Si Jehova​—Sakey a Dios a Manbabangat

“Nabangatan ira ya amin ed Dios [Jehova, NW].”​—JUAN 6:45.

1. Anto so gagawaen nen Jesus ed Capernaum?

KAPKAPANGGAWA lambengat nen Jesu-Kristo na saray milagro tan natan et nanengneng a manbabangat diad sakey a sinagoga ed Capernaum, asingger ed Dayat na Galilea. (Juan 6:1-21, 59) Dakel so ag-anisia sanen kuanton: “Linmasor ak a nanlapu ed tawen.” Inngorongoro ra: “Ag ta sikato ya si Jesus, ya anak nen Jose, a say ama to tan ina to kaba’tayo? Panon so pangibaga to natan Siak linmasor ak a nanlapu ed tawen?” (Juan 6:38, 42) Diad impamaat ed sikara, inyabawag nen Jesus: “Angapo so too a makadago ed siak, likod no say Ama ya angibaki ed siak sikato so yasinger to; et sikato paolien ko ed bilay ed kaonoran ya agew.”​—Juan 6:44.

2. Anto so walan basiyan parad panisia’d sipan nen Jesus nipaakar ed kioli?

² Agaylan makapakelaw a sipan​—kikioli diad kaunoran ya agew, sano manguuley lay Panarian na Dios! Napanisiaan tayo iyan sipan lapud gagarantiyaan itan na Ama, si Jehova a Dios. (Job 14:13-15; Isaias 26:19) On, si Jehova, a manbabangat a saray inatey so napaoli, so “sankabalgan a managbangat ed amin.” (Job 36:22, Today’s English Version) Diad pangipapaimano’d panagbangat nen Ama to, oniay tinmumbok ya imbaga nen Jesus: “Nisulat ed saray profetas, et nabangatan ira ya amin ed Dios [Jehova, NW].”​—Juan 6:45.

3. Antoran tepet so konsideraen tayo?

³ Maseguro, talagan sakey a pribilihyo so pakapibilang ed saramay angisulatan nen propeta Isaias na onia: “Amin iray anak mo nibangat ira ed Jehova.” (Isaias 54:13) Nayari kasin magmaliw tayon ontan? Sioparay nagmaliw a singa ananak to tan angawat ed saray bangat to? Antoray makanan bangat nen Jehova a nepeg tayon amtaen tan onkiwas unong ed satan pian naawat so bendisyon to? Panon so impanbangat nen Jehova diad apalabas, tan kasin sikatoy manbabangat ed parehon paraan natan? Saraya so tepet a konsideraen tayo.

Ama, Managbangat, Asawa

4. Sioparay inmunan ananak nen Jehova ya angawat na saray bangat to?

⁴ Si Jehova so inmunan nagmaliw a namparan Ama tan Managbangat sanen pinalsa toy bogbogtong ya Anak to, say sakbay a nagmaliw a toon Jesus. Sayan sakey so tinawag a “say Salita” lapud sikatoy Manunan Pinagkasangiyan nen Jehova. (Juan 1:1, 14, NW; 3:16) Say Salita so nanlingkor “ed abay [na Ama] to, singa uloen a komikimey,” tan akaaral a maong manlapud panagbangat nen Ama to. (Uliran 8:22, 30) Diad tua, sikatoy nagmaliw ya Ahenti, odino instrumento, a diad panamegley to pinalsa na Ama so amin nin bengatla, pati ‘saray [espiritun] anak na Dios.’ Maseguron nanggayagaan day impanbangat na Dios ed sikara! (Job 1:6; 2:1; 38:7; Colosas 1:15-17) Diad saginonor, pinalsa so inmunan too, si Adan. Sikato met so “anak na Dios,” tan ipaparungtal na Biblia a sikatoy imbangat nen Jehova.​—Lucas 3:38; Genesis 2:7, 16, 17.

