Tumboken so Ehemplo nen Jesus ed Maridios a Debosyon

“Say sagradon sekreto na sayan maridios a debosyon so inakon baleg: ‘Sikato [Jesus] so nipatnag ed laman.’”​—1 TIMOTEO 3:16.

1. (a) Anton tepet so agnaebatan ed masulok a 4,000 taon? (b) Kapigan tan panon so inkiiter na ebat?

SAMAN so sakey a tepet ya agnaebatan ed masulok a 4,000 taon. Nanlapulad inmunan too, si Adan, so sinmaew a mamemben na katooran, say tepet so: Panon so nayarin kipatnag na maridios a debosyon ed limog na katooan? Kaunoran, nen inmunan siglo K.P., diad isabi na Anak na Dios ed dalin, say ebat so niiter. Diad kada kaisipan, salita, tan gawa, impanengneng nen Jesu-Kristo so personal a siglaotan to ed si Jehova. Nilukasan to sirin so ‘sagradon sekreto na maridios a debosyon,’ ya impanengneng to so dalan diad pamasiansia na saray dedikadon totoo ed ontan a debosyon.​—1 Timoteo 3:16.

2. Diad pananumbok ed maridios a debosyon, akin a nepeg tayon imanoen a maapit so ehemplo nen Jesus?

² Diad pananumbok ed maridios a debosyon bilang dedikado, bautismadon Kristianos, maabig so “pangimanon maapit” ed ehemplo nen Jesus. (Hebreos 12:3) Akin? Nisengeg ed duaran rason. Ununa, say ehemplo nen Jesus so ontulong ed sikatayon mamayubo ed maridios a debosyon. Kabat nen Jesus so Ama to a magmaong nen say siopaman. (Juan 1:18) Tan ontanlan maapit so impangalig nen Jesus ed saray dalan tan kalidad nen Jehova a nayarian ton ibaga: “Siopaman ya akanengneng ed siak so akanengneng met ed Ama.” (Juan 14:9) Diad panamegley na bilay tan ministeryo nen Jesus, sirin, makagamor itayo na araddalem ya apresasyon ed saray matamoy a kalidad nen Jehova, sirin pabiskegen to so personal a siglaotan tayo ed maaron Manamalsa tayo. Komadua, say ehemplo nen Jesus so ontulong ed sikatayo diad panangipatnag na maridios a debosyon. Inletneg to so ayadyarin ehemplo na kondukta a mangipatnag ed maridios a debosyon. Maabig sirin so pangimano tayo no panon so nayarin ‘pangisulong tayo ed si Kristo,’ salanti, sikato so alaen a bilang padron, aligen so ehemplo to.​—Roma 13:14.

3. Anto so nepeg ya isakup na programa tayo ed personal a panagaral ed Biblia, tan akin?

³ Aliwan amin a bengatlan imbaga nen Jesus tan ginawa to so nipreserba ed insulat a porma. (Juan 21:25) Sirin, saray bengatlan nikurit ed leksab na madibinon puyan so nepeg a nagkalautlan makapainteres ed sikatayo. Say programa na personal a panagaral ed Biblia so nepeg sirin a mangisakup ed maparanay a panagbasa ed awaran na Ebanghelyo na bilay nen Jesus. Balet pian say ontan a panagbasa so ontulong ed sikatayo diad pananumbok tayo ed maridios a debosyon, nepeg ya ilugar tayo so panaon diad panmorekdek a sipapabli ed babasaen tayo. Sikatayo met so nepeg ya alerton onnengneng ed labas na mapatnag.

Singa Ama, Singa Anak

4. (a) Anto so mangipanengneng a si Jesus so sakey a personan walaan na interes tan panangabagey? (b) Anton ununan kiwas so inala nen Jesus diad pidedeneng ed arum?

