Tumboken so Maridios a Debosyon Bilang Bautismadon Kristianos

“Anggaman ontan, sika, O too na Dios, . . . tumboken mo so inkatunong, maridios a debosyon.”​—1 TIMOTEO 6:11.

1. Panon mon ebatan so tepet, Anto so sankaimportantian ya agew ed bilay mo? Akin ya ontan so ebat mo?

ANTO so sankaimportantian ya agew ed bilay mo? No sakey kan bautismadon Tasi nen Jehova, andi-duaruwan onebat ka na, ‘Siempre, say agew na inkabautismoan ko!’ Peteg, say bautismo so sankaimportantian a kundang ed bilay mo. Satan so akinpaway a simbolon ginawam so sigpot tan anggapoy-kibot a dedikasyon ed si Jehova a manggawa ed linawa to. Say bautismom so mananda ed petsa na ordinasyon mo bilang sakey a ministro na Sankatageyan a Dios, si Jehova.

2. (a) Panon a nayarin niilustra a say bautismo so aliwan unor a kundang ya alaen mo diad Kristianon kurang mo? (b) Antoran importantin manunan kundang so inalam sakbay na inkabautismoan?

² Kasin say bautismo, anggaman kuan, so unor a kundang ya alaen mo ed Kristianon kurang mo? Arawin ontan! Diad pangiyilustra: Diad dakel iran daldalin say seremonya na kasal so mananda ed anggaan na sakey a peryodo na panagplano tan panagparaan (tan gendagendat ed panagkaraw). Ontan met, tandaan to so gapoan na mankasakey a bilay bilang sanasawan paris. Miulibay, say bautismom so pantok na sakey a peryodo na panagparaan a kaleganan to et inalam so pigaran importantin manunan kundang. Agamoran mo so pikakabat ed Dios tan si Kristo. (Juan 17:3) Ginapoan mon agamilen so pananisia ed si Jehova bilang say tuan Dios, ed si Kristo bilang Manangilaban mo, tan ed Biblia bilang Salita na Dios. (Gawa 4:12; 1 Tesalonica 2:13; Hebreos 11:6) Satan a pananisia so indemostram diad impagbabawim ed saray datin kurang na kiwas mo tan akumberte ed matunong a kurang. (Gawa 3:19) Sirin ginawam la so sakey a desisyon a mangidedika na inkasika ed si Jehova pian gawaen so linawa to. (Mateo 16:24) Kaunoran, sika so abautismoan.​—Mateo 28:19, 20.

3. (a) Panon tayon nidemostra a say bautismo tayo so mananda ed gapowan na sakey a bilay na dedikadon serbisyo ed Dios? (b) Antoran tepet so onlesa, tan akin a saray ebat so nepeg a makapainteres ed sikatayo?

³ Say bautismom, anggaman kuan, so aliwan anggaan noagta gapowan na sakey a bilay a nidedika ed sagradon serbisyo ed Dios. A singa imbaga na sakey ya eskolar na Biblia, say Kristianon bilay so nepeg ya aliwan ‘gapon inkasugnar a tumboken na mankalkalinatey a pansigbosigbo.’ Panon, sirin, so pakapangipanengneng mo a diad kipapasen mo, et say bautismo so agmangirepresenta na basta ‘gapon inkasugnar’? Satan so diad panamegley na panumbok ed sakey a legay-bilay a kurang na maridios a debosyon. Anto iyan maridios a debosyon? Akin a nakaukolan so panumbok ed satan? Panon so pakabayubom ed satan a lalon nagnap ed bilay mo? Saray ebat so nepeg a paninteresan tayo, lapud sikatayo so nepeg a totoon nabidbir ed panamegley na “saray gawa na maridios a debosyon” pian sikatayo so makaliktar ed onsasabin agew na panangukom nen Jehova.​—2 Pedro 3:11, 12.

Say Kabaliksan na Maridios a Debosyon

4. Anto so insimbawa nen Pablo ed si Timoteo a gawaen, tan anto so tua ed si Timoteo ed sayan panaon?

⁴ Diad baetan na ngalngalin 61 tan 64 K.P., insulat nen apostol Pablo so inmunan apuyanan a sulat to ed si Kristianon babangatan a Timoteo. Kayari na impaneskribe ed saray kaatapan a nayarin pangipaarapan na aro ed kuarta, insulat nen Pablo: “Anggaman ontan, sika, O too na Dios, ontaynan a manlapud sarayan bengatla. Balet tumbok mo so . . . maridios a debosyon.” (1 Timoteo 6:​9-11) Makapasagyat, diad sayan panaon et si Timoteo so nayarin wala ed asasakbay a 30’s to. Sikato la so akapambaroy a malaknab a kaiba nen apostol Pablo tan naikdan la na autoridad a manuro ed saray manangasikaso tan ministeryal ya ariripen ed saray kongregasyon. (Gawa 16:3; 1 Timoteo 5:22) Ingen, si Pablo so animbawa ed sayan dedikado tan bautismado, matatken a Kristianon laki a manumbok ed maridios a debosyon.

