Saray Ministro na Panarian so Manatalona ed Subok
“Anto, sirin, si Apollo? On, anto si Pablo? Sikara so ministros a diad panamegley da et nagmaliw kayon mananisia.”—1 CORINTO 3:5.
1. (a) Marelihyoso, anto so nasusuppiat natan, tan akin? (b) Anton imperyo so niiyan ed kaatapan, tan anto so nagawa ed satan?
SARAY autoridad na ministro na relihyon so nasusubok natan. Lalon lalo, saya so kipapasen legan a say pulitikal ya elemento na sayan mundo so onsusumpa ed relihyon, a pati say “Kristianon” relihyon, a satan so ipapasen ton raket. Anggan saray graduado ed relihyoson seminaryo so impasen lan anggapoy kuentan autorisadon ministros tan sikara la so sinebelan ed saray nasyones ya onsusumpa ed relihyon. On, say sankamundoan ya imperyo na palson relihyon so nanaataki tan niiyan ed kaatapan diad sankadalinan a panangatakin mansumpal ed kadederal to. Say madibinon autor na tuan panagdayew so angipasakbay ed saya tan inggeter to so dilin panaon to diad kasumpalan na propesiya to. Saray pinalsan bilay ed interon talba so mangungguna ed sayan makapakelkelaw a nagawa!
2. No nipaakar ed relihyon, anto so mansiansia tan anto so agmansiansia?
2 Ingen, say agpananisia ed relihyon so agmansiansian mandomina ed dalin, ingen say naalangon ya amalsa na talba so mansiansia! On, tan say tuan relihyon na sayan ag-ompatey tan Sankatageyan a Dios so mansiansia! Nisengeg ed satan a pamaakaran, anggaman saray binilyon a manaayam ed dalin so mangiburi ed saratan a katuaan, natan a mismo et saray mangaagamil na puron panagdayew ed Dios so mabilay tan aktibo ed dalin. Tan say onggendan ya abayaglan balikas so tua natan: “Saray agnanengneng a kalidad to so malinlinew ya anengneng a manlapud inkapalsa na mundo a manpatuloy, lapud sikara so amorekdek ed saray bengatlan agawa, anggan say maandon pakayari tan inkadios to, ta pian sikara so agmakapambaraan.”—Roma 1:20.
3, 4. (a) Panon a napaneknekan a si Jehova so walaan na saray ministro ed dalin? (b) Panoy pikabat tayo a saray relihyoson ministro na Babilonia a Baleg so magano lan naandian na trabaho?
3 Sanen saraman a salita so nisulat kaleganan na inmunan siglo na Komon a Panaon tayo, si Jehova a Dios so walaan na saray ministro to ed dalin. Sirin nayarian nen apostol Pablo ya isulat: “Anto, sirin, si Apollo? On, anto si Pablo? Sikara so ministros a diad panamegley da et nagmaliw kayon mananisia, anggan singa unong na impabtang na Katawan ed balang sakey. Siak so nantanem, si Apollo so analog, balet say Dios so nansiansian amabaleg.”—1 Corinto 3:5-9.
4 Si Jehova so nepeg met a nawalaan na saray ministro ed dalin natan, balet agto uusaren iray relihyoson ministro na Babilonia a Baleg, say sankamundoan ya imperyo na palson relihyon. Diad tua, agmanbayag et sikara la so naandian na trabaho. Satan so sano say Babilonia a Baleg a mismo so naandi la. Diad impangipasakbay ed saya, ibabaga na Apocalipsis 16:19: “Say baleg a syudad so naapag a nankatlo, tan saray syudad na nasyones so nagba; tan say Babilonia a Baleg so anonotan diad arap na Dios, pian iter ed sikato so kopa na alak na petang na sanok to.”
5. Anto so agawa ed kadaanan a Babilonia nen 539 K.K.P., tan anto so nipaakar ed saray ministros tan arum niran managsuporta ed saray relihyon na Babilonia a Baleg?
5 Anto, sirin, so nipaakar ed saray totoon mansiansian matoor a patumbok na relihyoson sistema a nilingkoran na saray propesyonal a ministro na Babilonia a Baleg? Bueno, imanoen so agawa ed samay labi na 539 K.K.P. sanen say Arin Belshazar tan saray inimbitaan ton kakatawan so mandadayew ed saray dirios na Babilonia ed sakey a nikadkaduman piesta diad pankantyaw ed saray nanliktub a Medo tan Persiano. Ununa, niiter so paimano ed saray manliliket sanen anengneng da so mamilagron sulat-na-lima ed dingding na pampipiestaan da tan nadngel da so impangipatalos nen Daniel a propeta nen Jehova. Sirin, diad inkagba na Babilonia ed saman a mismon labi, say ari tan mapatnag ya anggan arum ed saray manpipiestan mangitatandoro ed palson dirios so pinatey na saray linmubak a manangonkesta. (Daniel, kapitulo 5) Say mipadparan desyang so manaalagar ed saray ministros tan saraman so mansiansian matoor ed saray relihyoson sistema na Babilonia a Baleg.