⁴ Imanoen so sakey ya ehemplo. Si Jesus so sakey a toon walaan na interes tan panangabagey. Imanoen so manlapud Marcos 10:​1, 10, 13, 17, tan 35 a saray totoo ed amin ya edad tan nanlapuan so akaromog ed sikaton mainomay ya asinggeran. Diad masulok nen aminsan ya inkagawa, saray ugugaw so sinarakoy to ed saray taklay to. (Marcos 9:36; 10:16) Akin a saray totoo, anggan saray ugugaw, so walaan na anlemew a liknaan ed si Jesus? Lapud masimoon, puron interes to ed sikara. (Marcos 1:40, 41) Saya so mapatnag unong ta mabetbet a sikato so unuuna diad iyasingger ed arum a mankaukolan na tulong. Sirin, nabasa tayo ya “anengneng” to so balo ed Nain a say inatey ya anak ton laki so sankaawit. Diad saman et sikato so “inmasingger” tan pinaoli to so ugaw a laki, tan anggapo so abitlan wala so siopaman ya angerew ed sikato a manggawa na onman. (Lucas 7:13-15) Sikato met, agkinerew a gawaen to, so kinmiwas ya inmunan manambal ed sakey a biin lupoy tan sakey a lakin linmarag.​—Lucas 13:11-13; 14:1-4.

5. Anto so ibangat ed sikatayo na sarayan awaran ed ministeryo nen Jesus nipaakar ed saray kalidad tan daladalan nen Jehova?

⁵ Sano nabasam so ontan iran inkagawa, ontunda tan tepetan mo so inkasika: ‘Lapud ayadyarin inalig nen Jesus so Ama to, anto so ibaga na sarayan salaysay ed siak nipaakar ed saray kalidad tan daladalan nen Jehova?’ Nepeg a saratan so mangipaseguro ed sikatayo a si Jehova so sakey a Dios a walaan na interes tan panangabagey. Say biskeg na mantultuloy ya interes to ed pamilya na too so anenyeg ed sikaton manggawa na ununan kundang diad pideneng ed sikara. Agkinaukolan a sikato so piliten diad impangiter to ed Anak to a “sakey a dondon diad kasalat na dakel.” (Mateo 20:28; Juan 3:16) Sikato so nananap na saray pankanawnawa “diad pisiglaotan” ed saraman so manlingkor ed sikato a nisesengeg ed aro. (Deuteronomio 10:15) A singa ibabaga na Biblia: “Saray mata [nen Jehova] so onnenengneng ed amin a dalin pian ipanengneng to so biskeg to a nisesengeg ed saraman so say puso ra so nagnap ed sikato.”​—2 Awaran 16:9.

6. Antoray pansumpalan no morekdeken tayo so interes tan panangabagey nen Jehova a singa impanengneng ya ehemplo na Anak to?

⁶ Manumameng ed onian dalan ed interes tan panangabagey nen Jehova, a singa impanengneng ya uliran na Anak to, so manenyeg ed puso yo, a panoen to na babaleg ya apresasyon ed matamoy tan makapasagyat iran kalidad To. Saya, met, so mamaasingger ed sikayo diad sikato. Sikayo so natenyeg ya onasingger ed sikaton mabulbulos diad pikakasi ed amin a panaon tan diad leksab na amin a sirkumstansya. (Salmo 65:2) Pabiskegen to so personal yon siglaotan ed sikato.

7. Kayari na panmorekdek ed interes tan panangabagey nen Jehova, anto so nepeg mon itepet ed inkasika, tan akin?

⁷ Nonoten, anggaman kuan, a say maridios a debosyon so manasaglawi na mas nen say basta panagdayew a liknaan. A singa imbaga na eskolar na Biblia a si R. Lenski, “isasakup to so interon magalang, panagdayew ya awawey tan saray aksion ya ompapaway ditan.” (Kien mi so italiko.) Sirin kayari na panmorekdek ed kiwawala na interes tan panangabagey nen Jehova a singa impanengneng ya ehemplo nen Jesus, tepetan mo so inkasika: ‘Panon so pakapagmaliw kon nagkalalo a singa si Jehova ed sayan pamaakaran? Kasin naromog na arum a siak so mainomay ya asinggeran?’ No sakey kan ateng, nepeg a sika so mainomay a piregan na saray anak mo. Tan no sakey kan matatken ed kongregasyon, peteg a sika so mainomay a piregan. Anto, sirin, so manggawa ed sikan lalon mainomay ya asinggeran? Walaan na interes tan maabagey. Nepeg mon bayuboan so masimoon, puron interes ed arum. No peteg a sika so matalima ed arum tan mabulos ya iter mo so inkasika a nisesengeg ed sikara, saya so nalikas da tan onapit ira ed sika.

