Naabrasa ed “Maridios a Debosyon” Iran Kumbension Distrito
AGAYLAN maabig a tema so kumbension distrito ed sayan taon: “Maridios a debosyon”! Tan agaylan maabig ya ehemplo na maridios a Debosyon so inletneg nen Jesu-Kristo ed sikatayo! Agpankelawan a si apostol Pablo so apuyanan a mansulat nipaakar ed sikato: “Peteg, say sagradon sekreto na sayan maridios a debosyon so naakon baleg: ‘Sikato so nipatnag ed laman, niyabawag a matunong ed espiritu, pinmatnag ed saray angheles, nipulong ed limog na nasyones, sinisia ed mundo, naawat ed gloria.’”—1 Timoteo 3:16.
Say kumbension distrito tayo so amabiskeg ed sikatayon magmaliw a totoo na tuan maridios a debosyon, a singa si Jesus. Sirin, ununa ed amin, labay tayon seguroen ya absoluton agtayo abuloyan so antokaman a mangamper diad pibiang tayo ed sayan espiritual a piesta. Kanian, sikatayo komon so akayurong la ed Biernes na kabuasan ed 8:50 pian panggayagaan so presentasyon na musika tan sirin wala ed suston kipapasen na nonot a mangunggunan sigpot a manlapud programa ya ontumbok. Say teman pinili a para ed ununan agew so “Lingkoran So Sakey a Dios a Mankakaukolan na Sigpot a Debosyon,” nibase ed Exodo 20:5. Say paliwawa na tserman so matukotukoy: “Naabrasa, Sikayon Totoo na Maridios a Debosyon!” Diad ununan agew, sikatayo so napabiskeg ed saray paliwawan mangipapanengneng no akin ya ipipilit nen Jehova so maridios a debosyon tan no akin a nakaukolan tayon aralen so sagradon sekreto na maridios a debosyon. Wala met so makapasagyat ya impormasyon nipaakar ed pakabidbiran ed tuan Dios tan say inkapeteg na Salita to.
Say tema ed Sabado so “Say Maridios a Debosyon et Kabaliksan To So Baleg a Gungguna,” nibase ed 1 Timoteo 6:6. Diad kabuasan, akaawat itayo na instruksion ed no anto so nakaukolan diad panumpal ed maridios a debosyon. Tan, siempre, wala so paliwawa ed bautismo a para ed saraman so akaparaan ya onloob ed sakey a kurang na bilay na maridios a debosyon. Diad Sabado na ngarem et nipaslep ed sikatayo so pankaukolan na katooran ed “matoor tan makabat ya aripen,” tan insan naaralan tayo no panon so pangipatnag tayo na saray gawa na maridios a debosyon diad sirkulo na pamilya. Nisesengeg ed saray probleman kidudungetan na saray tobonbalo tayo, wala so nikadkaduman mensahe a para ed sikara.
“Italirak So Ag-inkamaridios tan Manbilay ed Maridios a Debosyon,” inaon ed Tito 2:12, so tema ed Simba. Diad kabuasan, awaten tayo so pigaran nipanpanaon a bilin a mamapasakbay ed sikatayo a sumpad “too na kaugsan” tan sumpad ikasipa ed saray pamaakaran na tagano tan iinumen, tan panag-ayos, tan panligliwaan. (2 Tesalonica 2:3) Saya so tumboken na modernon-agew a draman mangidadanet ed kaimportantian na panagpauley tayo ed Dios. Say paliwawa ed publiko ed ngarem so mangipresenta ed maong a balitan say kililiktar so asingger ed saray totoo na maridios a debosyon. Say espiritual a piesta tayo so mansara diad sakey a diskusyon a mangipapanengneng a say “Mantultuloy a Kipapasal ed Maridios a Debosyon So Makagungguna.”
Sirin ondagon akaparaan a manumbok ed Biblia yo diad saray reperensya na saray managpaliwawa tan isulat iray makanan punto ed paliwawa diad sakey a panagsulatan. Say panagnota so baleg a tulong diad panangiyapasakey tan nagunggunaan a nagnap ed saman so narengel na sakey. Tan sikatayo komon so agbalot mangibabaliwala ed katuaan a say malaem a kimey so nakaukolan diad sakey a kumbension pian onkurang a sankaabigan tan marlas tan say dakel a lima so manggawa ed kimey ya anlemew. Diad pamboluntaryon ontulong, nalikna tayo so babaleg a liket na panangiter.—Gawa 20:35.
Sirin komon ta say maridios a debosyon tayo so managdag ed sikatayon ondago ed sayan kumbension tan pakiwasen to itayon mangunggunan tuloy ed satan. Komon ta sikatayo so ontaynan ya apabiskeg tan determinadon mangipakurang na bilay na maridios a debosyon a nagkalalon nagnap.