5. Anton mablin pribilihyo so abalang nen Adan, ingen sioparay imbangat nen Jehova, tan akin?

⁵ Makapaermen, lapud sigagalan intunganga to et abalang nen Adan so pribilihyon pantultuloy a pagmaliw ya anak na Dios. Saray kapolian to, sirin, so agmakapangibaga a sikaray walaay siglaotan bilang ananak na Dios, lapu lambengat ed inkiyanak da. Ingen, imbangat nen Jehova so ag-ayadyarin totoo a maniilalo ed sikato parad panangiwanwan. Alimbawa, si Noe so apaneknekan a “sakey a too a maptek” ya “akiolop-olop ed Dios,” tan diad ontan et imbangat nen Jehova si Noe. (Genesis 6:9, 13–Ge 6:13 anggad 7:5) Diad katutulok to, pinaneknekan nen Abraham so inkasikato bilang “kaaro na Dios,” tan sirin sikato met so imbangat nen Jehova.​—Santiago 2:23; Genesis 12:1-4; 15:1-8; 22:1, 2.

6. Siopa so minoria nen Jehova bilang “anak” to, tan anton klase a sikatoy managbangat ed sikara?

⁶ Diad saginonor nin panaon, legan na agew nen Moises, akisipanan si Jehova ed nasyon na Israel. Bilang resulta, satan a nasyon so nagmaliw ya apilin totoo to tan sirin impasen bilang “anak” to. Inkuan na Dios: “Say Israel sikato so ana’ko.” (Exodo 4:22, 23; 19:3-6; Deuteronomio 14:1, 2) Base’d satan ya impisipanan, nikuan na saray Israelita, a singa ed inkurit nen propeta Isaias: “Sika O Jehova, sika so Ama mi.” (Isaias 63:16) Sinakbat nen Jehova so makaaman responsabilidad to tan simamaaron imbangat toray anak to, say Israel. (Salmo 71:17; Isaias 48:17, 18) Diad tua, sanen sikaray nagmaliw ya agmatoor, sikatoy akikasi ed sikara: “Ompawil kayo, O manangibeneg ya anak.”​—Jeremias 3:14.

7. Anton siglaotan ed si Jehova so niwala’d Israel?

⁷ Bilang nansumpalan na impisipanan ed Israel, diad piguratibo met a paraan et si Jehova so nagmaliw ya Asawa na nasyon, tan satan so nagmaliw a piguratibon asawan bii. Oniay insulat nen propeta Isaias nipaakar ed sikato: “Ta say Nangawa ed sika sikato so asawam a laki; Jehova na saray ejercito so ngaran to.” (Isaias 54:5; Jeremias 31:32) Anggaman mapagalang a sinumpal nen Jehova so betang to bilang Asawa, say nasyon na Israel so nagmaliw ya agmatoor ya asawan bii. “Tua a singa say sakey ya asawa a bii onsian a liputan ed asawa to,” inkuan nen Jehova, “ontan so pangawa yo a liputan ed siak, O abung na Israel.” (Jeremias 3:20) Nansiansian akikasi si Jehova ed ananak na agmatoor ya asawa to; sikatoy nantultuloy a nagmaliw ya “Engranden Instruktor” da.​—Isaias 30:20, NW; 2 Awaran 36:15.

8. Anggaman say Israel bilang sakey a nasyon so impulisay nen Jehova, anton antitipikon piguratibon asawan bii so wala ni ed sikato?

⁸ Sanen impulisay tan pinatey na Israel so Anak To, si Jesu-Kristo, diad kaunoran et sikatoy impulisay na Dios. Kanian agto la piguratibon asawa itan a Judion nasyon, nisay sikatoy Ama tan Managbangat na saray matungangan anak to. (Mateo 23:37, 38) Anggaman ontan, say Israel so sakey lambengat a tipiko, odino simbolikon asawan bii. Inaon nen apostol Pablo so Isaias 54:1, a sasaglawien to so nipaakar ed sakey a “lepes” a nikaduma tan nikabiig manlapud “saray anak na bibii a naasawa,” say nasyon na Israel ed laman. Ipaparungtal nen Pablo a saray alanaan a Kristiano so ananak na “lepes,” a tatawagen ton “Jerusalem ya wala ed tagey.” Tugyopen na sayan antitipikon piguratibon bii so mangatatawen ya organisasyon na Dios na espiritu iran pinalsa.​—Galacia 4:26, 27.