8. (a) Anto so nepeg mon lawas nonoten legan a babasaen moray salaysay na Biblia nipaakar ed si Jesus? (b) Anto so naaralan tayo nipaakar ed si Jehova manlapud saray salaysay a nisita ed paimanod-leksab?

⁸ Sirin legan a babasaen moray awaran ed Biblia nipaakar ed si Jesus, lawas nonoten a naaralan mo so nagkalalo nipaakar ed si Jehova bilang sakey a persona a manlapud saray bengatlan imbaga tan ginawa nen Jesus.a Tan sano say apresasyon mo ed saray kalidad na Dios, a singa impatnag nen Jesus, so manenyeg ed sikan manalin magmaliw a nagkalalon singa Sikato, sika so mangiiter na ebidensya ed maridios a debosyon mo.

Panangagamil na Maridios a Debosyon ed Saray Membro na Pamilya

9, 10. (a) Panon a say aro tan panagpaga nen Jesus ed ina to, si Maria, so nipatnag ed pigaran bekta sakbay na impatey to? (b) Akin, mapatnag, ya inmatalek nen Jesus so panangasikaso ed si Maria diad si apostol Juan tan aliwan diad sakey ed saray dilin agi to ed laman?

⁹ Say bilay tan ministeryo nen Jesu-Kristo so mangiparungtal na malaem nipaakar ed no panon so manepeg a pangipatnag ed maridios a debosyon. Sakey a makatenyeg ya ehemplo so nikurit ed Juan 19:25-27, a nabasa tayo: “Diad abay na panamairapan a kiew nen Jesus, anggaman kuan, akaalagey diman so ina to tan say agin bii nen ina to; si Maria ya asawa nen Clopas, tan si Maria Magdalena. Sirin si Jesus, diad impakanengneng to ed si ina to tan say babangatan ya inaro to [Juan] a manalalagey, inkuanto ed si ina to: ‘Bii, nia! Say anak mo!’ Ontumbok et imbaga to ed babangatan: ‘Nia! Si inam!’ Tan manlapud saman ya oras a manpatuloy say babangatan so angawit ed sikato diad dilin abung to.”

¹⁰ Isipen pa itan! Pigaran kasikmat labat sakbay na impangisuko to ed mangaraldalin a bilay to, say aro tan panagpaga nen Jesus so anenyeg ed sikatayon mangimatalek na panangasikaso ed si ina to, si Maria, (mapatnag a sikato la natan so sakey a balo) diad si inad-aro ton apostol Juan. Balet akin a si Juan tan aliwan diad sakey ed saray dilin agagi to ed laman? Lapud si Jesus so mapaga ed aliwan basta pisikal, materyal iran nakakaukolan nen Maria noagta nagkalautla ed espiritual a pankaabigan to. Tan pinaneknekan nen apostol Juan (nayarin kapinsan nen Jesus) so pananisia to, bangta anggapo so pamatnagan a saray agagi nen Jesus ed laman so, diad saman, mananisia la.​—Mateo 12:46-50; Juan 7:5.

11. (a) Unong ed si Pablo, panon so nayarin pangagamil na sakey a Kristiano na maridios a debosyon ed dilin sankaabungan to? (b) Akin a say puron Kristiano so manlegpet ed saray matatatken ya atateng?

