Paneknekan na Saray Ministros na Dios so Kualipikasyon Da
“Tan siopa so magenap a kualipikado?”—2 CORINTO 2:16.
1. Diad mundon naapag-apag ed relihyon natan, anton tepet so nayarin napalesa ed amin ya inkasimoon?
DIAD mundo natan a naapag-apag ed relihyon, sayan tepet so nayarin itepet ed amin ya inkasimoon: Siopan peteg so sakey ya autorisadon ministro na Dios? Miulibay, intepet nen apostol Pablo: “Siopa so magenap a kualipikado ed sarayan bengatla?” Sanen inangatan, si Pablo tan saray kakimeyan to so makapangibaga, “Sikami”! (2 Corinto 2:16, 17) Balet natan, siopa so walaan na mabiskeg a letnegan, say kanepegan, tan say tepel ya onebat na, “Sikami”?
2. Anto so talos na saray salita nen Pablo ed 2 Corinto 2:14-17?
2 Sakbay ya ebatan itan a tepet, imanoen tayo irayan salita nen Pablo ed saray Kristianos ed Corinto: “Balet salamat ed Dios! Ta . . . inerman a laen tayo et uusaren to itayon mangibaga ed arum na nipaakar ed Katawan tan ilaknab so ebanghelyo a singa masamit a pabalingit. No nipaakar ed Dios wala so masamit, mabunigas a balingit ed bilay mi. Sikato so balingit nen Kristo ed dalem mi, sakey ya angob ed saray nilaban tan saray agnilaban ed amin a kaliberliber mi. Ed saraman so agnilaban, sikami so singa tatakotan ya angob na patey tan desyang, bang saraman so mikabat ed Kristo et sikami so manangiter-bilay a pabalingit. Balet siopa so magenap ed ontan a kimey a singa saya? Saraman lambengat so, a singa sikatayon dili, totoo na katooran, ya imbaki na Dios, mansalita ed pakayari nen Kristo, ed mata na Dios ed sikatayo. Aliwa itayon singa saraman so managtagilako—tan dakel ed sikara—a say kaisipan da et say pangipaway ed ebanghelyo pian pananapan na pambilay.”—2 Corinto 2:14-17, The Living Bible; nengnengen so The Watchtower, Mayo 1, 1944, pahina 133-4.
3. (a) Panon so nepeg tayon ikiwas ed kaisipan na pangitagilako ed Salita na Dios a para ed sinisiblet a gungguna? (b) Anto so ginawa nen Pablo diad ipaliis ed pagmaliw a pakabelatan ed pinansyal ed saraman so nampulongan to?
3 Say pantagilako ed Salita na Dios a para ed sinisiblet a gungguna—agaylan mauges so ontan a kaisipan! Ag-inanap nen Pablo so pinansyal a pananubo diad impangipulong to ed satan a Salita ta pian manbilay ed mainawan bilay, a diad kaunoran et manretiro ed ministeryo tan mainawa la ed amin na saray agew to. Sikato so bulos-linawan manggawa ed saray tolda a bilang pamipaminsan a kimey to diad pangitarya na pambilay to tan panulong to ed saray kakaiba to diad serbisyo ed si Jehova. (Gawa 18:1-4) Si Pablo so agnagmaliw a pakabelatan ed pinansyal ed saraman so angipulongan to na maong a balita. Kanian nayarian ton itepet ed saray Kristianos ed Corinto: “Kasin siak so nankasalanan diad impangipaabebak ed inkasiak pian sikayo komon so naalangon, lapud anggapoy bayar ya inyabawag kon maliket so maong a balita na Dios ed sikayo?” (2 Corinto 11:7) Satan a tepet so nakaukolan ya ebatan na positibon andi!