Maganat a Nakaukolan Iray Ministro na Dios
6. (a) Diad sayan maatap a panaon, anto so nepeg a wala ed Dios a para ed pamilya na too? (b) Kapigan so impangangga na Panaon Gentil, tan anto so imbaga nen Jesus nipaakar ed saya?
6 Anggapo so makatunongan a makasuppiat ed katuaan a sikatayo la natan so manbibilay ed sankaatapan a panaon ed awaran na too nanlapulad samay sankagloboan a Delap ed agew nen Noe. (2 Timoteo 3:1-5) Sirin makana a wala natan iray puron ministro na Dios nen Noe. Peteg, unong a si Jehova so angiter na pasakbay ed saray totoo diad panaon nen Noe tan ed saray manliliket ed piesta nen Belshazar, nakaukolan a Sikato so walaan na maganat a mensahe a para ed atooan a pamilya nanlapulad 1914, sanen tinmerak so inmunan guerra mundial. Diad tua, diad sankalaknaban a lapag, ed apatira lan dekada a saray ariripen na Dios so angituro ed saman a taon a mananda ed Panaon Gentil, a nipaakar ed satan et inkuan nen Jesus: “Say Jerusalem so igatin-gatin na saray Gentiles, ya anggad nasumpal so Panaon na Gentiles.”—Lucas 21:24, King James Version.
7. (a) Anggad kapigan a say mangaraldalin a Jerusalem so inggatin-gatin na saray aliwan-Judion nasyones? (b) Diad anto so tutukoyen nen Jesus ed kaunoran sanen sinalita to so Jerusalem ya “igatin-gatin na saray Gentiles”?
7 Diad 53 taon kayari na 1914, odino anggad samay Anemiran-Agew a Bakal nen 1967, say mangaraldalin a Jerusalem so nantultuloy ya igagatin-gatin na saray aliwan-Judion nasyones. Mapatnag, anggaman kuan, et agtutukoyen nen Jesus ed kaunoran so Judion Jerusalem natan noagta ed samay inrepresenta na saman a syudad ya anggad 607 K.K.P. Tan anto so irerepresenta to? Akin, say Panarian nen Jehovan Dios ed panamegley na nilanaan ton Ari ed maarin abung nen David!—Lucas 1:32; 1 Awaran 29:11.
8. Diad siopa so pangiteran nen Jehova na panarian nen David, tan akin ya agnanengneng na totoo so nipasakbay a kitrono?
8 Si Jesu-Kristo so sakey a pangiteran nen Jehova a Dios na panarian na ama ton David nensaman. Diad arap nen Pilato a bilang ukom, imbaga nen Jesus a say Panarian To so agmanlapud sayan mundo, a kabaliksan ton satan so mangatatawen. (Juan 18:36) Makatunongan, sirin, say arapen a kitandoro nen Jesus ed Panarian diad panampot na Panaon Gentil so nagawa ed agnanengneng a katawenan. Sirin say kitrono to so agnanengneng na saray mata na totoo, tan sikato no akin a sikatayo nisay saray Gentil a nasyones so literal ya akanengneng ed sikato a nitrono ed makanepegan, inter-na-Dios a Panarian nen 1914. Saraman a nasyones so peteg ya ag-anisia a sayan ebento so agawa, anggaman ed katuaan a sikato so inyabawag na saray totoo nen Jehova nanlapulad 1870’s.
9. (a) Anto so ginawa na nasyones ya andian na panangimano ed mensahe na Panarian? (b) Nisesengeg ed ginawa na nasyones nen 1914, anto so nagmaliw a nakaukolan?
9 Diad agpanangimano ed mensahe na Panarian, nen utonyo na 1914 saray nasyones so nipanget ed bakal. A singa nipasakbay ed Salmo 2:1-12, pinaneknekan da so inkasikaran kakabusol nen Jesus, agda labay ya “anguban” so balobalon nitandoron Ari a bilang sakey a tanda na katutulok tan panagpasakop da. Sirin, kaukolan a nasumpal so Salmo 110:1, 2, a nabasa tayo: “Say salita nen Jehova ed Katawan ko so: ‘Yurong ka ed nikawanan ko ya anggad pangyan ko ed saray kakabusol mo a gagatinan na salim.’ Say tayukor na biskeg mo so ipawit nen Jehova a manlapud Sion, a kuanto: ‘Onla kan manuley ed pegley na kakabusol mo.’”
