No Panon a Tangguyoren so Arum
1 Agamoran nen apostol Pablo so reputasyon bilang makatangguyor a ministro. (Gawa 19:26) Anggan si Arin Agripa et inkuanto ed sikato: “Agmabayag et natangguyor moak lan magmaliw a Kristiano.” (Gawa 26:28, NW) Antoy nanggawa ed ministeryo nen Pablo ya ontan lan makatangguyor? Sikatoy akikatunongan manlapud Kasulatan, ya intukoy to iray argumento to ed saray dumerengel to.—Gawa 28:23.
2 Diad pangalig ed si Pablo, kaukolan tayo met so magmaliw a makatangguyor ed ministeryo tayo. Panon? Diad panebek tayo ed arum sano mitotongtong tan ondedengel ed sikara. (Uli. 16:23) Walay taloran importantin kundang ya ontulong ed sikatayo pian nagawaan iya.
3 Ontalineng a Maong: Legan a mansasalita so arum a too, ontalineng parad pangibasian na tongtongan. No sikatoy amalesa na isusuppiat, panggunaetan a tebeken so makasengeg na insuppiat. Makatulong itan pian naamtaan tayon eksakto no antoray sisiaen to, no akin a sisiaen to itan, tan no antoy akakombinsian to ed satan. (Uli. 18:13) Mataktikan amtaen ed sikato.
4 Mantepet: No ibalikas na sakey a too so pananisia to ed Trinidad, nayarin itepet mo: “Kasin lawas mon sisiaen so Trinidad?” Insan patumbokan na: “Kasin inusisam lan maong no antoy ibabaga na Biblia nipaakar ed satan a tema?” Nayarin itepet mo met: “No say Dios et kabiangan na Trinidad, agta nailaloan tayon ipalinew itan na Biblia?” Say iyebat da ed sika so ontulong ed sikan mikatunongan ed indibidual ed no antoy ibabaga na Kasulatan.
5 Mangusar na Maabig a Panagkatunongan: Tinepetan na sakey a Tasi so sakey a bii a panisiaan ton si Jesus et Dios: ‘No salien mon iyilustra a say duaran too et parpareho, anton relasyon ed pamilya so nayarin pangiyalilingan mo?’ Inyebat na bii: “Nayarin usaren koy duaran sanagi.” Inyarum na Tasi: “Nayari ni ingen a say mankalupan maong a lason. Balet diad pangibabangat nen Jesus ed sikatayo a moriaen so Dios bilang say Ama tan sikaton mismo bilang say Anak, anton mensahe so ipapasabi to?” Atalosan na bii so punto a samay sakey et mas panguloan tan nagkalalon walaan na autoridad. (Mat. 20:23; Juan 14:28; 20:17) Asabi so nonot tan puso to lapud dunong ed pananangguyor.
6 Siempre, aliwan amin so mangawat ed katuaan, anggan panon lay inkamakatunongan tan inkasusto na presentasyon tayo. Balet singa si Pablo, magmaliw itayon maseet a mananap ed saray matuan-impanpuso ed teritorya tayo, a tangguyoren iran mangawat ed mensahe na Panarian.—Gawa 19:8.