¹¹ Natan, panon a saya so sakey a panangipatnag na maridios a debosyon? Impaliwawa nen apostol Pablo: “Igalang moray babalo a peteg a babalo. Balet no wala so balo a walaan na saray anak odino apo, komon ta saraya so makaaral ya ununa a mangagamil na maridios a debosyon ed dilin sankaabungan da tan mantultuloy a tumangan daray atateng da tan lalaki-babai ra, ta saya so makapaliket ed imaton na Dios.” (1 Timoteo 5:​3, 4) Say panangigalang ed saray atateng na sakey diad panangitarya na materyal a suporta sano nakaukolan so, a singa imbaga nen Pablo, sakey a balikas na maridios a debosyon. Panon ya ontan? Si Jehova, say Manangigapo ed oksuyan na pamilya, so mangigaganggan ed saray anak a mangigalang ed saray atateng da. (Efeso 3:14, 15; 6:1-3) Sirin, say puron Kristiano so mamidbir a say panangasikaso ed ontan a responsabilidad ed pamilya so aglabatla mangipapanengneng na aro ed saray atateng na sakey noagta mangipapatnag met na panamasantos ed Dios tan katutulok ed saray ganggan to.​—Ipareng so Colosas 3:20.

12. Panon mon naagamil so maridios a debosyon diad matatatken ya atateng, tan anto so nepeg a motibo?

¹² Panon, sirin, so pakaagamil mo na maridios a debosyon ed saray membro na pamilya? Saya so seguradon manasaglawi ed pangiyuksoy na panangasikaso ed espiritual tan materyal a nakakaukolan na saray matatatken lan atateng, a singa ginawa nen Jesus. Say isaew a panggawa ed satan so mangipatnag na kakulangan na maridios a debosyon. (Ipareng so 2 Timoteo 3:2, 3, 5.) Say dedikadon Kristiano so manlegpet ed saray mankaukolan ya atateng aliwan lapu lambengat ed panangasi odino obligasyon noagta lapud inaro to so pamilya to, tan bidbiren to so atagey a panangigalang ya impasen nen Jehova diad panangasikaso ed ontan a responsabilidad. Sirin, say panangumponi to ed saray matatatken ya atateng so sakey a balikas na maridios a debosyon.b

13. Panon so nayarin pangagamil na sakey a Kristianon ama na maridios a debosyon ed pamilya to?

¹³ Say maridios a debosyon so nayarin agamilen ed abung diad arum a dalan. Alimbawa, say sakey a Kristianon ama so walaan na responsabilidad a manlegpet ed pamilya to diad materyal, emosyonal, tan espiritual. Sirin, niarum ed panangitarya to na materyal a suporta, sikato so simamaaron mangiyuksoy na maparanay a panagaral na Biblia ed pamilya. Sikato so mangiyeskedyul na panaon diad pibiang a maparanay ed lawak na ministeryo a kaiba to so pamilya to. Sikato so asimbang, bidbiren to so nakaukolan da ed pampainawa tan panligliwaan met. Tan sikato so sikakabat a mangigeter ed saray uunaen, ya agto abuloyan so kimey ed kongregasyon a manggawa ed sikaton makapaulian ed pamilya to. (1 Timoteo 3:​5, 12) Akin ya amin na saya so gawaen to? Aliwa lambengat a lapud panlikna na obligasyon noagta lapud aro to ed pamilya to. Bidbiren to so importansyan impasen nen Jehova diad panangasikaso ed pamilya na sakey. Diad pananumpal sirin ed reponsabilidad to bilang asawan-laki tan ama, sikato so mangaagamil na maridios a debosyon.