9. (a) Siopa so tutukoyen nen Jesus sanen sinaglawi to so nipaakar ed ‘saray anak mon ibabangat nen Jehova’? (b) Diad anton basiyan a magmamaliw so totoo ya espiritual ya ananak na Dios?

⁹ Kanian, diad sinagoga ed Capernaum, sanen inulit nen Jesus so propesiya nen Isaias: “Amin iray anak mo nibangat ira ed Jehova,” sasaglawien to so nipaakar ed saramay magmaliw ya “anak” na “Jerusalem ya wala ed tagey,” say singa-asawan mangatatawen ya organisasyon na Dios. Diad impangawat na saray bangat na manangilaman na Dios manlapud tawen, si Jesu-Kristo, saramay Judion dumerengel so nayarin magmaliw ya ananak na datin lepes a mangatatawen a pinagka-asawan bii na Dios tan tutugyopen to so “masantos a nacion,” say espiritual ya “Israel na Dios.” (1 Pedro 2:9, 10; Galacia 6:16) Diad panedeskribe ed engranden pankanawnawa a nilukasan nen Jesus parad saray magmaliw ya espiritual ya ananak na Dios, oniay insulat nen apostol Juan: “Sikato linma dia ed saray kayarian to, et saray kayarian to nen saman sikato so ag da inawat. Balet amiamin ya angawat ed sikato, inter to’d sikara so pankatonongan a magmaliw ya anak na Dios, salanti saray manisia ed ngaran to.”​—Juan 1:11, 12.

Makanan Bangabangat nen Jehova

10. Tampol kayari impanrebelde diad Eden, antoy imbangat nen Jehova nipaakar ed “bini,” tan apaneknekan a siopa iyan Bini?

¹⁰ Bilang maaron Ama, ipapaamta nen Jehova ed ananak to iray gagala to. Kanian, sanen sinagyat na rebelden anghel so inmunan sanasawa pian ontunganga, tampol a sikaray pinakabatan nen Jehova no antoy gawaen to pian sumpalen so gagala ton pagmaliwey dalin a paraiso. Inkuanton mangipasen na gulaan ed baetan na “daan ya uleg,” a si Satanas a Diablo, “tan say bii.” Insan to impaliwawa a say “bini” na bii so manmekmek ed si Satanas, ‘ed olo.’ (Genesis 3:1-6, 15; Apocalipsis 12:9; 20:9, 10) Singa naimano tayo la, say bii​—a diad saginonor et abidbiran bilang “Jerusalem ya wala ed tagey”—​so mangatatawen ya organisasyon na Dios na espiritu iran pinalsa. Balet siopay “bini” to? Sikato so Anak na Dios, si Jesu-Kristo, samay sakey ya imbaki manlapud tawen tan say sakey a diad kaunoran et maneral ed si Satanas.​—Galacia 4:4; Hebreos 2:14; 1 Juan 3:8.

11, 12. Panon a pinalaknab nen Jehova so makanan bangat to nipaakar ed “bini”?

¹¹ Inlaknab nen Jehova iyan makanan bangat nipaakar ed “bini” sanen insipan to’d si Abraham: “Parakelen ko so ilalak mo a singa saray bitewen ed katawenan, . . . Tan dia ed ilalak mo so pakapikapalaranan na saray amin a nacion dia.” (Genesis 22:17, 18) Inusar nen Jehova si apostol Pablo a mangipaliwawa a si Jesu-Kristo so insipan a Bini nen Abraham balet say arum so magmaliw met a kabiangan na say “bini.” “No sikayo kien kayo nen Cristo,” insulat nen Pablo, “sirin ilalak [bini, NW] kayo nen Abraham, tan mananawir unong ed sipan.”​—Galacia 3:16, 29.