4. Panon so pangalig na saray Tasi nen Jehova ed ehemplo nen Pablo nipaakar ed Salita na Dios?
4 Natan, saray Tasi nen Jehova so mangaalig ed maabig ya ehemplo na apostol diad agda pantagilako ed mablin Salita na Dios noagta diad pangitarya ra ed satan ed amin. Agda ikokomersyo so ontan a masanton bengatla. Sirin andian ira na susueldoan a klero, saray managpaliwawa ra ed publiko so agmanisingil ed saray paliwawa, tan agbalot nipapasa so platon kolektaan ed saray pantitipon da. No siopaman et pilalek to so mangiter na kuarta ed kimey, nayarian ton ipelag so anggan anton kantidad, anggan singa say “duaran melag a marabelis na melmelag a kantidad” na balo, diad kahon a panagpelagan ed Kingdom Hall odino ed arum a pasen. (Lucas 21:1-4) Say ontan a bulos-linawan kontribusyon so nanausar diad saray gastos tan aliwan diad pampayaman ed anggan siopan indibidual. Anggan saray pribadan abung so libren lukas a para ed saray miting na Tasi nen Jehova.—Filemon 1, 2.
“Magenap a Kualipikado”
5. Siopa so nanggawan kualipikado ed saray Tasi nen Jehova a para ed sagradon serbisyo?
5 Balet siopa natan so walaan na kualipikadon Tasi nen Jehova a mangitarok ed ontan a Makasulatan a padron anggaman ed amin a panamasegsegang tan isusumpan mabetbet a nasasagmak da? Anggapo so makagawa ed saya noag say Sakey a nanggawan magenap a kualipikado ed si Pablo tan saray kakaiba to a para ed sagradon serbisyo. Ipangasin imanoen so inkalinis na motibo nen Pablo, no ipareng ed relihyoson managtagilakon motibo, a singa inlasaysay to: “A singa manlapud inkasimoon, on, a singa imbaki na Dios, diad panmoria na Dios, diad piulop ed Kristo, sikami so mansasalita.” (2 Corinto 2:17) Saya so dalan na pansasalita natan na saray Tasi nen Jehova. Balet kasin irerekomenda mi so inkasikami a bilang ministro? Kasin nakaukolan tayon ipalapag iray sulat na rekomendasyon a manlapud arum?
6. (a) Akin ya isipen na saray klero na Kakristianoan a sikara so “magenap a kualipikado”? (b) Balet anto so basiyan ed pagmaliw a magenap a kualipikado na sakey a too a para ed tuan Kristianon ministeryo?
6 Agbinidbir nen Pablo so kualipikasyon to ed ministeryo a singa bengatlan agawaan to. Inkuanto: “Say impagmaliw min magenap a kualipikado so nanlapud Dios, a sikato so peteg a magenap a nanggawa ed sikamin kualipikado a ministro na sakey a balon sipanan.” (2 Corinto 3:4-6) Aliwan singa Pablo, saray klero na Kakristianoan so mangibabagan “magenap a kualipikado” lapud sikara so nanggraduar ed saray teologon seminaryo. Kanian agda bidbiren a saraman so agnanggraduar ed seminaryo so kualipikadon ministro a walaan na autoridad a manbangat. Balet say nikaduman impanaral nen Pablo ed Judaismo so agnanggawa ed sikaton kualipikado a para ed Kristianon ministeryo no nipaakar ed balon sipanan. Nisay si Jesus so angiletneg na anggan anton teologon seminaryo a para ed saray 12 apostoles to o siopaman ni ya onatendi. Ontan met natan, say pagmaliw na sakey a toon magenap a kualipikado a para ed tuan Kristianon ministeryo so nepeg a manlapud si Jehova, say sankabalgan a Managbangat. Siempre, say ontan a ministro so mangiter na prueba ya agbalot nipulisay.
“Siopa So Angiter ed Sika na Sayan Autoridad?”
7. Diad anton dalan so pidumaan na saray relihyoson papangulo ed si Nicodemo diad pamaakaran na impanmoria ra ed autoridad nen Jesus?
