo ni] no anto so linawa na Katawan.”
14. Anton nengneng iran managbangat so ibabaga na Deuteronomio 6:6, 7 a nepeg a pagmaliwan na saray atateng, a mankakaukolan na anto?
14 Nepeg a magmaliw a maseet a managbangat iray atateng ed saray anak da. (Deuteronomio 6:6, 7) Balet aliwa itan a basta pamaakaran na panamilin odino panangiganggan ed anak da. Kaukolan ya ontalineng met so ama tan ina, diad ontan et lalon naaamtaan iray bengatlan kaukolan a nipaliwawa, nipalinew, niyilustra, odino nidanet. Diad sakey a Kristianon pamilya, nisagyat na atateng so lukas a pitatalosan diad impamaseseg ed saray anak dan mantepet ed saray bengatlan agda natalosan odino sengegan na panpapagaan. Diad ontan et naaralan da a say tin-edyer ya anak a laki et naiirapan a talosan ya andiay gapoan si Jehova. Niusar na atateng so impormasyon manlapud saray publikasyon na Watch Tower Society a mangipapanengneng a say panaon tan liwang so bibidbiren bilang andigeter. Kinmana itan a mangiyilustra ed punto, tan amenek itan ed anak da. Kanian ipanaon ya ebatan a malinew tan manlapud Kasulatan iray tepet na ananak yo, a tulongan iran talosan a say panaral a gawaen so linaway Dios so mas makapenek a tuloy. Anto ni so nibabangat natan ed totoo na Dios—malangwer man odino matatatken?
Nibabangat a Mangaro tan Milaban
15. Kapigan a nayarin nasubok so inkapuro na inaagin aro tayo?
15 Mitukoyan ed balon ganggan nen Jesus, sikatayo so “binangatan la na Dios a mangaro ed sakey tan sakey.” (1 Tesalonica 4:9) Sano marendeen tan onkukurang a maabig iray bengatla, nayarin liknaen tayon naaaro tayon amin so agagi tayo. Ingen anto so nagawa sano onlesa iray personal ya agpantatalosan odino sikatayo so naopendi lapud nibaga odino agawa na arum a Kristiano? Diad sayan punto et nasubok so inkapuro na aro tayo. (Ikompara so 2 Corinto 8:8.) Anto so ibabangat ed sikatayo na Biblia a gawaen ed ontan iran situasyon? Say sakey a bengatla et say pangisekar ya ipanengneng so aro ed sankasigpotan a pantalos. (1 Pedro 4:8) Imbes ya onnengneng tayo ed dilin paninteresan, onsanok ed angkelag iran kakulangan, odino say panem-em na sakit na linawa, nepeg tayon pankimeyan a sakbongan na aro so dakel a kasalanan. (1 Corinto 13:5) Amta tayon saya so linawa na Dios, lapud satan so ibabangat na Salita to.
16. (a) Diad anton nengneng na pibabakal so nibabangat ed saray Kristiano a pibiangan? (b) Panon itayon nakikinlongan?
16 Anggaman dakel so agmakapangitukoy ed aro tan pibabakal, say onsaginonor et bengatlan nibabangat ed sikatayo, balet diad sakey a nikaduman nengneng na pibabakal. Binidbir nen David so paniilalo to’d si Jehova a mangibangat ed sikato no panon ton sumpalen so pibabakal to, anggaman diad panaon to et laktipen na satan so literal a pilalaban ed kakabusol na Israel. (1 Samuel 17:45-51; 19:8; 1 Arari 5:3; Salmo 144:1) Komusta met so pilalabanan tayo natan? Saray ayura tayo so aliwan silalaman. (2 Corinto 10:4) Espiritual a pilalaban so kien tayo, no iner et kaukolan itayon nakinlongan na espiritual ya armas. (Efeso 6:10-13) Diad panamegley na Salita to tan say atiptipon a totoo to, ibabangat itayo nen Jehova pian mibakal a matalona ed espiritual a pilalaban.
17. (a) Antoran taktika so uusaren na Diablo pian nisuwawi itayo? (b) Anto so makabat tayon paliisan?