¹² Imparungtal met nen Jehova a si Kristo, say Bini, so manlapud maharlikan linya nen Juda tan diad sikato “wala naani katotolok na saray katooan.” (Genesis 49:10) Nipaakar ed si Arin David na tribu nen Juda, insipan nen Jehova: “Say bini to gawaen ko met a manando lawas, tan say trono to a singa dukey na saray agew na tawen. Saray bini to maando ra lawas, tan say trono to singa say agew ed arap ko.” (Salmo 89:3, 4, 29, 36) Sanen inyanunsio nen anghel Gabriel so kiyanak nen Jesus, impaliwawa to a say ugaw et say tinuro na Dios a Manuley, say Bini nen David. “Sikato naani baleg, et ningaran ya Anak na Sankatageyan,” inkuan nen Gabriel, “et iter na Dios a Katawan [Jehova, NW] ed sikato so trono nen David ya ama to; . . . et say panarian to andi anga.”​—Lucas 1:32, 33; Isaias 9:6, 7; Daniel 7:13, 14.

13. Pian naawat so bendisyon nen Jehova, panon so nepeg ya ikiwas tayo ed bangat to?

¹³ Ta pian naawat so panamendisyon nen Jehova, nepeg tayon amtaen tan onkiwas ed sayan makanan bangat nipaakar ed Panariay Dios. Nepeg tayon sisiaen a si Jesus so linma dia manlapud tawen, a sikatoy aturon Ari na Dios​—say maharlikan Bini a mangasikaso’d kipawil na Paraiso ed dalin—​tan sikato so mamaoli ed inaatey. (Lucas 23:42, 43; Juan 18:33-37) Diad Capernaum sanen sinalita nen Jesus so nipaakar ed pamaoli ed inaatey, apatnagan komon ed saray Judio a sikatoy nansalitay katuaan. Agayla, pigaran simba lambengat sakbay to, anganko diman a mismo ed Capernaum, a pinaoli to so mantaon na 12 ya anak a bii na manangasikason opisyal na sinagoga! (Lucas 8:49-56) Maseguron sikatayo met so walaan na dakel a rason a sisiaen tan onkiwas a mitunosan ed makapasagyat-ilalon bangat nen Jehova nipaakar ed Panarian to!

14, 15. (a) Kaunongan kaimportanti ed si Jesus so Panarian nen Jehova? (b) Anto so kaukolan tayon gawaen pian natalosan tan naisalaysay so nipaakar ed Panarian nen Jehova?

¹⁴ Indeboto nen Jesus so mangaraldalin a bilay to ed impanbangat nipaakar ed Panarian nen Jehova. Satan so pinagka-temay ministeryo to, tan binilin to ni ingen iray patumbok ton ipikasi itan. (Mateo 6:9, 10; Lucas 4:43) Saray Judio ed laman so nilinyan magmaliw a “saray anak na panarian,” balet lapud andian na pananisia, maslak ed sikara so sinmaew a mangamor ed satan a pribilihyo. (Mateo 8:12; 21:43) Imparungtal nen Jesus a “melag a pulok” lambengat so makaawat na pribilihyon magmaliw a “saray anak na panarian.” Sarayan “anak” so magmaliw a “mitatawir ed Cristo” diad mangatatawen a Panarian to.​—Lucas 12:32, NW; Mateo 13:38; Roma 8:14-17; Santiago 2:5.

¹⁵ Pigaran minanawir ed panarian so alaen nen Kristo ed tawen ta pian miuley ed sikato ed interon dalin? Unong ed Biblia et 144,000 lambengat. (Juan 14:2, 3; 2 Timoteo 2:12; Apocalipsis 5:10; 14:1-3; 20:4) Balet inkuan nen Jesus a sikatoy walaan na “arum a carnero” a magmaliw a mangaraldalin ya uuleyan ed satan ya uley na Panarian. Panggayagaan na saraya so ayadyarin bunigas tan deen ed ando lan ando ed paraison dalin. (Juan 10:16; Salmo 37:29; Apocalipsis 21:3, 4) Nakaukolan tayon talosan tan naisalaysay so bangat nen Jehova nipaakar ed say Panarian.