10. (a) Diad leksab na antoran kipapasen ya inggapo nen Jesus so panuley to nen 1914? (b) Siopa so mangirerepresenta ed si Jehova diad koma-20 siglo?
10 Impatnag na saray Judion sumusumpa so panggula ra ed saray apostoles nen Jesus sanen si Jesus so yinmurong ed nikawanan na Dios a manalagar ed panaon ya igapo na panuley ed pegley na kakabusol to. (Gawa 4:24-26) Ontan met, saman so diad limog na saray kakabusol to a say niglorian Jesu-Kristo so angigapo ed uley to diad impanampot na Panaon Gentil nen 1914. Sirin diad sayan koma-20 siglo, a singa ed abenegan, saman so diad limog na kakabusol a si Jehova so walaan na saray manangitarok na mensahe to, saray puron ministros na Panarian. Sikara so tastasi to.—Isaias 43:10-12.
Idepensa So Kualipikasyon Tayo a bilang Ministro
11. Siopa so mangaangat ed autorisasyon na saray Tastasi nen Jehova a bilang tinuro-na-Dios a ministro na Panarian?
11 Ontan met, nakaukolan so pangidepensa na saray puron tinuro-na-Dios a ministro na Panarian ed autorisasyon da ed ministeryo. Satan so peteg a tua ed saray Tasi nen Jehova ed sayan koma-20 siglo. Say kualipikasyon da a bilang manepeg ya ordinadon ministro na Dios so inangatan tan imbaliwala. Na siopa? Nagkalautla diad saray graduado ed teologon-seminaryo na Kakristianoan ya angawat na sertipiko na ordinasyon tan nagmaliw a kleron babayaran. Impasen da so inkasikaran manepeg ya akaaral tan magenap a kualipikadon magmaliw a sigpot iran propesyonal a ministro na Dios na Biblia.
12. Say autorisasyon na anton prominentin inmunan siglon Kristiano so inangatan, tan panon so impanmoria ed anggan siopan mangitarok na duman nengneng na maong a balita?
12 Say kipapasen so miulibay nen inmunan siglo K.P. Diad Romanon probinsya na Galacia, anggan say apuyanan a managsulat na ngalngalin kapaldua na Kristianon Griegon Kasulatan so akaabet na ontan ya inkagawan angangat ed kualipikasyon to bilang apostol nen Jesu-Kristo, lapud inyan to ed suppiat so inkamatua na ibabangat to bilang Inkakristiano. Sirin sikato so naobligan mangibaga ed saray taga Galacia: “Mankelaw ak ed gano yon nakal a manlapud Sakey ya anawag ed sikayo ed agkanepegan a panangasi nen Kristo pian ontumbok ed sananey a nengneng na maong a balita. Ingen aliwan sananey; noag say walaray mangogonigon ed sikayo tan kaliktan dan deralen so maong a balita nipaakar ed si Kristo. Anggaman kuan, anggan sikami odino sakey ya anghel a nanlapud tawen so mangiyabawag ed sikayo na maong a balitan bengatlan duma ed saman so inyabawag mi ed sikayo a maong a balita, sikato komon so naayew. Singa imbaga mi lan akauna, ibagak lamet natan, Siopaman a mangiyabawag ed sikayo na maong a balitan bengatlan duma ed saman so inawat yo, sikato komon so naayew.”—Galacia 1:6-9.
13. Akin ya agkomon sinuppiat na saray taga Galacia so autoridad nen Pablo?
13 Tua, satan a managsulat, si apostol Pablo, so ag-inmunan akaaral ed saray Kristianon bangabangat diad personal ya impiarap ed si Jesu-Kristo odino diad saray 12 apostoles To. Saginonor, si Pablo so akilimog ed pigaran panaon ed si apostol Pedro, odino Cepas. (Juan 1:42; Galacia 1:18, 19) Balet diad impangidepensa to ed kipapasen ton kualipikadon ministro na maong a balita a nanlapud Dios ed panamegley nen Kristo, nayarian nen Pablo ya ibaga ed saray liganligan a Kristianos ed Galacia: “On, sanen akabatan da so agkanepegan a panangasin niiter ed siak, si Santiago tan Cepas tan Juan, a sikara so pinmatnag a lusek, inter da ed siak tan si Bernabe so liman kawanan a pannanabangan, pian onla kami ed saray nasyones, balet sikara et diad saraman so agalsiman.” (Galacia 2:9) Sirin saraman a taga Galacia so angitepet komon ed inkasikara: No saray babangatan nen Jesus a Pedro, Santiago, tan Juan so amidbir ed si Pablo a bilang manangitarok na maong a balita, anton letnegan so wala ed sikatayo diad iyangat ed mensahe to tan onarawi ed satan?