7 Inangatan na saray relihyoson papangulo so kanepegan na anggan say Anak na Dios a mangipulong ed maong a balita tan manggawa ed saray milagro. Diad templo, “saray manunan saserdote tan saray mamasiken na totoo so sinmingger ed sikato legan a sikato so manbabangat tan kuanto: ‘Diad anton autoridad so panggagawaan mo ed sarayan bengatla? Tan siopa so angiter ed sika na sayan autoridad?’” (Mateo 21:23) Agda labay ya alaen so konklusyon nen Judion manuley a Nicodemo sanen inkuanto ed si Jesus: “Rabbi, kabat mi a sika bilang sakey a managbangat so nanlapud Dios; ta anggapo so makapanggawa ed sarayan tanda a ginawam noag say Dios so wala ed sika.”—Juan 3:1, 2.
8. Kayari na masulok a taloy taon na ministeryo nen Jesus, panon so inkiwas na saray Judion papangulo ed prueba na pakabidbiran tan autoridad to?
8 Nayarin imbaga nen Jesus ed saray sinmuppiat ed sikato, ‘Paulian a saray kimey ko so mansalita ed inkasikaran dili!’ Kayari na masulok a taloy taon na mapublikon karera to, saray manunan saserdote tan mamasiken so walaan na dakel a tandan pangibasyan na suston konklusyon no nipaakar ed pakabidbiran tan kanepegan nen Jesus a manggawa ed saray milagro tan manbangat na katuaan nipaakar ed Panarian na Dios. Sikara lambengat so masekder-impantenger a mangawat ed amin ya ebidensyan gagawaen nen Jehova diad pamaneknek a si Jesus so nisipan a Mesias.
9, 10. (a) Akin ya agto pankelawen iray Tasi nen Jehova a say kualipikasyon da bilang ministro so nasusuppiat natan? (b) Panon so impideneng nen Jesus ed saray relihyoson papangulo ya anuppiat ed autoridad to, tan anto so epekto na saya?
9 Nisesengeg ed saman ya agawa ed kipapasen nen Jesus, agpankelawan na saray Tasi nen Jehova a say kualipikasyon da bilang autorisadon ministro na Ama to so susuppiaten na saray relihyoson papangulo natan. Lapud saramay anuppiat ed autoridad nen Jesus so angipulisay ed saray dakel a mamilagron kimey to, sikato so amalesa na sakey a tepet ya angiparungtal ed sikara. Tan saray kaplesan-agew a babangatan to so makapanggawa met na ontan a bengatla diad kipapasen na saraman so manggagagalan agmangiimano ed kimey na saratan a babangatan.
10 Sanen intepet na saray manunan saserdote tan mamasiken ed si Jesus, “Siopa so angiter ed sika na sayan autoridad?” sikato so ag-angipaarap na makilot a tepet noagta kuanto: “Siak, met, so manepet ed sikayo na sakey a bengatla. No ibaga yo ed siak, ibagak met ed sikayo no anton autoridad so panggagawaan ko ed sarayan bengatla: Say bautismo nen Juan, manlapud anton sengegan? Manlapud tawen o manlapud totoo?” Inyarum na salaysay: “Ingen inggapo ra so nankatunongan ed limog dan dili, a kuan da: ‘No ikuan tayo, “Manlapud tawen,” ikuanto ed sikatayo, “Akin, sirin, et agyo sisiaen?” No, anggaman kuan, ikuan tayo, “Manlapud totoo,” say karaklan so takotan tayo, ta amin da so mamibidbir ed si Juan a bilang propeta.’ Kanian diad ebat ed si Jesus inkuan da: ‘Agmi amta.’ Sikato, met, so angikuan ed sikara: ‘Agko met ibaga ed sikayo no anton autoridad so panggagawaan ko ed sarayan bengatla.’” (Mateo 21:23-27) Natan, saray Tasi nen Jehova so nayarin manuppiat ed saray klero a Makasulatan diad paraan a walaan na miulibay ya epekto.a