16. Anton makanan bangat nen Jehova so kaukolan tayon naaralan tan agamilen?

¹⁶ Impabidbir nen apostol Pablo so sananey nin makanan bangat nen Jehova. Inkuanto: “Ta sikayon dili binangatan kayo la na Dios a mangaro ed sakey tan sakey.” (1 Tesalonica 4:9) Pian napaliket si Jehova, nakaukolan tayon idemostra so ontan ya aro. “Say Dios sikato so aro,” kuan na Biblia, tan nepeg tayon aligen so alimbawa to ed panangipanengneng na aro. (1 Juan 4:8; Efeso 5:1, 2) Makapaermen, maslak a totoo so miserablin sinmaew ed panaral a pangaro ed kapara ran totoo unong ya ibabangat ed sikatayo na Dios a gawaen. Komusta itayo? Kasin sikatayoy onkikiwas ed sayan bangat nen Jehova?

17. Siopan awawey so nepeg tayon aligen?

¹⁷ Importantin sikatayoy mangawat ed amin a bangat nen Jehova. Komon ta say awawey tayo et singa samay ed salmista’d Biblia ya angisulat: “Iparongtal mo ed siak so saray dalan mo, O Jehova; ibangat mo ed siak so saray basbas mo. Itonton moak, ed katuaan mo, tan ibangat moak.” “Ibangat mo ed siak so saray panangitontonan mo. Bangatan moak na maong a panangisisip, tan kakabatan . . . Ibangat mo ed siak so bilibilin mo.” (Salmo 25:4, 5; 119:12, 66, 108) No say liknaan yo et pareho ed saraman a salita na salmista, nayarin magmaliw kayon kabiangan na satan ya ulop ya ibabangat nen Jehova.

Baleg ya Ulop na Saray Abangatan

18. Anto so impasakbay nen propeta Isaias a nagawa ed panaon tayo?

¹⁸ Impasakbay nen propeta Isaias so nagawa ed panaon tayo: “Nagawa dia ed saray kaonoran ya agew, a say palandey na abung nen Jehova niletneg ed toktok na saray palandey, . . . Et dakerakel a baley so onla tan kuan da, Dago kayo, tan ontatdang itayo ed palandey nen Jehova, ed abung na Dios nen Jacob; ta ibangat to itayo ed saray dalan to.” (Isaias 2:2, 3; Miqueas 4:2) Sioparayan totoon nababangatan nen Jehova?

19. Siopa natan so lalaktipen na saray nababangatan nen Jehova?

¹⁹ Lalaktipen day arum nilikud ed saramay manguley diad tawen a kaiba nen Kristo. Singa nibaga ed asasakbay, inkuan nen Jesus a sikato so walaan na “arum a carnero”​—mangaraldalin ya uuleyan na Panarian—​niarum ni ed say “melag a pulok” na saray mananawir ed Panarian. (Juan 10:16; Lucas 12:32) Say “baleg ya olop,” a makaliktar “ed baleg ya irap,” et kabiangan na arum a karneron klase, tan panggagayagaan day naabobonan a talindeg ed arap nen Jehova diad basiyan na pananisia ra ed nipaagos a dala nen Jesus. (Apocalipsis 7:9, 14) Anggaman say arum a karnero so aliwan direktan nilaktip ed limog na saray “anak” ya asalambit ed Isaias 54:13, sikaray nabebendisyonan diad kibabangatan ed si Jehova. Kanian, manepenepeg so panawag da ed Dios bilang say “Ama” lapud sikato so, diad tua et magmaliw a Láki ra diad panamegley na “Andi angaan ya Ama,” si Jesu-Kristo.​—Mateo 6:9; Isaias 9:6.

