Pagmaliwen a Makatangguyor so Panagbangat Mo
1. Anto so mabetbet a kalaktip na epektibon panangusar na Biblia diad ministeryo?
1 Bibidbiren na saray eksperiensyadon ministro, a singa si apostol Pablo a say ‘dugan panangusar ed salita na katuaan’ et aliwa labat a basta pangaon na teksto ed Biblia. (2 Tim. 2:15) Sano usaren tayoy Salita na Dios, panon tayon gawaen a ‘makatangguyor’ so panagbangat tayo?—Gawa 28:23.
2. Panon tayon natulongan iray totoo a lalon naapresyay Salita na Dios?
2 Ipaimano so Ibabagay Biblia: Unona, ipresenta so Biblia diad paraan a natangguyor so dumerengel a lugan na satan so kakabatan a nanlapud Dios. No nipalikna tayo’d katongtong tayo a talagan panisiaan tayoy Biblia, nayarin sikatoy ondengel a maong sano mangibasa tayoy teksto. (Heb. 4:12) Nayarin oniay ibaga tayo: “Naeksperiensyak a mismo a makatulong so simbawa na Dios nipaakar ed saya. Imanom pa iyay ibabaga to.” No posible, ipaimano so teksto ed Biblia diad pambasa ed satan.
3. Kayari na impangibasa ed teksto, anto so gawaen tayo pian mas natalosan na katongtong tayo so kabaliksan na satan?
3 Komadua, ipaliwawa so imbasa yo. Agtampol a natalosan na dakel a totoo so sakey a teksto diad unaan ya impakadngel ed satan. Kaukolan so kaaruman ya eksplinasyon pian naamtaan so pikonektaan na satan ed pantotongtongan. (Luc. 24:26, 27) Idanet iray manunan salita ed teksto. Makatulong met so pantepet pian naseguro ya atalosan na dumerengel so apantongtongan.—Uli. 20:5; Gawa 8:30.
4. Anto ni so nakaukolan pian magmaliw a makatangguyor so panagbangat tayo?
4 Mankatunongan Manlapud Kasulatan: Komatlo, panggunaetan a nasabi so nonot tan puso ra. Tulongan so unabung a natalosan no panon ya onaplika’d sikato so teksto. Say pankatunongan manlapud Kasulatan so mamakiwas ed sakey pian umaney panmoria to. (Gawa 17:2-4; 19:8) Alimbawa, kayari tayon basaey Salmo 83:18, sarag tayon ibagay rason no akin ya importanti so pangamta’d ngaran na sakey a too pian makapikaaro ed sikato. Insan nayarin itepet, “Parad sika, kasin mas dengelen na Dios so pikakasim no usaren moy ngaran to?” Nipanengneng tayoy praktikal a kablian na kasulatan no iyaplika tayo itan ed personal a pankaukolan na unabung. Say ontan a panangusar ed Salita na Dios diad panagbangat so mamakiwas ed saray matuan-impapuson totoo pian dayewen so tua tan mabilay a Dios, si Jehova.—Jer. 10:10.