5. Anto so kabaliksan na balikas a “maridios a debosyon”?

⁵ Anto so labay nen Pablo ya ibaga ed balikas a “maridios a debosyon”? Say orihinal a Griegon salita (eu·seʹbei·a) so nayarin nipatalos a literal bilang “manangigalang-a-maong.” Nipaakar ed kabaliksan to, nabasa tayo: “Say eusebeia so nausar a panapanaon diad pantalos a mangisusuhiri na personal a relihyoson debosyon ed kaplesan a sulat . . . balet say lalon inheneral a kabaliksan to ed popular a Griego na Romanon peryodo so ‘katooran.’ . . . Para ed saray Kristianos et say eusebeia so sankatageyan a klase na debosyon ed Dios.” (Christian Words, nen Nigel Turner) Sirin a singa nausar ed Kasulatan, say balikas a “maridios a debosyon” so manutukoy ed panangigalang odino debosyon a dingan na katooran ed si Jehova a Dios a personal.

6. Panoy pangiter na sakey a Kristiano na ebidensya ed maridios a debosyon to?

⁶ Sayan maridios a debosyon, anggaman kuan, so aliwan basta panagdayew a liknaan. Unong a singa say “pananisian andian na gawa so inatey,” sirin, ontan met, say maridios a debosyon so nepeg a makaromog na balikas ed bilay na sakey. (Santiago 2:26) Diad New Testament Words, insulat nen William Barclay: “Aliwa lambengat a say [eu·seʹbei·a tan saray misiglaotan a salita] so mangibalikas ed satan a liknaan na takot tan galang, noagta sikara met so manutukoy na panagdayew a mankanepegan ed satan a takot, tan sakey a bilay na aktibon katutulok a mankanepegan na satan a panangigalang.” Say eu·seʹbei·a so malaknab nin naukeran a bilang “sankapraktikalan a pikakabat ed Dios ed amin ya aspekto na bilay.” (The Second Epistle General of Peter and the General Epistle of Jude, nen Michael Green) Say Kristiano, sirin, so nepeg a mangiter na ebidensya ed personal a siglaotan to ed si Jehova diad dalan na panangipakurang to ed bilay to.​—1 Timoteo 2:2; 2 Pedro 3:11.

Nakaukolan So Insekar a Sagpot

7. Anto so labay nen Pablo ya ibaga sanen pinaseseg to si Timoteo, anggamano sikato so bautismado, a “manumbok” ed maridios a debosyon?

⁷ Anto, anggaman kuan, so nalalanor diad pamayubo tan pangipatnag ed maridios a debosyon? Kasin basta sakey a pamaakaran na kabautismoan? Nonoten a si Timoteo, anggaman abautismoan, so apaseseg a “manumbok [literal, ‘tumboken mo’]” ed satan.a (1 Timoteo 6:11, Kingdom Interlinear) Mapatnag, ag-isusuhiri nen Pablo a si babangatan a Timoteo so kinmulang na maridios a debosyon. Imbes, ipupurek to ed sikato so pankaukolan na mantultuloy a panumbok ed satan a tekep na inkagunaet tan seseg. (Ipareng so Filipos 3:14.) Mabitar, saya so magmaliw a legay-bilay a gegemtan. Si Timoteo, singa amin na saray bautismadon Kristianos, so makapantultuloy ya onaligwas diad panangipatnag ed maridios a debosyon.

8. Panoy impangipanengneng nen Pedro a say ontan ya insekar a sagpot so nakaukolan na sakey a dedikado, bautismadon Kristiano diad panumbok ed maridios a debosyon?