No Panon a Manbabangat si Jehova

20. Diad antoran dalan a manbabangat si Jehova?

²⁰ Manbabangat si Jehova diad dakel a dalan. Alimbawa, gagawaen to itan diad panamegley na mapamaraan a kimkimey to, a namparan mamapaneknek ed kiwawala tan baleg a kakabatan to. (Job 12:7-9; Salmo 19:1, 2; Roma 1:20) Sakey ni, manbabangat diad panamegley na direktan pitatalosan, a singa ginawa to diad impanbangat ed si Jesus sakbay a nagmaliw a too. Mipadpara, diad taloran nirekord ya inkagawa et direktan nansalita manlapud tawen ed totoo diad dalin.​—Mateo 3:17; 17:5; Juan 12:28.

21. Anton anghel so partikular ya inusar nen Jehova bilang representanti to, balet ta panon tayon amta ya angusar ni arum?

²¹ Inusar met nen Jehova iray anghelikon representanti pian manbangat, kaibay Panguloan to, “say Salita.” (Juan 1:1-3, NW) Anggaman makapansalitan direkta si Jehova ed ayadyarin anak ton too, si Adan, diad harden na Eden, maseguron inusar to si Jesus sakbay a sikatoy nagmaliw a too pian mansalita parad Sikato. (Genesis 2:16, 17) Anganko ta saya imay “angel na Dios a nanakar ed arap na campamento na Israel” tan nipaakar ed sikato et ingganggan nen Jehova: “Dengelen yo so voces to.” (Exodo 14:19; 23:20, 21) Anggapoy duaruwa a say sakbay a nagmaliw a toon si Jesus et sikato met imay “singa principe na ejercito nen Jehova” ya inmapireng ed si Josue pian pabiskegen. (Josue 5:14, 15) Inusar met nen Jehova so arum niran anghel pian ipanabang iray bangat to, a singa saramay inusar to pian ipasabi Ganggan to ed si Moises.​—Exodo 20:1; Galacia 3:19; Hebreos 2:2, 3.

22. (a) Siopa ed dalin so inusar nen Jehova pian manbangat? (b) Anto so manunan paraan a diad panamegley to et ibabangat nen Jehova so totoo natan?

²² Niarum ni, uusaren nen Jehova a Dios so atooan a representanti pian manbangat. Kaukolan a bangatan na atateng ed Israel so ananak da; saray propeta, saserdote, prinsipe, tan saray Levita so angibangat ed Ganggan nen Jehova ed nasyon. (Deuteronomio 11:18-21; 1 Samuel 12:20-25; 2 Awaran 17:7-9) Si Jesus so manunaan a Pinagkasangiyan na Dios ed dalin. (Hebreos 1:1, 2) Mabetbet ya inkuan nen Jesus a no antoy imbangat to et saman met so eksakton naaralan to ed say Ama to, kanian saray dumerengel to so, diad tua, et ibabangat nen Jehova. (Juan 7:16; 8:28; 12:49; 14:9, 10) Impairekord nen Jehova iray salita to, tan diad agew tayo et sikatoy manbabangat ed totoo manuna diad panamegley na sarayan impuyan a Kasulatan.​—Roma 15:4; 2 Timoteo 3:16.

23. Antoran tepet so konsideraen ed ontumbok ya artikulo?

²³ Sikatayoy manbibilay ed importantin panaon, lapud isisipan na Kasulatan a ‘nagawa dia ed saray kaonoran ya agew [a panbibilayan tayo] dakerakel a baley so nabangatan nipaakar ed saray dalan nen Jehova.’ (Isaias 2:2, 3) Panon a nitatarok iyan instruksion? Anto so nepeg tayon gawaen pian nagunggunaan tan minabang ed engranden programan panangibangat nen Jehova a nagagawa natan? Konsideraen tayo iratan a tepet ed ontumbok ya artikulo.

Panon Yon Ebatan?

◻ Panon a nagmaliw a sakey ya Ama, sakey a Managbangat, tan sakey ya Asawa si Jehova?

◻ Anto so ibabangat nen Jehova nipaakar ed “bini”?

◻ Anton makanan bangat nen Jehova so nepeg tayon sumpalen?

◻ Panon so panbabangat nen Jehova?

[Litrato ed pahina 10]

Say impamaoli ed anak a bii nen Jairo so angitarok na basiyan pian panisiaan so sipan nen Jesus a kioli