11. Anton kimey so gagawaen na saray Tasi nen Jehova sakbay na 1914, tan panon a saray managbalaw da so apepe?
11 Nanlapud 1876 a nampatuloy, saray totoo nen Jehova so nampakabat ed mundo, tan ilautla’d Kakristianoan, a say Panaon Gentil so mangangga ed luglog na 1914. (Lucas 21:24, King James Version) Saray klero so agmakapangipulisay ed sayan manunan kimey ed ngalngalin 40 taon—sakey a kimey a misimbangan ed saman so ginawa nen Juan a Managbautismo. Saraman a klero so nantalaran a sigugunaet pian martilyoen da so editor na sayan palapagan no say 1914 so onsabin andian na anggan anton matalonan nagawa a mipetekan ed saraman so impasakbay to. Balet, o, agaylan sikaray apepe sanen nen Hulyo 28, 1914, et akusbo so kareenan diad imbetag na Guerra Mundial I!
12. Antoran kairapan so angulop tan tinmumbok ed Guerra Mundial I?
12 Say impanderal na bakal tan impamaulian na dakel a totoo ed agrikultura so angitarok na kakisiran ed tagano. Minayegmeg na saray yegyeg so nanduruman pasen na dalin, a nansengegan na baleg a deral tan irap. Nen 1915 pinatey na yegyeg ed Avezzano, Italya, so 29,970, tan say mabiskeg a yegyeg nen 1920 so amatey na 200,000 ed Probinsya na Kansu, China. Nen 1923, masulok a 140,000 so inatey ed samay yegyeg ed Great Kanto ed Hapon. Diad mukor na bakal sinmabi so trankaso Espanyol a diad sakey taon et pinatey to so mas dakel nen say apalabas ya apatiran taon na bakal. Agpalampasen et say inkapasegsegang na saray ariripen nen Jehova na saman ya inmunan gutgutan na mundo, ya amantok ed agmakatunongan ya inkapriso ed siam-bulan na presidente tan say sekretaryo-tesorero na Watch Tower Society tan saray anemiran kakimeyan da.
13. Anto so intepet na saray Tasi nen Jehova ed saray klero na Kakristianoan, tan anto so nakaukolan ya awaten na sarayan managbalaw no sikara so inmebat a simamatua?
13 Nanlapulad impanampot na Guerra Mundial I, tinepetan na saray Tasi nen Jehova so klero na Kakristianoan: ‘Kasin saray makadesyang ya agawgawan amairap ed dalin tayo nanlapulad 1914 a manpatuloy so kasumpalan na propesiya nen Jesus ed Mateo 24:3-13?’ No saraman a klero so simamatuan mangibaga na on, inako ra komon sirin a si Jesu-Kristo so sinmabi ed mangatatawen a Panarian to nen 1914. Sirin, lapud imbaga nen Jesus a ‘say mundo so agla makanengneng ed sikato’ tan sikato la natan so imortal ya espiritun persona, say “isasabi,” odino “kiwawala” to, so agnanengneng. (Juan 14:19; Mateo 24:3, KJ; 1 Pedro 3:18) Balet say pangako ed amin na saya so mangamper ed saray klero diad panuppiat a saray manamayegyeg-mundon agawgawa nen 1914-18 so datin kurang labat na insanok na nasyones diad andar na awaran.
14. (a) No saray relihyoson papangulo so manggawa na manepeg a panangako, diad anton kimey komon so mangobliga ed sikara a pibiangan? (b) Anton talindeg ed Panarian so intalirak da, balet anton kurang so tinumbok da?
14 Nagkalalo ni, no inako na saray klero na Kakristianoan a saray agawgawa nen 1914-18 so ananda ed gapo na anggaan na daan a sistema, sikara komon so naobligan mamidbir ed arum a nengneng na “tanda” na “kiwawala” nen Jesus tan akibiang komon ed kasumpalan na saray salita to: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones.” (Mateo 24:14) Kabaliksan na satan so pangipulong, aliwan say Ebanghelyo ya impulong da ed dakel a siglo, noagta say maong a balita na Panarian a niletneg ed tawen diad impanampot na Panaon Gentil nen 1914. Intalirak da komon so Liga na Nasyones a bilang “say pulitikal a balikas na Panarian na Dios ed dalin” tan satan so moriaen da tan say sandi to, say Nasyones Unidas, a bilang ‘say makapadimla a pankibalatar a manalalagey ed masanton pasen.’ (Mateo 24:15, KJ) Balet anggad taon 1985, saray klero na Kakristianoan so agmalabay a mananda ed Liga na Nasyones tan say Nasyones Unidas a sikato so “makapadimla,” odino “mauges a bengatla.”