14. Panon so nayarin pangipatnag na sakey a Kristianon asawan bii na maridios a debosyon ed abung?

¹⁴ Saray Kristianon kaasawaan a bibii so walaan met na responsabilidad a mangagamil na maridios a debosyon ed abung. Panon? Ibabaga na Biblia a say sakey ya asawan bii so nepeg a “pauleyan” ed asawa to tan nepeg a nawalaan na “aralem a panangigalang” ed sikato. (Efeso 5:​22, 33) Anggano say asawa ton laki so agmananisia, sikato so “pauleyan” ed sikato. (1 Pedro 3:1) Idemostra na Kristianon bii so ontan a panagpauley na asawan bii diad pananuporta to ed asawa to diad saray desisyon a gawaen to anggad saraya so agmisumlangan ed saray ganggan na Dios. (Gawa 5:29) Tan akin a sayan betang so awaten to? Aliwa lambengat a lapud inaro to so asawa ton laki noagta nagkalautla lapud bibidbiren ton satan so “makapaliket ed Katawan”​—salanti, satan so oksuyan na Dios ed pamilya. (Colosas 3:18) Say mabulos a panagpauley to ed asawa ton laki so sirin sakey a balikas na maridios a debosyon to.

“Nisengeg ed Saya et Siak So Sinmabi”

15. Diad anton matalonan dalan ya impatnag nen Jesus so maridios a debosyon?

¹⁵ Sakey ed saray matalonan dalan ya angipatnagan nen Jesus na maridios a debosyon et say ‘impangiyabawag ed maong a balita na panarian na Dios.’ (Lucas 4:43) Kayari na bautismo to ed Jordan nen 29 K.P., inusar nen Jesus so ontumbok a talora tan kapalduan taon ya okupadon tuloy ed sayan lawas-importantin kimey. “Nisengeg ed saya et siak so sinmabi,” impaliwawa to. (Marcos 1:​38; Juan 18:37) Balet panon a saya so sakey a panangipatnag na maridios a debosyon to?

16, 17. (a) Anto so amakiwas ed si Jesus a magmaliw ya okupadon tuloy ed panagpulong tan panagbangat? (b) Akin a say ministeryo nen Jesus ed panagpulong tan panagbangat so sakey a pamatnagan na maridios a debosyon?

¹⁶ Nonoten a say maridios a debosyon so manasaglawi na pambilay ed nengneng a makapaliket ed Dios lapud sikato so inaro yo tan apresyaen yon tuloy iray mabmablin kalidad to. Anto, sirin, so amakiwas ed si Jesus a mangusar ed saray unor a taon to ed dalin ya okupadon tuloy ed panagpulong tan panagbangat? Liknaan lambengat na kimey odino obligasyon? Anggapoy suppiat a sikato so walaan na kapagaan ed totoo. (Mateo 9:35, 36) Tan amoria ton nagnap a say inkalanaan to ed masanton espiritu so anuro tan angiganggan ed sikato a manumpal ed ministeryo to. (Lucas 4:16-21) Ingen, saray motibo to so inmaralem.

¹⁷ “Inarok so Ama,” so mabitar ya imbaga nen Jesus ed saray apostoles to diad samay ultimon labi na mangaraldalin a bilay to. (Juan 14:31) Satan ya aro so niletneg ed sankaaraleman, maapit a pikakabat ed saray kalidad nen Jehova. (Lucas 10:22) Pinakiwas na sakey a puson tinenyeg na aralem ya apresasyon, si Jesus so akaromog na liket diad panaggawa ed linawa na Dios. (Salmo 40:8) Satan so “tagano” to​—nakaukolan a tuloy ed bilay, naakan a tuloy. (Juan 4:34) Inletneg to so ayadyarin ehemplo na “panag-anap ya ununa ed panarian” imbes ya unaen so dilin laman. (Mateo 6:33) Sirin aliwan basta no anto so ginawa to odino anggan no panon so karakel na ginawa to noagta no akin a satan so ginawa to so nanggawa ed ministeryo na impanpulong tan impanbangat to a sakey a balikas na maridios a debosyon to.