⁸ Nakaukolan so insekar a sagpot na sakey a dedikado, bautismadon Kristiano diad panumbok ed maridios a debosyon. Nansulat ed saray bautismadon Kristianos a walaan na ilalon ‘magmaliw a minanabang ed madibinon palsa,’ imbaga nen apostol Pedro: “On, nisengeg ed sayan mismon sengegan, diad impangyan yo na amin a magunaet a sagpot, iter yo ed pananisia yo so birtud, diad birtud yo et say pikakabat, diad pikakabat yo et say dangka, diad dangka yo et say panagsungdo, diad panagsungdo yo et say maridios a debosyon.” (2 Pedro 1:4-6) Mapatnag, nakaukolan so sakey a sukat na pananisia ta pian nipresenta tayo so inkasikatayo a para ed bautismo. Anggaman ontan, kayari na bautismo et agtayo nayarian so manpasapasa, a mankontento itayo la ed basta nibagan Inkakristiano. Imbes, legan a sikatayo so onaligwas ed Kristianon panagbilay, nakaukolan tayon itultuloy a bayuboan so arum iran maabig a kalidad, a pati say maridios a debosyon, a nayarin iter ed pananisia tayo. Saya, inkuan nen Pedro, so mankaukolan na magunaet a sagpot ed biang tayo.

9. (a) Panoy pangiyilustra na Griegon salita a para ed “iter” diad sukat na sagpot a nakaukolan diad pamayubo ed maridios a debosyon? (b) Anto so ipapaseseg nen Pedro ed sikatayo a gawaen?

⁹ Say Griegon salitan inusar nen Pedro ed “iter” (e·pi·kho·re·geʹo) so walaan na makapainteres a nanlapuan tan mangiyilustra ed sukat na sagpot a nakaukolan. Satan so nanlapud noun a (kho·re·gosʹ) a literal a kabaliksan to “so pangulo na sakey a kuro.” Tinukoy to so sakey a nambayar ed amin a gastos na panagpasal tan panamasiansia ed sakey a kuro diad pangipaway na sakey a sarsuela. Saray ontan a lalaki so anakbat ed sayan responsabilidad a boluntaryo a nisesengeg ed aro ed syudad da tan binayaran daray gastos a nanlapud dilin bulsa ra. Kakinonan ed ontan a lalaki so panggastos na impasya diad pangiter ed amin a nakaukolan a para ed magalgalang a paway. Say salitan ombaleg et kabaliksan to “so pangiter, pamawala na daakan.” (Ipareng so 2 Pedro 1:11.) Sirin sikatayo so papasesegen nen Pedro a mangiter ed inkasikatayo na, aliwan basta sakey a sukat na maridios a debosyon, noagta say sankagnapan a posiblen balikas na sayan mablin a kalidad.

10, 11. (a) Akin a nakaukolan so sagpot diad pamayubo tan pangipatnag na maridios a debosyon? (b) Panon so panalo tayo ed puligesgesan?

¹⁰ Akin, anggaman kuan, kasin say ontan a sagpot so nakaukolan diad pamayubo tan pangipatnag na maridios a debosyon? Para ed sakey a bengatla, wadtan so pipuligesgesan a sumpad maletey a laman. Lapud “say kiling na puso na too so mauges a nanlapud inkaugaw to,” aliwan mainomay so panumbok ed sakey a bilay na aktibon katutulok ed Dios. (Genesis 8:21; Roma 7:21-23) “Amin na saramay manpilalek a manbilay ed maridios a debosyon diad pikakasakey ed si Kristo Jesus so napasegsegang met,” so kuan nen apostol Pablo. (2 Timoteo 3:12) On, say Kristianon manbanikel a manbilay ed nengneng a makapaliket ed Dios so nepeg a duma a manlapud mundo. Sikato so walaan na miduman geter na saray estandarte tan duman kalat. A singa impasakbay nen Jesus, saya so mamaalingasa na panggula na marelmeng a mundo.​—Juan 15:19; 1 Pedro 4:4.

¹¹ Anggaman kuan, sikatayo so manalo ed puligesgesan, lapud “kabat nen Jehova no panon so pangiliktar ed totoo na maridios a debosyon a manlapud subok.” (2 Pedro 2:9) Sikatayo, anggaman kuan, so nepeg a manggawa na biang tayo diad pantultuloy a manumbok ed maridios a debosyon.

Panamayubo ed Maridios a Debosyon

12. Panoy impangipanengneng nen Pedro ed no anto so nakaukolan diad pamayubo na maridios a debosyon ed nanagnap a sukat?

¹² Panon, sirin, so pakabayubo yo ed sayan maridios a debosyon diad nanagnap a sukat? Iter nen apostol Pedro so paraan. Diad 2 Pedro 1:5, 6, sanen inlista toray kalidad a nepeg ya ipano ed pananisia tayo, inlista to so pikakabat ya akauna nen say maridios a debosyon. Asasakbay ed parehon kapitulo, insulat to: “Say madibinon pakayari to so angiter ed sikatayon mabulbulos ed saray bengatlan manasaglawi ed bilay tan maridios a debosyon, diad panamegley na suston pikakabat ed samay sakey ya anawag ed sikatayo.” (2 Pedro 1:3) Sirin insiglaot nen Pedro so maridios a debosyon ed suston pikakabat ed si Jehova.

