Kasin Idedepensa Yoy Salita na Dios?
1 Diad sayan mundo et kaslakan a totoo so agmanisia ed Biblia. Balet, saray tuan Kristiano so maseseg a mangiyaalibansa ed Salita na Dios. Lapud kombinsido itayo ya “amin a sulat [et] impuyan na Dios,” miabobon itayo ed si Jesu-Kristo, ya amaneknek diad pikakasi to ed si Jehova: “Say salitam sikato so katuaan.” (2 Tim. 3:16; Juan 17:17) Panon tayon epektibon nidepensa so Salita na Dios?
2 Aralen so Kasulatan: Seguradon maseet ya inaral nen Jesus so Salita na Dios. Tinmulong iya pian diad interon ministeryo to et sikatoy makapanbangat manlapud Kasulatan. (Luc. 4:16-21; 24:44-46) Panon itayon magmaliw a matalem ed saray teksto? Nagawaan tayo itan diad pambasa ed Biblia kada agew tan diad pandalepdep ed sakey a bersikulo a naimano tayo a nagkalalo lan makapaseseg odino makatulong ed ministeryo. Sano manpaparaan parad pipiaral, kaukolan tayon anapen tan basaen iray nisitas a teksto ed mismon Biblia tan mangiparaan na komento ed saratan. Sano walad aral, kaukolan tayon itumbok so Biblia tayo legan a babasaen na espiker iray teksto. Say panaral ed saray teksto na Biblia so mangiparaan ed sikatayon ‘agamilen ed matunong [odino, nausar ed dugan paraan] so salita a tua.’—2 Tim. 2:15.
3 Abuloyan a Mansalita so Biblia: Sano mibibiang ed ministeryo, kaukolan tayon abuloyan so Biblia a mansalita. Alimbawa, no iyabuloy na saray sirkumstansya, kaukolan tayon panggunaetan ya ibasa tan isingbat so sakey a teksto ed unabung. No sikatoy mantepet odino onsuppiat, sankaabigan ya usaren so Biblia bilang pangebat. Sano okupado so unabung, nayari tayo nin siansia ya ipabitar so Makasulatan a punto diad pangibaga na, “Antis ak ya onalis, ibasak pan magano ed sikayo so sakey a teksto.” No posible, basaen a direkta ed Biblia, a legan na satan et ipanengneng ed unabung so babasaen yo.
4 Sanen nibasa iray teksto ed sakey ya unabung pian paneknekan ya aliwa so Trinidad, inkuan to, “Mimimisa ak ed simbaan ed interon bilay ko, balet agko amta ya ontan so ibabaga na Biblia!” Mabulos ton inawat so panagaral na Biblia. Inkuan nen Jesus a saray karnero to so ontalineng ed boses to. (Juan 10:16, 27) Say sankaabigan a paraan pian nabidbir na saray matuan impanpuso so katuaan et say pakanengneng da ed satan a mismo manlapud Kasulatan. Kanian magmaliw itayo sirin a manangidepensa na katuaan na Salita na Dios!