18. Akin a say samet a pibibiang ed ministeryo so agnakaukolan a panangipatnag na maridios a debosyon?

¹⁸ Panon tayon natumbok so ehemplo na “modelo,” si Jesus, diad sayan pamaakaran? (1 Pedro 2:21) Amin a kinmiwas ed imbitasyon nen Jesus a “dago kayon magmaliw a babangatan ko” so walaan na madibinon komisyon a mangipulong ed maong a balita na Panarian tan manggawa na babangatan. (Lucas 18:22; Mateo 24:14; 28:19, 20) Kasin kabaliksan na saya a diad samet a pibibiang ed panangiyabawag na maong a balita, et tutumboken tayo la so maridios a debosyon? Agnakaukolan ya ontan. No sikatayo so mibiang ed ministeryo diad paspasaray odino pasapasan nengneng, odino pian basta paliketen iray membro na pamilya odino arum, mairap ya ipasen a sakey a ‘gawa na maridios a debosyon.’​—2 Pedro 3:11.

19. (a) Anto so nepeg a manunan rason nipaakar ed gawaen tayo ed ministeryo? (b) Antoray pansumpalan no sikatayo so pakiwasen na aralem-nilamut ya aro ed Dios?

¹⁹ A singa ed si Jesus, saray motibo tayo so nepeg ya onaralem. Imbaga nen Jesus: “Nepeg mon aroen si Jehova a Dios mo ed interon pusom [saray emosyon, saray pilalek, tan say liknaan na akindalem a persona] tan diad interon kamarerwam [say bilay mo tan interon inkatoom] tan diad interon nonot mo [saray katudioan a pakayarim] tan diad interon biskeg mo.” Diad saya, inyarum na makatalos ya eskriba: “Saya . . . so nagkalalon mabli nen say amin a pinoolan ya iyaapay tan bagbagat,” (Marcos 12:30, 33, 34) Sirin aliwan no anto so gawaen tayo lambengat so makana noagta ontan met no akin a satan so gawaen tayo. Say aralem-nilamut a panangaro ed Dios a manasaglawi ed amin a biskeg tayo so nepeg a manunan rason ed gawaen tayo diad ministeryo. Sano ontan so kipapasen, sikatayo so agmankontento ed basta pasapasan pibibiang, noagta sikatayo so napakiwas a mangipatnag na kinaaralem na maridios a debosyon tayo diad panggawa na anggaan na nayarian tayo. (2 Timoteo 2:15) Ontan met, sano say aro ed Dios so motibo tayo, sikatayo so aliwan mabalaw, ya ipareng so ministeryo tayo ed arum.​—Galacia 6:4.

20. Panon so nayarin kagunggunaan tayon nagnap ed ehemplo nen Jesus diad pananumbok ed maridios a debosyon?

²⁰ Agaylan sikatayo so misalsalamat ya imparungtal nen Jehova ed sikatayo so sagradon sekreto na maridios a debosyon! Diad maalwar a panaral ed saray bengatlan imbaga tan ginawa nen Jesus tan diad pambanikel a mangalig ed sikato, sikatayo so natulongan a mamayubo tan mangipatnag na maridios a debosyon ed nanagnap a sukat. Si Jehova so siyayaman a mamendisyon ed sikatayo legan a tumboken tayo so ehemplo nen Jesus diad panumbok ed maridios a debosyon bilang dedikado, bautismadon Kristianos.​—1 Timoteo 4:​7, 8.

[Saray paimano ed leksab]

Kasin Nanonotan Yo

◻ Diad pananumbok ed maridios a debosyon, akin a nepeg tayon imanoen so ehemplo nen Jesus?

◻ Anto so naaralan tayo nipaakar ed si Jehova a manlapud interes tan panangabagey ya impanengneng na ehemplo nen Jesus?

◻ Panon so nayarin pangipatnag tayo na maridios a debosyon ed saray membro na pamilya?

◻ Anto so nepeg a motibo tayo ta pian say ministeryo tayo so magmaliw a sakey a balikas na maridios a debosyon?

[Litrato ed pahina 21]

Say sakey a Kristianon ama so responsabli a manlegpet ed pamilya to diad materyal, emosyonal, tan espiritual

[Litrato ed pahina 23]

“Balet no wala so balo a walaan na saray anak odino apo, komon ta saraya . . . so mantultuloy a manumang ed saray atateng da tan lalaki-babai ra.”