14. Akin ya agpankelawan a say ministeryon talindeg na saray Tasi nen Jehova so sinuppiat?
14 Balet anto so nipaakar ed saray totoo nen Jehova natan? Bueno, lapud say sakey a toon singa si Pablo so naobligan mangidepensa ed saray kualipikasyon to bilang sakey a ministro na Dios tan si Kristo, akin a sikatayo so onkelaw no sikatayo bilang dedikado, bautismadon tastasi nen Jehova, so nasubok tan nakaukolan ya idepensa so talindeg tayo a bilang ministro na Panarian? Siempre, a singa kipapasen nen Pablo, say ontan ya anggapoy letnegan a pananubok ed sikatayo so mansumpal ya andi-kana.
Anggan Si Jesus So Asubok
15. Siopa, ya atagtagey nen saray apostoles, so asuppiat met no nipaakar ed autoridad ton manbangat, tan ed siopa so angipabtangan to na pakauley to?
15 Say Katawan a Jesu-Kristo a mismo so asubok tan nidunget ed inkasugnar na dilin katooan to a mangawat ed sikato a bilang sakey ya autorisadon ministro na Dios. Alimbawa, nabasa tayo: “Sanen mameglepegley so piesta [na tabernakulo], si Jesus so tinmatdang ed templo tan nambangat. Kanian saray Judios so nikelawan, a kuan da: ‘Panon a sayan too so walaan na pikakabat ed saray letra, anta sikato so agnanaral ed eskuelaan?’” Satan ya angat so diretsan atalonaan nen Jesus, a kuanto: “Say ibangat ko so agko kayarian, noagta kayarian na saman so angibaki ed siak. No siopaman et pilalek ton gawaen so linawa to, kabat to so nipaakar ed bangat no kasin satan so nanlapud Dios odino siak so mansalita ed dilin inkasiak. Saman so mansalita ed dilin linawa to so manaanap na dilin gloria to; balet saman so mananap ed gloria na saman so angibaki ed sikato, sayan sakey so tua, tan anggapo so ag-inkatunong ed sikato.”—Juan 7:14-18.
16. Akin a liknaen na saray relihyoson papangulo na Judaismo a walaan ira na letnegan diad panuppiat ed abilidad nen Jesus ed panagbangat?
16 Saray relihyoson papangulo na Judaismo so nanleglemew ed si Jesu-Kristo a bilang sakey a Galileano lambengat. Siempre, agda inisip a nayarian to so manbasa lapud agnanaral ed eskuelaan, nagkalautla ed teologon seminaryo. Tutal, impanengneng la nen Jesus a nayarian ton basaen so teksto na Hebreon Kasulatan. (Lucas 4:16-21) Say apaneknekan ya agnaawat na saratan a Judios ed Judea tan Jerusalem et sayan datin karpentero so aliwan sakey a teologo tan agnayarin idasig ed saray eskribas, Pariseos, tan Saduceos ed nasyon da. Akin, sirin, a nepeg ton mapublikon ipatnag a kabat to so kabaliksan na Hebreon Kasulatan tan no panon so kiyaplika ra a mansalita ed ontan lan pakauley a singa ginawa to? Saya so nanggawa ed saraman a Judios a telek ed espiritual ya ondengel ed aniweng na madibinon katuaan. Sikara so makinon a tuloy a mangawat ed saman so nanlapud sakey a toon agnangraduar ed sakey a teologon eskuelaan.
“Imbangat nen Jehova”
17. Nipapaakar ed si Jesu-Kristo, saray Judion relihyoson papangulo so ag-angimano ed anton Managbangat, tan anton nengneng na eskolar si Jesus?
17 Saraman a minumundon-makabat a Judios so ag-angimano ed samay Sakey a peteg a nambangat ed si Jesu-Kristo. Akin, say dilin abilidad nen Jesus bilang sakey a managbangat so nanlapud “sankabalgan a managbangat ed amin,” si Jehovan Dios! (Job 36:22, Today’s English Version) Tutukoyen to so Dios ed sayan kapasidad, inkuan nen Jesus: “Sanen aminsan ya intagey yo so Anak na too, sirin kabat yo a siak iman, tan anggapo so gawaen ko ed dilin linawak; noagta unong na imbangat na Ama ed siak et sarayan bengatla so salitaen ko.” (Juan 8:28) Sirin pinaneknekan nen Jesus so inkasikato a sankaabigan a babangatan ed sankatalbaan ya eskuelaan na sankatageyan a Managbangat. Saya so kagalangan na samay Sakey ya angibangat ed sikato. Agpankelawan a saray Nazareno so angibaga ed dati ran kabaleyan: “Iner so angalaan na sayan too na kakabatan tan sarayan makapanyarin gawa?”—Mateo 13:54.
