Epektibon Pangusar ed Biblia
1. Akin a mausa-usar so Biblia?
1 Say epektibon pangusar ed impuyan a Salita na Dios et ontulong ed sikatayon ipulong tan ibangat so katuaan ed malinew a paraan tan pian iwalwal iray palson bangat tan tradisyon na totoo. —2 Tim. 2:15; 1 Ped. 3:15.
2. Anto so ontulong ed sikayon nikabisado iray teksto?
2 Ikabisado Yon Maong so Biblia: Singa ed pangusar na dinanman a kagawaan, magmaliw itayon eksperto no kabkabisado tayo itan. Ontan met, diad pambasa ed interon Biblia, naamtaan yo so tema na satan. Ontulong met iya ed sikayo pian natandaan iray teksto tan mas mainomay yon naromog iratan. No lalo yon nikakabisado so Kasulatan, mas maseseg tan lalon walaan kayo na kombiksion a mansalita sano manpupulong ed arum ed impormal a paraan tan sano walad lawak na ministeryo. —1 Tes. 1:5.
3, 4. (a) Antoray pigaran paraan pian lalo tayon nikabisado so Biblia? (b) Kasin angusar kayo lay arum a paraan pian nikabisado yo so Kasulatan?
3 Iyugali yon ibukay so Biblia yo tan itumbok legan na saray pantitipon ed kongregasyon. Diad personal a panagaral tan diad panagparaan ed saray pantitipon na kongregasyon, anapen iray nisitas a Kasulatan tan dalepdepen so aplikasyon na saratan. Naimano na dakel a say direktan pambasa ed saray teksto ed Biblia imbes a diad computer odino diad kupon et ontulong pian mas mainomay ya anapen iratan sano walad ministeryo. —Juan 14:26.
4 Saray arum a pamilya so angiyeskedyul na panaon pian ipatlep iray teksto ed Biblia. Nagawaan iya diad pangusar na kinatli iran karton a diad pagpag et akasitas so teksto na Biblia tan diad pagpag so akasulatan na samay teksto. Mansusublayan iran manpabitla no kasin nibaga da so mismon lugan na teksto odino samay pakaromogan ed satan. Say pangipasal ed saray presentasyon ed lawak na serbisyo tan pangebat ed tepet na unabung so ontulong met ed inkaepektibo tayo ed pangusar na Biblia.
5. Akin a labay tayon lalon epektibon usaren so Biblia?
5 Anggapo lay arum a libron makapipara ed Biblia. Lugan labat na satan iray sulsulat a manggawa ed totoon “makabat ed kilalaban.” (2 Tim. 3:15) Lapud maslak a totoo ed teritorya tayo et agmikabisado ed saray mabmablin kayamanan a naromog ed Biblia, walaan itayo na rason pian lalon padaaken so inkaepektibo tayo diad panginabang ed sikara na ilalo ya iyoopresi na Biblia.—Uli. 2:1-5.