17 Diad makapalikdo, masilib iran dalan, mabetbet ya uusaren na Diablo iray elemento na sayan mundo, saray apostata, tan arum niran sumusumpa’d katuaan pian isuwawi itayo ed ag-importanti iran bengatla. (1 Timoteo 6:3-5, 11; Tito 3:9-11) Singano nanenengneng ton daiset la so pankanawnawa ton talonaan itayo diad panamegley na direkta, parungtalan a panangataki, kanian sasalien to itayon tiroren a gawaen ton nibalikas tayon naynay so panrereklamoan tan say makulangkulang iran pananepet, ya andiay espiritual a kablian. Bilang aliston mibabakal, nepeg itayon manalerto ed ontan iran kapeligroan legan ya aarapen tayo so parungtalan iran panangataki.—1 Timoteo 1:3, 4.
18. Anto so peteg a nalalanor ed agla panbilay parad inkasikatayon dili?
18 Agtayo iyaalibansa iray pilalek na totoo odino say linawa na saray nasyon. Ibabangat itayo nen Jehova ed panamegley na alimbawa nen Jesus a kaukolan itayon manbilay aliwa lan parad inkasikatayon dili; imbes, kaukolan itayon naarmasan la na parehon kanonotan a walad si Kristo Jesus tan manbilay parad linawa na Dios. (2 Corinto 5:14, 15) Nen saman, nayarin nanbilay itayo ed sakey ya alablabas, patapon a bilay, a dadaraken so mablin panaon. Nabibidbiran iyan marelmeng a mundo ed maingal a panliliket, panagbuanges, tan imoralidad. Natan ta nibabangat itayo a gawaen so linawa na Dios, agta misalsalamat itayon nibiig ed sayan abulok a mundo? Kanian mibakal tayo sirin ed impasyan pilalaban ed espiritual a paraan pian napaliisan tayoy pakalanor ed saray makatilol a minumundon agamil.—1 Pedro 4:1-3.
Nibabangat Itayon Gunggunaan so Inkasikatayon Dili
19. Say kibabangatan ed linawa nen Jehova tan insan panggawa ed satan so mangitonton ed antoran gungguna?
19 Importantin bidbiren a say kibabangat tayon gawaen so linawa nen Jehova so makagunggunan tuloy ed sikatayo. Natalosan, nepeg tayon gawaen so betang tayo diad maapit a panangimano pian makaaral tan insan tumboken iray instruksion a niiiter ed sikatayo ed panamegley na Anak to ontan met ed panamegley na Salita to tan say atiptipon a totoo to. (Isaias 48:17, 18; Hebreos 2:1) Diad panggawa tayo ed satan, napabiskeg itayon ontalindeg a masekder ed sayan makadesyang iran panaon tan onsuba ed saray bagyon onsabi. (Mateo 7:24-27) Anggan natan, napaliket tayo so Dios diad panggawa na linawa to tan napaseguroan itayon naebatan iray pikakasi tayo. (Juan 9:31; 1 Juan 3:22) Tan naeksperiensia tayo so puron liket.—Juan 13:17.
20. Diad anto so maabig a dalepdepen legan a nanengneng tayo so tinaon a teksto diad entiron 1997?
20 Legan na 1997, mabetbet itayon nawalaan na pankanawnawan basaen tan konsideraen so tinaon a teksto, Salmo 143:10: “Ibangat moak a mangunor na linawam.” Legan tayon gagawaen iya, usaren tayo sirin so arum a pankanawnawa a molimolien iray probisyon a ginawa na Dios ed sikatayo pian nibangat, a singa nidatak ed tagey. Tan usaren tayo itan a pandalepdep ed saratan a salita bilang sakey a manangiliing pian onkiwas a tuloytuloy unong ed satan ya ey-ey, a nakabatan a say “mangonor ed linawa na Dios onsiansia lawas.”—1 Juan 2:17.
Panon Yon Ebatan?
◻ Siopa natan iray nibabangat a manggawa ed linawa nen Jehova?
◻ Panon tayon apektaan na Salmo 143:10 legan na 1997?
◻ Panon itayon nibabangat a manggawa ed linawa nen Jehova?
◻ Anto so kakaukolanen ed saray Kristianon atateng diad panbangat ed ananak da?