18. (a) Anton nengneng na managbangat so kaliktan tayo? (b) Anto so imbaga nen Jesus nipaakar ed sankabalgan a Managbangat tan saraman so imbangat To?
18 Pian natalosan so Biblia, labay tayo tan nakaukolan tayo so sankaabigan a managbangat. Tan satan a managbangat et say Manamuyan ed satan ya agbalot naparengan a Libro. Mansasalita ed saraman so membro na satan a nanengneng, mangaraldalin ya organisasyon na Managbangat kaleganan na mangaraldalin a bilay to, inkuan nen Jesus: “Anggapo so toon makadago ed siak nilikud no say Ama, ya angibaki ed siak, so mangiyasingger ed sikato; tan sikato so paolien ko ed unor ya agew. Walan nisulat ed saray Propeta, ‘Tan sikaran amin so bangatan nen Jehova.’ Siopaman ya akadngel a manlapud Ama tan akaaral so ondago ed siak.” (Juan 6:44, 45) Diman et aaonen nen Jesus so Isaias 54:13, a nabasa: “Tan amin na saray anak mo so magmaliw a totoon imbangat nen Jehova, tan say kareenan na saray ilalak mo so daakan.”
19. Saray “anak” na siopa so imbangat nen Jehova?
19 Anggaman kuan, itepet tayo: Saray “anak” na siopa so magmaliw a “totoon imbangat nen Jehova”? Saman a mapropetikon sipan so agawa ed piguratibon “bii,” sakey a prospektibon ina na saray “ilalak,” odino ananak. Sayan “bii” et samay sakey ya asaglawi ed Isaias 54:1, a nabasa: “‘Onkelyaw a magayaga, sika a biin lepes ya agmananak! Onarakak ka ed panggayaga tan onkelyaw ka, sika ya agnampasakit ed impananak, ta saray anak na ataynanan so lalon dakel nen saray anak na bii a walaan na akankayarian ya asawan laki,’ so inkuan nen Jehova.”
20. Nisesengeg ed 2 Corinto 13:5, anto so nepeg ya itultuloy a gawaen na saray dedikadon Kristianos, tan anto so pisiglaotan na saya ed kualipikasyon da bilang ministros na Panarian?
20 Lapud si Jehova so Sakey a mitotongtong ed sayan “bii” tan sikato so Managbangat ed saray “anak” to, nepeg a sikato so piguratibon Asawan-laki, tan sikato so singa-biin mangatatawen ya organisasyon to. Saray “ilalak” to, odino ananak, et saray estudyante na “sankabalgan a managbangat ed amin.” Siempre, makana a saratan ya “anak,” saray alanaan a patumbok nen Jesus, tan saray kakaiba ra, say “baleg ya ulop,” so mantultuloy ya onaplika ed saray bilin ya intarya nen Jehova. (Apocalipsis 7:9) Satan so seguradon sakey a paraan na italineng ed simbawa nen Pablo: “Itultuloy yon suboken no kasin wala kayo ed pananisia, itultuloy yon salien so inkasikayo.” (2 Corinto 13:5) No saray dedikado, bautismadon Kristianos so mantultuloy a manggawa ed saya tan mansiansian magunaet ya estudyante na sankabalgan a Managbangat, nepeg a sikara so walaan na nakakaukolan a kualipikasyon bilang ministro na Panarian ya inutorisaan nen Jehova. Ontumbok a nengnengen tayo no panon so pamaneknek na saray ministro na Dios na kualipikasyon da.
Anto So Nibaga Yo?
◻ Panon so pakapaneknek yo a si Jehova so walaan na saray ministro ed dalin?
◻ Anto so inrepresenta na Jerusalem ya “inggatin-gatin na saray Gentiles”?
◻ Lapud saray nasyones so angibaliwala ed Panarian, anto so ginawa nen Jesus?
◻ Akin ya agpankelawan a say ministeryon talindeg na saray Tasi nen Jehova so inangatan?
◻ Anto so agnaimano na saray Judion relihyoson papangulo ya inmangat ed abilidad nen Jesus ed panagbangat?