15. Anton arapen so manatalaran ed saray klero, balet anto so gagawaen na saray Tasi nen Jehova?
15 Sirin saray klero na Kakristianoan so agmalabay a mangala na talindeg ed Panarian nen Jehova diad panamegley nen Jesu-Kristo. Diad insaew a panuporta ed satan, sikara so naderal ed “baleg a kairapan” ya asingger la. Balet aliwan singa sikara, saray Tasi nen Jehova so anaynan ed Babilonia a Baleg, say sankamundoan ya imperyo na palson relihyon tan sikara so mangipupulong na mensahe na Panarian ed 205 daldalin. Sayan agnaparaan a kimey so matalonan nengneng na “tanda” a mamapaneknek a nen 1914 et nitandoro si Jesus bilang mangatatawen ya Ari, a manuley ed pegley na kakabusol to.—Mateo 24:3, 14, 21; Salmo 110:1, 2; Apocalipsis 18:1-5.
Kasin Wala So Pankaukolan na Rekomendasyon?
16. Antoran tepet so onlesa no nipaakar ed rekomendasyon, tan anto so walan ibaga nen Pablo nipaakar ed saya?
16 Kasin andi-letnegan ya irekomenda mi so inkasikami a bilang alanaan a tasi nen Jehova? Odino kasin sikami so manisilib a mangimamanyubra ed saray pamaakaran ta pian iletneg so ontan a rekomendasyon a para ed “arum a karnero” nen Jesus? (Juan 10:16) Agginawa nen Pablo so ontan a bengatla noagta nayarian ton ibaga ed saraman a taga Corinto a nagmaliw a Kristiano nisesengeg ed andi-kesaw a sagpot da: “Kasin igagapo mi lamet ya irekomenda so inkasikami? Odino kasin sikami, angangko, singa arum a lalaki, a mankaukolan na saray sulat na rekomendasyon ed sikayo odino manlapud sikayo? Sikayon mismo so sulat mi, a nitatak ed kapusoan mi tan akabatan tan nababasa na amin a totoo. Ta sikayo so nipanengneng a sakey a sulat nen Kristo ya insulat mi a bilang ministro, a nitatak aliwan diad tinta noagta diad espiritu na sakey a Dios a mabilay, aliwan diad tablan bato noagta diad silalaman a tabla, diad kapusoan.”—2 Corinto 3:1-3
17. Akin a nibagan si Pablo so magenap a kualipikado ed ministeryo, tan diad sayan pamaakaran, anto so nayarin nibaga ed saray Tasi nen Jehova?
17 Diad tulong na espiritu nen Jehova, insulat nen Pablo so dakel a libro na Biblia tan dakel so akumberte to ed Inkakristiano. Sirin peteg a pinaneknekan ton sikato so magenap a kualipikado ed Kristianon ministeryo. Diad modernon kasimbangan, nagkalautla nanlapud inmunan inkipalapag na sayan palapagan nen 1879, say alanaan a nakdaan na babangatan nen Kristo, anggaman sikara so ag-apuyanan a singa si Pablo, so amawala na dakel a literatura na Biblia. Nanlapulad 1920, impalapag da so nilibon milyon a libro, pulyeto, magasin, tan tracts ed dakerakel a lenguahe. Sayan literatura so nibunog ed abeban presyo, a dakel ed saya so inter a libre ed saray pobre. Say Watch Tower Society so agiyareglo met ed saray libren paliwawa ed Biblia tan angibaki na saray misionero ed teritoryan agnalilingkoran ed liber na globo. Nilibu-libo so kinmiwas ed saray inimprinta tan insangin mensahe tan insimbolo ra so dedikasyon da ed si Jehovan Dios diad inkabautismoan, nagkalalo la nanlapulad 1935 sanen inmunan agawan malinew a say andi-getar a “baleg ya ulop” na “arum a karnero” nen Jesus so maniilalo ed arapen diad maandon bilay ed paraison nipawil ed dalin.—Apocalipsis 7:9-17; Lucas 23:43.