13. Akin a makana so suston pikakabat diad panamayubo ed maridios a debosyon?

¹³ Diad tua, no anggapo so suston pikakabat imposibli so pakabayubo ed maridios a debosyon. Akin? Bueno, nonoten a say maridios a debosyon so diad si Jehova a personal tan patnagan na dalan na pangipapakurang tayo ed saray bilay tayo. Sirin say suston pikakabat ed si Jehova so makana, lapud lalanoren to so pikabat ed sikato a personal, maapit, magmaliw a nagnap a mikabat ed saray kalidad to tan daladalan to. Mas nen say satan, lalanoren to so pambanikel a mangalig ed sikato. (Efeso 5:1) Kapiganman a lalon sikatayo so onaligwas diad panagaral nipaakar ed si Jehova tan diad panangumameng ed saray dalan to tan saray kalidad to ed saray bilay tayo, diman lalon sikatayo so onsabin mikabat ed sikato. (2 Corinto 3:​18; ipareng so 1 Juan 2:​3-6.) Saya, met, so mansumpal ed araddalem ya apresasyon ed saray mablin kalidad nen Jehova, nanagnap a sukat na maridios a debosyon.

14. Pian nagamoran so suston pikakabat, anto so nepeg ya isakup na programa tayo ed personal a panagaral, tan akin?

¹⁴ Panon so pakagamor yo ed ontan a suston pikakabat? Anggaporay panamatikey. Pian nagamoran so suston pikakabat, nepeg a sikatayo so magunaet diad panagaral ed Salita na Dios tan diad saray niletneg-ed-Biblian palapagan. Say ontan a personal a panagaral so nepeg a mangisakup ed maparanay a programa na panagbasa ed Biblia, a singa say niyeskedyul ed Teokratikon Eskuelaan na Ministeryo. (Salmo 1:2) Lapud say Biblia so sakey a langkap a nanlapud si Jehova, say gawaen tayo ed pamaakaran na personal a panagaral ed Biblia so sakey a sindag ed no panon a tuloy so pangaapresya tayo ed satan a langkap. Anto so ipatnag na saray ugali yo ed personal a panagaral nipaakar ed kaaralman na apresasyon yo ed saray espiritual a tarya nen Jehova?​—Salmo 119:97.

15, 16. (a) Anto so nayarin ontulong ed sikatayo diad pamayubo na espiritual a gana ed personal a panagaral ed Biblia? (b) Pian say personal a panagaral ed Biblia so mansumpal ed pakabayubo tayo na maridios a debosyon, anto so nepeg a gawaen sano babasaen so sakey a kabiangan na Salita na Dios?

¹⁵ Inako, say panagbasa tan panagaral so aliwan mainomay ed arum. Ingen tekep na panaon tan sagpot, nayarian yon bayuboan so espiritual a gana diad personal a panagaral ed Biblia. (1 Pedro 2:2) No sikayo so manumameng a sipapabli ed amin a ginawa nen Jehova a Dios, gagawaen to, tan gawaen to ni a nisesengeg ed sikayo, say puso yo so manenyeg ed sikayon manaral ed amin a nayarian yo nipaakar ed sikato.​—Salmo 25:4.

¹⁶ Balet pian say ontan a personal a panagaral na Biblia so mansumpal diad panamayubo yo ed maridios a debosyon, say puntirya yo so agnayarin basta pangubre ed saray pahina na materyal odino panoen so kanonotan yo ed impormasyon. Imbes, sano basaen yo so sakey a kabiangan na Salita na Dios, nepeg yon ipalugar so panaon diad panmorekdek ed materyal, a tepetan mo so inkasika na saray tepet a singa: ‘Anto so ibangat to ed siak nipaakar ed saray matamoy a kalidad nen Jehova tan saray daladalan to? Panon so pagmaliw kon lalon singa si Jehova ed sarayan pamaakaran?’

17. (a) Anto so naaralan tayo nipaakar ed panangasi nen Jehova a manlapud libro nen Oseas? (b) Panon so nepeg a pangapekta ed sikatayo na panagmorekdek ed panangasi nen Jehova?

¹⁷ Imanoen so sakey ya ehemplo. Diad imbeneg say nipabtang ed sikatayon babasaen ed Biblia diad Teokratikon Eskuelaan na Ministeryo so angiyakar ed sikatayo diad libro nen Oseas. Kayari na impamasa ed sayan libro na Biblia, nayarin tepetan mo so inkasika: ‘Anto so naaralan ko nipaakar ed si Jehova bilang sakey a Persona​—saray kalidad to tan saray daladalan to​—a manlapud sayan libro?’ Say dalan na impangusar na saray saginonor a managsulat na Biblia so mangipatnag a sikatayo so akaaral na malaem nipaakar ed matamoy a panangasi nen Jehova a manlapud libro nen Oseas. (Ipareng so Mateo 9:13 ed Oseas 6:6; Roma 9:22-26 ed Oseas 1:10 tan 2:21-23.) Say inkamabulos nen Jehova a mangipanengneng na panangasi ed Israel so inyilustra na impiarap nen Oseas ed asawa to, si Gomer. (Oseas 1:2; 3:1-5) Anggaman kasmak so panagpaagus-na-dala, panagtakew, panaglawan, tan panagtalintao ed Israel, si Jehova so ‘nansalita ed puso na Israel.’ (Oseas 2:13, 14; 4:2) Si Jehova so agnaobligan mangipanengneng na ontan a panangasi noagta gawaen to ed “dilin bulos a linawa” to, daput no saray Israelitas so mangipatnag na impapuson panagbabawi tan ombeneg ed makasalanan a kurang da. (Oseas 14:4; ipareng so Oseas 3:3.) Legan a sikayo so manumameng ed onian dalan diad nikadkaduman panangasi nen Jehova, liingin to so puso yo, pabiskegen to so personal a siglaotan yo ed sikato.

18. Kayari na panumameng ed panangasi nen Jehova a singa nidanet ed Oseas, anto so nayarin itepet mo ed inkasika?

¹⁸ Nagkalalo ni, anggaman kuan, so nakaukolan. “Maliket iraman so mapangasi, lapud sikara so napanengnengan na panangasi,” so kuan nen Jesus. (Mateo 5:7) Kanian, kayari na panmorekdek ed panangasi nen Jehova a singa nidanet ed libro nen Oseas, tepetan mo so inkasika: ‘Panon so magmaong a pakaalig ko ed panangasi nen Jehova diad pidedeneng ko ed arum? No sakey ya agin laki odino agin bii a nankasalanan odino amasakit ed siak so onkerew na panamerdona, kasin siak so mamerdona “a tekep na liket”? (Roma 12:8; Efeso 4:32) No sika so manseserbi ed kongregasyon bilang aturon matatken, nayarin tepetan mo so inkasika: ‘Sano mamebemben na hudisyal iran pamaakaran, panon so magmaong a pakaalig ko ed si Jehova, ya “akaparaan a mamerdona,” nagkalautla no say nankasalanan so mangiter na puron ebidensya na impapuson panagbabawi?’ (Salmo 86:5; Uliran 28:13) ‘Anto so nepeg kon nengnengan bilang letnegan na pananginatnat na panangasi?’​—Ipareng so Oseas 5:4 tan 7:14.

19, 20. (a) Anto so pansumpalan sano nagawa so panagaral ed Biblia diad nagnap a nengneng? (b) Anto so kaaruman nin tulong diad pamayubo ed maridios a debosyon?

¹⁹ Agaylan makagungguna so pagmaliwan na personal a panagaral mo ed Biblia sano nagawa ed ontan a nagnap a nengneng! Say pusom so ombaleg ed apresasyon diad saray mablin kalidad nen Jehova. Tan diad mantultuloy a pambanikel mon mangalig ed sarayan kalidad diad bilay mo, napabiskeg mo so personal a siglaotan mo ed sikato. Sirin tutumboken mo so maridios a debosyon bilang sakey a dedikado, bautismadon aripen nen Jehova.​—1 Timoteo 6:11.

²⁰ Sakey a kaaruman nin makatulong diad panamayubo ed sayan mablin kalidad so naromog ed si Jesu-Kristo​—say ayadyarin ehemplo na maridios a debosyon. Panon so panulong ed sikayo na pananumbok ed ehemplo nen Jesus diad pamayubo tan diad panangipatnag na maridios a debosyon? Say artikulo ed pahina 18 so manalaysay ed saya tan diad saray misiglaotan a tepet.

[Paimano ed leksab]

Panon So Panangebat Yo?

◻ Akin a say bautismo so aliwan unor a kundang ya alaen mo ed Kristianon kurang mo?

◻ Anto so kabaliksan na “maridios a debosyon,” tan panon so pangiter mo na ebidensya ed satan?

◻ Akin a nakaukolan so insekar a sagpot diad pamayubo na maridios a debosyon?

◻ Panon mon bayuboan so maridios a debosyon diad nanagnap a sukat?