18. No naangatan a mamaneknek ed kualipikasyon da bilang ministro, diad anto so nayarin ituro na alanaan a nakdaan?
18 Kanian sirin, anto ey no angatan na saray klero so alanaan a nakdaan a mamawala na sertipiko a bilang Doctors of Divinity? Akin, sarayan ariripen nen Jehova so makapawala na mas abalbaleg a makabaliksan ya ebidensya! Nayarian da natan ya ituro so masulok a taloran milyon ya “arum a karnero” ed sankadalinan tan nayarian dan ibaga: ‘Wala so sulat na panuporta mi!’ Nayarian dan alaen iray salita nen Pablo tan iyabawag da ed saray membro na “baleg ya ulop”: “Sikayon dili so sulat mi, a nitatak ed saray kapusoan mi tan akabatan tan babasaen na amin a totoo.” (2 Corinto 3:2) Paulian a saray klero na Kakristianoan so mamasa ed satan a mabilay a sulat a tinibukel na saray dedikado, bautismadon Kristiano a manlilingkor ed si Jehovan Dios ed agew tan labi ed templo to tan ontutulong ed ‘pangipulong ed sayan maong a balita na panarian ed amin a dalin ya onkanan pantasi ed amin a nasyones.’ (Mateo 24:14) Singa say alanaan a nakdaan, papaneknekan da so inkasikara a magenap a kualipikado ed Kristianon ministeryo.
19. Anton nikadkaduman sulat na rekomendasyon so nipreserba ed Har–Magedon?
19 Sayan nikadkaduman sulat na rekomendasyon so agnapunas ed onsasabin “bakal na baleg ya agew na Dios a Makapanyarin-amin” diad simbolikon pasen a tinawag na Har–Magedon. (Apocalipsis 16:14-16) Noag ingen, sikara so bantayan tan ipreserba na Lawas-Makapanyarin Dios pian niparungtal diad kayari-Har–Magedon a sistema na bengabengatla ed silong nen Kristo ya Ari. Agaylan mabiskeg a sulat so pagmaliwan na “baleg ya ulop” ed saray binilyon a totoon inaatey a paolien nen Jehovan Dios ed panamegley nen Jesu-Kristo, ed satan a manlapud saray pakanodnonotan a lubok ed sankadalinan! Sirin itultuloy yo so mansulat, sikayon alanaan a nakdaan! Tan sikara so itultuloy yon tulongan, sikayon “baleg ya ulop” na “arum a karnero” na Maabig a Pastol!
[Paimano ed Leksab]
a Nengnengen, alimbawa, so parapo 13 tan 14 ed leksab.
Antoray Komento Yo?
◻ Panon so pangaalig na saray Tasi nen Jehova ed si Pablo diad agpangitatagilako ed Salita na Dios?
◻ Anto so letnegan ed pagmaliw na sakey a toon magenap a kualipikado a para ed tuan Kristianon ministeryo?
◻ No saray relihyoson papangulo so manggawa na manepeg a pangawat, ed anton kimey so naobligaan da komon a pibiangan?
◻ Nayarian ya ituro na alanaan a nakdaan so anton nikadkaduman sulat ed pamaneknek a sikara so magenap a kualipikadon ministros?
[Litrato ed pahina 9]
Imbangat nen Jesus iray babangatan to a magmaliw a ministro, balet agto inletneg so anggan anton teologon seminaryo
[Litrato ed pahina 25]
Bilang kualipikadon ministro, saray Tasi nen Jehova so mangipupulong ed balita na niletneglan Panarian. Kasin gagawaen yo?